၈. အဋ္ဌမဝဂ္ဂေါ

(၈၁) ၉. ရူပံ ကမ္မန္တိကထာ

၅၂၇. ကုသလေန စိတ္တေန သမုဋ္ဌိတံ ကာယကမ္မံ ရူပံ ကုသလန္တိ? အာမန္တာ. သာရမ္မဏံ၊ အတ္ထိ တဿ အာဝဋ္ဋနာ အာဘောဂေါ သမန္နာဟာရော မနသိကာရော စေတနာ ပတ္ထနာ ပဏိဓီတိ? န ဟေဝံ ဝတ္တဗ္ဗေ။ပေ။ နနု အနာရမ္မဏံ၊ နတ္ထိ တဿ အာဝဋ္ဋနာ အာဘောဂေါ သမန္နာဟာရော မနသိကာရော စေတနာ ပတ္ထနာ ပဏိဓီတိ? အာမန္တာ. ဟဉ္စိ အနာရမ္မဏံ၊ နတ္ထိ တဿ အာဝဋ္ဋနာ။ပေ။ ပဏိဓီတိ၊ နော စ ဝတ ရေ ဝတ္တဗ္ဗေ – ‘‘ကုသလေန စိတ္တေန သမုဋ္ဌိတံ ကာယကမ္မံ ရူပံ ကုသလ’’န္တိ.

ကုသလေန စိတ္တေန သမုဋ္ဌိတော ဖဿော ကုသလော သာရမ္မဏော၊ အတ္ထိ တဿ အာဝဋ္ဋနာ။ပေ။ ပဏိဓီတိ? အာမန္တာ. ကုသလေန စိတ္တေန သမုဋ္ဌိတံ ကာယကမ္မံ ရူပံ ကုသလံ သာရမ္မဏံ၊ အတ္ထိ တဿ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။ ကုသလေန စိတ္တေန သမုဋ္ဌိတာ ဝေဒနာ။ပေ။ သညာ။ စေတနာ။ သဒ္ဓါ။ ဝီရိယံ။ သတိ။ သမာဓိ။ပေ။ ပညာ ကုသလာ သာရမ္မဏာ၊ အတ္ထိ တာယ အာဝဋ္ဋနာ။ပေ။ ပဏိဓီတိ? အာမန္တာ. ကုသလေန စိတ္တေန သမုဋ္ဌိတံ ကာယကမ္မံ ရူပံ ကုသလံ သာရမ္မဏံ၊ အတ္ထိ တဿ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။.

ကုသလေန စိတ္တေန သမုဋ္ဌိတံ ကာယကမ္မံ ရူပံ ကုသလံ အနာရမ္မဏံ၊ နတ္ထိ တဿ အာဝဋ္ဋနာ။ပေ။ ပဏိဓီတိ? အာမန္တာ. ကုသလေန စိတ္တေန သမုဋ္ဌိတော ဖဿော ကုသလော အနာရမ္မဏော၊ နတ္ထိ တဿ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။ ကုသလေန စိတ္တေန သမုဋ္ဌိတံ ကာယကမ္မံ ရူပံ ကုသလံ အနာရမ္မဏံ၊ နတ္ထိ တဿ အာဝဋ္ဋနာ။ပေ။ ပဏိဓီတိ? အာမန္တာ. ကုသလေန စိတ္တေန သမုဋ္ဌိတာ ဝေဒနာ။ပေ။ သညာ။ စေတနာ။ သဒ္ဓါ။ ဝီရိယံ။ သတိ။ သမာဓိ။ပေ။ ပညာ ကုသလာ အနာရမ္မဏာ၊ နတ္ထိ တာယ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။.

၅၂၈. ကုသလေန စိတ္တေန သမုဋ္ဌိတံ ကာယကမ္မံ ရူပံ ကုသလန္တိ? အာမန္တာ. ယံ ကိဉ္စိ ကုသလေန စိတ္တေန သမုဋ္ဌိတံ ရူပံ သဗ္ဗံ တံ ကုသလန္တိ? န ဟေဝံ ဝတ္တဗ္ဗေ။ပေ။.

ကုသလေန စိတ္တေန သမုဋ္ဌိတံ ကာယကမ္မံ ရူပံ ကုသလန္တိ? အာမန္တာ. ကုသလေန စိတ္တေန သမုဋ္ဌိတံ ရူပါယတနံ ကုသလန္တိ? န ဟေဝံ ဝတ္တဗ္ဗေ။ပေ။ ကုသလေန စိတ္တေန သမုဋ္ဌိတံ ကာယကမ္မံ ရူပံ ကုသလန္တိ? အာမန္တာ. ကုသလေန စိတ္တေန သမုဋ္ဌိတံ သဒ္ဒါယတနံ။ပေ။ ဂန္ဓာယတနံ။ ရသာယတနံ။ ဖောဋ္ဌဗ္ဗာယတနံ။ပေ။ ပထဝီဓာတု ။ အာပေါဓာတု။ တေဇောဓာတု။ပေ။ ဝါယောဓာတု ကုသလာတိ? န ဟေဝံ ဝတ္တဗ္ဗေ။ပေ။.

ကုသလေန စိတ္တေန သမုဋ္ဌိတံ ရူပါယတနံ အဗျာကတန္တိ? အာမန္တာ. ကုသလေန စိတ္တေန သမုဋ္ဌိတံ ကာယကမ္မံ ရူပံ အဗျာကတန္တိ? န ဟေဝံ ဝတ္တဗ္ဗေ။ပေ။ ကုသလေန စိတ္တေန သမုဋ္ဌိတံ သဒ္ဒါယတနံ။ပေ။ ဂန္ဓာယတနံ။ ရသာယတနံ။ ဖောဋ္ဌဗ္ဗာယတနံ။ပေ။ ပထဝီဓာတု။ အာပေါဓာတု ။ တေဇောဓာတု ။ပေ။ ဝါယောဓာတု အဗျာကတာတိ? အာမန္တာ. ကုသလေန စိတ္တေန သမုဋ္ဌိတံ ကာယကမ္မံ ရူပံ အဗျာကတန္တိ? န ဟေဝံ ဝတ္တဗ္ဗေ။ပေ။.

