၁၂. ဒွါဒသမဝဂ္ဂေါ

(၁၂၃) ၈. ဇီဝိတာ ဝေါရောပနကထာ

၆၄၈. ဒိဋ္ဌိသမ္ပန္နော ပုဂ္ဂလော သဉ္စိစ္စ ပါဏံ ဇီဝိတာ ဝေါရောပေယျာတိ? အာမန္တာ. ဒိဋ္ဌိသမ္ပန္နော ပုဂ္ဂလော သဉ္စိစ္စ မာတရံ ဇီဝိတာ ဝေါရောပေယျ။ပေ။ ပိတရံ ဇီဝိတာ ဝေါရောပေယျ ။ပေ။ အရဟန္တံ ဇီဝိတာ ဝေါရောပေယျ။ပေ။ ဒုဋ္ဌေန စိတ္တေန တထာဂတဿ လောဟိတံ ဥပ္ပါဒေယျ။ပေ။ သံဃံ ဘိန္ဒေယျာတိ? န ဟေဝံ ဝတ္တဗ္ဗေ။ပေ။.

ဒိဋ္ဌိသမ္ပန္နော ပုဂ္ဂလော သဉ္စိစ္စ ပါဏံ ဇီဝိတာ ဝေါရောပေယျာတိ? အာမန္တာ. ဒိဋ္ဌိသမ္ပန္နော ပုဂ္ဂလော သတ္ထရိ အဂါရဝေါတိ? န ဟေဝံ ဝတ္တဗ္ဗေ။ပေ။ ဓမ္မေ။ပေ။ သံဃေ။ပေ။ သိက္ခာယ အဂါရဝေါတိ? န ဟေဝံ ဝတ္တဗ္ဗေ။ပေ။.

နနု ဒိဋ္ဌိသမ္ပန္နော ပုဂ္ဂလော သတ္ထရိ သဂါရဝေါတိ? အာမန္တာ. ဟဉ္စိ ဒိဋ္ဌိသမ္ပန္နော ပုဂ္ဂလော သတ္ထရိ သဂါရဝေါ၊ နော စ ဝတ ရေ ဝတ္တဗ္ဗေ – ‘‘ဒိဋ္ဌိသမ္ပန္နော ပုဂ္ဂလော သဉ္စိစ္စ ပါဏံ ဇီဝိတာ ဝေါရောပေယျာ’’တိ. နနု ဒိဋ္ဌိသမ္ပန္နော ပုဂ္ဂလော ဓမ္မေ။ပေ။ သံဃေ။ပေ။ သိက္ခာယ သဂါရဝေါတိ? အာမန္တာ. ဟဉ္စိ ဒိဋ္ဌိသမ္ပန္နော ပုဂ္ဂလော သိက္ခာယ သဂါရဝေါ၊ နော စ ဝတ ရေ ဝတ္တဗ္ဗေ – ‘‘ဒိဋ္ဌိသမ္ပန္နော ပုဂ္ဂလော သဉ္စိစ္စ ပါဏံ ဇီဝိတာ ဝေါရောပေယျာ’’တိ.

၆၄၉. ဒိဋ္ဌိသမ္ပန္နော ပုဂ္ဂလော သတ္ထရိ အဂါရဝေါတိ? အာမန္တာ. ဒိဋ္ဌိသမ္ပန္နော ပုဂ္ဂလော ဗုဒ္ဓထူပေ ဩဟဒေယျ ဩမုတ္တေယျ နိဋ္ဌုဘေယျ ဗုဒ္ဓထူပေ အပဗျာမတော [အသဗျာကတော (သီ. က.)] ကရေယျာတိ? န ဟေဝံ ဝတ္တဗ္ဗေ။ပေ။.

ဒိဋ္ဌိသမ္ပန္နော ပုဂ္ဂလော သဉ္စိစ္စ ပါဏံ ဇီဝိတာ ဝေါရောပေယျာတိ? အာမန္တာ. နနု ဝုတ္တံ ဘဂဝတာ – ‘‘သေယျထာပိ၊ ဘိက္ခဝေ၊ မဟာသမုဒ္ဒေါ ဌိတဓမ္မော ဝေလံ နာတိဝတ္တတိ၊ ဧဝမေဝ ခေါ၊ ဘိက္ခဝေ၊ ယံ မယာ သာဝကာနံ သိက္ခာပဒံ ပညတ္တံ တံ မမ သာဝကာ ဇီဝိတဟေတုပိ နာတိက္ကမန္တီ’’တိ [စူဠဝ. ၃၈၅၊ အ. နိ. ၈.၂၀၊ ဥဒါ. ၄၅]! အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘ဒိဋ္ဌိသမ္ပန္နော ပုဂ္ဂလော သဉ္စိစ္စ ပါဏံ ဇီဝိတာ ဝေါရောပေယျာ’’တိ.

ဇီဝိတာ ဝေါရောပနကထာ နိဋ္ဌိတာ.