၁၄. စုဒ္ဒသမဝဂ္ဂေါ

(၁၃၉) ၄. အရိယရူပကထာ

၆၉၈. အရိယရူပံ မဟာဘူတာနံ ဥပါဒါယာတိ? အာမန္တာ. အရိယရူပံ ကုသလန္တိ? အာမန္တာ. မဟာဘူတာ ကုသလာတိ? န ဟေဝံ ဝတ္တဗ္ဗေ ။ပေ။ မဟာဘူတာ အဗျာကတာတိ? အာမန္တာ. အရိယရူပံ အဗျာကတန္တိ? န ဟေဝံ ဝတ္တဗ္ဗေ။ပေ။ အရိယရူပံ မဟာဘူတာနံ ဥပါဒါယာတိ? အာမန္တာ. အရိယရူပံ အနာသဝံ အသံယောဇနိယံ အဂန္ထနိယံ အနောဃနိယံ အယောဂနိယံ အနီဝရဏိယံ အပရာမဋ္ဌံ အနုပါဒါနိယံ အသံကိလေသိယန္တိ? အာမန္တာ. မဟာဘူတာ အနာသဝါ။ပေ။ အသံကိလေသိယာတိ? န ဟေဝံ ဝတ္တဗ္ဗေ။ပေ။ မဟာဘူတာ သာသဝါ သံယောဇနိယာ။ပေ။ သံကိလေသိယာတိ? အာမန္တာ. အရိယရူပံ သာသဝံ သံယောဇနိယံ။ပေ။ သံကိလေသိယန္တိ? န ဟေဝံ ဝတ္တဗ္ဗေ။ပေ။.

၆၉၉. န ဝတ္တဗ္ဗံ – ‘‘အရိယရူပံ မဟာဘူတာနံ ဥပါဒါယာ’’တိ? အာမန္တာ. နနု ဝုတ္တံ ဘဂဝတာ – ‘‘ယံ ကိဉ္စိ၊ ဘိက္ခဝေ၊ ရူပံ စတ္တာရိ မဟာဘူတာနိ စတုန္နဉ္စ မဟာဘူတာနံ ဥပါဒါယရူပ’’န္တိ [မ. နိ. ၁.၃၄၇၊ အ. နိ. ၁၁.၁၅]! အတ္ထေဝ သုတ္တန္တောတိ? အာမန္တာ. တေန ဟိ အရိယရူပံ မဟာဘူတာနံ ဥပါဒါယာတိ.

အရိယရူပကထာ နိဋ္ဌိတာ.