၅၂၉. ကုသလေန စိတ္တေန သမုဋ္ဌိတံ ကာယကမ္မံ ရူပံ အနာရမ္မဏံ ကုသလန္တိ? အာမန္တာ. ကုသလေန စိတ္တေန သမုဋ္ဌိတံ ရူပါယတနံ အနာရမ္မဏံ ကုသလန္တိ? န ဟေဝံ ဝတ္တဗ္ဗေ။ပေ။ ကုသလေန စိတ္တေန သမုဋ္ဌိတံ ကာယကမ္မံ ရူပံ အနာရမ္မဏံ ကုသလန္တိ? အာမန္တာ. ကုသလေန စိတ္တေန သမုဋ္ဌိတံ သဒ္ဒါယတနံ။ပေ။ ဂန္ဓာယတနံ။ ရသာယတနံ။ ဖောဋ္ဌဗ္ဗာယတနံ။ပေ။ ပထဝီဓာတု။ အာပေါဓာတု။ တေဇောဓာတု။ပေ။ ဝါယောဓာတု အနာရမ္မဏာ ကုသလာတိ? န ဟေဝံ ဝတ္တဗ္ဗေ။ပေ။.

ကုသလေန စိတ္တေန သမုဋ္ဌိတံ ရူပါယတနံ အနာရမ္မဏံ အဗျာကတန္တိ? အာမန္တာ. ကုသလေန စိတ္တေန သမုဋ္ဌိတံ ကာယကမ္မံ ရူပံ အနာရမ္မဏံ အဗျာကတန္တိ? န ဟေဝံ ဝတ္တဗ္ဗေ။ပေ။ ကုသလေန စိတ္တေန သမုဋ္ဌိတံ သဒ္ဒါယတနံ။ပေ။ ဂန္ဓာယတနံ ။ ရသာယတနံ။ ဖောဋ္ဌဗ္ဗာယတနံ။ပေ။ ပထဝီဓာတု။ အာပေါဓာတု။ တေဇောဓာတု။ပေ။ ဝါယောဓာတု အနာရမ္မဏာ အဗျာကတာတိ? အာမန္တာ. ကုသလေန စိတ္တေန သမုဋ္ဌိတံ ကာယကမ္မံ ရူပံ အနာရမ္မဏံ အဗျာကတန္တိ? န ဟေဝံ ဝတ္တဗ္ဗေ။ပေ။.

၅၃၀. ကုသလေန စိတ္တေန သမုဋ္ဌိတံ ကာယကမ္မံ ရူပံ ဖဿဝိပ္ပယုတ္တံ ကုသလန္တိ? အာမန္တာ. ကုသလေန စိတ္တေန သမုဋ္ဌိတံ ရူပါယတနံ ဖဿဝိပ္ပယုတ္တံ ကုသလန္တိ? န ဟေဝံ ဝတ္တဗ္ဗေ။ပေ။ ကုသလေန စိတ္တေန သမုဋ္ဌိတံ ကာယကမ္မံ ရူပံ ဖဿဝိပ္ပယုတ္တံ ကုသလန္တိ? အာမန္တာ. ကုသလေန စိတ္တေန သမုဋ္ဌိတံ သဒ္ဒါယတနံ။ပေ။ ဂန္ဓာယတနံ။ ရသာယတနံ။ ဖောဋ္ဌဗ္ဗာယတနံ။ပေ။ ပထဝီဓာတု။ အာပေါဓာတု။ တေဇောဓာတု။ပေ။ ဝါယောဓာတု ဖဿဝိပ္ပယုတ္တာ ကုသလာတိ? န ဟေဝံ ဝတ္တဗ္ဗေ။ပေ။.

ကုသလေန စိတ္တေန သမုဋ္ဌိတံ ရူပါယတနံ ဖဿဝိပ္ပယုတ္တံ အဗျာကတန္တိ? အာမန္တာ. ကုသလေန စိတ္တေန သမုဋ္ဌိတံ ကာယကမ္မံ ရူပံ ဖဿဝိပ္ပယုတ္တံ အဗျာကတန္တိ? န ဟေဝံ ဝတ္တဗ္ဗေ။ပေ။ ကုသလေန စိတ္တေန သမုဋ္ဌိတံ သဒ္ဒါယတနံ။ပေ။ ဂန္ဓာယတနံ။ ရသာယတနံ။ ဖောဋ္ဌဗ္ဗာယတနံ။ပေ။ ပထဝီဓာတု။ အာပေါဓာတု။ တေဇောဓာတု။ပေ။ ဝါယောဓာတု ဖဿဝိပ္ပယုတ္တာ အဗျာကတာတိ? အာမန္တာ. ကုသလေန စိတ္တေန သမုဋ္ဌိတံ ကာယကမ္မံ ရူပံ ဖဿဝိပ္ပယုတ္တံ အဗျာကတန္တိ? န ဟေဝံ ဝတ္တဗ္ဗေ။ပေ။.

