(၁၃၆) ၁. ကုသလာကုသလပဋိသန္ဒဟနကထာ

၆၈၆. အကုသလမူလံ ပဋိသန္ဒဟတိ ကုသလမူလန္တိ? အာမန္တာ. ယာ အကုသလဿ ဥပ္ပါဒါယ အာဝဋ္ဋနာ။ပေ။ ပဏိဓိ၊ သာဝ ကုသလဿ ဥပ္ပါဒါယ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။.

အကုသလမူလံ ပဋိသန္ဒဟတိ ကုသလမူလံ၊ န ဝတ္တဗ္ဗံ – ‘‘ယာ အကုသလဿ ဥပ္ပါဒါယ အာဝဋ္ဋနာ။ပေ။ ပဏိဓိ၊ သာဝ ကုသလဿ ဥပ္ပါဒါယ အာဝဋ္ဋနာ။ပေ။ ပဏိဓီ’’တိ? အာမန္တာ. ကုသလံ အနာဝဋ္ဋေန္တဿ [အနာဝဋ္ဋန္တဿ (သီ. ပီ. က.)၊ အနာဝဇ္ဇန္တဿ (သျာ. ကံ.)] ဥပ္ပဇ္ဇတိ ။ပေ။ အပ္ပဏိဒဟန္တဿ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ။ နနု ကုသလံ အာဝဋ္ဋေန္တဿ ဥပ္ပဇ္ဇတိ။ပေ။ ပဏိဒဟန္တဿ ဥပ္ပဇ္ဇတီတိ? အာမန္တာ. ဟဉ္စိ ကုသလံ အာဝဋ္ဋေန္တဿ ဥပ္ပဇ္ဇတိ။ပေ။ ပဏိဒဟန္တဿ ဥပ္ပဇ္ဇတိ၊ နော စ ဝတ ရေ ဝတ္တဗ္ဗေ – ‘‘အကုသလမူလံ ပဋိသန္ဒဟတိ ကုသလမူလ’’န္တိ.

၆၈၇. အကုသလမူလံ ပဋိသန္ဒဟတိ ကုသလမူလန္တိ? အာမန္တာ. အကုသလမူလံ အယောနိသော မနသိကရောတော ဥပ္ပဇ္ဇတီတိ? အာမန္တာ. ကုသလံ အယောနိသော မနသိကရောတော ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ။ နနု ကုသလံ ယောနိသော မနသိကရောတော ဥပ္ပဇ္ဇတီတိ? အာမန္တာ. ဟဉ္စိ ကုသလံ ယောနိသော မနသိကရောတော ဥပ္ပဇ္ဇတိ၊ နော စ ဝတ ရေ ဝတ္တဗ္ဗေ – ‘‘အကုသလမူလံ ပဋိသန္ဒဟတိ ကုသလမူလ’’န္တိ.

အကုသလမူလံ ပဋိသန္ဒဟတိ ကုသလမူလန္တိ? အာမန္တာ. ကာမသညာယ အနန္တရာ နေက္ခမ္မသညာ ဥပ္ပဇ္ဇတိ၊ ဗျာပါဒသညာယ အနန္တရာ အဗျာပါဒသညာ ဥပ္ပဇ္ဇတိ၊ ဝိဟိံသာသညာယ အနန္တရာ အဝိဟိံသာသညာ ဥပ္ပဇ္ဇတိ၊ ဗျာပါဒဿ အနန္တရာ မေတ္တာ ဥပ္ပဇ္ဇတိ၊ ဝိဟိံသာယ အနန္တရာ ကရုဏာ ဥပ္ပဇ္ဇတိ၊ အရတိယာ အနန္တရာ မုဒိတာ ဥပ္ပဇ္ဇတိ၊ ပဋိဃဿ အနန္တရာ ဥပေက္ခာ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ။.

၆၈၈. ကုသလမူလံ ပဋိသန္ဒဟတိ အကုသလမူလန္တိ? အာမန္တာ. ယာ ကုသလဿ ဥပ္ပါဒါယ အာဝဋ္ဋနာ။ပေ။ ပဏိဓိ၊ သာဝ အကုသလဿ ဥပ္ပါဒါယ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။.

