၁. ဝိဘင်္ဂဝါရော

ဟေတုပစ္စယော

၃၈. သုခါယ ဝေဒနာယ သမ္ပယုတ္တော ဓမ္မော သုခါယ ဝေဒနာယ သမ္ပယုတ္တဿ ဓမ္မဿ ဟေတုပစ္စယေန ပစ္စယော – သုခါယ ဝေဒနာယ သမ္ပယုတ္တာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော၊ ပဋိသန္ဓိက္ခဏေ သုခါယ ဝေဒနာယ သမ္ပယုတ္တာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော. (၁)

ဒုက္ခာယ ဝေဒနာယ သမ္ပယုတ္တော ဓမ္မော ဒုက္ခာယ ဝေဒနာယ သမ္ပယုတ္တဿ ဓမ္မဿ ဟေတုပစ္စယေန ပစ္စယော – ဒုက္ခာယ ဝေဒနာယ သမ္ပယုတ္တာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော. (၁)

အဒုက္ခမသုခါယ ဝေဒနာယ သမ္ပယုတ္တော ဓမ္မော အဒုက္ခမသုခါယ ဝေဒနာယ သမ္ပယုတ္တဿ ဓမ္မဿ ဟေတုပစ္စယေန ပစ္စယော – အဒုက္ခမသုခါယ ဝေဒနာယ သမ္ပယုတ္တာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော၊ ပဋိသန္ဓိက္ခဏေ အဒုက္ခမသုခါယ ဝေဒနာယ သမ္ပယုတ္တာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော. (၁)

အာရမ္မဏပစ္စယော

၃၉. သုခါယ ဝေဒနာယ သမ္ပယုတ္တော ဓမ္မော သုခါယ ဝေဒနာယ သမ္ပယုတ္တဿ ဓမ္မဿ အာရမ္မဏပစ္စယေန ပစ္စယော – သုခါယ ဝေဒနာယ သမ္ပယုတ္တေန စိတ္တေန ဒါနံ ဒတွာ၊ သီလံ သမာဒိယိတွာ၊ ဥပေါသထကမ္မံ ကတွာ သုခါယ ဝေဒနာယ သမ္ပယုတ္တေန စိတ္တေန ပစ္စဝေက္ခတိ. သုခါယ ဝေဒနာယ သမ္ပယုတ္တာ ဈာနာ ဝုဋ္ဌဟိတွာ၊ မဂ္ဂါ ဝုဋ္ဌဟိတွာ၊ ဖလာ ဝုဋ္ဌဟိတွာ သုခါယ ဝေဒနာယ သမ္ပယုတ္တေန စိတ္တေန ပစ္စဝေက္ခတိ. အရိယာ သုခါယ ဝေဒနာယ သမ္ပယုတ္တေန စိတ္တေန သုခါယ ဝေဒနာယ သမ္ပယုတ္တေ ပဟီနေ ကိလေသေ ပစ္စဝေက္ခန္တိ၊ ဝိက္ခမ္ဘိတေ ကိလေသေ ပစ္စဝေက္ခန္တိ၊ ပုဗ္ဗေ သမုဒါစိဏ္ဏေ ကိလေသေ ဇာနန္တိ. သုခါယ ဝေဒနာယ သမ္ပယုတ္တေ ခန္ဓေ သုခါယ ဝေဒနာယ သမ္ပယုတ္တေန စိတ္တေန အနိစ္စတော ဒုက္ခတော အနတ္တတော ဝိပဿတိ၊ အဿာဒေတိ အဘိနန္ဒတိ၊ တံ အာရဗ္ဘ သုခါယ ဝေဒနာယ သမ္ပယုတ္တော ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ သုခါယ ဝေဒနာယ သမ္ပယုတ္တေ ခန္ဓေ အာရဗ္ဘ သုခါယ ဝေဒနာယ သမ္ပယုတ္တာ ခန္ဓာ ဥပ္ပဇ္ဇန္တိ. (၁)

သုခါယ ဝေဒနာယ သမ္ပယုတ္တော ဓမ္မော ဒုက္ခာယ ဝေဒနာယ သမ္ပယုတ္တဿ ဓမ္မဿ အာရမ္မဏပစ္စယေန ပစ္စယော – သုခါယ ဝေဒနာယ သမ္ပယုတ္တေန စိတ္တေန ဒါနံ ဒတွာ၊ သီလံ သမာဒိယိတွာ၊ ဥပေါသထကမ္မံ ကတွာ ဝိပ္ပဋိသာရိဿ ဒေါမနဿံ ဥပ္ပဇ္ဇတိ. သုခါယ ဝေဒနာယ သမ္ပယုတ္တေ ဈာနေ ပရိဟီနေ ဝိပ္ပဋိသာရိဿ ဒေါမနဿံ ဥပ္ပဇ္ဇတိ. သုခါယ ဝေဒနာယ သမ္ပယုတ္တေ ခန္ဓေ အာရဗ္ဘ ဒုက္ခာယ ဝေဒနာယ သမ္ပယုတ္တာ ခန္ဓာ ဥပ္ပဇ္ဇန္တိ. (၂)

သုခါယ ဝေဒနာယ သမ္ပယုတ္တော ဓမ္မော အဒုက္ခမသုခါယ ဝေဒနာယ သမ္ပယုတ္တဿ ဓမ္မဿ အာရမ္မဏပစ္စယေန ပစ္စယော – သုခါယ ဝေဒနာယ သမ္ပယုတ္တေန စိတ္တေန ဒါနံ ဒတွာ၊ သီလံ သမာဒိယိတွာ၊ ဥပေါသထကမ္မံ ကတွာ အဒုက္ခမသုခါယ ဝေဒနာယ သမ္ပယုတ္တေန စိတ္တေန ပစ္စဝေက္ခတိ. သုခါယ ဝေဒနာယ သမ္ပယုတ္တာ ဈာနာ ဝုဋ္ဌဟိတွာ၊ မဂ္ဂါ ဝုဋ္ဌဟိတွာ၊ ဖလာ ဝုဋ္ဌဟိတွာ အဒုက္ခမသုခါယ ဝေဒနာယ သမ္ပယုတ္တေန စိတ္တေန ပစ္စဝေက္ခတိ. အရိယာ အဒုက္ခမသုခါယ ဝေဒနာယ သမ္ပယုတ္တေန စိတ္တေန သုခါယ ဝေဒနာယ သမ္ပယုတ္တေ ပဟီနေ ကိလေသေ ပစ္စဝေက္ခန္တိ၊ ဝိက္ခမ္ဘိတေ ကိလေသေ ပစ္စဝေက္ခန္တိ၊ ပုဗ္ဗေ သမုဒါစိဏ္ဏေ ကိလေသေ ဇာနန္တိ. သုခါယ ဝေဒနာယ သမ္ပယုတ္တေ ခန္ဓေ အဒုက္ခမသုခါယ ဝေဒနာယ သမ္ပယုတ္တေန စိတ္တေန အနိစ္စတော ဒုက္ခတော အနတ္တတော ဝိပဿတိ၊ အဿာဒေတိ အဘိနန္ဒတိ၊ တံ အာရဗ္ဘ အဒုက္ခမသုခါယ ဝေဒနာယ သမ္ပယုတ္တော ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ဝိစိကိစ္ဆာ ဥပ္ပဇ္ဇတိ၊ ဥဒ္ဓစ္စံ ဥပ္ပဇ္ဇတိ၊ စေတောပရိယဉာဏေန သုခါယ ဝေဒနာယ သမ္ပယုတ္တစိတ္တသမင်္ဂိဿ စိတ္တံ ဇာနာတိ. သုခါယ ဝေဒနာယ သမ္ပယုတ္တာ ခန္ဓာ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. သုခါယ ဝေဒနာယ သမ္ပယုတ္တေ ခန္ဓေ အာရဗ္ဘ အဒုက္ခမသုခါယ ဝေဒနာယ သမ္ပယုတ္တာ ခန္ဓာ ဥပ္ပဇ္ဇန္တိ. (၃)

၄၀. ဒုက္ခာယ ဝေဒနာယ သမ္ပယုတ္တော ဓမ္မော ဒုက္ခာယ ဝေဒနာယ သမ္ပယုတ္တဿ ဓမ္မဿ အာရမ္မဏပစ္စယေန ပစ္စယော – ဒေါသံ အာရဗ္ဘ ဒေါသော ဥပ္ပဇ္ဇတိ၊ မောဟော ဥပ္ပဇ္ဇတိ၊ ဒုက္ခာယ ဝေဒနာယ သမ္ပယုတ္တံ မောဟံ အာရဗ္ဘ မောဟော ဥပ္ပဇ္ဇတိ၊ ဒေါသော ဥပ္ပဇ္ဇတိ၊ ဒုက္ခသဟဂတံ ကာယဝိညာဏံ အာရဗ္ဘ ဒေါသော ဥပ္ပဇ္ဇတိ၊ မောဟော ဥပ္ပဇ္ဇတိ၊ ဒုက္ခာယ ဝေဒနာယ သမ္ပယုတ္တေ ခန္ဓေ အာရဗ္ဘ ဒုက္ခာယ ဝေဒနာယ သမ္ပယုတ္တာ ခန္ဓာ ဥပ္ပဇ္ဇန္တိ. (၁)