၅၃၁. ကုသလေန စိတ္တေန သမုဋ္ဌိတံ ကာယကမ္မံ ရူပံ အနာရမ္မဏံ ဖဿဝိပ္ပယုတ္တံ ကုသလန္တိ? အာမန္တာ. ကုသလေန စိတ္တေန သမုဋ္ဌိတံ ရူပါယတနံ အနာရမ္မဏံ ဖဿဝိပ္ပယုတ္တံ ကုသလန္တိ? န ဟေဝံ ဝတ္တဗ္ဗေ။ပေ။ ကုသလေန စိတ္တေန သမုဋ္ဌိတံ ကာယကမ္မံ ရူပံ အနာရမ္မဏံ ဖဿဝိပ္ပယုတ္တံ ကုသလန္တိ? အာမန္တာ. ကုသလေန စိတ္တေန သမုဋ္ဌိတံ သဒ္ဒါယတနံ။ပေ။ ဂန္ဓာယတနံ။ ရသာယတနံ။ ဖောဋ္ဌဗ္ဗာယတနံ။ပေ။ ပထဝီဓာတု။ အာပေါဓာတု။ တေဇောဓာတု။ပေ။ ဝါယောဓာတု အနာရမ္မဏာ ဖဿဝိပ္ပယုတ္တာ ကုသလာတိ? န ဟေဝံ ဝတ္တဗ္ဗေ။ပေ။.

ကုသလေန စိတ္တေန သမုဋ္ဌိတံ ရူပါယတနံ အနာရမ္မဏံ ဖဿဝိပ္ပယုတ္တံ အဗျာကတန္တိ? အာမန္တာ. ကုသလေန စိတ္တေန သမုဋ္ဌိတံ ကာယကမ္မံ ရူပံ အနာရမ္မဏံ ဖဿဝိပ္ပယုတ္တံ အဗျာကတန္တိ? န ဟေဝံ ဝတ္တဗ္ဗေ။ပေ။ ကုသလေန စိတ္တေန သမုဋ္ဌိတံ သဒ္ဒါယတနံ။ပေ။ ဂန္ဓာယတနံ။ ရသာယတနံ။ ဖောဋ္ဌဗ္ဗာယတနံ။ပေ။ ပထဝီဓာတု။ အာပေါဓာတု။ တေဇောဓာတု။ပေ။ ဝါယောဓာတု အနာရမ္မဏာ ဖဿဝိပ္ပယုတ္တာ အဗျာကတာတိ? အာမန္တာ. ကုသလေန စိတ္တေန သမုဋ္ဌိတံ ကာယကမ္မံ ရူပံ အနာရမ္မဏံ ဖဿဝိပ္ပယုတ္တံ အဗျာကတန္တိ? န ဟေဝံ ဝတ္တဗ္ဗေ။ပေ။.

၅၃၂. ကုသလေန စိတ္တေန သမုဋ္ဌိတံ ဝစီကမ္မံ ရူပံ ကုသလန္တိ? အာမန္တာ. သာရမ္မဏံ၊ အတ္ထိ တဿ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။ နနု အနာရမ္မဏံ၊ နတ္ထိ တဿ အာဝဋ္ဋနာ။ပေ။ ပဏိဓီတိ? အာမန္တာ. ဟဉ္စိ အနာရမ္မဏံ၊ နတ္ထိ တဿ အာဝဋ္ဋနာ။ပေ။ ပဏိဓိ၊ နော စ ဝတ ရေ ဝတ္တဗ္ဗေ – ‘‘ကုသလေန စိတ္တေန သမုဋ္ဌိတံ ဝစီကမ္မံ ရူပံ ကုသလ’’န္တိ.

ကုသလေန စိတ္တေန သမုဋ္ဌိတော ဖဿော ကုသလော သာရမ္မဏော၊ အတ္ထိ တဿ အာဝဋ္ဋနာ။ပေ။ ပဏိဓီတိ? အာမန္တာ. ကုသလေန စိတ္တေန သမုဋ္ဌိတံ ဝစီကမ္မံ ရူပံ ကုသလံ သာရမ္မဏံ၊ အတ္ထိ တဿ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။ ကုသလေန စိတ္တေန သမုဋ္ဌိတာ ဝေဒနာ။ပေ။ သညာ။ စေတနာ။ သဒ္ဓါ။ ဝီရိယံ။ သတိ။ သမာဓိ။ပေ။ ပညာ ကုသလာ သာရမ္မဏာ၊ အတ္ထိ တာယ အာဝဋ္ဋနာ။ပေ။ ပဏိဓီတိ? အာမန္တာ. ကုသလေန စိတ္တေန သမုဋ္ဌိတံ ဝစီကမ္မံ ရူပံ ကုသလံ သာရမ္မဏံ၊ အတ္ထိ တဿ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။.

ကုသလေန စိတ္တေန သမုဋ္ဌိတံ ဝစီကမ္မံ ရူပံ ကုသလံ အနာရမ္မဏံ၊ နတ္ထိ တဿ အာဝဋ္ဋနာ။ပေ။ ပဏိဓီတိ? အာမန္တာ. ကုသလေန စိတ္တေန သမုဋ္ဌိတော ဖဿော ကုသလော အနာရမ္မဏော၊ နတ္ထိ တဿ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။ ကုသလေန စိတ္တေန သမုဋ္ဌိတံ ဝစီကမ္မံ ရူပံ ကုသလံ အနာရမ္မဏံ၊ နတ္ထိ တဿ အာဝဋ္ဋနာ။ပေ။ ပဏိဓီတိ? အာမန္တာ. ကုသလေန စိတ္တေန သမုဋ္ဌိတာ ဝေဒနာ။ပေ။ သညာ။ စေတနာ။ သဒ္ဓါ။ ဝီရိယံ။ သတိ။ သမာဓိ။ပေ။ ပညာ ကုသလာ အနာရမ္မဏာ၊ နတ္ထိ တာယ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။.

