၁၉. ဧကူနဝီသတိမဝဂ္ဂေါ

(၁၈၇) ၂. သုညတာကထာ

၈၃၂. သုညတာ သင်္ခါရက္ခန္ဓပရိယာပန္နာတိ? အာမန္တာ. အနိမိတ္တံ သင်္ခါရက္ခန္ဓပရိယာပန္နန္တိ? န ဟေဝံ ဝတ္တဗ္ဗေ။ပေ။ သုညတာ သင်္ခါရက္ခန္ဓပရိယာပန္နာတိ? အာမန္တာ. အပ္ပဏိဟိတော သင်္ခါရက္ခန္ဓပရိယာပန္နောတိ? န ဟေဝံ ဝတ္တဗ္ဗေ။ပေ။ အနိမိတ္တံ န ဝတ္တဗ္ဗံ – ‘‘သင်္ခါရက္ခန္ဓပရိယာပန္န’’န္တိ? အာမန္တာ. သုညတာ န ဝတ္တဗ္ဗာ – ‘‘သင်္ခါရက္ခန္ဓပရိယာပန္နာ’’တိ? န ဟေဝံ ဝတ္တဗ္ဗေ။ပေ။ အပ္ပဏိဟိတော န ဝတ္တဗ္ဗော – ‘‘သင်္ခါရက္ခန္ဓပရိယာပန္နော’’တိ? အာမန္တာ. သုညတာ န ဝတ္တဗ္ဗာ – ‘‘သင်္ခါရက္ခန္ဓပရိယာပန္နာ’’တိ? န ဟေဝံ ဝတ္တဗ္ဗေ။ပေ။.

သုညတာ သင်္ခါရက္ခန္ဓပရိယာပန္နာတိ? အာမန္တာ. သင်္ခါရက္ခန္ဓော န အနိစ္စော န သင်္ခတော န ပဋိစ္စသမုပ္ပန္နော န ခယဓမ္မော န ဝယဓမ္မော န ဝိရာဂဓမ္မော န နိရောဓဓမ္မော န ဝိပရိဏာမဓမ္မောတိ? န ဟေဝံ ဝတ္တဗ္ဗေ။ပေ။ နနု သင်္ခါရက္ခန္ဓော အနိစ္စော သင်္ခတော ပဋိစ္စသမုပ္ပန္နော ခယဓမ္မော ဝယဓမ္မော ဝိရာဂဓမ္မော နိရောဓဓမ္မော ဝိပရိဏာမဓမ္မောတိ? အာမန္တာ. ဟဉ္စိ သင်္ခါရက္ခန္ဓော အနိစ္စော။ပေ။ ဝိပရိဏာမဓမ္မော၊ နော စ ဝတ ရေ ဝတ္တဗ္ဗေ – ‘‘သုညတာ သင်္ခါရက္ခန္ဓပရိယာပန္နာ’’တိ.

၈၃၃. ရူပက္ခန္ဓဿ သုညတာ သင်္ခါရက္ခန္ဓပရိယာပန္နာတိ? အာမန္တာ. သင်္ခါရက္ခန္ဓဿ သုညတာ ရူပက္ခန္ဓပရိယာပန္နာတိ? န ဟေဝံ ဝတ္တဗ္ဗေ။ပေ။ ဝေဒနာက္ခန္ဓဿ။ပေ။ သညာက္ခန္ဓဿ။ ဝိညာဏက္ခန္ဓဿ သုညတာ သင်္ခါရက္ခန္ဓပရိယာပန္နာတိ? အာမန္တာ. သင်္ခါရက္ခန္ဓဿ သုညတာ ဝိညာဏက္ခန္ဓပရိယာပန္နာတိ? န ဟေဝံ ဝတ္တဗ္ဗေ။ပေ။.

သင်္ခါရက္ခန္ဓဿ သုညတာ န ဝတ္တဗ္ဗာ – ‘‘ရူပက္ခန္ဓပရိယာပန္နာ’’တိ? အာမန္တာ. ရူပက္ခန္ဓဿ သုညတာ န ဝတ္တဗ္ဗာ – ‘‘သင်္ခါရက္ခန္ဓပရိယာပန္နာ’’တိ? န ဟေဝံ ဝတ္တဗ္ဗေ။ပေ။ သင်္ခါရက္ခန္ဓဿ သုညတာ န ဝတ္တဗ္ဗာ – ‘‘ဝေဒနာက္ခန္ဓပရိယာပန္နာ။ပေ။ သညာက္ခန္ဓပရိယာပန္နာ။ ဝိညာဏက္ခန္ဓပရိယာပန္နာ’’တိ? အာမန္တာ. ဝိညာဏက္ခန္ဓဿ သုညတာ န ဝတ္တဗ္ဗာ – ‘‘သင်္ခါရက္ခန္ဓပရိယာပန္နာ’’တိ? န ဟေဝံ ဝတ္တဗ္ဗေ။ပေ။.

၈၃၄. န ဝတ္တဗ္ဗံ – သုညတာ သင်္ခါရက္ခန္ဓပရိယာပန္နာ’’တိ? အာမန္တာ. နနု ဝုတ္တံ ဘဂဝတာ – ‘‘သုညမိဒံ၊ ဘိက္ခဝေ၊ သင်္ခါရာ အတ္တေန ဝါ အတ္တနိယေန ဝါ’’တိ [မ. နိ. ၃.၆၉ အာနေဉ္ဇသပ္ပါယေ]! အတ္ထေဝ သုတ္တန္တောတိ? အာမန္တာ. တေန ဟိ သုညတာ သင်္ခါရက္ခန္ဓပရိယာပန္နာတိ.

သုညတာကထာ နိဋ္ဌိတာ.