ဒုက္ခာယ ဝေဒနာယ သမ္ပယုတ္တော ဓမ္မော သုခါယ ဝေဒနာယ သမ္ပယုတ္တဿ ဓမ္မဿ အာရမ္မဏပစ္စယေန ပစ္စယော – အရိယာ သုခါယ ဝေဒနာယ သမ္ပယုတ္တေန စိတ္တေန ဒုက္ခာယ ဝေဒနာယ သမ္ပယုတ္တေ ပဟီနေ ကိလေသေ ပစ္စဝေက္ခန္တိ၊ ဝိက္ခမ္ဘိတေ ကိလေသေ ပစ္စဝေက္ခန္တိ၊ ပုဗ္ဗေ သမုဒါစိဏ္ဏေ ကိလေသေ ဇာနန္တိ. ဒုက္ခာယ ဝေဒနာယ သမ္ပယုတ္တေ ခန္ဓေ သုခါယ ဝေဒနာယ သမ္ပယုတ္တေန စိတ္တေန အနိစ္စတော ဒုက္ခတော အနတ္တတော ဝိပဿတိ၊ ဒုက္ခာယ ဝေဒနာယ သမ္ပယုတ္တေ ခန္ဓေ အာရဗ္ဘ သုခါယ ဝေဒနာယ သမ္ပယုတ္တာ ခန္ဓာ ဥပ္ပဇ္ဇန္တိ. (၂)

ဒုက္ခာယ ဝေဒနာယ သမ္ပယုတ္တော ဓမ္မော အဒုက္ခမသုခါယ ဝေဒနာယ သမ္ပယုတ္တဿ ဓမ္မဿ အာရမ္မဏပစ္စယေန ပစ္စယော – အရိယာ အဒုက္ခမသုခါယ ဝေဒနာယ သမ္ပယုတ္တေန စိတ္တေန ဒုက္ခာယ ဝေဒနာယ သမ္ပယုတ္တေ ပဟီနေ ကိလေသေ ပစ္စဝေက္ခန္တိ၊ ဝိက္ခမ္ဘိတေ ကိလေသေ ပစ္စဝေက္ခန္တိ၊ ပုဗ္ဗေ သမုဒါစိဏ္ဏေ ကိလေသေ ဇာနန္တိ. ဒုက္ခာယ ဝေဒနာယ သမ္ပယုတ္တေ ခန္ဓေ အဒုက္ခမသုခါယ ဝေဒနာယ သမ္ပယုတ္တေန စိတ္တေန အနိစ္စတော ဒုက္ခတော အနတ္တတော ဝိပဿတိ၊ စေတောပရိယဉာဏေန ဒုက္ခာယ ဝေဒနာယ သမ္ပယုတ္တစိတ္တသမင်္ဂိဿ စိတ္တံ ဇာနန္တိ. ဒုက္ခာယ ဝေဒနာယ သမ္ပယုတ္တာ ခန္ဓာ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော – ဒုက္ခာယ ဝေဒနာယ သမ္ပယုတ္တေ ခန္ဓေ အာရဗ္ဘ အဒုက္ခမသုခါယ ဝေဒနာယ သမ္ပယုတ္တာ ခန္ဓာ ဥပ္ပဇ္ဇန္တိ. (၃)

၄၁. အဒုက္ခမသုခါယ ဝေဒနာယ သမ္ပယုတ္တော ဓမ္မော အဒုက္ခမသုခါယ ဝေဒနာယ သမ္ပယုတ္တဿ ဓမ္မဿ အာရမ္မဏပစ္စယေန ပစ္စယော – အဒုက္ခမသုခါယ ဝေဒနာယ သမ္ပယုတ္တေန စိတ္တေန ဒါနံ ဒတွာ၊ သီလံ သမာဒိယိတွာ၊ ဥပေါသထကမ္မံ ကတွာ အဒုက္ခမသုခါယ ဝေဒနာယ သမ္ပယုတ္တေန စိတ္တေန ပစ္စဝေက္ခတိ. အဒုက္ခမသုခါယ ဝေဒနာယ သမ္ပယုတ္တာ ဈာနာ ဝုဋ္ဌဟိတွာ၊ မဂ္ဂါ ဝုဋ္ဌဟိတွာ၊ ဖလာ ဝုဋ္ဌဟိတွာ အဒုက္ခမသုခါယ ဝေဒနာယ သမ္ပယုတ္တေန စိတ္တေန ပစ္စဝေက္ခတိ၊ အရိယာ အဒုက္ခမသုခါယ ဝေဒနာယ သမ္ပယုတ္တေန စိတ္တေန အဒုက္ခမသုခါယ ဝေဒနာယ သမ္ပယုတ္တေ ပဟီနေ ကိလေသေ ပစ္စဝေက္ခန္တိ၊ ဝိက္ခမ္ဘိတေ ကိလေသေ ပစ္စဝေက္ခန္တိ၊ ပုဗ္ဗေ သမုဒါစိဏ္ဏေ ကိလေသေ ဇာနန္တိ. အဒုက္ခမသုခါယ ဝေဒနာယ သမ္ပယုတ္တေ ခန္ဓေ အဒုက္ခမသုခါယ ဝေဒနာယ သမ္ပယုတ္တေန စိတ္တေန အနိစ္စတော ဒုက္ခတော အနတ္တတော ဝိပဿတိ၊ အဿာဒေတိ အဘိနန္ဒတိ၊ တံ အာရဗ္ဘ အဒုက္ခမသုခါယ ဝေဒနာယ သမ္ပယုတ္တော ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ဝိစိကိစ္ဆာ ဥပ္ပဇ္ဇတိ၊ ဥဒ္ဓစ္စံ ဥပ္ပဇ္ဇတိ၊ စေတောပရိယဉာဏေန အဒုက္ခမသုခါယ ဝေဒနာယ သမ္ပယုတ္တစိတ္တသမင်္ဂိဿ စိတ္တံ ဇာနန္တိ. အာကာသာနဉ္စာယတနံ ဝိညာဏဉ္စာယတနဿ အာရမ္မဏပစ္စယေန ပစ္စယော. အာကိဉ္စညာယတနံ နေဝသညာနာသညာယတနဿ အာရမ္မဏပစ္စယေန ပစ္စယော. အဒုက္ခမသုခါယ ဝေဒနာယ သမ္ပယုတ္တာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ အာဝဇ္ဇနာယ အာရမ္မဏပစ္စယေန ပစ္စယော. အဒုက္ခမသုခါယ ဝေဒနာယ သမ္ပယုတ္တေ ခန္ဓေ အာရဗ္ဘ အဒုက္ခမသုခါယ ဝေဒနာယ သမ္ပယုတ္တာ ခန္ဓာ ဥပ္ပဇ္ဇန္တိ. (၁)

အဒုက္ခမသုခါယ ဝေဒနာယ သမ္ပယုတ္တော ဓမ္မော သုခါယ ဝေဒနာယ သမ္ပယုတ္တဿ ဓမ္မဿ အာရမ္မဏပစ္စယေန ပစ္စယော – အဒုက္ခမသုခါယ ဝေဒနာယ သမ္ပယုတ္တေန စိတ္တေန ဒါနံ ဒတွာ၊ သီလံ သမာဒိယိတွာ၊ ဥပေါသထကမ္မံ ကတွာ သုခါယ ဝေဒနာယ သမ္ပယုတ္တေန စိတ္တေန ပစ္စဝေက္ခတိ. အဒုက္ခမသုခါယ ဝေဒနာယ သမ္ပယုတ္တာ ဈာနာ ဝုဋ္ဌဟိတွာ၊ မဂ္ဂါ ဝုဋ္ဌဟိတွာ၊ ဖလာ ဝုဋ္ဌဟိတွာ သုခါယ ဝေဒနာယ သမ္ပယုတ္တေန စိတ္တေန ပစ္စဝေက္ခတိ. အရိယာ သုခါယ ဝေဒနာယ သမ္ပယုတ္တေန စိတ္တေန အဒုက္ခမသုခါယ ဝေဒနာယ သမ္ပယုတ္တေ ပဟီနေ ကိလေသေ ပစ္စဝေက္ခန္တိ၊ ဝိက္ခမ္ဘိတေ ကိလေသေ ပစ္စဝေက္ခန္တိ၊ ပုဗ္ဗေ သမုဒါစိဏ္ဏေ ကိလေသေ ဇာနန္တိ. အဒုက္ခမသုခါယ ဝေဒနာယ သမ္ပယုတ္တေ ခန္ဓေ သုခါယ ဝေဒနာယ သမ္ပယုတ္တေန စိတ္တေန အနိစ္စတော ဒုက္ခတော အနတ္တတော ဝိပဿတိ၊ အဿာဒေတိ အဘိနန္ဒတိ၊ တံ အာရဗ္ဘ သုခါယ ဝေဒနာယ သမ္ပယုတ္တော ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ အဒုက္ခမသုခါယ ဝေဒနာယ သမ္ပယုတ္တေ ခန္ဓေ အာရဗ္ဘ သုခါယ ဝေဒနာယ သမ္ပယုတ္တာ ခန္ဓာ ဥပ္ပဇ္ဇန္တိ. (၂)

