၈. အဋ္ဌမဝဂ္ဂေါ

(၈၂) ၁၀. ဇီဝိတိန္ဒြိယကထာ

၅၄၀. နတ္ထိ ရူပဇီဝိတိန္ဒြိယန္တိ? အာမန္တာ. နတ္ထိ ရူပီနံ ဓမ္မာနံ အာယု ဌိတိ ယပနာ ယာပနာ ဣရိယနာ ဝတ္တနာ ပါလနာတိ? န ဟေဝံ ဝတ္တဗ္ဗေ။ပေ။ အတ္ထိ ရူပီနံ ဓမ္မာနံ အာယု ဌိတိ ယပနာ ယာပနာ ဣရိယနာ ဝတ္တနာ ပါလနာတိ? အာမန္တာ. ဟဉ္စိ အတ္ထိ ရူပီနံ ဓမ္မာနံ အာယု ဌိတိ ယပနာ ယာပနာ ဣရိယနာ ဝတ္တနာ ပါလနာ၊ နော စ ဝတ ရေ ဝတ္တဗ္ဗေ – ‘‘နတ္ထိ ရူပဇီဝိတိန္ဒြိယ’’န္တိ.

အတ္ထိ အရူပီနံ ဓမ္မာနံ အာယု ဌိတိ ယပနာ ယာပနာ ဣရိယနာ ဝတ္တနာ ပါလနာ၊ အတ္ထိ အရူပဇီဝိတိန္ဒြိယန္တိ? အာမန္တာ. အတ္ထိ ရူပီနံ ဓမ္မာနံ အာယု ဌိတိ ယပနာ ယာပနာ ဣရိယနာ ဝတ္တနာ ပါလနာ၊ အတ္ထိ ရူပဇီဝိတိန္ဒြိယန္တိ? န ဟေဝံ ဝတ္တဗ္ဗေ။ပေ။ အတ္ထိ ရူပီနံ ဓမ္မာနံ အာယု ဌိတိ ယပနာ ယာပနာ ဣရိယနာ ဝတ္တနာ ပါလနာ၊ နတ္ထိ ရူပဇီဝိတိန္ဒြိယန္တိ? အာမန္တာ. အတ္ထိ အရူပီနံ ဓမ္မာနံ အာယု ဌိတိ ယပနာ ယာပနာ ဣရိယနာ ဝတ္တနာ ပါလနာ၊ နတ္ထိ အရူပဇီဝိတိန္ဒြိယန္တိ? န ဟေဝံ ဝတ္တဗ္ဗေ။ပေ။.

အရူပီနံ ဓမ္မာနံ အာယု အရူပဇီဝိတိန္ဒြိယန္တိ? အာမန္တာ. ရူပီနံ ဓမ္မာနံ အာယု ရူပဇီဝိတိန္ဒြိယန္တိ? န ဟေဝံ ဝတ္တဗ္ဗေ။ပေ။ ရူပီနံ ဓမ္မာနံ အာယု န ဝတ္တဗ္ဗံ – ‘‘ရူပဇီဝိတိန္ဒြိယ’’န္တိ? အာမန္တာ. အရူပီနံ ဓမ္မာနံ အာယု န ဝတ္တဗ္ဗံ – ‘‘အရူပဇီဝိတိန္ဒြိယ’’န္တိ? န ဟေဝံ ဝတ္တဗ္ဗေ။ပေ။.

၅၄၁. ရူပီနံ ဓမ္မာနံ အာယု အရူပဇီဝိတိန္ဒြိယန္တိ? အာမန္တာ. အရူပီနံ ဓမ္မာနံ အာယု ရူပဇီဝိတိန္ဒြိယန္တိ? န ဟေဝံ ဝတ္တဗ္ဗေ။ပေ။.

အရူပီနံ ဓမ္မာနံ အာယု န ဝတ္တဗ္ဗံ – ‘‘ရူပဇီဝိတိန္ဒြိယ’’န္တိ? အာမန္တာ. ရူပီနံ ဓမ္မာနံ အာယု န ဝတ္တဗ္ဗံ – ‘‘အရူပဇီဝိတိန္ဒြိယ’’န္တိ? န ဟေဝံ ဝတ္တဗ္ဗေ။ပေ။.

ရူပီနဉ္စ အရူပီနဉ္စ ဓမ္မာနံ အာယု အရူပဇီဝိတိန္ဒြိယန္တိ? အာမန္တာ. ရူပီနဉ္စ အရူပီနဉ္စ ဓမ္မာနံ အာယု ရူပဇီဝိတိန္ဒြိယန္တိ? န ဟေဝံ ဝတ္တဗ္ဗေ။ပေ။.

ရူပီနဉ္စ အရူပီနဉ္စ ဓမ္မာနံ အာယု န ဝတ္တဗ္ဗံ – ‘‘ရူပဇီဝိတိန္ဒြိယ’’န္တိ? အာမန္တာ. ရူပီနဉ္စ အရူပီနဉ္စ ဓမ္မာနံ အာယု န ဝတ္တဗ္ဗံ – ‘‘အရူပဇီဝိတိန္ဒြိယ’’န္တိ? န ဟေဝံ ဝတ္တဗ္ဗေ။ပေ။ နတ္ထိ ရူပဇီဝိတိန္ဒြိယန္တိ? အာမန္တာ. နိရောဓံ သမာပန္နဿ နတ္ထိ ဇီဝိတိန္ဒြိယန္တိ? န ဟေဝံ ဝတ္တဗ္ဗေ။ပေ။.

