၁၄. စုဒ္ဒသမဝဂ္ဂေါ

(၁၃၈) ၃. အနန္တရပစ္စယကထာ

၆၉၃. စက္ခုဝိညာဏဿ အနန္တရာ သောတဝိညာဏံ ဥပ္ပဇ္ဇတီတိ? အာမန္တာ. ယာ စက္ခုဝိညာဏဿ ဥပ္ပါဒါယ အာဝဋ္ဋနာ။ပေ။ ပဏိဓိ၊ သာဝ သောတဝိညာဏဿ ဥပ္ပါဒါယ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။.

စက္ခုဝိညာဏဿ အနန္တရာ သောတဝိညာဏံ ဥပ္ပဇ္ဇတိ၊ န ဝတ္တဗ္ဗံ – ‘‘ယာ စက္ခုဝိညာဏဿ ဥပ္ပါဒါယ အာဝဋ္ဋနာ။ပေ။ ပဏိဓိ၊ သာဝ သောတဝိညာဏဿ ဥပ္ပါဒါယ အာဝဋ္ဋနာ။ပေ။ ပဏိဓီတိ? အာမန္တာ. သောတဝိညာဏံ အနာဝဋ္ဋေန္တဿ ဥပ္ပဇ္ဇတိ။ပေ။ အပ္ပဏိဒဟန္တဿ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ။. နနု သောတဝိညာဏံ အာဝဋ္ဋေန္တဿ ဥပ္ပဇ္ဇတိ။ပေ။ ပဏိဒဟန္တဿ ဥပ္ပဇ္ဇတီတိ၊ အာမန္တာ. ဟဉ္စိ သောတဝိညာဏံ အာဝဋ္ဋေန္တဿ ဥပ္ပဇ္ဇတိ။ပေ။ ပဏိဒဟန္တဿ ဥပ္ပဇ္ဇတိ၊ နော စ ဝတ ရေ ဝတ္တဗ္ဗေ – ‘‘စက္ခုဝိညာဏဿ အနန္တရာ သောတဝိညာဏံ ဥပ္ပဇ္ဇတီ’’တိ.

၆၉၄. စက္ခုဝိညာဏဿ အနန္တရာ သောတဝိညာဏံ ဥပ္ပဇ္ဇတီတိ? အာမန္တာ. စက္ခုဝိညာဏံ ရူပနိမိတ္တံ မနသိကရောတော ဥပ္ပဇ္ဇတီတိ? အာမန္တာ. သောတဝိညာဏံ ရူပနိမိတ္တံ မနသိကရောတော ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ။.

စက္ခုဝိညာဏံ ရူပါရမ္မဏညေဝ န အညာရမ္မဏန္တိ? အာမန္တာ. သောတဝိညာဏံ ရူပါရမ္မဏညေဝ န အညာရမ္မဏန္တိ? န ဟေဝံ ဝတ္တဗ္ဗေ။ပေ။.

စက္ခုဉ္စ ပဋိစ္စ ရူပေ စ ဥပ္ပဇ္ဇတိ စက္ခုဝိညာဏန္တိ? အာမန္တာ. စက္ခုဉ္စ ပဋိစ္စ ရူပေ စ ဥပ္ပဇ္ဇတိ သောတဝိညာဏန္တိ? န ဟေဝံ ဝတ္တဗ္ဗေ။ပေ။.

စက္ခုဉ္စ ပဋိစ္စ ရူပေ စ ဥပ္ပဇ္ဇတိ သောတဝိညာဏန္တိ? အာမန္တာ. ‘‘စက္ခုဉ္စ ပဋိစ္စ ရူပေ စ ဥပ္ပဇ္ဇတိ သောတဝိညာဏ’’န္တိ – အတ္ထေဝ သုတ္တန္တောတိ? နတ္ထိ. ‘‘စက္ခုဉ္စ ပဋိစ္စ ရူပေ စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တောတိ? အာမန္တာ. ဟဉ္စိ ‘‘စက္ခုဉ္စ ပဋိစ္စ ရူပေ စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တော၊ နော စ ဝတ ရေ ဝတ္တဗ္ဗေ – ‘‘စက္ခုဉ္စ ပဋိစ္စ ရူပေ စ ဥပ္ပဇ္ဇတိ သောတဝိညာဏ’’န္တိ.

စက္ခုဝိညာဏဿ အနန္တရာ သောတဝိညာဏံ ဥပ္ပဇ္ဇတီတိ? အာမန္တာ. တညေဝ စက္ခုဝိညာဏံ တံ သောတဝိညာဏန္တိ? န ဟေဝံ ဝတ္တဗ္ဗေ။ပေ။.