အဒုက္ခမသုခါယ ဝေဒနာယ သမ္ပယုတ္တော ဓမ္မော ဒုက္ခာယ ဝေဒနာယ သမ္ပယုတ္တဿ ဓမ္မဿ အာရမ္မဏပစ္စယေန ပစ္စယော – အဒုက္ခမသုခါယ ဝေဒနာယ သမ္ပယုတ္တေန စိတ္တေန ဒါနံ ဒတွာ၊ သီလံ သမာဒိယိတွာ၊ ဥပေါသထကမ္မံ ကတွာ ဝိပ္ပဋိသာရိဿ ဒေါမနဿံ ဥပ္ပဇ္ဇတိ၊ အဒုက္ခမသုခါယ ဝေဒနာယ သမ္ပယုတ္တေ ဈာနေ ပရိဟီနေ ဝိပ္ပဋိသာရိဿ ဒေါမနဿံ ဥပ္ပဇ္ဇတိ၊ အဒုက္ခမသုခါယ ဝေဒနာယ သမ္ပယုတ္တေ ခန္ဓေ အာရဗ္ဘ ဒုက္ခာယ ဝေဒနာယ သမ္ပယုတ္တာ ခန္ဓာ ဥပ္ပဇ္ဇန္တိ. (၃)

အဓိပတိပစ္စယော

၄၂. သုခါယ ဝေဒနာယ သမ္ပယုတ္တော ဓမ္မော သုခါယ ဝေဒနာယ သမ္ပယုတ္တဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ.

အာရမ္မဏာဓိပတိ – သုခါယ ဝေဒနာယ သမ္ပယုတ္တေန စိတ္တေန ဒါနံ ဒတွာ၊ သီလံ သမာဒိယိတွာ၊ ဥပေါသထကမ္မံ ကတွာ သုခါယ ဝေဒနာယ သမ္ပယုတ္တေန စိတ္တေန တံ ဂရုံ ကတွာ ပစ္စဝေက္ခတိ. သုခါယ ဝေဒနာယ သမ္ပယုတ္တာ ဈာနာ ဝုဋ္ဌဟိတွာ၊ မဂ္ဂါ ဝုဋ္ဌဟိတွာ၊ ဖလာ ဝုဋ္ဌဟိတွာ သုခါယ ဝေဒနာယ သမ္ပယုတ္တေန စိတ္တေန တံ ဂရုံ ကတွာ ပစ္စဝေက္ခတိ. သုခါယ ဝေဒနာယ သမ္ပယုတ္တေ ခန္ဓေ သုခါယ ဝေဒနာယ သမ္ပယုတ္တေန စိတ္တေန ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ သုခါယ ဝေဒနာယ သမ္ပယုတ္တော ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ.

သဟဇာတာဓိပတိ – သုခါယ ဝေဒနာယ သမ္ပယုတ္တာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော. (၁)

သုခါယ ဝေဒနာယ သမ္ပယုတ္တော ဓမ္မော အဒုက္ခမသုခါယ ဝေဒနာယ သမ္ပယုတ္တဿ ဓမ္မဿ အဓိပတိပစ္စယေန ပစ္စယော.

အာရမ္မဏာဓိပတိ – သုခါယ ဝေဒနာယ သမ္ပယုတ္တေန စိတ္တေန ဒါနံ ဒတွာ၊ သီလံ သမာဒိယိတွာ၊ ဥပေါသထကမ္မံ ကတွာ အဒုက္ခမသုခါယ ဝေဒနာယ သမ္ပယုတ္တေန စိတ္တေန တံ ဂရုံ ကတွာ ပစ္စဝေက္ခတိ. သုခါယ ဝေဒနာယ သမ္ပယုတ္တာ ဈာနာ ဝုဋ္ဌဟိတွာ၊ မဂ္ဂါ ဝုဋ္ဌဟိတွာ၊ ဖလာ ဝုဋ္ဌဟိတွာ အဒုက္ခမသုခါယ ဝေဒနာယ သမ္ပယုတ္တေန စိတ္တေန တံ ဂရုံ ကတွာ ပစ္စဝေက္ခတိ. သုခါယ ဝေဒနာယ သမ္ပယုတ္တေ ခန္ဓေ အဒုက္ခမသုခါယ ဝေဒနာယ သမ္ပယုတ္တေန စိတ္တေန ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ အဒုက္ခမသုခါယ ဝေဒနာယ သမ္ပယုတ္တော ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. (၂)

၄၃. ဒုက္ခာယ ဝေဒနာယ သမ္ပယုတ္တော ဓမ္မော ဒုက္ခာယ ဝေဒနာယ သမ္ပယုတ္တဿ ဓမ္မဿ အဓိပတိပစ္စယေန ပစ္စယော.

သဟဇာတာဓိပတိ – ဒုက္ခာယ ဝေဒနာယ သမ္ပယုတ္တာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော. (၁)

၄၄. အဒုက္ခမသုခါယ ဝေဒနာယ သမ္ပယုတ္တော ဓမ္မော အဒုက္ခမသုခါယ ဝေဒနာယ သမ္ပယုတ္တဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ.

အာရမ္မဏာဓိပတိ – အဒုက္ခမသုခါယ ဝေဒနာယ သမ္ပယုတ္တေန စိတ္တေန ဒါနံ ဒတွာ၊ သီလံ သမာဒိယိတွာ၊ ဥပေါသထကမ္မံ ကတွာ အဒုက္ခမသုခါယ ဝေဒနာယ သမ္ပယုတ္တေန စိတ္တေန တံ ဂရုံ ကတွာ ပစ္စဝေက္ခတိ. အဒုက္ခမသုခါယ ဝေဒနာယ သမ္ပယုတ္တာ ဈာနာ ဝုဋ္ဌဟိတွာ၊ မဂ္ဂါ ဝုဋ္ဌဟိတွာ၊ ဖလာ ဝုဋ္ဌဟိတွာ အဒုက္ခမသုခါယ ဝေဒနာယ သမ္ပယုတ္တေန စိတ္တေန တံ ဂရုံ ကတွာ ပစ္စဝေက္ခတိ. အဒုက္ခမသုခါယ ဝေဒနာယ သမ္ပယုတ္တေ ခန္ဓေ အဒုက္ခမသုခါယ ဝေဒနာယ သမ္ပယုတ္တေန စိတ္တေန ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ အဒုက္ခမသုခါယ ဝေဒနာယ သမ္ပယုတ္တော ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ.

သဟဇာတာဓိပတိ – အဒုက္ခမသုခါယ ဝေဒနာယ သမ္ပယုတ္တာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော. (၁)

အဒုက္ခမသုခါယ ဝေဒနာယ သမ္ပယုတ္တော ဓမ္မော သုခါယ ဝေဒနာယ သမ္ပယုတ္တဿ ဓမ္မဿ အဓိပတိပစ္စယေန ပစ္စယော.