ကုသလေန စိတ္တေန သမုဋ္ဌိတံ ဝစီကမ္မံ ရူပံ ကုသလန္တိ? အာမန္တာ. ယံ ကိဉ္စိ ကုသလေန စိတ္တေန သမုဋ္ဌိတံ ရူပံ သဗ္ဗံ တံ ကုသလန္တိ? န ဟေဝံ ဝတ္တဗ္ဗေ။ပေ။ ယထာ ကာယကမ္မံ တထာ ဝစီကမ္မန္တိ.

၅၃၃. အကုသလေန စိတ္တေန သမုဋ္ဌိတံ ကာယကမ္မံ ရူပံ အကုသလန္တိ? အာမန္တာ. သာရမ္မဏံ၊ အတ္ထိ တဿ အာဝဋ္ဋနာ အာဘောဂေါ သမန္နာဟာရော မနသိကာရော စေတနာ ပတ္ထနာ ပဏိဓီတိ? န ဟေဝံ ဝတ္တဗ္ဗေ။ပေ။ နနု အနာရမ္မဏံ၊ နတ္ထိ တဿ အာဝဋ္ဋနာ အာဘောဂေါ သမန္နာဟာရော မနသိကာရော စေတနာ ပတ္ထနာ ပဏိဓီတိ? အာမန္တာ. ဟဉ္စိ အနာရမ္မဏံ၊ နတ္ထိ တဿ အာဝဋ္ဋနာ အာဘောဂေါ သမန္နာဟာရော မနသိကာရော စေတနာ ပတ္ထနာ ပဏိဓိ၊ နော စ ဝတ ရေ ဝတ္တဗ္ဗေ – ‘‘အကုသလေန စိတ္တေန သမုဋ္ဌိတံ ကာယကမ္မံ ရူပံ အကုသလ’’န္တိ.

အကုသလေန စိတ္တေန သမုဋ္ဌိတော ဖဿော အကုသလော သာရမ္မဏော၊ အတ္ထိ တဿ အာဝဋ္ဋနာ။ပေ။ ပဏိဓီတိ? အာမန္တာ. အကုသလေန စိတ္တေန သမုဋ္ဌိတံ ကာယကမ္မံ ရူပံ အကုသလံ သာရမ္မဏံ၊ အတ္ထိ တဿ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။ အကုသလေန စိတ္တေန သမုဋ္ဌိတာ ဝေဒနာ။ပေ။ သညာ။ စေတနာ။ ရာဂေါ။ ဒေါသော။ မောဟော။ မာနော။ ဒိဋ္ဌိ။ ဝိစိကိစ္ဆာ။ ထိနံ။ ဥဒ္ဓစ္စံ။ အဟိရိကံ။ပေ။ အနောတ္တပ္ပံ အကုသလံ သာရမ္မဏံ၊ အတ္ထိ တဿ အာဝဋ္ဋနာ။ပေ။ ပဏိဓီတိ? အာမန္တာ. အကုသလေန စိတ္တေန သမုဋ္ဌိတံ ကာယကမ္မံ ရူပံ အကုသလံ သာရမ္မဏံ၊ အတ္ထိ တဿ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။.

အကုသလေန စိတ္တေန သမုဋ္ဌိတံ ကာယကမ္မံ ရူပံ အကုသလံ အနာရမ္မဏံ၊ နတ္ထိ တဿ အာဝဋ္ဋနာ။ပေ။ ပဏိဓီတိ? အာမန္တာ. အကုသလေန စိတ္တေန သမုဋ္ဌိတော ဖဿော အကုသလော အနာရမ္မဏော၊ နတ္ထိ တဿ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။ အကုသလေန စိတ္တေန သမုဋ္ဌိတံ ကာယကမ္မံ ရူပံ အကုသလံ အနာရမ္မဏံ၊ နတ္ထိ တဿ အာဝဋ္ဋနာ။ပေ။ ပဏိဓီတိ? အာမန္တာ. အကုသလေန စိတ္တေန သမုဋ္ဌိတာ ဝေဒနာ။ပေ။ သညာ။ စေတနာ။ ရာဂေါ။ ဒေါသော။ မောဟော။ မာနော။ ဒိဋ္ဌိ။ ဝိစိကိစ္ဆာ။ ထိနံ။ ဥဒ္ဓစ္စံ။ အဟိရိကံ။ပေ။ အနောတ္တပ္ပံ အကုသလံ အနာရမ္မဏံ၊ နတ္ထိ တဿ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။.

အကုသလေန စိတ္တေန သမုဋ္ဌိတံ ကာယကမ္မံ ရူပံ အကုသလန္တိ? အာမန္တာ. ယံ ကိဉ္စိ အကုသလေန စိတ္တေန သမုဋ္ဌိတံ ရူပံ သဗ္ဗံ တံ အကုသလန္တိ? န ဟေဝံ ဝတ္တဗ္ဗေ။ပေ။.

၅၃၄. အကုသလေန စိတ္တေန သမုဋ္ဌိတံ ဝစီကမ္မံ ရူပံ အကုသလန္တိ? အာမန္တာ. သာရမ္မဏံ၊ အတ္ထိ တဿ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။ နနု အနာရမ္မဏံ၊ နတ္ထိ တဿ အာဝဋ္ဋနာ။ပေ။ ပဏိဓီတိ? အာမန္တာ. ဟဉ္စိ အနာရမ္မဏံ၊ နတ္ထိ တဿ အာဝဋ္ဋနာ။ပေ။ ပဏိဓိ၊ နော စ ဝတ ရေ ဝတ္တဗ္ဗေ – ‘‘အကုသလေန စိတ္တေန သမုဋ္ဌိတံ ဝစီကမ္မံ ရူပံ အကုသလ’’န္တိ.

