(၁၅၆) ၁. နိဂ္ဂဟကထာ

၇၄၃. ပရော ပရဿ စိတ္တံ နိဂ္ဂဏှာတီတိ? အာမန္တာ. ပရော ပရဿ စိတ္တံ ‘‘မာ ရဇ္ဇိ’’၊ ‘‘မာ ဒုဿိ’’၊ ‘‘မာ မုယှိ’’၊ ‘‘မာ ကိလိဿီ’’တိ နိဂ္ဂဏှာတီတိ? န ဟေဝံ ဝတ္တဗ္ဗေ။ပေ။ ပရော ပရဿ စိတ္တံ နိဂ္ဂဏှာတီတိ? အာမန္တာ. ပရော ပရဿ ဥပ္ပန္နော ဖဿော ‘‘မာ နိရုဇ္ဈီ’’တိ နိဂ္ဂဏှာတီတိ? န ဟေဝံ ဝတ္တဗ္ဗေ။ပေ။ ပရော ပရဿ ဥပ္ပန္နာ ဝေဒနာ။ပေ။ ဥပ္ပန္နာ သညာ။ ဥပ္ပန္နာ စေတနာ။ ဥပ္ပန္နံ စိတ္တံ။ ဥပ္ပန္နာ သဒ္ဓါ။ ဥပ္ပန္နံ ဝီရိယံ ။ ဥပ္ပန္နာ သတိ။ ဥပ္ပန္နော သမာဓိ။ပေ။ ဥပ္ပန္နာ ပညာ ‘‘မာ နိရုဇ္ဈီ’’တိ နိဂ္ဂဏှာတီတိ? န ဟေဝံ ဝတ္တဗ္ဗေ။ပေ။.

ပရော ပရဿ စိတ္တံ နိဂ္ဂဏှာတီတိ? အာမန္တာ. ပရော ပရဿ အတ္ထာယ ရာဂံ ပဇဟတိ။ ဒေါသံ ပဇဟတိ။ပေ။ အနောတ္တပ္ပံ ပဇဟတီတိ? န ဟေဝံ ဝတ္တဗ္ဗေ။ပေ။.

ပရော ပရဿ စိတ္တံ နိဂ္ဂဏှာတီတိ? အာမန္တာ. ပရော ပရဿ အတ္ထာယ မဂ္ဂံ ဘာဝေတိ။ သတိပဋ္ဌာနံ ဘာဝေတိ။ပေ။ ဗောဇ္ဈင်္ဂံ ဘာဝေတီတိ? န ဟေဝံ ဝတ္တဗ္ဗေ။ပေ။.

ပရော ပရဿ စိတ္တံ နိဂ္ဂဏှာတီတိ? အာမန္တာ. ပရော ပရဿ အတ္ထာယ ဒုက္ခံ ပရိဇာနာတိ၊ သမုဒယံ ပဇဟတိ၊ နိရောဓံ သစ္ဆိကရောတိ၊ မဂ္ဂံ ဘာဝေတီတိ? န ဟေဝံ ဝတ္တဗ္ဗေ။ပေ။.

ပရော ပရဿ စိတ္တံ နိဂ္ဂဏှာတီတိ? အာမန္တာ. အညော အညဿ ကာရကော၊ ပရင်္ကတံ သုခံ ဒုက္ခံ အညော ကရောတိ အညော ပဋိသံဝေဒေတီတိ? န ဟေဝံ ဝတ္တဗ္ဗေ။ပေ။.

ပရော ပရဿ စိတ္တံ နိဂ္ဂဏှာတီတိ? အာမန္တာ. နနု ဝုတ္တံ ဘဂဝတာ –

‘‘အတ္တနာဝ ကတံ ပါပံ၊ အတ္တနာ သံကိလိဿတိ၊

အတ္တနာ အကတံ ပါပံ၊ အတ္တနာဝ ဝိသုဇ္ဈတိ၊

သုဒ္ဓိ အသုဒ္ဓိ ပစ္စတ္တံ၊ နာညော အညံ ဝိသောဓယေ’’တိ [ဓ. ပ. ၁၆၅].

အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘ပရော ပရဿ စိတ္တံ နိဂ္ဂဏှာတီ’’တိ.

၇၄၄. န ဝတ္တဗ္ဗံ – ‘‘ပရော ပရဿ စိတ္တံ နိဂ္ဂဏှာတီ’’တိ? အာမန္တာ. နနု အတ္ထိ ဗလပ္ပတ္တာ၊ အတ္ထိ ဝသီဘူတာတိ? အာမန္တာ. ဟဉ္စိ အတ္ထိ ဗလပ္ပတ္တာ၊ အတ္ထိ ဝသီဘူတာ၊ တေန ဝတ ရေ ဝတ္တဗ္ဗေ – ‘‘ပရော ပရဿ စိတ္တံ နိဂ္ဂဏှာတီ’’တိ.

နိဂ္ဂဟကထာ နိဋ္ဌိတာ.