အာရမ္မဏာဓိပတိ – အဒုက္ခမသုခါယ ဝေဒနာယ သမ္ပယုတ္တေန စိတ္တေန ဒါနံ ဒတွာ၊ သီလံ သမာဒိယိတွာ၊ ဥပေါသထကမ္မံ ကတွာ သုခါယ ဝေဒနာယ သမ္ပယုတ္တေန စိတ္တေန တံ ဂရုံ ကတွာ ပစ္စဝေက္ခတိ. အဒုက္ခမသုခါယ ဝေဒနာယ သမ္ပယုတ္တာ ဈာနာ ဝုဋ္ဌဟိတွာ၊ မဂ္ဂါ ဝုဋ္ဌဟိတွာ၊ ဖလာ ဝုဋ္ဌဟိတွာ သုခါယ ဝေဒနာယ သမ္ပယုတ္တေန စိတ္တေန တံ ဂရုံ ကတွာ ပစ္စဝေက္ခတိ. အဒုက္ခမသုခါယ ဝေဒနာယ သမ္ပယုတ္တေ ခန္ဓေ သုခါယ ဝေဒနာယ သမ္ပယုတ္တေန စိတ္တေန ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ သုခါယ ဝေဒနာယ သမ္ပယုတ္တော ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. (၂)

အနန္တရပစ္စယော

၄၅. သုခါယ ဝေဒနာယ သမ္ပယုတ္တော ဓမ္မော သုခါယ ဝေဒနာယ သမ္ပယုတ္တဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ သုခါယ ဝေဒနာယ သမ္ပယုတ္တာ ခန္ဓာ ပစ္ဆိမာနံ ပစ္ဆိမာနံ သုခါယ ဝေဒနာယ သမ္ပယုတ္တကာနံ ခန္ဓာနံ အနန္တရပစ္စယေန ပစ္စယော. သုခါယ ဝေဒနာယ သမ္ပယုတ္တံ အနုလောမံ သုခါယ ဝေဒနာယ သမ္ပယုတ္တဿ ဂေါတြဘုဿ အနန္တရပစ္စယေန ပစ္စယော၊ အနုလောမံ ဝေါဒါနဿ။ ဂေါတြဘု မဂ္ဂဿ။ ဝေါဒါနံ မဂ္ဂဿ။ မဂ္ဂေါ ဖလဿ။ ဖလံ ဖလဿ။ အနုလောမံ သုခါယ ဝေဒနာယ သမ္ပယုတ္တာယ ဖလသမာပတ္တိယာ အနန္တရပစ္စယေန ပစ္စယော. သုခါယ ဝေဒနာယ သမ္ပယုတ္တာ ခန္ဓာ သုခါယ ဝေဒနာယ သမ္ပယုတ္တဿ ဝုဋ္ဌာနဿ အနန္တရပစ္စယေန ပစ္စယော. (၁)

သုခါယ ဝေဒနာယ သမ္ပယုတ္တော ဓမ္မော အဒုက္ခမသုခါယ ဝေဒနာယ သမ္ပယုတ္တဿ ဓမ္မဿ အနန္တရပစ္စယေန ပစ္စယော – သုခါယ ဝေဒနာယ သမ္ပယုတ္တံ စုတိစိတ္တံ အဒုက္ခမသုခါယ ဝေဒနာယ သမ္ပယုတ္တဿ ဥပပတ္တိစိတ္တဿ အနန္တရပစ္စယေန ပစ္စယော. သုခါယ ဝေဒနာယ သမ္ပယုတ္တံ ဘဝင်္ဂံ အာဝဇ္ဇနာယ အနန္တရပစ္စယေန ပစ္စယော. သုခသဟဂတံ ကာယဝိညာဏံ ဝိပါကမနောဓာတုယာ အနန္တရပစ္စယေန ပစ္စယော. သုခါယ ဝေဒနာယ သမ္ပယုတ္တာ ဝိပါကမနောဝိညာဏဓာတု ကိရိယမနောဝိညာဏဓာတုယာ အနန္တရပစ္စယေန ပစ္စယော. သုခါယ ဝေဒနာယ သမ္ပယုတ္တံ ဘဝင်္ဂံ အဒုက္ခမသုခါယ ဝေဒနာယ သမ္ပယုတ္တဿ ဘဝင်္ဂဿ အနန္တရပစ္စယေန ပစ္စယော. သုခါယ ဝေဒနာယ သမ္ပယုတ္တံ ကုသလာကုသလံ အဒုက္ခမသုခါယ ဝေဒနာယ သမ္ပယုတ္တဿ ဝုဋ္ဌာနဿ။ ကိရိယံ ဝုဋ္ဌာနဿ။ ဖလံ ဝုဋ္ဌာနဿ အနန္တရပစ္စယေန ပစ္စယော. (၂)

၄၆. ဒုက္ခာယ ဝေဒနာယ သမ္ပယုတ္တော ဓမ္မော ဒုက္ခာယ ဝေဒနာယ သမ္ပယုတ္တဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ဒုက္ခာယ ဝေဒနာယ သမ္ပယုတ္တာ ခန္ဓာ ပစ္ဆိမာနံ ပစ္ဆိမာနံ ဒုက္ခာယ ဝေဒနာယ သမ္ပယုတ္တကာနံ ခန္ဓာနံ အနန္တရပစ္စယေန ပစ္စယော. (၁)

ဒုက္ခာယ ဝေဒနာယ သမ္ပယုတ္တော ဓမ္မော အဒုက္ခမသုခါယ ဝေဒနာယ သမ္ပယုတ္တဿ ဓမ္မဿ အနန္တရပစ္စယေန ပစ္စယော – ဒုက္ခသဟဂတံ ကာယဝိညာဏံ ဝိပါကမနောဓာတုယာ အနန္တရပစ္စယေန ပစ္စယော. ဒုက္ခာယ ဝေဒနာယ သမ္ပယုတ္တာ ခန္ဓာ အဒုက္ခမသုခါယ ဝေဒနာယ သမ္ပယုတ္တဿ ဝုဋ္ဌာနဿ အနန္တရပစ္စယေန ပစ္စယော. (၂)

၄၇. အဒုက္ခမသုခါယ ဝေဒနာယ သမ္ပယုတ္တော ဓမ္မော အဒုက္ခမသုခါယ ဝေဒနာယ သမ္ပယုတ္တဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ အဒုက္ခမသုခါယ ဝေဒနာယ သမ္ပယုတ္တာ ခန္ဓာ ပစ္ဆိမာနံ ပစ္ဆိမာနံ အဒုက္ခမသုခါယ ဝေဒနာယ သမ္ပယုတ္တကာနံ ခန္ဓာနံ အနန္တရပစ္စယေန ပစ္စယော. အဒုက္ခမသုခါယ ဝေဒနာယ သမ္ပယုတ္တံ အနုလောမံ အဒုက္ခမသုခါယ ဝေဒနာယ သမ္ပယုတ္တဿ ဂေါတြဘုဿ အနန္တရပစ္စယေန ပစ္စယော. အနုလောမံ ဝေါဒါနဿ။ ဂေါတြဘု မဂ္ဂဿ။ ဝေါဒါနံ မဂ္ဂဿ။ မဂ္ဂေါ ဖလဿ။ ဖလံ ဖလဿ။ အနုလောမံ ဖလသမာပတ္တိယာ။ နိရောဓာ ဝုဋ္ဌဟန္တဿ နေဝသညာနာသညာယတနံ အဒုက္ခမသုခါယ ဝေဒနာယ သမ္ပယုတ္တာယ ဖလသမာပတ္တိယာ အနန္တရပစ္စယေန ပစ္စယော. အဒုက္ခမသုခါယ ဝေဒနာယ သမ္ပယုတ္တာ ခန္ဓာ အဒုက္ခမသုခါယ ဝေဒနာယ သမ္ပယုတ္တဿ ဝုဋ္ဌာနဿ အနန္တရပစ္စယေန ပစ္စယော. (၁)

အဒုက္ခမသုခါယ ဝေဒနာယ သမ္ပယုတ္တော ဓမ္မော သုခါယ ဝေဒနာယ သမ္ပယုတ္တဿ ဓမ္မဿ အနန္တရပစ္စယေန ပစ္စယော – အဒုက္ခမသုခါယ ဝေဒနာယ သမ္ပယုတ္တံ စုတိစိတ္တံ သုခါယ ဝေဒနာယ သမ္ပယုတ္တဿ ဥပပတ္တိစိတ္တဿ အနန္တရပစ္စယေန ပစ္စယော. အာဝဇ္ဇနာ သုခါယ ဝေဒနာယ သမ္ပယုတ္တကာနံ ခန္ဓာနံ အနန္တရပစ္စယေန ပစ္စယော. ဝိပါကမနောဓာတု သုခါယ ဝေဒနာယ သမ္ပယုတ္တာယ ဝိပါကမနောဝိညာဏဓာတုယာ အနန္တရပစ္စယေန ပစ္စယော. အဒုက္ခမသုခါယ ဝေဒနာယ သမ္ပယုတ္တံ ဘဝင်္ဂံ သုခါယ ဝေဒနာယ သမ္ပယုတ္တဿ ဘဝင်္ဂဿ အနန္တရပစ္စယေန ပစ္စယော. အဒုက္ခမသုခါယ ဝေဒနာယ သမ္ပယုတ္တံ ကုသလာကုသလံ သုခါယ ဝေဒနာယ သမ္ပယုတ္တဿ ဝုဋ္ဌာနဿ။ ကိရိယံ ဝုဋ္ဌာနဿ။ ဖလံ ဝုဋ္ဌာနဿ။ နိရောဓာ ဝုဋ္ဌဟန္တဿ နေဝသညာနာသညာယတနံ သုခါယ ဝေဒနာယ သမ္ပယုတ္တာယ ဖလသမာပတ္တိယာ အနန္တရပစ္စယေန ပစ္စယော. (၂)

အဒုက္ခမသုခါယ ဝေဒနာယ သမ္ပယုတ္တော ဓမ္မော ဒုက္ခာယ ဝေဒနာယ သမ္ပယုတ္တဿ ဓမ္မဿ အနန္တရပစ္စယေန ပစ္စယော – အာဝဇ္ဇနာ ဒုက္ခာယ ဝေဒနာယ သမ္ပယုတ္တကာနံ ခန္ဓာနံ အနန္တရပစ္စယေန ပစ္စယော. (၃)

သမနန္တရပစ္စယော

၄၈. သုခါယ ဝေဒနာယ သမ္ပယုတ္တော ဓမ္မော သုခါယ ဝေဒနာယ သမ္ပယုတ္တဿ ဓမ္မဿ သမနန္တရပစ္စယေန ပစ္စယော (အနန္တရပစ္စယသဒိသံ).

