၁၄. စုဒ္ဒသမဝဂ္ဂေါ

(၁၃၇) ၂. သဠာယတနုပ္ပတ္တိကထာ

၆၉၁. သဠာယတနံ အပုဗ္ဗံ အစရိမံ မာတုကုစ္ဆိသ္မိံ သဏ္ဌာတီတိ? အာမန္တာ. သဗ္ဗင်္ဂပစ္စင်္ဂီ အဟီနိန္ဒြိယော မာတုကုစ္ဆိသ္မိံ ဩက္ကမတီတိ? န ဟေဝံ ဝတ္တဗ္ဗေ။ပေ။.

ဥပပတ္တေသိယေန စိတ္တေန စက္ခာယတနံ သဏ္ဌာတီတိ? အာမန္တာ. ဥပပတ္တေသိယေန စိတ္တေန ဟတ္ထာ သဏ္ဌန္တိ၊ ပါဒါ သဏ္ဌန္တိ၊ သီသံ သဏ္ဌာတိ၊ ကဏ္ဏော သဏ္ဌာတိ၊ နာသိကာ သဏ္ဌာတိ၊ မုခံ သဏ္ဌာတိ၊ ဒန္တာ သဏ္ဌန္တီတိ? န ဟေဝံ ဝတ္တဗ္ဗေ။ပေ။.

ဥပပတ္တေသိယေန စိတ္တေန သောတာယတနံ။ပေ။ ဃာနာယတနံ။ပေ။ ဇိဝှါယတနံ သဏ္ဌာတီတိ? အာမန္တာ. ဥပပတ္တေသိယေန စိတ္တေန ဟတ္ထာ သဏ္ဌန္တိ၊ ပါဒါ သဏ္ဌန္တိ၊ သီသံ သဏ္ဌာတိ၊ ကဏ္ဏော သဏ္ဌာတိ၊ နာသိကာ သဏ္ဌာတိ၊ မုခံ သဏ္ဌာတိ၊ ဒန္တာ သဏ္ဌန္တီတိ? န ဟေဝံ ဝတ္တဗ္ဗေ။ပေ။.

၆၉၂. မာတုကုစ္ဆိဂတဿ ပစ္ဆာ စက္ခာယတနံ ဥပ္ပဇ္ဇတီတိ? အာမန္တာ. မာတုကုစ္ဆိသ္မိံ စက္ခုပဋိလာဘာယ ကမ္မံ ကရောတီတိ? န ဟေဝံ ဝတ္တဗ္ဗေ။ပေ။ မာတုကုစ္ဆိဂတဿ ပစ္ဆာ သောတာယတနံ။ပေ။ ဃာနာယတနံ။ပေ။ ဇိဝှါယတနံ ဥပ္ပဇ္ဇတီတိ? အာမန္တာ. မာတုကုစ္ဆိသ္မိံ ဇိဝှါပဋိလာဘာယ ကမ္မံ ကရောတီတိ? န ဟေဝံ ဝတ္တဗ္ဗေ။ပေ။.

မာတုကုစ္ဆိဂတဿ ပစ္ဆာ ကေသာ လောမာ နခါ ဒန္တာ အဋ္ဌီ ဥပ္ပဇ္ဇန္တီတိ? အာမန္တာ. မာတုကုစ္ဆိသ္မိံ အဋ္ဌိပဋိလာဘာယ ကမ္မံ ကရောတီတိ? န ဟေဝံ ဝတ္တဗ္ဗေ။ပေ။.

န ဝတ္တဗ္ဗံ – ‘‘မာတုကုစ္ဆိဂတဿ ပစ္ဆာ ကေသာ လောမာ နခါ ဒန္တာ အဋ္ဌီ ဥပ္ပဇ္ဇန္တီ’’တိ? အာမန္တာ. နနု ဝုတ္တံ ဘဂဝတာ –

‘‘ပဌမံ ကလလံ ဟောတိ၊ ကလလာ ဟောတိ အဗ္ဗုဒံ၊

အဗ္ဗုဒါ ဇာယတေ ပေသိ [ပေသီ (သျာ. ကံ. ပီ.)]၊ ပေသိ နိဗ္ဗတ္တတေ [နိဗ္ဗတ္တတီ (သီ. သျာ.၊ သံ. နိ. ၁.၂၃၅)၊ နိဗ္ဗတ္တတိ (ပီ. က.)] ဃနော၊

ဃနာ ပသာခါ ဇာယန္တိ၊ ကေသာ လောမာ နခါပိ စ.

‘‘ယဉ္စဿ ဘုဉ္ဇတိ မာတာ၊ အန္နံ ပါနဉ္စ ဘောဇနံ၊

တေန သော တတ္ထ ယာပေတိ၊ မာတုကုစ္ဆိဂတော နရော’’တိ [သံ. နိ. ၁.၂၃၅].

အတ္ထေဝ သုတ္တန္တောတိ? အာမန္တာ. တေန ဟိ မာတုကုစ္ဆိဂတဿ ပစ္ဆာ ကေသာ လောမာ နခါ ဒန္တာ အဋ္ဌီ ဥပ္ပဇ္ဇန္တီတိ.

သဠာယတနုပ္ပတ္တိကထာ နိဋ္ဌိတာ.