အကုသလေန စိတ္တေန သမုဋ္ဌိတော ဖဿော အကုသလော သာရမ္မဏော၊ အတ္ထိ တဿ အာဝဋ္ဋနာ။ပေ။ ပဏိဓီတိ? အာမန္တာ. အကုသလေန စိတ္တေန သမုဋ္ဌိတံ ဝစီကမ္မံ ရူပံ အကုသလံ သာရမ္မဏံ၊ အတ္ထိ တဿ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။ အကုသလေန စိတ္တေန သမုဋ္ဌိတာ ဝေဒနာ။ပေ။ သညာ ။ စေတနာ။ ရာဂေါ။ ဒေါသော။ မောဟော။ မာနော။ ဒိဋ္ဌိ။ ဝိစိကိစ္ဆာ။ ထိနံ။ ဥဒ္ဓစ္စံ။ အဟိရိကံ။ပေ။ အနောတ္တပ္ပံ အကုသလံ သာရမ္မဏံ၊ အတ္ထိ တဿ အာဝဋ္ဋနာ။ပေ။ ပဏိဓီတိ? အာမန္တာ. အကုသလေန စိတ္တေန သမုဋ္ဌိတံ ဝစီကမ္မံ ရူပံ အကုသလံ သာရမ္မဏံ၊ အတ္ထိ တဿ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။.

အကုသလေန စိတ္တေန သမုဋ္ဌိတံ ဝစီကမ္မံ ရူပံ အကုသလံ အနာရမ္မဏံ၊ နတ္ထိ တဿ အာဝဋ္ဋနာ။ပေ။ ပဏိဓီတိ? အာမန္တာ. အကုသလေန စိတ္တေန သမုဋ္ဌိတော ဖဿော အကုသလော အနာရမ္မဏော၊ နတ္ထိ တဿ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။ အကုသလေန စိတ္တေန သမုဋ္ဌိတံ ဝစီကမ္မံ ရူပံ အကုသလံ အနာရမ္မဏံ၊ နတ္ထိ တဿ အာဝဋ္ဋနာ။ပေ။ ပဏိဓီတိ? အာမန္တာ. အကုသလေန စိတ္တေန သမုဋ္ဌိတာ ဝေဒနာ။ပေ။ သညာ။ စေတနာ။ ရာဂေါ။ ဒေါသော။ မောဟော။ မာနော။ ဒိဋ္ဌိ။ ဝိစိကိစ္ဆာ။ ထိနံ။ ဥဒ္ဓစ္စံ။ အဟိရိကံ။ပေ။ အနောတ္တပ္ပံ အကုသလံ အနာရမ္မဏံ၊ နတ္ထိ တဿ အာဝဋ္ဋနာ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။.

အကုသလေန စိတ္တေန သမုဋ္ဌိတံ ဝစီကမ္မံ ရူပံ အကုသလန္တိ? အာမန္တာ. ယံ ကိဉ္စိ အကုသလေန စိတ္တေန သမုဋ္ဌိတံ ရူပံ သဗ္ဗံ တံ အကုသလန္တိ? န ဟေဝံ ဝတ္တဗ္ဗေ။ပေ။.

၅၃၅. အကုသလေန စိတ္တေန သမုဋ္ဌိတံ ဝစီကမ္မံ ရူပံ အကုသလန္တိ? အာမန္တာ. အကုသလေန စိတ္တေန သမုဋ္ဌိတံ ရူပါယတနံ အကုသလန္တိ? န ဟေဝံ ဝတ္တဗ္ဗေ။ပေ။ အကုသလေန စိတ္တေန သမုဋ္ဌိတံ ဝစီကမ္မံ ရူပံ အကုသလန္တိ? အာမန္တာ. အကုသလေန စိတ္တေန သမုဋ္ဌိတံ သဒ္ဒါယတနံ။ပေ။ ဂန္ဓာယတနံ။ ရသာယတနံ။ ဖောဋ္ဌဗ္ဗာယတနံ။ပေ။ ပထဝီဓာတု။ အာပေါဓာတု။ တေဇောဓာတု။ပေ။ ဝါယောဓာတု အသုစိ အဿု လောဟိတံ သေဒေါ အကုသလောတိ? န ဟေဝံ ဝတ္တဗ္ဗေ။ပေ။.

အကုသလေန စိတ္တေန သမုဋ္ဌိတံ ရူပါယတနံ အဗျာကတန္တိ? အာမန္တာ. အကုသလေန စိတ္တေန သမုဋ္ဌိတံ ဝစီကမ္မံ ရူပံ အဗျာကတန္တိ? န ဟေဝံ ဝတ္တဗ္ဗေ။ပေ။ အကုသလေန စိတ္တေန သမုဋ္ဌိတံ သဒ္ဒါယတနံ။ပေ။ ဂန္ဓာယတနံ။ ရသာယတနံ။ ဖောဋ္ဌဗ္ဗာယတနံ။ပေ။ ပထဝီဓာတု။ အာပေါဓာတု။ တေဇောဓာတု။ပေ။ ဝါယောဓာတု အသုစိ အဿု လောဟိတံ သေဒေါ အဗျာကတောတိ? အာမန္တာ. အကုသလေန စိတ္တေန သမုဋ္ဌိတံ ဝစီကမ္မံ ရူပံ အဗျာကတန္တိ? န ဟေဝံ ဝတ္တဗ္ဗေ။ပေ။.