၆၉၅. သောတဝိညာဏဿ အနန္တရာ ဃာနဝိညာဏံ ဥပ္ပဇ္ဇတိ။ပေ။ ဃာနဝိညာဏဿ အနန္တရာ ဇိဝှါဝိညာဏံ ဥပ္ပဇ္ဇတိ။ပေ။ ဇိဝှါဝိညာဏဿ အနန္တရာ ကာယဝိညာဏံ ဥပ္ပဇ္ဇတီတိ? အာမန္တာ. ယာ ဇိဝှါဝိညာဏဿ ဥပ္ပါဒါယ အာဝဋ္ဋနာ။ပေ။ ပဏိဓိ၊ သာဝ ကာယဝိညာဏဿ ဥပ္ပါဒါယ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။ ဇိဝှါဝိညာဏဿ အနန္တရာ ကာယဝိညာဏံ ဥပ္ပဇ္ဇတိ၊ န ဝတ္တဗ္ဗံ – ‘‘ယာ ဇိဝှါဝိညာဏဿ ဥပ္ပါဒါယ အာဝဋ္ဋနာ။ပေ။ ပဏိဓိ၊ သာဝ ကာယဝိညာဏဿ ဥပ္ပါဒါယ အာဝဋ္ဋနာ။ပေ။ ပဏိဓီ’’တိ? အာမန္တာ. ကာယဝိညာဏံ အနာဝဋ္ဋေန္တဿ ဥပ္ပဇ္ဇတိ။ပေ။ အပ္ပဏိဒဟန္တဿ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ။ နနု ကာယဝိညာဏံ အာဝဋ္ဋေန္တဿ ဥပ္ပဇ္ဇတိ။ပေ။ ပဏိဒဟန္တဿ ဥပ္ပဇ္ဇတီတိ? အာမန္တာ. ဟဉ္စိ ကာယဝိညာဏံ အာဝဋ္ဋေန္တဿ ဥပ္ပဇ္ဇတိ။ပေ။ ပဏိဒဟန္တဿ ဥပ္ပဇ္ဇတိ၊ နော စ ဝတ ရေ ဝတ္တဗ္ဗေ – ‘‘ဇိဝှါဝိညာဏဿ အနန္တရာ ကာယဝိညာဏံ ဥပ္ပဇ္ဇတီ’’တိ.

၆၉၆. ဇိဝှါဝိညာဏဿ အနန္တရာ ကာယဝိညာဏံ ဥပ္ပဇ္ဇတီတိ? အာမန္တာ. ဇိဝှါဝိညာဏံ ရသနိမိတ္တံ မနသိကရောတော ဥပ္ပဇ္ဇတီတိ? အာမန္တာ. ကာယဝိညာဏံ ရသနိမိတ္တံ မနသိကရောတော ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ။.

ဇိဝှါဝိညာဏံ ရသာရမ္မဏညေဝ န အညာရမ္မဏန္တိ? အာမန္တာ. ကာယဝိညာဏံ ရသာရမ္မဏညေဝ န အညာရမ္မဏန္တိ? န ဟေဝံ ဝတ္တဗ္ဗေ။ပေ။.

ဇိဝှဉ္စ ပဋိစ္စ ရသေ စ ဥပ္ပဇ္ဇတိ ဇိဝှါဝိညာဏန္တိ? အာမန္တာ. ဇိဝှဉ္စ ပဋိစ္စ ရသေ စ ဥပ္ပဇ္ဇတိ ကာယဝိညာဏန္တိ? န ဟေဝံ ဝတ္တဗ္ဗေ။ပေ။.

ဇိဝှဉ္စ ပဋိစ္စ ရသေ စ ဥပ္ပဇ္ဇတိ ကာယဝိညာဏန္တိ? အာမန္တာ. ‘‘ဇိဝှဉ္စ ပဋိစ္စ ရသေ စ ဥပ္ပဇ္ဇတိ ကာယဝိညာဏ’’န္တိ – အတ္ထေဝ သုတ္တန္တောတိ? နတ္ထိ. ‘‘ဇိဝှဉ္စ ပဋိစ္စ ရသေ စ ဥပ္ပဇ္ဇတိ ဇိဝှါဝိညာဏ’’န္တိ – အတ္ထေဝ သုတ္တန္တောတိ? အာမန္တာ. ဟဉ္စိ ‘‘ဇိဝှဉ္စ ပဋိစ္စ ရသေ စ ဥပ္ပဇ္ဇတိ ဇိဝှါဝိညာဏ’’န္တိ – အတ္ထေဝ သုတ္တန္တောတိ၊ နော စ ဝတ ရေ ဝတ္တဗ္ဗေ – ‘‘ဇိဝှဉ္စ ပဋိစ္စ ရသေ စ ဥပ္ပဇ္ဇတိ ကာယဝိညာဏ’’န္တိ.

ဇိဝှါဝိညာဏဿ အနန္တရာ ကာယဝိညာဏံ ဥပ္ပဇ္ဇတီတိ? အာမန္တာ. တညေဝ ဇိဝှါဝိညာဏံ တံ ကာယဝိညာဏန္တိ? န ဟေဝံ ဝတ္တဗ္ဗေ။ပေ။.

၆၉၇. န ဝတ္တဗ္ဗံ – ‘‘ပဉ္စဝိညာဏာ အညမညဿ သမနန္တရာ ဥပ္ပဇ္ဇန္တီ’’တိ? အာမန္တာ. နနု အတ္ထိ ကောစိ နစ္စတိ ဂါယတိ ဝါဒေတိ၊ ရူပဉ္စ ပဿတိ၊ သဒ္ဒဉ္စ သုဏာတိ၊ ဂန္ဓဉ္စ ဃာယတိ၊ ရသဉ္စ သာယတိ၊ ဖောဋ္ဌဗ္ဗဉ္စ ဖုသတီတိ? အာမန္တာ. ဟဉ္စိ အတ္ထိ ကောစိ နစ္စတိ ဂါယတိ ဝါဒေတိ၊ ရူပဉ္စ ပဿတိ၊ သဒ္ဒဉ္စ သုဏာတိ၊ ဂန္ဓဉ္စ ဃာယတိ၊ ရသဉ္စ သာယတိ၊ ဖောဋ္ဌဗ္ဗဉ္စ ဖုသတိ၊ တေန ဝတ ရေ ဝတ္တဗ္ဗေ – ‘‘ပဉ္စဝိညာဏာ အညမညဿ သမနန္တရာ ဥပ္ပဇ္ဇန္တီ’’တိ.

အနန္တရပစ္စယကထာ နိဋ္ဌိတာ.