ကုသလမူလံ ပဋိသန္ဒဟတိ အကုသလမူလံ၊ န ဝတ္တဗ္ဗံ – ‘‘ယာ ကုသလဿ ဥပ္ပါဒါယ အာဝဋ္ဋနာ။ပေ။ ပဏိဓိ၊ သာဝ အကုသလဿ ဥပ္ပါဒါယ အာဝဋ္ဋနာ။ပေ။ ပဏိဓီ’’တိ? အာမန္တာ. အကုသလံ အနာဝဋ္ဋေန္တဿ ဥပ္ပဇ္ဇတိ။ပေ။ အပ္ပဏိဒဟန္တဿ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ။ နနု အကုသလံ အာဝဋ္ဋေန္တဿ ဥပ္ပဇ္ဇတိ။ပေ။ ပဏိဒဟန္တဿ ဥပ္ပဇ္ဇတီတိ? အာမန္တာ. ဟဉ္စိ အကုသလံ အာဝဋ္ဋေန္တဿ ဥပ္ပဇ္ဇတိ။ပေ။ ပဏိဒဟန္တဿ ဥပ္ပဇ္ဇတိ၊ နော စ ဝတ ရေ ဝတ္တဗ္ဗေ – ‘‘ကုသလမူလံ ပဋိသန္ဒဟတိ အကုသလမူလ’’န္တိ.

၆၈၉. ကုသလမူလံ ပဋိသန္ဒဟတိ အကုသလမူလန္တိ? အာမန္တာ. ကုသလံ ယောနိသော မနသိကရောတော ဥပ္ပဇ္ဇတီတိ? အာမန္တာ. အကုသလံ ယောနိသော မနသိကရောတော ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ။ နနု အကုသလံ အယောနိသော မနသိကရောတော ဥပ္ပဇ္ဇတီတိ? အာမန္တာ. ဟဉ္စိ အကုသလံ အယောနိသော မနသိကရောတော ဥပ္ပဇ္ဇတိ၊ နော စ ဝတ ရေ ဝတ္တဗ္ဗေ – ‘‘ကုသလမူလံ ပဋိသန္ဒဟတိ အကုသလမူလ’’န္တိ.

ကုသလမူလံ ပဋိသန္ဒဟတိ အကုသလမူလန္တိ? အာမန္တာ. နေက္ခမ္မသညာယ အနန္တရာ ကာမသညာ ဥပ္ပဇ္ဇတိ၊ အဗျာပါဒသညာယ အနန္တရာ ဗျာပါဒသညာ ဥပ္ပဇ္ဇတိ၊ အဝိဟိံသာသညာယ အနန္တရာ ဝိဟိံသာသညာ ဥပ္ပဇ္ဇတိ၊ မေတ္တာယ အနန္တရာ ဗျာပါဒေါ ဥပ္ပဇ္ဇတိ၊ ကရုဏာယ အနန္တရာ ဝိဟိံသာ ဥပ္ပဇ္ဇတိ၊ မုဒိတာယ အနန္တရာ အရတိ ဥပ္ပဇ္ဇတိ၊ ဥပေက္ခာယ အနန္တရာ ပဋိဃံ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ။.

၆၉၀. န ဝတ္တဗ္ဗံ – ‘‘အကုသလမူလံ ပဋိသန္ဒဟတိ ကုသလမူလံ၊ ကုသလမူလံ ပဋိသန္ဒဟတိ အကုသလမူလ’’န္တိ? အာမန္တာ. နနု ယသ္မိံယေဝ ဝတ္ထုသ္မိံ ရဇ္ဇတိ တသ္မိညေဝ ဝတ္ထုသ္မိံ ဝိရဇ္ဇတိ၊ ယသ္မိံယေဝ ဝတ္ထုသ္မိံ ဝိရဇ္ဇတိ တသ္မိညေဝ ဝတ္ထုသ္မိံ ရဇ္ဇတီတိ? အာမန္တာ. ဟဉ္စိ ယသ္မိညေဝ ဝတ္ထုသ္မိံ ရဇ္ဇတိ တသ္မိညေဝ ဝတ္ထုသ္မိံ ဝိရဇ္ဇတိ၊ ယသ္မိညေဝ ဝတ္ထုသ္မိံ ဝိရဇ္ဇတိ တသ္မိညေဝ ဝတ္ထုသ္မိံ ရဇ္ဇတိ၊ တေန ဝတ ရေ ဝတ္တဗ္ဗေ – ‘‘အကုသလမူလံ ပဋိသန္ဒဟတိ ကုသလမူလံ၊ ကုသလမူလံ ပဋိသန္ဒဟတိ အကုသလမူလ’’န္တိ.

ကုသလာကုသလပဋိသန္ဒဟနကထာ နိဋ္ဌိတာ.