၁. နသုတ္တာဟရဏကထာ

၂၇၉. ဇဟတိ ပုထုဇ္ဇနော ကာမရာဂဗျာပါဒန္တိ? အာမန္တာ. အစ္စန္တံ ဇဟတိ၊ အနဝသေသံ ဇဟတိ၊ အပ္ပဋိသန္ဓိယံ ဇဟတိ၊ သမူလံ ဇဟတိ၊ သတဏှံ ဇဟတိ၊ သာနုသယံ ဇဟတိ၊ အရိယေန ဉာဏေန ဇဟတိ၊ အရိယေန မဂ္ဂေန ဇဟတိ၊ အကုပ္ပံ ပဋိဝိဇ္ဈန္တော ဇဟတိ၊ အနာဂါမိဖလံ သစ္ဆိကရောန္တော ဇဟတီတိ? န ဟေဝံ ဝတ္တဗ္ဗေ။ပေ။.

ဝိက္ခမ္ဘေတိ ပုထုဇ္ဇနော ကာမရာဂဗျာပါဒန္တိ? အာမန္တာ. အစ္စန္တံ ဝိက္ခမ္ဘေတိ၊ အနဝသေသံ ဝိက္ခမ္ဘေတိ၊ အပ္ပဋိသန္ဓိယံ ဝိက္ခမ္ဘေတိ၊ သမူလံ ဝိက္ခမ္ဘေတိ၊ သတဏှံ ဝိက္ခမ္ဘေတိ၊ သာနုသယံ ဝိက္ခမ္ဘေတိ၊ အရိယေန ဉာဏေန ဝိက္ခမ္ဘေတိ၊ အရိယေန မဂ္ဂေန ဝိက္ခမ္ဘေတိ၊ အကုပ္ပံ ပဋိဝိဇ္ဈန္တော ဝိက္ခမ္ဘေတိ၊ အနာဂါမိဖလံ သစ္ဆိကရောန္တော ဝိက္ခမ္ဘေတီတိ? န ဟေဝံ ဝတ္တဗ္ဗေ။ပေ။.

ဇဟတိ အနာဂါမိဖလသစ္ဆိကိရိယာယ ပဋိပန္နော ပုဂ္ဂလော ကာမရာဂဗျာပါဒံ၊ သော စ အစ္စန္တံ ဇဟတိ၊ အနဝသေသံ ဇဟတိ။ပေ။ အနာဂါမိဖလံ သစ္ဆိကရောန္တော ဇဟတီတိ? အာမန္တာ. ဇဟတိ ပုထုဇ္ဇနော ကာမရာဂဗျာပါဒံ၊ သော စ အစ္စန္တံ ဇဟတိ၊ အနဝသေသံ ဇဟတိ။ပေ။ အနာဂါမိဖလံ သစ္ဆိကရောန္တော ဇဟတီတိ? န ဟေဝံ ဝတ္တဗ္ဗေ။ပေ။.

ဝိက္ခမ္ဘေတိ အနာဂါမိဖလသစ္ဆိကိရိယာယ ပဋိပန္နော ပုဂ္ဂလော ကာမရာဂဗျာပါဒံ၊ သော စ အစ္စန္တံ ဝိက္ခမ္ဘေတိ၊ အနဝသေသံ ဝိက္ခမ္ဘေတိ။ပေ။ အနာဂါမိဖလံ သစ္ဆိကရောန္တော ဝိက္ခမ္ဘေတီတိ? အာမန္တာ. ဝိက္ခမ္ဘေတိ ပုထုဇ္ဇနော ကာမရာဂဗျာပါဒံ၊ သော စ အစ္စန္တံ ဝိက္ခမ္ဘေတိ၊ အနဝသေသံ ဝိက္ခမ္ဘေတိ ။ပေ။ အနာဂါမိဖလံ သစ္ဆိကရောန္တော ဝိက္ခမ္ဘေတီတိ? န ဟေဝံ ဝတ္တဗ္ဗေ။ပေ။.