သဟဇာတပစ္စယော

၄၉. သုခါယ ဝေဒနာယ သမ္ပယုတ္တော ဓမ္မော သုခါယ ဝေဒနာယ သမ္ပယုတ္တဿ ဓမ္မဿ သဟဇာတပစ္စယေန ပစ္စယော – သုခါယ ဝေဒနာယ သမ္ပယုတ္တော ဧကော ခန္ဓော ဒွိန္နံ ခန္ဓာနံ သဟဇာတပစ္စယေန ပစ္စယော. ဒွေ ခန္ဓာ ဧကဿ ခန္ဓဿ သဟဇာတပစ္စယေန ပစ္စယော. ပဋိသန္ဓိက္ခဏေ သုခါယ ဝေဒနာယ သမ္ပယုတ္တော ဧကော ခန္ဓော ဒွိန္နံ ခန္ဓာနံ သဟဇာတပစ္စယေန ပစ္စယော. ဒွေ ခန္ဓာ ဧကဿ ခန္ဓဿ သဟဇာတပစ္စယေန ပစ္စယော. (၁)

၅၀. ဒုက္ခာယ ဝေဒနာယ သမ္ပယုတ္တော ဓမ္မော ဒုက္ခာယ ဝေဒနာယ သမ္ပယုတ္တဿ ဓမ္မဿ သဟဇာတပစ္စယေန ပစ္စယော – ဒုက္ခာယ ဝေဒနာယ သမ္ပယုတ္တော ဧကော ခန္ဓော ဒွိန္နံ ခန္ဓာနံ သဟဇာတပစ္စယေန ပစ္စယော. ဒွေ ခန္ဓာ ဧကဿ ခန္ဓဿ သဟဇာတပစ္စယေန ပစ္စယော. (ဒုက္ခာယ ဝေဒနာယ သမ္ပယုတ္တပဋိသန္ဓိ န လဗ္ဘတိ.) (၁)

၅၁. အဒုက္ခမသုခါယ ဝေဒနာယ သမ္ပယုတ္တော ဓမ္မော အဒုက္ခမသုခါယ ဝေဒနာယ သမ္ပယုတ္တဿ ဓမ္မဿ သဟဇာတပစ္စယေန ပစ္စယော – အဒုက္ခမသုခါယ ဝေဒနာယ သမ္ပယုတ္တော ဧကော ခန္ဓော ဒွိန္နံ ခန္ဓာနံ သဟဇာတပစ္စယေန ပစ္စယော. ဒွေ ခန္ဓာ ဧကဿ ခန္ဓဿ သဟဇာတပစ္စယေန ပစ္စယော. ပဋိသန္ဓိက္ခဏေ အဒုက္ခမသုခါယ ဝေဒနာယ သမ္ပယုတ္တော ဧကော ခန္ဓော ဒွိန္နံ ခန္ဓာနံ သဟဇာတပစ္စယေန ပစ္စယော. ဒွေ ခန္ဓာ ဧကဿ ခန္ဓဿ သဟဇာတပစ္စယေန ပစ္စယော. (၁)

အညမည-နိဿယပစ္စယာ

၅၂. သုခါယ ဝေဒနာယ သမ္ပယုတ္တော ဓမ္မော သုခါယ ဝေဒနာယ သမ္ပယုတ္တဿ ဓမ္မဿ အညမညပစ္စယေန ပစ္စယော။ နိဿယပစ္စယေန ပစ္စယော (အညမညမ္ပိ နိဿယမ္ပိ သဟဇာတပစ္စယသဒိသံ).

ဥပနိဿယပစ္စယော

၅၃. သုခါယ ဝေဒနာယ သမ္ပယုတ္တော ဓမ္မော သုခါယ ဝေဒနာယ သမ္ပယုတ္တဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။.

ပကတူပနိဿယော – သုခါယ ဝေဒနာယ သမ္ပယုတ္တံ သဒ္ဓံ ဥပနိဿာယ သုခါယ ဝေဒနာယ သမ္ပယုတ္တေန စိတ္တေန ဒါနံ ဒေတိ၊ သီလံ သမာဒိယတိ၊ ဥပေါသထကမ္မံ ကရောတိ၊ သုခါယ ဝေဒနာယ သမ္ပယုတ္တံ ဈာနံ ဥပ္ပါဒေတိ၊ ဝိပဿနံ ဥပ္ပါဒေတိ၊ မဂ္ဂံ ဥပ္ပါဒေတိ၊ သမာပတ္တိံ ဥပ္ပါဒေတိ၊ မာနံ ဇပ္ပေတိ၊ ဒိဋ္ဌိံ ဂဏှာတိ. သုခါယ ဝေဒနာယ သမ္ပယုတ္တံ သီလံ။ သုတံ။ စာဂံ။ ပညံ။ ရာဂံ။ မောဟံ။ မာနံ။ ဒိဋ္ဌိံ။ ပတ္ထနံ။ သုခသဟဂတံ ကာယဝိညာဏံ ဥပနိဿာယ သုခါယ ဝေဒနာယ သမ္ပယုတ္တေန စိတ္တေန ဒါနံ ဒေတိ။ပေ။ သမာပတ္တိံ ဥပ္ပါဒေတိ (သဒ္ဓါပဉ္စမကေသု ‘‘မာနံ ဇပ္ပေတိ၊ ဒိဋ္ဌိံ ဂဏှာတီ’’တိ ကာတဗ္ဗံ၊ အဝသေသေသု န ကာတဗ္ဗံ). သုခါယ ဝေဒနာယ သမ္ပယုတ္တေန စိတ္တေန အဒိန္နံ အာဒိယတိ၊ မုသာ ဘဏတိ၊ ပိသုဏံ ဘဏတိ၊ သမ္ဖံ ပလပတိ၊ သန္ဓိံ ဆိန္ဒတိ၊ နိလ္လောပံ ဟရတိ၊ ဧကာဂါရိကံ ကရောတိ၊ ပရိပန္ထေ တိဋ္ဌတိ၊ ပရဒါရံ ဂစ္ဆတိ၊ ဂါမဃာတံ ကရောတိ၊ နိဂမဃာတံ ကရောတိ. သုခါယ ဝေဒနာယ သမ္ပယုတ္တာ သဒ္ဓါ။ သီလံ။ သုတံ။ စာဂေါ။ ပညာ။ ရာဂေါ။ မောဟော။ မာနော။ ဒိဋ္ဌိ။ ပတ္ထနာ။ သုခသဟဂတံ ကာယဝိညာဏံ သုခါယ ဝေဒနာယ သမ္ပယုတ္တာယ သဒ္ဓါယ။ သီလဿ။ သုတဿ။ စာဂဿ။ ပညာယ။ ရာဂဿ။ မောဟဿ။ မာနဿ။ ဒိဋ္ဌိယာ။ ပတ္ထနာယ။ သုခသဟဂတဿ ကာယဝိညာဏဿ။ သုခါယ ဝေဒနာယ သမ္ပယုတ္တကာနံ ခန္ဓာနံ ဥပနိဿယပစ္စယေန ပစ္စယော. (၁)

သုခါယ ဝေဒနာယ သမ္ပယုတ္တော ဓမ္မော ဒုက္ခာယ ဝေဒနာယ သမ္ပယုတ္တဿ ဓမ္မဿ ဥပနိဿယပစ္စယေန ပစ္စယော.