၅၃၆. အကုသလေန စိတ္တေန သမုဋ္ဌိတံ ဝစီကမ္မံ ရူပံ အနာရမ္မဏံ အကုသလန္တိ? အာမန္တာ. အကုသလေန စိတ္တေန သမုဋ္ဌိတံ ရူပါယတနံ အနာရမ္မဏံ အကုသလန္တိ? န ဟေဝံ ဝတ္တဗ္ဗေ။ပေ။ အကုသလေန စိတ္တေန သမုဋ္ဌိတံ ဝစီကမ္မံ ရူပံ အနာရမ္မဏံ အကုသလန္တိ? အာမန္တာ. အကုသလေန စိတ္တေန သမုဋ္ဌိတံ သဒ္ဒါယတနံ။ပေ။ ဂန္ဓာယတနံ။ပေ။ ရသာယတနံ။ပေ။ ဖောဋ္ဌဗ္ဗာယတနံ။ ပထဝီဓာတု။ အာပေါဓာတု။ တေဇောဓာတု။ပေ။ ဝါယောဓာတု အသုစိ အဿု လောဟိတံ သေဒေါ အနာရမ္မဏော အကုသလောတိ? န ဟေဝံ ဝတ္တဗ္ဗေ။ပေ။.

အကုသလေန စိတ္တေန သမုဋ္ဌိတံ ရူပါယတနံ အနာရမ္မဏံ အဗျာကတန္တိ? အာမန္တာ. အကုသလေန စိတ္တေန သမုဋ္ဌိတံ ဝစီကမ္မံ ရူပံ အနာရမ္မဏံ အဗျာကတန္တိ? န ဟေဝံ ဝတ္တဗ္ဗေ။ပေ။ အကုသလေန စိတ္တေန သမုဋ္ဌိတံ သဒ္ဒါယတနံ။ပေ။ ဂန္ဓာယတနံ။ ရသာယတနံ။ ဖောဋ္ဌဗ္ဗာယတနံ။ပေ။ ပထဝီဓာတု။ အာပေါဓာတု။ တေဇောဓာတု။ပေ။ ဝါယောဓာတု အသုစိ အဿု လောဟိတံ သေဒေါ အနာရမ္မဏော အဗျာကတောတိ? အာမန္တာ. အကုသလေန စိတ္တေန သမုဋ္ဌိတံ ဝစီကမ္မံ ရူပံ အနာရမ္မဏံ အဗျာကတန္တိ? န ဟေဝံ ဝတ္တဗ္ဗေ။ပေ။.

၅၃၇. အကုသလေန စိတ္တေန သမုဋ္ဌိတံ ဝစီကမ္မံ ရူပံ ဖဿဝိပ္ပယုတ္တံ အကုသလန္တိ? အာမန္တာ. အကုသလေန စိတ္တေန သမုဋ္ဌိတံ ရူပါယတနံ ဖဿဝိပ္ပယုတ္တံ အကုသလန္တိ? န ဟေဝံ ဝတ္တဗ္ဗေ။ပေ။ အကုသလေန စိတ္တေန သမုဋ္ဌိတံ ဝစီကမ္မံ ရူပံ ဖဿဝိပ္ပယုတ္တံ အကုသလန္တိ? အာမန္တာ. အကုသလေန စိတ္တေန သမုဋ္ဌိတံ သဒ္ဒါယတနံ။ပေ။ ဂန္ဓာယတနံ။ ရသာယတနံ။ ဖောဋ္ဌဗ္ဗာယတနံ။ ပထဝီဓာတု။ အာပေါဓာတု။ တေဇောဓာတု။ပေ။ ဝါယောဓာတု အသုစိ အဿု လောဟိတံ သေဒေါ ဖဿဝိပ္ပယုတ္တော အကုသလောတိ? န ဟေဝံ ဝတ္တဗ္ဗေ။ပေ။.

အကုသလေန စိတ္တေန သမုဋ္ဌိတံ ရူပါယတနံ ဖဿဝိပ္ပယုတ္တံ အဗျာကတန္တိ? အာမန္တာ. အကုသလေန စိတ္တေန သမုဋ္ဌိတံ ဝစီကမ္မံ ရူပံ အနာရမ္မဏံ ဖဿဝိပ္ပယုတ္တံ အဗျာကတန္တိ? န ဟေဝံ ဝတ္တဗ္ဗေ။ပေ။ အကုသလေန စိတ္တေန သမုဋ္ဌိတံ သဒ္ဒါယတနံ။ပေ။ ဂန္ဓာယတနံ။ ရသာယတနံ။ ဖောဋ္ဌဗ္ဗာယတနံ။ ပထဝီဓာတု။ အာပေါဓာတု။ တေဇောဓာတု။ပေ။ ဝါယောဓာတု အသုစိ အဿု လောဟိတံ သေဒေါ အနာရမ္မဏော ဖဿဝိပ္ပယုတ္တော အဗျာကတောတိ? အာမန္တာ. အကုသလေန စိတ္တေန သမုဋ္ဌိတံ ဝစီကမ္မံ ရူပံ အနာရမ္မဏံ ဖဿဝိပ္ပယုတ္တံ အဗျာကတန္တိ? န ဟေဝံ ဝတ္တဗ္ဗေ။ပေ။.

အကုသလေန စိတ္တေန သမုဋ္ဌိတံ ဝစီကမ္မံ ရူပံ အနာရမ္မဏံ ဖဿဝိပ္ပယုတ္တံ အကုသလန္တိ? အာမန္တာ. အကုသလေန စိတ္တေန သမုဋ္ဌိတံ ရူပါယတနံ အနာရမ္မဏံ ဖဿဝိပ္ပယုတ္တံ အကုသလန္တိ? န ဟေဝံ ဝတ္တဗ္ဗေ။ပေ။ အကုသလေန စိတ္တေန သမုဋ္ဌိတံ ဝစီကမ္မံ ရူပံ အနာရမ္မဏံ ဖဿဝိပ္ပယုတ္တံ အကုသလန္တိ? အာမန္တာ. အကုသလေန စိတ္တေန သမုဋ္ဌိတံ သဒ္ဒါယတနံ။ပေ။ ဂန္ဓာယတနံ။ ရသာယတနံ။ ဖောဋ္ဌဗ္ဗာယတနံ။ ပထဝီဓာတု။ အာပေါဓာတု။ တေဇောဓာတု။ပေ။ ဝါယောဓာတု အသုစိ အဿု လောဟိတံ သေဒေါ အနာရမ္မဏော ဖဿဝိပ္ပယုတ္တော အကုသလောတိ? န ဟေဝံ ဝတ္တဗ္ဗေ။ပေ။.

