(၁၈၆) ၁. ကိလေသဇဟနကထာ

၈၂၈. အတီတေ ကိလေသေ ဇဟတီတိ? အာမန္တာ. နိရုဒ္ဓံ နိရောဓေတိ၊ ဝိဂတံ ဝိဂမေတိ၊ ခီဏံ ခေပေတိ၊ အတ္ထင်္ဂတံ အတ္ထင်္ဂမေတိ၊ အဗ္ဘတ္ထင်္ဂတံ အဗ္ဘတ္ထင်္ဂမေတီတိ? န ဟေဝံ ဝတ္တဗ္ဗေ။ပေ။ အတီတေ ကိလေသေ ဇဟတီတိ? အာမန္တာ. နနု အတီတံ နိရုဒ္ဓန္တိ? အာမန္တာ. ဟဉ္စိ အတီတံ နိရုဒ္ဓံ၊ နော စ ဝတ ရေ ဝတ္တဗ္ဗေ – ‘‘အတီတေ ကိလေသေ ဇဟတီ’’တိ. အတီတေ ကိလေသေ ဇဟတီတိ? အာမန္တာ. နနု အတီတံ နတ္ထီတိ? အာမန္တာ. ဟဉ္စိ အတီတံ နတ္ထိ၊ နော စ ဝတ ရေ ဝတ္တဗ္ဗေ – ‘‘အတီတေ ကိလေသေ ဇဟတီ’’တိ.

၈၂၉. အနာဂတေ ကိလေသေ ဇဟတီတိ? အာမန္တာ. အဇာတံ အဇနေတိ၊ အသဉ္ဇာတံ အသဉ္ဇနေတိ၊ အနိဗ္ဗတ္တံ အနိဗ္ဗတ္တေတိ၊ အပါတုဘူတံ အပါတုဘာဝေတီတိ? န ဟေဝံ ဝတ္တဗ္ဗေ။ပေ။ အနာဂတေ ကိလေသေ ဇဟတီတိ? အာမန္တာ. နနု အနာဂတံ အဇာတန္တိ? အာမန္တာ. ဟဉ္စိ အနာဂတံ အဇာတံ၊ နော စ ဝတ ရေ ဝတ္တဗ္ဗေ – ‘‘အနာဂတေ ကိလေသေ ဇဟတီ’’တိ. အနာဂတေ ကိလေသေ ဇဟတီတိ? အာမန္တာ. နနု အနာဂတံ နတ္ထီတိ? အာမန္တာ. ဟဉ္စိ အနာဂတံ နတ္ထိ၊ နော စ ဝတ ရေ ဝတ္တဗ္ဗေ – ‘‘အနာဂတေ ကိလေသေ ဇဟတီ’’တိ.

၈၃၀. ပစ္စုပ္ပန္နေ ကိလေသေ ဇဟတီတိ? အာမန္တာ. ရတ္တော ရာဂံ ဇဟတိ၊ ဒုဋ္ဌော ဒေါသံ ဇဟတိ၊ မူဠှော မောဟံ ဇဟတိ၊ ကိလိဋ္ဌော ကိလေသေ ဇဟတီတိ? န ဟေဝံ ဝတ္တဗ္ဗေ။ပေ။ ရာဂေန ရာဂံ ဇဟတိ၊ ဒေါသေန ဒေါသံ ဇဟတိ၊ မောဟေန မောဟံ ဇဟတိ၊ ကိလေသေဟိ ကိလေသေ ဇဟတီတိ? န ဟေဝံ ဝတ္တဗ္ဗေ။ပေ။.

ရာဂေါ စိတ္တသမ္ပယုတ္တော၊ မဂ္ဂေါ စိတ္တသမ္ပယုတ္တောတိ? အာမန္တာ. ဒွိန္နံ စိတ္တာနံ သမောဓာနံ ဟောတီတိ? န ဟေဝံ ဝတ္တဗ္ဗေ။ပေ။.

ရာဂေါ အကုသလော၊ မဂ္ဂေါ ကုသလောတိ? အာမန္တာ. ကုသလာကုသလာ သာဝဇ္ဇာနဝဇ္ဇာ ဟီနပဏီတာ ကဏှသုက္ကသပ္ပဋိဘာဂါ ဓမ္မာ သမ္မုခီဘာဝံ အာဂစ္ဆန္တီတိ? န ဟေဝံ ဝတ္တဗ္ဗေ။ပေ။.

ကုသလာကုသလာ သာဝဇ္ဇာနဝဇ္ဇာ ဟီနပဏီတာ ကဏှသုက္ကသပ္ပဋိဘာဂါ ဓမ္မာ သမ္မုခီဘာဝံ အာဂစ္ဆန္တီတိ? အာမန္တာ. နနု ဝုတ္တံ ဘဂဝတာ – ‘‘စတ္တာရိမာနိ၊ ဘိက္ခဝေ၊ သုဝိဒူရဝိဒူရာနိ! ကတမာနိ စတ္တာရိ? နဘဉ္စ၊ ဘိက္ခဝေ၊ ပထဝီ စ – ဣဒံ ပဌမံ သုဝိဒူရဝိဒူရံ။ပေ။ တသ္မာ သတံ ဓမ္မော အသဗ္ဘိ အာရကာ’’တိ. အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘ကုသလာကုသလာ။ပေ။ သမ္မုခီဘာဝံ အာဂစ္ဆန္တီ’’တိ.

၈၃၁. န ဝတ္တဗ္ဗံ – ‘‘အတီတေ ကိလေသေ ဇဟတိ၊ အနာဂတေ ကိလေသေ ဇဟတိ၊ ပစ္စုပ္ပန္နေ ကိလေသေ ဇဟတီ’’တိ? အာမန္တာ. နတ္ထိ ကိလေသေ ဇဟတီတိ? န ဟေဝံ ဝတ္တဗ္ဗေ။ပေ။ တေန ဟိ အတီတေ ကိလေသေ ဇဟတိ၊ အနာဂတေ ကိလေသေ ဇဟတိ၊ ပစ္စုပ္ပန္နေ ကိလေသေ ဇဟတီတိ.

ကိလေသဇဟနကထာ နိဋ္ဌိတာ.