ပကတူပနိဿယော – သုခါယ ဝေဒနာယ သမ္ပယုတ္တံ သဒ္ဓံ ဥပနိဿာယ အတ္တာနံ အာတာပေတိ ပရိတာပေတိ၊ ပရိယိဋ္ဌိမူလကံ ဒုက္ခံ ပစ္စနုဘောတိ. သုခါယ ဝေဒနာယ သမ္ပယုတ္တံ သီလံ။ သုတံ။ စာဂံ။ ပညံ ဥပနိဿာယ အတ္တာနံ အာတာပေတိ ပရိတာပေတိ၊ ပရိယိဋ္ဌိမူလကံ ဒုက္ခံ ပစ္စနုဘောတိ. သုခါယ ဝေဒနာယ သမ္ပယုတ္တံ ရာဂံ။ မောဟံ။ မာနံ။ ဒိဋ္ဌိံ။ ပတ္ထနံ။ သုခသဟဂတံ ကာယဝိညာဏံ ဥပနိဿာယ ပါဏံ ဟနတိ. ဒုက္ခာယ ဝေဒနာယ သမ္ပယုတ္တေန စိတ္တေန အဒိန္နံ အာဒိယတိ၊ မုသာ ဘဏတိ၊ ပိသုဏံ ဘဏတိ၊ ဖရုသံ ဘဏတိ၊ သမ္ဖံ ပလပတိ၊ သန္ဓိံ ဆိန္ဒတိ၊ နိလ္လောပံ ဟရတိ၊ ဧကာဂါရိကံ ကရောတိ၊ ပရိပန္ထေ တိဋ္ဌတိ၊ ပရဒါရံ ဂစ္ဆတိ၊ ဂါမဃာတံ ကရောတိ၊ နိဂမဃာတံ ကရောတိ၊ မာတရံ ဇီဝိတာ ဝေါရောပေတိ၊ ပိတရံ ဇီဝိတာ ဝေါရောပေတိ၊ အရဟန္တံ ဇီဝိတာ ဝေါရောပေတိ၊ ဒုဋ္ဌေန စိတ္တေန တထာဂတဿ လောဟိတံ ဥပ္ပါဒေတိ၊ သံဃံ ဘိန္ဒတိ. သုခါယ ဝေဒနာယ သမ္ပယုတ္တာ သဒ္ဓါ။ သီလံ။ သုတံ။ စာဂေါ။ ပညာ။ ရာဂေါ။ မောဟော။ မာနော။ ဒိဋ္ဌိ။ ပတ္ထနာ။ သုခသဟဂတံ ကာယဝိညာဏံ ဒေါသဿ။ မောဟဿ။ ဒုက္ခသဟဂတဿ ကာယဝိညာဏဿ။ ဒုက္ခာယ ဝေဒနာယ သမ္ပယုတ္တကာနံ ခန္ဓာနံ ဥပနိဿယပစ္စယေန ပစ္စယော. (၂)

သုခါယ ဝေဒနာယ သမ္ပယုတ္တော ဓမ္မော အဒုက္ခမသုခါယ ဝေဒနာယ သမ္ပယုတ္တဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။.

ပကတူပနိဿယော – သုခါယ ဝေဒနာယ သမ္ပယုတ္တံ သဒ္ဓံ ဥပနိဿာယ အဒုက္ခမသုခါယ ဝေဒနာယ သမ္ပယုတ္တေန စိတ္တေန ဒါနံ ဒေတိ၊ သီလံ သမာဒိယတိ၊ ဥပေါသထကမ္မံ ကရောတိ၊ အဒုက္ခမသုခါယ ဝေဒနာယ သမ္ပယုတ္တံ ဈာနံ ဥပ္ပါဒေတိ၊ ဝိပဿနံ ဥပ္ပါဒေတိ၊ မဂ္ဂံ ဥပ္ပါဒေတိ၊ အဘိညံ ဥပ္ပါဒေတိ၊ သမာပတ္တိံ ဥပ္ပါဒေတိ၊ မာနံ ဇပ္ပေတိ၊ ဒိဋ္ဌိံ ဂဏှာတိ. သုခါယ ဝေဒနာယ သမ္ပယုတ္တံ သီလံ။ သုတံ။ စာဂံ။ ပညံ။ ရာဂံ။ မောဟံ။ မာနံ။ ဒိဋ္ဌိံ။ ပတ္ထနံ။ သုခသဟဂတံ ကာယဝိညာဏံ ဥပနိဿာယ အဒုက္ခမသုခါယ ဝေဒနာယ သမ္ပယုတ္တေန စိတ္တေန ဒါနံ ဒေတိ။ပေ။ သမာပတ္တိံ ဥပ္ပါဒေတိ. အဒုက္ခမသုခါယ ဝေဒနာယ သမ္ပယုတ္တေန စိတ္တေန အဒိန္နံ အာဒိယတိ၊ မုသာ ဘဏတိ၊ ပိသုဏံ ဘဏတိ၊ သမ္ဖံ ပလပတိ [ဖရုသံ ဘဏတိ၊ သမ္ဖံ ပလပတိ (သီ. သျာ.)]၊ သန္ဓိံ ဆိန္ဒတိ၊ နိလ္လောပံ ဟရတိ၊ ဧကာဂါရိကံ ကရောတိ၊ ပရိပန္ထေ တိဋ္ဌတိ၊ ပရဒါရံ ဂစ္ဆတိ၊ ဂါမဃာတံ ကရောတိ၊ နိဂမဃာတံ ကရောတိ. သုခါယ ဝေဒနာယ သမ္ပယုတ္တာ သဒ္ဓါ။ သီလံ။ သုတံ။ စာဂေါ။ ပညာ။ ရာဂေါ။ မောဟော။ မာနော။ ဒိဋ္ဌိ။ ပတ္ထနာ။ သုခသဟဂတံ ကာယဝိညာဏံ အဒုက္ခမသုခါယ ဝေဒနာယ သမ္ပယုတ္တာယ သဒ္ဓါယ။ သီလဿ။ သုတဿ။ စာဂဿ။ ပညာယ။ ရာဂဿ။ မောဟဿ။ မာနဿ။ ဒိဋ္ဌိယာ။ ပတ္ထနာယ။ အဒုက္ခမသုခါယ ဝေဒနာယ သမ္ပယုတ္တကာနံ ခန္ဓာနံ ဥပနိဿယပစ္စယေန ပစ္စယော. (၃)

၅၄. ဒုက္ခာယ ဝေဒနာယ သမ္ပယုတ္တော ဓမ္မော ဒုက္ခာယ ဝေဒနာယ သမ္ပယုတ္တဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ။.

ပကတူပနိဿယော – ဒေါသံ ဥပနိဿာယ ပါဏံ ဟနတိ၊ ဒုက္ခာယ ဝေဒနာယ သမ္ပယုတ္တေန စိတ္တေန အဒိန္နံ အာဒိယတိ။ပေ။ သံဃံ ဘိန္ဒတိ. မောဟံ၊ ဒုက္ခသဟဂတံ ကာယဝိညာဏံ ဥပနိဿာယ ပါဏံ ဟနတိ၊ ဒုက္ခာယ ဝေဒနာယ သမ္ပယုတ္တေန စိတ္တေန အဒိန္နံ အာဒိယတိ။ပေ။ သံဃံ ဘိန္ဒတိ. ဒေါသော။ မောဟော။ ဒုက္ခသဟဂတံ ကာယဝိညာဏံ ဒေါသဿ။ မောဟဿ။ ဒုက္ခသဟဂတဿ ကာယဝိညာဏဿ။ ဒုက္ခာယ ဝေဒနာယ သမ္ပယုတ္တကာနံ ခန္ဓာနံ ဥပနိဿယပစ္စယေန ပစ္စယော. (၁)

ဒုက္ခာယ ဝေဒနာယ သမ္ပယုတ္တော ဓမ္မော သုခါယ ဝေဒနာယ သမ္ပယုတ္တဿ ဓမ္မဿ ဥပနိဿယပစ္စယေန ပစ္စယော.

ပကတူပနိဿယော – ဒေါသံ ဥပနိဿာယ သုခါယ ဝေဒနာယ သမ္ပယုတ္တေန စိတ္တေန ဒါနံ ဒေတိ။ပေ။ သမာပတ္တိံ ဥပ္ပါဒေတိ. သုခါယ ဝေဒနာယ သမ္ပယုတ္တေန စိတ္တေန အဒိန္နံ အာဒိယတိ။ပေ။ နိဂမဃာတံ ကရောတိ. မောဟံ၊ ဒုက္ခသဟဂတံ ကာယဝိညာဏံ ဥပနိဿာယ သုခါယ ဝေဒနာယ သမ္ပယုတ္တေန စိတ္တေန ဒါနံ ဒေတိ။ပေ။ နိဂမဃာတံ ကရောတိ. ဒေါသော။ မောဟော။ ဒုက္ခသဟဂတံ ကာယဝိညာဏံ သုခါယ ဝေဒနာယ သမ္ပယုတ္တာယ သဒ္ဓါယ။ပေ။ သုခသဟဂတဿ ကာယဝိညာဏဿ သုခါယ ဝေဒနာယ သမ္ပယုတ္တကာနံ ခန္ဓာနံ ဥပနိဿယပစ္စယေန ပစ္စယော. (၂)

ဒုက္ခာယ ဝေဒနာယ သမ္ပယုတ္တော ဓမ္မော အဒုက္ခမသုခါယ ဝေဒနာယ သမ္ပယုတ္တဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ။.