အကုသလေန စိတ္တေန သမုဋ္ဌိတံ ရူပါယတနံ အနာရမ္မဏံ ဖဿဝိပ္ပယုတ္တံ အဗျာကတန္တိ? အာမန္တာ. အကုသလေန စိတ္တေန သမုဋ္ဌိတံ ဝစီကမ္မံ ရူပံ အနာရမ္မဏံ ဖဿဝိပ္ပယုတ္တံ အဗျာကတန္တိ? န ဟေဝံ ဝတ္တဗ္ဗေ။ပေ။ အကုသလေန စိတ္တေန သမုဋ္ဌိတံ သဒ္ဒါယတနံ။ပေ။ ဂန္ဓာယတနံ။ ရသာယတနံ။ ဖောဋ္ဌဗ္ဗာယတနံ။ ပထဝီဓာတု။ အာပေါဓာတု။ တေဇောဓာတု။ပေ။ ဝါယောဓာတု အသုစိ အဿု လောဟိတံ သေဒေါ အနာရမ္မဏော ဖဿဝိပ္ပယုတ္တော အဗျာကတောတိ? အာမန္တာ. အကုသလေန စိတ္တေန သမုဋ္ဌိတံ ဝစီကမ္မံ ရူပံ အနာရမ္မဏံ ဖဿဝိပ္ပယုတ္တံ အဗျာကတန္တိ? န ဟေဝံ ဝတ္တဗ္ဗေ။ပေ။.

၅၃၈. န ဝတ္တဗ္ဗံ – ‘‘ရူပံ ကုသလမ္ပိ အကုသလမ္ပီ’’တိ? အာမန္တာ. နနု ကာယကမ္မံ ဝစီကမ္မံ ကုသလမ္ပိ အကုသလမ္ပီတိ? အာမန္တာ. ဟဉ္စိ ကာယကမ္မံ ဝစီကမ္မံ ကုသလမ္ပိ အကုသလမ္ပိ၊ တေန ဝတ ရေ ဝတ္တဗ္ဗေ – ‘‘ရူပံ ကုသလမ္ပိ အကုသလမ္ပီ’’တိ.

ရူပံ ကုသလမ္ပိ အကုသလမ္ပီတိ? အာမန္တာ. စက္ခာယတနံ ကုသလမ္ပိ အကုသလမ္ပီတိ? န ဟေဝံ ဝတ္တဗ္ဗေ။ပေ။ ရူပံ ကုသလမ္ပိ အကုသလမ္ပီတိ? အာမန္တာ. သောတာယတနံ။ပေ။ ဃာနာယတနံ။ ဇိဝှါယတနံ။ ကာယာယတနံ။ ရူပါယတနံ။ သဒ္ဒါယတနံ။ ဂန္ဓာယတနံ။ ရသာယတနံ ။ ဖောဋ္ဌဗ္ဗာယတနံ။ ပထဝီဓာတု။ အာပေါဓာတု။ တေဇောဓာတု။ပေ။ ဝါယောဓာတု အသုစိ အဿု လောဟိတံ သေဒေါ ကုသလောပိ အကုသလောပီတိ? န ဟေဝံ ဝတ္တဗ္ဗေ။ပေ။.

ကာယော ရူပံ၊ ကာယကမ္မံ ရူပန္တိ? အာမန္တာ. မနော ရူပံ၊ မနောကမ္မံ ရူပန္တိ? န ဟေဝံ ဝတ္တဗ္ဗေ ။ပေ။ မနော အရူပံ၊ မနောကမ္မံ အရူပန္တိ? အာမန္တာ. ကာယော အရူပံ၊ ကာယကမ္မံ အရူပန္တိ? န ဟေဝံ ဝတ္တဗ္ဗေ။ပေ။.

ကာယော ရူပန္တိ၊ ကာယကမ္မံ ရူပန္တိ? အာမန္တာ. စက္ခာယတနံ ရူပန္တိ၊ စက္ခုဝိညာဏံ ရူပန္တိ? န ဟေဝံ ဝတ္တဗ္ဗေ။ပေ။ ကာယော ရူပန္တိ၊ ကာယကမ္မံ ရူပန္တိ? အာမန္တာ. သောတာယတနံ ရူပန္တိ၊ သောတဝိညာဏံ ရူပန္တိ? န ဟေဝံ ဝတ္တဗ္ဗေ။ပေ။ ကာယော ရူပန္တိ၊ ကာယကမ္မံ ရူပန္တိ? အာမန္တာ. ဃာနာယတနံ ရူပန္တိ၊ ဃာနဝိညာဏံ ရူပန္တိ? န ဟေဝံ ဝတ္တဗ္ဗေ။ပေ။ ကာယော ရူပန္တိ၊ ကာယကမ္မံ ရူပန္တိ? အာမန္တာ. ဇိဝှါယတနံ ရူပန္တိ၊ ဇိဝှါဝိညာဏံ ရူပန္တိ? န ဟေဝံ ဝတ္တဗ္ဗေ။ပေ။ ကာယော ရူပန္တိ၊ ကာယကမ္မံ ရူပန္တိ? အာမန္တာ. ကာယာယတနံ ရူပန္တိ၊ ကာယဝိညာဏံ ရူပန္တိ? န ဟေဝံ ဝတ္တဗ္ဗေ။ပေ။.