ဇဟတိ ပုထုဇ္ဇနော ကာမရာဂဗျာပါဒံ၊ သော စ န အစ္စန္တံ ဇဟတိ၊ န အနဝသေသံ ဇဟတိ။ပေ။ န အနာဂါမိဖလံ သစ္ဆိကရောန္တော ဇဟတီတိ? အာမန္တာ. ဇဟတိ အနာဂါမိဖလသစ္ဆိကိရိယာယ ပဋိပန္နော ပုဂ္ဂလော ကာမရာဂဗျာပါဒံ၊ သော စ န အစ္စန္တံ ဇဟတိ။ပေ။ န အနာဂါမိဖလံ သစ္ဆိကရောန္တော ဇဟတီတိ? န ဟေဝံ ဝတ္တဗ္ဗေ။ပေ။.

ဝိက္ခမ္ဘေတိ ပုထုဇ္ဇနော ကာမရာဂဗျာပါဒံ၊ သော စ န အစ္စန္တံ ဝိက္ခမ္ဘေတိ၊ န အနဝသေသံ ဝိက္ခမ္ဘေတိ။ပေ။ န အနာဂါမိဖလံ သစ္ဆိကရောန္တော ဝိက္ခမ္ဘေတီတိ? အာမန္တာ. ဝိက္ခမ္ဘေတိ အနာဂါမိဖလသစ္ဆိကိရိယာယ ပဋိပန္နော ပုဂ္ဂလော ကာမရာဂဗျာပါဒံ၊ သော စ န အစ္စန္တံ ဝိက္ခမ္ဘေတိ၊ န အနဝသေသံ ဝိက္ခမ္ဘေတိ။ပေ။ န အနာဂါမိဖလံ သစ္ဆိကရောန္တော ဝိက္ခမ္ဘေတီတိ? န ဟေဝံ ဝတ္တဗ္ဗေ။ပေ။.

ဇဟတိ ပုထုဇ္ဇနော ကာမရာဂဗျာပါဒန္တိ? အာမန္တာ. ကတမေန မဂ္ဂေနာတိ? ရူပါဝစရေန မဂ္ဂေနာတိ. ရူပါဝစရော မဂ္ဂေါ နိယျာနိကော ခယဂါမီ ဗောဓဂါမီ အပစယဂါမီ အနာသဝေါ အသံယောဇနိယော အဂန္ထနိယော အနောဃနိယော အယောဂနိယော အနီဝရဏိယော အပရာမဋ္ဌော အနုပါဒါနိယော အသံကိလေသိယောတိ? န ဟေဝံ ဝတ္တဗ္ဗေ. နနု ရူပါဝစရော မဂ္ဂေါ အနိယျာနိကော န ခယဂါမီ န ဗောဓဂါမီ န အပစယဂါမီ သာသဝေါ သံယောဇနိယော။ပေ။ သံကိလေသိယောတိ? အာမန္တာ. ဟဉ္စိ ရူပါဝစရော မဂ္ဂေါ အနိယျာနိကော န ခယဂါမီ။ပေ။ သံကိလေသိယော၊ နော စ ဝတ ရေ ဝတ္တဗ္ဗေ – ‘‘ဇဟတိ ပုထုဇ္ဇနော ရူပါဝစရေန မဂ္ဂေန ကာမရာဂဗျာပါဒ’’န္တိ.

ဇဟတိ အနာဂါမိဖလသစ္ဆိကိရိယာယ ပဋိပန္နော ပုဂ္ဂလော အနာဂါမိမဂ္ဂေန ကာမရာဂဗျာပါဒံ၊ သော စ မဂ္ဂေါ နိယျာနိကော ခယဂါမီ ဗောဓဂါမီ အပစယဂါမီ အနာသဝေါ။ပေ။ အသံကိလေသိယောတိ? အာမန္တာ. ဇဟတိ ပုထုဇ္ဇနော ရူပါဝစရေန မဂ္ဂေန ကာမရာဂဗျာပါဒံ၊ သော စ မဂ္ဂေါ နိယျာနိကော ခယဂါမီ ဗောဓဂါမီ အပစယဂါမီ အနာသဝေါ။ပေ။ အသံကိလေသိယောတိ? န ဟေဝံ ဝတ္တဗ္ဗေ။ပေ။.