ပကတူပနိဿယော – ဒေါသံ ဥပနိဿာယ အဒုက္ခမသုခါယ ဝေဒနာယ သမ္ပယုတ္တေန စိတ္တေန ဒါနံ ဒေတိ။ပေ။ နိဂမဃာတံ ကရောတိ. မောဟံ၊ ဒုက္ခသဟဂတံ ကာယဝိညာဏံ ဥပနိဿာယ အဒုက္ခမသုခါယ ဝေဒနာယ သမ္ပယုတ္တေန စိတ္တေန ဒါနံ ဒေတိ။ပေ။ နိဂမဃာတံ ကရောတိ. ဒေါသော။ မောဟော။ ဒုက္ခသဟဂတံ ကာယဝိညာဏံ အဒုက္ခမသုခါယ ဝေဒနာယ သမ္ပယုတ္တာယ သဒ္ဓါယ။ပေ။ ပတ္ထနာယ။ အဒုက္ခမသုခါယ ဝေဒနာယ သမ္ပယုတ္တကာနံ ခန္ဓာနံ ဥပနိဿယပစ္စယေန ပစ္စယော. (၃)

၅၅. အဒုက္ခမသုခါယ ဝေဒနာယ သမ္ပယုတ္တော ဓမ္မော အဒုက္ခမသုခါယ ဝေဒနာယ သမ္ပယုတ္တဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။.

ပကတူပနိဿယော – အဒုက္ခမသုခါယ ဝေဒနာယ သမ္ပယုတ္တံ သဒ္ဓံ ဥပနိဿာယ အဒုက္ခမသုခါယ ဝေဒနာယ သမ္ပယုတ္တေန စိတ္တေန ဒါနံ ဒေတိ။ပေ။ ဒိဋ္ဌိံ ဂဏှာတိ. အဒုက္ခမသုခါယ ဝေဒနာယ သမ္ပယုတ္တံ သီလံ။ သုတံ။ စာဂံ။ ပညံ။ ရာဂံ။ မောဟံ။ မာနံ။ ဒိဋ္ဌိံ။ ပတ္ထနံ ဥပနိဿာယ အဒုက္ခမသုခါယ ဝေဒနာယ သမ္ပယုတ္တေန စိတ္တေန ဒါနံ ဒေတိ။ပေ။ သမာပတ္တိံ ဥပ္ပါဒေတိ. အဒုက္ခမသုခါယ ဝေဒနာယ သမ္ပယုတ္တေန စိတ္တေန အဒိန္နံ အာဒိယတိ။ပေ။ နိဂမဃာတံ ကရောတိ. အဒုက္ခမသုခါယ ဝေဒနာယ သမ္ပယုတ္တာ သဒ္ဓါ။ သီလံ။ သုတံ။ စာဂေါ။ ပညာ။ ရာဂေါ။ မောဟော။ မာနော။ ဒိဋ္ဌိ။ ပတ္ထနာ။ အဒုက္ခမသုခါယ ဝေဒနာယ သမ္ပယုတ္တာယ သဒ္ဓါယ။ပေ။ ပတ္ထနာယ အဒုက္ခမသုခါယ ဝေဒနာယ သမ္ပယုတ္တကာနံ ခန္ဓာနံ ဥပနိဿယပစ္စယေန ပစ္စယော. (၁)

အဒုက္ခမသုခါယ ဝေဒနာယ သမ္ပယုတ္တော ဓမ္မော သုခါယ ဝေဒနာယ သမ္ပယုတ္တဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။.

ပကတူပနိဿယော – အဒုက္ခမသုခါယ ဝေဒနာယ သမ္ပယုတ္တံ သဒ္ဓံ ဥပနိဿာယ သုခါယ ဝေဒနာယ သမ္ပယုတ္တေန စိတ္တေန ဒါနံ ဒေတိ။ပေ။ ဒိဋ္ဌိံ ဂဏှာတိ. အဒုက္ခမသုခါယ ဝေဒနာယ သမ္ပယုတ္တံ သီလံ။ပေ။ ပတ္ထနံ ဥပနိဿာယ သုခါယ ဝေဒနာယ သမ္ပယုတ္တေန စိတ္တေန ဒါနံ ဒေတိ။ပေ။ သမာပတ္တိံ ဥပ္ပါဒေတိ. သုခါယ ဝေဒနာယ သမ္ပယုတ္တေန စိတ္တေန အဒိန္နံ အာဒိယတိ။ပေ။ နိဂမဃာတံ ကရောတိ. အဒုက္ခမသုခါယ ဝေဒနာယ သမ္ပယုတ္တာ သဒ္ဓါ။ပေ။ ပတ္ထနာ သုခါယ ဝေဒနာယ သမ္ပယုတ္တာယ သဒ္ဓါယ။ပေ။ ပတ္ထနာယ။ သုခသဟဂတဿ ကာယဝိညာဏဿ သုခါယ ဝေဒနာယ သမ္ပယုတ္တကာနံ ခန္ဓာနံ ဥပနိဿယပစ္စယေန ပစ္စယော. (၂)

အဒုက္ခမသုခါယ ဝေဒနာယ သမ္ပယုတ္တော ဓမ္မော ဒုက္ခာယ ဝေဒနာယ သမ္ပယုတ္တဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ။.

ပကတူပနိဿယော – အဒုက္ခမသုခါယ ဝေဒနာယ သမ္ပယုတ္တံ သဒ္ဓံ ဥပနိဿာယ အတ္တာနံ အာတာပေတိ ပရိတာပေတိ၊ ပရိယိဋ္ဌိမူလကံ ဒုက္ခံ ပစ္စနုဘောတိ. အဒုက္ခမသုခါယ ဝေဒနာယ သမ္ပယုတ္တံ သီလံ။ပေ။ ပတ္ထနံ ဥပနိဿာယ ပါဏံ ဟနတိ. ဒုက္ခာယ ဝေဒနာယ သမ္ပယုတ္တေန စိတ္တေန အဒိန္နံ အာဒိယတိ။ပေ။ သံဃံ ဘိန္ဒတိ. အဒုက္ခမသုခါယ ဝေဒနာယ သမ္ပယုတ္တာ သဒ္ဓါ။ပေ။ ပတ္ထနာ။ ဒေါသဿ။ မောဟဿ။ ဒုက္ခသဟဂတဿ ကာယဝိညာဏဿ။ ဒုက္ခာယ ဝေဒနာယ သမ္ပယုတ္တကာနံ ခန္ဓာနံ ဥပနိဿယပစ္စယေန ပစ္စယော. (၃)

အာသေဝနပစ္စယော

၅၆. သုခါယ ဝေဒနာယ သမ္ပယုတ္တော ဓမ္မော သုခါယ ဝေဒနာယ သမ္ပယုတ္တဿ ဓမ္မဿ အာသေဝနပစ္စယေန ပစ္စယော – ပုရိမာ ပုရိမာ သုခါယ ဝေဒနာယ သမ္ပယုတ္တာ ခန္ဓာ ပစ္ဆိမာနံ ပစ္ဆိမာနံ သုခါယ ဝေဒနာယ သမ္ပယုတ္တကာနံ ခန္ဓာနံ အာသေဝနပစ္စယေန ပစ္စယော. သုခါယ ဝေဒနာယ သမ္ပယုတ္တံ အနုလောမံ ဂေါတြဘုဿ။ အနုလောမံ ဝေါဒါနဿ။ ဂေါတြဘု မဂ္ဂဿ။ ဝေါဒါနံ မဂ္ဂဿ အာသေဝနပစ္စယေန ပစ္စယော. (၁)

ဒုက္ခာယ ဝေဒနာယ သမ္ပယုတ္တော ဓမ္မော ဒုက္ခာယ ဝေဒနာယ သမ္ပယုတ္တဿ ဓမ္မဿ အာသေဝနပစ္စယေန ပစ္စယော – ပုရိမာ ပုရိမာ ဒုက္ခာယ ဝေဒနာယ သမ္ပယုတ္တာ ခန္ဓာ ပစ္ဆိမာနံ ပစ္ဆိမာနံ ဒုက္ခာယ ဝေဒနာယ သမ္ပယုတ္တကာနံ ခန္ဓာနံ အာသေဝနပစ္စယေန ပစ္စယော. (၁)

