၁၄. စုဒ္ဒသမဝဂ္ဂေါ

(၁၄၁) ၆. ပရိယုဋ္ဌာနံ စိတ္တဝိပ္ပယုတ္တန္တိကထာ

၇၀၂. ပရိယုဋ္ဌာနံ စိတ္တဝိပ္ပယုတ္တန္တိ? အာမန္တာ. ရူပံ နိဗ္ဗာနံ စက္ခာယတနံ။ပေ။ ဖောဋ္ဌဗ္ဗာယတနန္တိ? န ဟေဝံ ဝတ္တဗ္ဗေ။ပေ။ ပရိယုဋ္ဌာနံ စိတ္တဝိပ္ပယုတ္တန္တိ? အာမန္တာ. နတ္ထိ သရာဂံ စိတ္တံ သဒေါသံ စိတ္တံ သမောဟံ စိတ္တံ။ပေ။ အကုသလံ စိတ္တံ သံကိလိဋ္ဌံ စိတ္တန္တိ? န ဟေဝံ ဝတ္တဗ္ဗေ။ပေ။ နနု အတ္ထိ သရာဂံ စိတ္တံ သဒေါသံ စိတ္တံ သမောဟံ စိတ္တံ။ပေ။ အကုသလံ စိတ္တံ သံကိလိဋ္ဌံ စိတ္တန္တိ? အာမန္တာ. ဟဉ္စိ အတ္ထိ သရာဂံ စိတ္တံ သဒေါသံ စိတ္တံ သမောဟံ စိတ္တံ။ပေ။ အကုသလံ စိတ္တံ သံကိလိဋ္ဌံ စိတ္တံ၊ နော စ ဝတ ရေ ဝတ္တဗ္ဗေ – ‘‘ပရိယုဋ္ဌာနံ စိတ္တဝိပ္ပယုတ္တ’’န္တိ.

ပရိယုဋ္ဌာနံ စိတ္တဝိပ္ပယုတ္တန္တိကထာ နိဋ္ဌိတာ.