ဇဟတိ ပုထုဇ္ဇနော ရူပါဝစရေန မဂ္ဂေန ကာမရာဂဗျာပါဒံ၊ သော စ မဂ္ဂေါ အနိယျာနိကော န ခယဂါမီ န ဗောဓဂါမီ န အပစယဂါမီ သာသဝေါ။ပေ။ သံကိလေသိယောတိ? အာမန္တာ. ဇဟတိ အနာဂါမိဖလသစ္ဆိကိရိယာယ ပဋိပန္နော ပုဂ္ဂလော အနာဂါမိမဂ္ဂေန ကာမရာဂဗျာပါဒံ၊ သော စ မဂ္ဂေါ အနိယျာနိကော န ခယဂါမီ န ဗောဓဂါမီ န အပစယဂါမီ သာသဝေါ။ပေ။ သံကိလေသိယောတိ? န ဟေဝံ ဝတ္တဗ္ဗေ။ပေ။.

၂၈၀. ပုထုဇ္ဇနော ကာမေသု ဝီတရာဂေါ သဟ ဓမ္မာဘိသမယာ အနာဂါမိဖလေ သဏ္ဌာတီတိ? အာမန္တာ. အရဟတ္တေ သဏ္ဌာတီတိ? န ဟေဝံ ဝတ္တဗ္ဗေ။ပေ။.

ပုထုဇ္ဇနော ကာမေသု ဝီတရာဂေါ သဟ ဓမ္မာဘိသမယာ အနာဂါမိဖလေ သဏ္ဌာတီတိ? အာမန္တာ. အပုဗ္ဗံ အစရိမံ တယော မဂ္ဂေ ဘာဝေတီတိ? န ဟေဝံ ဝတ္တဗ္ဗေ။ပေ။.

အပုဗ္ဗံ အစရိမံ တယော မဂ္ဂေ ဘာဝေတီတိ? အာမန္တာ. အပုဗ္ဗံ အစရိမံ တီဏိ သာမညဖလာနိ သစ္ဆိကရောတီတိ? န ဟေဝံ ဝတ္တဗ္ဗေ။ပေ။.

အပုဗ္ဗံ အစရိမံ တီဏိ သာမညဖလာနိ သစ္ဆိကရောတီတိ? အာမန္တာ. တိဏ္ဏံ ဖဿာနံ တိဿန္နံ ဝေဒနာနံ တိဿန္နံ သညာနံ တိဿန္နံ စေတနာနံ တိဏ္ဏံ စိတ္တာနံ တိဿန္နံ သဒ္ဓါနံ တိဏ္ဏံ ဝီရိယာနံ တိဿန္နံ သတီနံ တိဏ္ဏံ သမာဓီနံ တိဿန္နံ ပညာနံ သမောဓာနံ ဟောတီတိ? န ဟေဝံ ဝတ္တဗ္ဗေ။ပေ။.

ပုထုဇ္ဇနော ကာမေသု ဝီတရာဂေါ သဟ ဓမ္မာဘိသမယာ အနာဂါမိဖလေ သဏ္ဌာတီတိ? အာမန္တာ. သောတာပတ္တိမဂ္ဂေနာတိ? န ဟေဝံ ဝတ္တဗ္ဗေ။ပေ။.

သကဒါဂါမိမဂ္ဂေနာတိ? န ဟေဝံ ဝတ္တဗ္ဗေ. ကတမေန မဂ္ဂေနာတိ? အနာဂါမိမဂ္ဂေနာတိ. အနာဂါမိမဂ္ဂေန သက္ကာယဒိဋ္ဌိံ ဝိစိကိစ္ဆံ သီလဗ္ဗတပရာမာသံ ဇဟတီတိ? န ဟေဝံ ဝတ္တဗ္ဗေ။ပေ။.