၁၆. သောဠသမဝဂ္ဂေါ

(၁၅၇) ၂. ပဂ္ဂဟကထာ

၇၄၅. ပရော ပရဿ စိတ္တံ ပဂ္ဂဏှာတီတိ? အာမန္တာ. ပရော ပရဿ စိတ္တံ ‘‘မာ ရဇ္ဇိ၊’’‘‘မာ ဒုဿိ၊’’‘‘မာ မုယှိ၊’’‘‘မာ ကိလိဿီ’’တိ ပဂ္ဂဏှာတီတိ? န ဟေဝံ ဝတ္တဗ္ဗေ။ပေ။ ပရော ပရဿ စိတ္တံ ပဂ္ဂဏှာတီတိ? အာမန္တာ. ပရော ပရဿ အလောဘံ ကုသလမူလံ ဇနေတိ။ အဒေါသံ ကုသလမူလံ ဇနေတိ။ အမောဟံ ကုသလမူလံ ဇနေတိ။ သဒ္ဓံ ဇနေတိ။ ဝီရိယံ ဇနေတိ။ သတိံ ဇနေတိ။ သမာဓိံ ဇနေတိ။ ပညံ ဇနေတီတိ? န ဟေဝံ ဝတ္တဗ္ဗေ။ပေ။ ပရော ပရဿ စိတ္တံ ပဂ္ဂဏှာတီတိ? အာမန္တာ. ပရော ပရဿ ဥပ္ပန္နော ဖဿော ‘‘မာ နိရုဇ္ဈီ’’တိ ပဂ္ဂဏှာတီတိ? န ဟေဝံ ဝတ္တဗ္ဗေ။ပေ။ ပရော ပရဿ ဥပ္ပန္နာ ဝေဒနာ။ပေ။ ဥပ္ပန္နာ ပညာ ‘‘မာ နိရုဇ္ဈီ’’တိ ပဂ္ဂဏှာတီတိ? န ဟေဝံ ဝတ္တဗ္ဗေ။ပေ။.

ပရော ပရဿ စိတ္တံ ပဂ္ဂဏှာတီတိ? အာမန္တာ. ပရော ပရဿ အတ္ထာယ ရာဂံ ပဇဟတိ။ ဒေါသံ ပဇဟတိ။ မောဟံ ပဇဟတိ။ပေ။ အနောတ္တပ္ပံ ပဇဟတီတိ? န ဟေဝံ ဝတ္တဗ္ဗေ။ပေ။.

ပရော ပရဿ စိတ္တံ ပဂ္ဂဏှာတီတိ? အာမန္တာ. ပရော ပရဿ အတ္ထာယ မဂ္ဂံ ဘာဝေတိ။ သတိပဋ္ဌာနံ ဘာဝေတိ။ပေ။ ဗောဇ္ဈင်္ဂံ ဘာဝေတီတိ? န ဟေဝံ ဝတ္တဗ္ဗေ။ပေ။.

ပရော ပရဿ စိတ္တံ ပဂ္ဂဏှာတီတိ? အာမန္တာ. ပရော ပရဿ အတ္ထာယ ဒုက္ခံ ပရိဇာနာတိ။ပေ။ မဂ္ဂံ ဘာဝေတီတိ? န ဟေဝံ ဝတ္တဗ္ဗေ။ပေ။.

ပရော ပရဿ စိတ္တံ ပဂ္ဂဏှာတီတိ? အာမန္တာ. အညော အညဿ ကာရကော၊ ပရင်္ကတံ သုခံ ဒုက္ခံ အညော ကရောတိ အညော ပဋိသံဝေဒေတီတိ? န ဟေဝံ ဝတ္တဗ္ဗေ။ပေ။.

ပရော ပရဿ စိတ္တံ ပဂ္ဂဏှာတီတိ? အာမန္တာ. နနု ဝုတ္တံ ဘဂဝတာ – ‘‘အတ္တနာဝ ကတံ ပါပံ။ပေ။ နာညော အညံ ဝိသောဓယေ’’တိ. အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘ပရော ပရဿ စိတ္တံ ပဂ္ဂဏှာတီ’’တိ.

၇၄၆. န ဝတ္တဗ္ဗံ – ‘‘ပရော ပရဿ စိတ္တံ ပဂ္ဂဏှာတီ’’တိ? အာမန္တာ. နနု အတ္ထိ ဗလပ္ပတ္တာ၊ အတ္ထိ ဝသီဘူတာတိ? အာမန္တာ. ဟဉ္စိ အတ္ထိ ဗလပ္ပတ္တာ၊ အတ္ထိ ဝသီဘူတာ၊ တေန ဝတ ရေ ဝတ္တဗ္ဗေ – ‘‘ပရော ပရဿ စိတ္တံ ပဂ္ဂဏှာတီ’’တိ.

ပဂ္ဂဟကထာ နိဋ္ဌိတာ.