(၁၄၀) ၅. အညော အနုသယောတိကထာ

၇၀၀. အညော ကာမရာဂါနုသယော အညံ ကာမရာဂပရိယုဋ္ဌာနန္တိ? အာမန္တာ. အညော ကာမရာဂေါ အညံ ကာမရာဂပရိယုဋ္ဌာနန္တိ? န ဟေဝံ ဝတ္တဗ္ဗေ။ပေ။ သွေဝ ကာမရာဂေါ တံ ကာမရာဂပရိယုဋ္ဌာနန္တိ? အာမန္တာ. သွေဝ ကာမရာဂါနုသယော တံ ကာမရာဂပရိယုဋ္ဌာနန္တိ? န ဟေဝံ ဝတ္တဗ္ဗေ။ပေ။.

အညော ပဋိဃာနုသယော အညံ ပဋိဃပရိယုဋ္ဌာနန္တိ? အာမန္တာ. အညံ ပဋိဃံ အညံ ပဋိဃပရိယုဋ္ဌာနန္တိ? န ဟေဝံ ဝတ္တဗ္ဗေ။ပေ။ တညေဝ ပဋိဃံ တံ ပဋိဃပရိယုဋ္ဌာနန္တိ? အာမန္တာ. သွေဝ ပဋိဃာနုသယော တံ ပဋိဃပရိယုဋ္ဌာနန္တိ? န ဟေဝံ ဝတ္တဗ္ဗေ။ပေ။.

အညော မာနာနုသယော အညံ မာနပရိယုဋ္ဌာနန္တိ? အာမန္တာ. အညော မာနော အညံ မာနပရိယုဋ္ဌာနန္တိ? န ဟေဝံ ဝတ္တဗ္ဗေ။ပေ။ သွေဝ မာနော တံ မာနပရိယုဋ္ဌာနန္တိ? အာမန္တာ. သွေဝ မာနာနုသယော တံ မာနပရိယုဋ္ဌာနန္တိ? န ဟေဝံ ဝတ္တဗ္ဗေ။ပေ။.

အညော ဒိဋ္ဌာနုသယော အညံ ဒိဋ္ဌိပရိယုဋ္ဌာနန္တိ? အာမန္တာ. အညာ ဒိဋ္ဌိ အညံ ဒိဋ္ဌိပရိယုဋ္ဌာနန္တိ? န ဟေဝံ ဝတ္တဗ္ဗေ။ပေ။ သာဝ ဒိဋ္ဌိ တံ ဒိဋ္ဌိပရိယုဋ္ဌာနန္တိ? အာမန္တာ. သွေဝ ဒိဋ္ဌာနုသယော တံ ဒိဋ္ဌိပရိယုဋ္ဌာနန္တိ? န ဟေဝံ ဝတ္တဗ္ဗေ။ပေ။.

အညော ဝိစိကိစ္ဆာနုသယော အညံ ဝိစိကိစ္ဆာပရိယုဋ္ဌာနန္တိ? အာမန္တာ. အညာ ဝိစိကိစ္ဆာ အညံ ဝိစိကိစ္ဆာပရိယုဋ္ဌာနန္တိ? န ဟေဝံ ဝတ္တဗ္ဗေ။ပေ။ သာဝ ဝိစိကိစ္ဆာ တံ ဝိစိကိစ္ဆာပရိယုဋ္ဌာနန္တိ? အာမန္တာ. သွေဝ ဝိစိကိစ္ဆာနုသယော တံ ဝိစိကိစ္ဆာပရိယုဋ္ဌာနန္တိ? န ဟေဝံ ဝတ္တဗ္ဗေ။ပေ။.

အညော ဘဝရာဂါနုသယော အညံ ဘဝရာဂပရိယုဋ္ဌာနန္တိ? အာမန္တာ. အညော ဘဝရာဂေါ အညံ ဘဝရာဂပရိယုဋ္ဌာနန္တိ? န ဟေဝံ ဝတ္တဗ္ဗေ။ပေ။ သွေဝ ဘဝရာဂေါ တံ ဘဝရာဂပရိယုဋ္ဌာနန္တိ? အာမန္တာ. သွေဝ ဘဝရာဂါနုသယော တံ ဘဝရာဂပရိယုဋ္ဌာနန္တိ? န ဟေဝံ ဝတ္တဗ္ဗေ။ပေ။.

အညော အဝိဇ္ဇာနုသယော အညံ အဝိဇ္ဇာပရိယုဋ္ဌာနန္တိ? အာမန္တာ. အညာ အဝိဇ္ဇာ အညံ အဝိဇ္ဇာပရိယုဋ္ဌာနန္တိ? န ဟေဝံ ဝတ္တဗ္ဗေ။ပေ။ သာဝ အဝိဇ္ဇာ တံ အဝိဇ္ဇာပရိယုဋ္ဌာနန္တိ? အာမန္တာ. သွေဝ အဝိဇ္ဇာနုသယော တံ အဝိဇ္ဇာပရိယုဋ္ဌာနန္တိ? န ဟေဝံ ဝတ္တဗ္ဗေ။ပေ။.

၇၀၁. န ဝတ္တဗ္ဗံ – ‘‘အညော အနုသယော အညံ ပရိယုဋ္ဌာန’’န္တိ? အာမန္တာ. ပုထုဇ္ဇနော ကုသလာဗျာကတေ စိတ္တေ ဝတ္တမာနေ ‘‘သာနုသယော’’တိ ဝတ္တဗ္ဗောတိ? အာမန္တာ. ‘‘ပရိယုဋ္ဌိတော’’တိ ဝတ္တဗ္ဗောတိ? န ဟေဝံ ဝတ္တဗ္ဗေ. တေန ဟိ အညော အနုသယော အညံ ပရိယုဋ္ဌာနန္တိ. ပုထုဇ္ဇနော ကုသလာဗျာကတေ စိတ္တေ ဝတ္တမာနေ ‘‘သရာဂေါ’’တိ ဝတ္တဗ္ဗောတိ? အာမန္တာ. ‘‘ပရိယုဋ္ဌိတော’’တိ ဝတ္တဗ္ဗောတိ? န ဟေဝံ ဝတ္တဗ္ဗေ. တေန ဟိ အညော ရာဂေါ အညံ ပရိယုဋ္ဌာနန္တိ.

အညော အနုသယောတိကထာ နိဋ္ဌိတာ.