၅၃၉. ရူပံ ကမ္မန္တိ? အာမန္တာ. နနု ဝုတ္တံ ဘဂဝတာ – ‘‘စေတနာဟံ၊ ဘိက္ခဝေ၊ ကမ္မံ ဝဒါမိ၊ စေတယိတွာ ကမ္မံ ကရောတိ ကာယေန ဝါစာယ မနသာ’’တိ [အ. နိ. ၆.၆၃ နိဗ္ဗေဓိကသုတ္တေ]! အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘ရူပံ ကမ္မ’’န္တိ.

ရူပံ ကမ္မန္တိ? အာမန္တာ. နနု ဝုတ္တံ ဘဂဝတာ – ‘‘ကာယေ ဝါ၊ အာနန္ဒ [ဟာနန္ဒ (သံ. နိ. ၂.၂၅)]၊ သတိ ကာယသဉ္စေတနာဟေတု ဥပ္ပဇ္ဇတိ အဇ္ဈတ္တံ သုခဒုက္ခံ၊ ဝါစာယ ဝါ၊ အာနန္ဒ [ဟာနန္ဒ (သံ. နိ. ၂.၂၅)]၊ သတိ ဝစီသဉ္စေတနာဟေတု ဥပ္ပဇ္ဇတိ အဇ္ဈတ္တံ သုခဒုက္ခံ၊ မနေ ဝါ၊ အာနန္ဒ [ဟာနန္ဒ (သံ. နိ. ၂.၂၅)]၊ သတိ မနောသဉ္စေတနာဟေတု ဥပ္ပဇ္ဇတိ အဇ္ဈတ္တံ သုခဒုက္ခ’’န္တိ [သံ. နိ. ၂.၂၅၊ အ. နိ. ၄.၁၇၁]! အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘ရူပံ ကမ္မ’’န္တိ.

ရူပံ ကမ္မန္တိ? အာမန္တာ. နနု ဝုတ္တံ ဘဂဝတာ – ‘‘တိဝိဓာ၊ ဘိက္ခဝေ၊ ကာယသဉ္စေတနာ အကုသလံ ကာယကမ္မံ ဒုက္ခုဒြယံ ဒုက္ခဝိပါကံ၊ စတုဗ္ဗိဓာ၊ ဘိက္ခဝေ၊ ဝစီသဉ္စေတနာ အကုသလံ ဝစီကမ္မံ ဒုက္ခုဒြယံ ဒုက္ခဝိပါကံ၊ တိဝိဓာ၊ ဘိက္ခဝေ၊ မနောသဉ္စေတနာ အကုသလံ မနောကမ္မံ ဒုက္ခုဒြယံ ဒုက္ခဝိပါကံ၊ တိဝိဓာ၊ ဘိက္ခဝေ၊ ကာယသဉ္စေတနာ ကုသလံ ကာယကမ္မံ သုခုဒြယံ သုခဝိပါကံ၊ စတုဗ္ဗိဓာ၊ ဘိက္ခဝေ၊ ဝစီသဉ္စေတနာ ကုသလံ ဝစီကမ္မံ သုခုဒြယံ သုခဝိပါကံ၊ တိဝိဓာ၊ ဘိက္ခဝေ၊ မနောသဉ္စေတနာ ကုသလံ မနောကမ္မံ သုခုဒြယံ သုခဝိပါက’’န္တိ [အ. နိ. ၁၀.၂၁၇ ထောကံ ပန ဝိသဒိသံ]! အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘ရူပံ ကမ္မ’’န္တိ.

ရူပံ ကမ္မန္တိ? အာမန္တာ. နနု ဝုတ္တံ ဘဂဝတာ – ‘‘သစာယံ၊ အာနန္ဒ၊ သမိဒ္ဓိ မောဃပုရိသော ပါဋလိပုတ္တဿ [ပေါတလိပုတ္တဿ (မ. နိ. ၃.၃၀၀)] ပရိဗ္ဗာဇကဿ ဧဝံ ပုဋ္ဌော ဧဝံ ဗျာကရေယျ – ‘သဉ္စေတနိယံ၊ အာဝုသော ပါဋလိပုတ္တ၊ ကမ္မံ ကတွာ ကာယေန ဝါစာယ မနသာ သုခဝေဒနိယံ သုခံ သော ဝေဒယတိ၊ သဉ္စေတနိယံ၊ အာဝုသော ပါဋလိပုတ္တ၊ ကမ္မံ ကတွာ ကာယေန ဝါစာယ မနသာ ဒုက္ခဝေဒနိယံ ဒုက္ခံ သော ဝေဒယတိ၊ သဉ္စေတနိယံ၊ အာဝုသော ပါဋလိပုတ္တ၊ ကမ္မံ ကတွာ ကာယေန ဝါစာယ မနသာ အဒုက္ခမသုခဝေဒနိယံ အဒုက္ခမသုခံ သော ဝေဒယတီ’တိ၊ ဧဝံ ဗျာကရမာနော ခေါ၊ အာနန္ဒ၊ သမိဒ္ဓိ မောဃပုရိသော ပါဋလိပုတ္တဿ ပရိဗ္ဗာဇကဿ သမ္မာ ဗျာကရမာနော ဗျာကရေယျာ’’တိ [မ. နိ. ၃.၃၀၀]! အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘ရူပံ ကမ္မ’’န္တိ.

ရူပံ ကမ္မန္တိကထာ နိဋ္ဌိတာ.