အဒုက္ခမသုခါယ ဝေဒနာယ သမ္ပယုတ္တော ဓမ္မော အဒုက္ခမသုခါယ ဝေဒနာယ သမ္ပယုတ္တဿ ဓမ္မဿ အာသေဝနပစ္စယေန ပစ္စယော – ပုရိမာ ပုရိမာ အဒုက္ခမသုခါယ ဝေဒနာယ သမ္ပယုတ္တာ ခန္ဓာ ပစ္ဆိမာနံ ပစ္ဆိမာနံ အဒုက္ခမသုခါယ ဝေဒနာယ သမ္ပယုတ္တကာနံ ခန္ဓာနံ အာသေဝနပစ္စယေန ပစ္စယော. အဒုက္ခမသုခါယ ဝေဒနာယ သမ္ပယုတ္တံ အနုလောမံ ဂေါတြဘုဿ။ အနုလောမံ ဝေါဒါနဿ။ ဂေါတြဘု မဂ္ဂဿ။ ဝေါဒါနံ မဂ္ဂဿ အာသေဝနပစ္စယေန ပစ္စယော. (၁)

ကမ္မပစ္စယော

၅၇. သုခါယ ဝေဒနာယ သမ္ပယုတ္တော ဓမ္မော သုခါယ ဝေဒနာယ သမ္ပယုတ္တဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ [နာနာခဏိကာ (က.)]. သဟဇာတာ – သုခါယ ဝေဒနာယ သမ္ပယုတ္တာ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော. ပဋိသန္ဓိက္ခဏေ။ပေ။. နာနာက္ခဏိကာ – သုခါယ ဝေဒနာယ သမ္ပယုတ္တာ စေတနာ ဝိပါကာနံ သုခါယ ဝေဒနာယ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော. (၁)

သုခါယ ဝေဒနာယ သမ္ပယုတ္တော ဓမ္မော ဒုက္ခာယ ဝေဒနာယ သမ္ပယုတ္တဿ ဓမ္မဿ ကမ္မပစ္စယေန ပစ္စယော. နာနာက္ခဏိကာ – သုခါယ ဝေဒနာယ သမ္ပယုတ္တာ စေတနာ ဝိပါကာနံ ဒုက္ခာယ ဝေဒနာယ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော. (၂)

သုခါယ ဝေဒနာယ သမ္ပယုတ္တော ဓမ္မော အဒုက္ခမသုခါယ ဝေဒနာယ သမ္ပယုတ္တဿ ဓမ္မဿ ကမ္မပစ္စယေန ပစ္စယော. နာနာက္ခဏိကာ – သုခါယ ဝေဒနာယ သမ္ပယုတ္တာ စေတနာ ဝိပါကာနံ အဒုက္ခမသုခါယ ဝေဒနာယ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော. (၃)

၅၈. ဒုက္ခာယ ဝေဒနာယ သမ္ပယုတ္တော ဓမ္မော ဒုက္ခာယ ဝေဒနာယ သမ္ပယုတ္တဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – ဒုက္ခာယ ဝေဒနာယ သမ္ပယုတ္တာ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော. နာနာက္ခဏိကာ – ဒုက္ခာယ ဝေဒနာယ သမ္ပယုတ္တာ စေတနာ ဝိပါကာနံ ဒုက္ခာယ ဝေဒနာယ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော. (၁)

ဒုက္ခာယ ဝေဒနာယ သမ္ပယုတ္တော ဓမ္မော အဒုက္ခမသုခါယ ဝေဒနာယ သမ္ပယုတ္တဿ ဓမ္မဿ ကမ္မပစ္စယေန ပစ္စယော. နာနာက္ခဏိကာ – ဒုက္ခာယ ဝေဒနာယ သမ္ပယုတ္တာ စေတနာ ဝိပါကာနံ အဒုက္ခမသုခါယ ဝေဒနာယ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော. (၂)

၅၉. အဒုက္ခမသုခါယ ဝေဒနာယ သမ္ပယုတ္တော ဓမ္မော အဒုက္ခမသုခါယ ဝေဒနာယ သမ္ပယုတ္တဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – အဒုက္ခမသုခါယ ဝေဒနာယ သမ္ပယုတ္တာ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော. ပဋိသန္ဓိက္ခဏေ။ပေ။. နာနာက္ခဏိကာ – အဒုက္ခမသုခါယ ဝေဒနာယ သမ္ပယုတ္တာ စေတနာ ဝိပါကာနံ အဒုက္ခမသုခါယ ဝေဒနာယ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော. (၁)

အဒုက္ခမသုခါယ ဝေဒနာယ သမ္ပယုတ္တော ဓမ္မော သုခါယ ဝေဒနာယ သမ္ပယုတ္တဿ ဓမ္မဿ ကမ္မပစ္စယေန ပစ္စယော. နာနာက္ခဏိကာ – အဒုက္ခမသုခါယ ဝေဒနာယ သမ္ပယုတ္တာ စေတနာ ဝိပါကာနံ သုခါယ ဝေဒနာယ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော. (၂)

အဒုက္ခမသုခါယ ဝေဒနာယ သမ္ပယုတ္တော ဓမ္မော ဒုက္ခာယ ဝေဒနာယ သမ္ပယုတ္တဿ ဓမ္မဿ ကမ္မပစ္စယေန ပစ္စယော. နာနာက္ခဏိကာ – အဒုက္ခမသုခါယ ဝေဒနာယ သမ္ပယုတ္တာ စေတနာ ဝိပါကာနံ ဒုက္ခာယ ဝေဒနာယ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော. (၃)

ဝိပါကပစ္စယော

၆၀. သုခါယ ဝေဒနာယ သမ္ပယုတ္တော ဓမ္မော သုခါယ ဝေဒနာယ သမ္ပယုတ္တဿ ဓမ္မဿ ဝိပါကပစ္စယေန ပစ္စယော – ဝိပါကော သုခါယ ဝေဒနာယ သမ္ပယုတ္တော ဧကော ခန္ဓော ဒွိန္နံ ခန္ဓာနံ ဝိပါကပစ္စယေန ပစ္စယော. ဒွေ ခန္ဓာ ဧကဿ ခန္ဓဿ ဝိပါကပစ္စယေန ပစ္စယော. ပဋိသန္ဓိက္ခဏေ သုခါယ ဝေဒနာယ သမ္ပယုတ္တော ဧကော ခန္ဓော ဒွိန္နံ ခန္ဓာနံ ဝိပါကပစ္စယေန ပစ္စယော. ဒွေ ခန္ဓာ ဧကဿ ခန္ဓဿ။ပေ။. (၁)

ဒုက္ခာယ ဝေဒနာယ သမ္ပယုတ္တော ဓမ္မော ဒုက္ခာယ ဝေဒနာယ သမ္ပယုတ္တဿ ဓမ္မဿ ဝိပါကပစ္စယေန ပစ္စယော – ဝိပါကော ဒုက္ခာယ ဝေဒနာယ သမ္ပယုတ္တော ဧကော ခန္ဓော ဒွိန္နံ ခန္ဓာနံ ဝိပါကပစ္စယေန ပစ္စယော ။ပေ။. (၁)

အဒုက္ခမသုခါယ ဝေဒနာယ။ပေ။ ဝိပါကော အဒုက္ခမသုခါယ ဝေဒနာယ သမ္ပယုတ္တော ဧကော ခန္ဓော ဒွိန္နံ ခန္ဓာနံ။ပေ။ ပဋိသန္ဓိက္ခဏေ။ပေ။. (၁)

အာဟာရပစ္စယာဒိ

၆၁. သုခါယ ဝေဒနာယ သမ္ပယုတ္တော ဓမ္မော သုခါယ ဝေဒနာယ သမ္ပယုတ္တဿ ဓမ္မဿ အာဟာရပစ္စယေန ပစ္စယော။ပေ။ ဣန္ဒြိယပစ္စယေန ပစ္စယော။ပေ။ ဈာနပစ္စယေန ပစ္စယော။ပေ။ မဂ္ဂပစ္စယေန ပစ္စယော။ပေ။ သမ္ပယုတ္တပစ္စယေန ပစ္စယော။ပေ။ အတ္ထိပစ္စယေန ပစ္စယော။ပေ။ နတ္ထိပစ္စယေန ပစ္စယော။ပေ။ ဝိဂတပစ္စယေန ပစ္စယော။ပေ။ အဝိဂတပစ္စယေန ပစ္စယော။ပေ။.