၅၄၂. နိရောဓံ သမာပန္နဿ အတ္ထိ ဇီဝိတိန္ဒြိယန္တိ? အာမန္တာ. ဟဉ္စိ နိရောဓံ သမာပန္နဿ အတ္ထိ ဇီဝိတိန္ဒြိယံ၊ နော စ ဝတ ရေ ဝတ္တဗ္ဗေ – ‘‘နတ္ထိ ရူပဇီဝိတိန္ဒြိယ’’န္တိ.

နိရောဓံ သမာပန္နဿ အတ္ထိ ဇီဝိတိန္ဒြိယန္တိ? အာမန္တာ. ကတမက္ခန္ဓပရိယာပန္နန္တိ? သင်္ခါရက္ခန္ဓပရိယာပန္နန္တိ. နိရောဓံ သမာပန္နဿ အတ္ထိ သင်္ခါရက္ခန္ဓောတိ? န ဟေဝံ ဝတ္တဗ္ဗေ။ပေ။.

နိရောဓံ သမာပန္နဿ အတ္ထိ သင်္ခါရက္ခန္ဓောတိ? အာမန္တာ. နိရောဓံ သမာပန္နဿ အတ္ထိ ဝေဒနာက္ခန္ဓော။ပေ။ သညာက္ခန္ဓော။ပေ။ ဝိညာဏက္ခန္ဓောတိ? န ဟေဝံ ဝတ္တဗ္ဗေ။ပေ။.

နိရောဓံ သမာပန္နဿ အတ္ထိ ဝေဒနာက္ခန္ဓော။ပေ။ သညာက္ခန္ဓော။ပေ။ ဝိညာဏက္ခန္ဓောတိ? အာမန္တာ. န နိရောဓံ သမာပန္နောတိ? န ဟေဝံ ဝတ္တဗ္ဗေ။ပေ။.

၅၄၃. နတ္ထိ ရူပဇီဝိတိန္ဒြိယန္တိ? အာမန္တာ. အသညသတ္တာနံ နတ္ထိ ဇီဝိတိန္ဒြိယန္တိ? န ဟေဝံ ဝတ္တဗ္ဗေ။ပေ။.

အသညသတ္တာနံ အတ္ထိ ဇီဝိတိန္ဒြိယန္တိ? အာမန္တာ. ဟဉ္စိ အသညသတ္တာနံ အတ္ထိ ဇီဝိတိန္ဒြိယံ၊ နော စ ဝတ ရေ ဝတ္တဗ္ဗေ – ‘‘နတ္ထိ ရူပဇီဝိတိန္ဒြိယ’’န္တိ. အသညသတ္တာနံ အတ္ထိ ဇီဝိတိန္ဒြိယန္တိ? အာမန္တာ. ကတမက္ခန္ဓပရိယာပန္နန္တိ? သင်္ခါရက္ခန္ဓပရိယာပန္နန္တိ. အသညသတ္တာနံ အတ္ထိ သင်္ခါရက္ခန္ဓောတိ? န ဟေဝံ ဝတ္တဗ္ဗေ။ပေ။.

အသညသတ္တာနံ အတ္ထိ သင်္ခါရက္ခန္ဓောတိ? အာမန္တာ. အသညသတ္တာနံ အတ္ထိ ဝေဒနာက္ခန္ဓော။ပေ။ သညာက္ခန္ဓော။ပေ။ ဝိညာဏက္ခန္ဓောတိ? န ဟေဝံ ဝတ္တဗ္ဗေ။ပေ။.

အသညသတ္တာနံ အတ္ထိ ဝေဒနာက္ခန္ဓော။ပေ။ သညာက္ခန္ဓော။ပေ။ ဝိညာဏက္ခန္ဓောတိ? အာမန္တာ. ပဉ္စဝေါကာရဘဝေါတိ? န ဟေဝံ ဝတ္တဗ္ဗေ။ပေ။.

၅၄၄. ဥပပတ္တေသိယေန စိတ္တေန သမုဋ္ဌိတံ ဇီဝိတိန္ဒြိယံ ဥပပတ္တေသိယေ စိတ္တေ ဘိဇ္ဇမာနေ ဧကဒေသံ ဘိဇ္ဇတီတိ? အာမန္တာ. ဥပပတ္တေသိယေန စိတ္တေန သမုဋ္ဌိတော ဖဿော ဥပပတ္တေသိယေ စိတ္တေ ဘိဇ္ဇမာနေ ဧကဒေသော ဘိဇ္ဇတီတိ? န ဟေဝံ ဝတ္တဗ္ဗေ။ပေ။.

ဥပပတ္တေသိယေန စိတ္တေန သမုဋ္ဌိတော ဖဿော ဥပပတ္တေသိယေ စိတ္တေ ဘိဇ္ဇမာနေ အနဝသေသော ဘိဇ္ဇတီတိ? အာမန္တာ. ဥပပတ္တေသိယေန စိတ္တေန သမုဋ္ဌိတံ ဇီဝိတိန္ဒြိယံ ဥပပတ္တေသိယေ စိတ္တေ ဘိဇ္ဇမာနေ အနဝသေသံ ဘိဇ္ဇတီတိ? န ဟေဝံ ဝတ္တဗ္ဗေ။ပေ။.

၅၄၅. ဒွေ ဇီဝိတိန္ဒြိယာနီတိ? အာမန္တာ. ဒွီဟိ ဇီဝိတေဟိ ဇီဝတိ၊ ဒွီဟိ မရဏေဟိ မီယတီတိ? အာမန္တာ [န ဟေဝံ ဝတ္တဗ္ဗေ (သျာ. ကံ. ပီ.)].

ဇီဝိတိန္ဒြိယကထာ နိဋ္ဌိတာ.