၁၂. ဒွါဒသမဝဂ္ဂေါ

(၁၂၄) ၉. ဒုဂ္ဂတိကထာ

၆၅၀. ဒိဋ္ဌိသမ္ပန္နဿ ပုဂ္ဂလဿ ပဟီနာ ဒုဂ္ဂတီတိ? အာမန္တာ. ဒိဋ္ဌိသမ္ပန္နော ပုဂ္ဂလော အာပါယိကေ ရူပေ ရဇ္ဇေယျာတိ? အာမန္တာ. ဟဉ္စိ ဒိဋ္ဌိသမ္ပန္နော ပုဂ္ဂလော အာပါယိကေ ရူပေ ရဇ္ဇေယျ၊ နော စ ဝတ ရေ ဝတ္တဗ္ဗေ – ‘‘ဒိဋ္ဌိသမ္ပန္နဿ ပုဂ္ဂလဿ ပဟီနာ ဒုဂ္ဂတီ’’တိ.

ဒိဋ္ဌိသမ္ပန္နဿ ပုဂ္ဂလဿ ပဟီနာ ဒုဂ္ဂတီတိ? အာမန္တာ. ဒိဋ္ဌိသမ္ပန္နော ပုဂ္ဂလော အာပါယိကေ သဒ္ဒေ။ပေ။ ဂန္ဓေ။ ရသေ။ ဖောဋ္ဌဗ္ဗေ။ပေ။ အမနုဿိတ္ထိယာ တိရစ္ဆာနဂတိတ္ထိယာ နာဂကညာယ မေထုနံ ဓမ္မံ ပဋိသေဝေယျ၊ အဇေဠကံ ပဋိဂ္ဂဏှေယျ၊ ကုက္ကုဋသူကရံ ပဋိဂ္ဂဏှေယျ၊ ဟတ္ထိဂဝဿဝဠဝံ ပဋိဂ္ဂဏှေယျ။ တိတ္တိရဝဋ္ဋကမောရကပိဉ္ဇရံ [။ ကပိဉ္ဇလံ (သျာ. ကံ. ပီ.)] ပဋိဂ္ဂဏှေယျာတိ? အာမန္တာ. ဟဉ္စိ ဒိဋ္ဌိသမ္ပန္နော ပုဂ္ဂလော တိတ္တိရဝဋ္ဋကမောရကပိဉ္ဇရံ ပဋိဂ္ဂဏှေယျ၊ နော စ ဝတ ရေ ဝတ္တဗ္ဗေ – ‘‘ဒိဋ္ဌိသမ္ပန္နဿ ပုဂ္ဂလဿ ပဟီနာ ဒုဂ္ဂတီ’’တိ.

၆၅၁. ဒိဋ္ဌိသမ္ပန္နဿ ပုဂ္ဂလဿ ပဟီနာ ဒုဂ္ဂတိ၊ ဒိဋ္ဌိသမ္ပန္နော ပုဂ္ဂလော အာပါယိကေ ရူပေ ရဇ္ဇေယျာတိ? အာမန္တာ. အရဟတော ပဟီနာ ဒုဂ္ဂတိ၊ အရဟာ အာပါယိကေ ရူပေ ရဇ္ဇေယျာတိ? န ဟေဝံ ဝတ္တဗ္ဗေ။ပေ။ ဒိဋ္ဌိသမ္ပန္နဿ ပုဂ္ဂလဿ ပဟီနာ ဒုဂ္ဂတိ၊ ဒိဋ္ဌိသမ္ပန္နော ပုဂ္ဂလော အာပါယိကေ သဒ္ဒေ။ ဂန္ဓေ။ ရသေ။ ဖောဋ္ဌဗ္ဗေ။ပေ။ တိတ္တိရဝဋ္ဋကမောရကပိဉ္ဇရံ ပဋိဂ္ဂဏှေယျာတိ? အာမန္တာ. အရဟတော ပဟီနာ ဒုဂ္ဂတိ၊ အရဟာ တိတ္တိရဝဋ္ဋကမောရကပိဉ္ဇရံ ပဋိဂ္ဂဏှေယျာတိ? န ဟေဝံ ဝတ္တဗ္ဗေ။ပေ။.

အရဟတော ပဟီနာ ဒုဂ္ဂတိ၊ န စ အရဟာ အာပါယိကေ ရူပေ ရဇ္ဇေယျာတိ? အာမန္တာ. ဒိဋ္ဌိသမ္ပန္နဿ ပုဂ္ဂလဿ ပဟီနာ ဒုဂ္ဂတိ၊ န စ ဒိဋ္ဌိသမ္ပန္နော ပုဂ္ဂလော အာပါယိကေ ရူပေ ရဇ္ဇေယျာတိ? န ဟေဝံ ဝတ္တဗ္ဗေ။ပေ။ အရဟတော ပဟီနာ ဒုဂ္ဂတိ၊ န စ အရဟာ အာပါယိကေ သဒ္ဒေ။ပေ။ ဂန္ဓေ။ပေ။ ရသေ။ပေ။ ဖောဋ္ဌဗ္ဗေ။ပေ။ အမနုဿိတ္ထိယာ တိရစ္ဆာနဂတိတ္ထိယာ နာဂကညာယ မေထုနံ ဓမ္မံ ပဋိသေဝေယျ၊ အဇေဠကံ ပဋိဂ္ဂဏှေယျ၊ ကုက္ကုဋသူကရံ ပဋိဂ္ဂဏှေယျ၊ ဟတ္ထိဂဝဿဝဠဝံ ပဋိဂ္ဂဏှေယျ။ပေ။ တိတ္တိရဝဋ္ဋကမောရကပိဉ္ဇရံ ပဋိဂ္ဂဏှေယျာတိ? အာမန္တာ. ဒိဋ္ဌိသမ္ပန္နဿ ပုဂ္ဂလဿ ပဟီနာ ဒုဂ္ဂတိ၊ န စ ဒိဋ္ဌိသမ္ပန္နော ပုဂ္ဂလော တိတ္တိရဝဋ္ဋကမောရကပိဉ္ဇရံ ပဋိဂ္ဂဏှေယျာတိ? န ဟေဝံ ဝတ္တဗ္ဗေ။ပေ။.

၆၅၂. [အဋ္ဌကထာနုလောမံ ပရဝါဒီပုစ္ဆာလက္ခဏံ. တထာပါယံ ပုစ္ဆာ သကဝါဒိဿ၊ ပုရိမာယော စ ဣမိဿံ ဒုဂ္ဂတိကထာယံ ပရဝါဒိဿာတိ ဂဟေတဗ္ဗာ ဝိယ ဒိဿန္တိ] န ဝတ္တဗ္ဗံ – ‘‘ဒိဋ္ဌိသမ္ပန္နဿ ပုဂ္ဂလဿ ပဟီနာ ဒုဂ္ဂတီ’’တိ? အာမန္တာ. ဒိဋ္ဌိသမ္ပန္နော ပုဂ္ဂလော နိရယံ ဥပပဇ္ဇေယျ။ပေ။ တိရစ္ဆာနယောနိံ ဥပပဇ္ဇေယျ။ ပေတ္တိဝိသယံ ဥပပဇ္ဇေယျာတိ? န ဟေဝံ ဝတ္တဗ္ဗေ. တေန ဟိ ဒိဋ္ဌိသမ္ပန္နဿ ပုဂ္ဂလဿ ပဟီနာ ဒုဂ္ဂတီတိ.

ဒုဂ္ဂတိကထာ နိဋ္ဌိတာ.