၈. အဋ္ဌမဝဂ္ဂေါ

(၈၀) ၈. အရူပေ ရူပကထာ

၅၂၄. အတ္ထိ ရူပံ အရူပေသူတိ? အာမန္တာ. ရူပဘဝေါ ရူပဂတိ ရူပသတ္တာဝါသော ရူပသံသာရော ရူပယောနိ ရူပတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ။ နနု အရူပဘဝေါ အရူပဂတိ အရူပသတ္တာဝါသော အရူပသံသာရော အရူပယောနိ အရူပတ္တဘာဝပဋိလာဘောတိ? အာမန္တာ. ဟဉ္စိ အရူပဘဝေါ။ပေ။ အရူပတ္တဘာဝပဋိလာဘော၊ နော စ ဝတ ရေ ဝတ္တဗ္ဗေ – ‘‘အတ္ထိ ရူပံ အရူပေသူ’’တိ.

အတ္ထိ ရူပံ အရူပေသူတိ? အာမန္တာ. ပဉ္စဝေါကာရဘဝေါ ဂတိ သတ္တာဝါသော သံသာရော ယောနိ ဝိညာဏဋ္ဌိတိ အတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ။ နနု စတုဝေါကာရဘဝေါ။ပေ။ အတ္တဘာဝပဋိလာဘောတိ? အာမန္တာ. ဟဉ္စိ စတုဝေါကာရဘဝေါ ဂတိ။ပေ။ အတ္တဘာဝပဋိလာဘော၊ နော စ ဝတ ရေ ဝတ္တဗ္ဗေ – ‘‘အတ္ထိ ရူပံ အရူပေသူ’’တိ.

၅၂၅. အတ္ထိ ရူပံ ရူပဓာတုယာ၊ သော စ ရူပဘဝေါ ရူပဂတိ ရူပသတ္တာဝါသော ရူပသံသာရော ရူပယောနိ ရူပတ္တဘာဝပဋိလာဘောတိ? အာမန္တာ. အတ္ထိ ရူပံ အရူပေသု၊ သော စ ရူပဘဝေါ ရူပဂတိ။ပေ။ ရူပတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ။ အတ္ထိ ရူပံ ရူပဓာတုယာ၊ သော စ ပဉ္စဝေါကာရဘဝေါ ဂတိ။ပေ။ အတ္တဘာဝပဋိလာဘောတိ? အာမန္တာ. အတ္ထိ ရူပံ အရူပေသု၊ သော စ ပဉ္စဝေါကာရဘဝေါ ဂတိ။ပေ။ အတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ။. အတ္ထိ ရူပံ အရူပေသု၊ သော စ အရူပဘဝေါ အရူပဂတိ အရူပသတ္တာဝါသော အရူပသံသာရော အရူပယောနိ အရူပတ္တဘာဝပဋိလာဘောတိ? အာမန္တာ. အတ္ထိ ရူပံ ရူပဓာတုယာ [အရူပဓာတုယာ (သဗ္ဗတ္ထ)]၊ သော စ အရူပဘဝေါ အရူပဂတိ။ပေ။ အရူပတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ။ အတ္ထိ ရူပံ အရူပေသု၊ သော စ စတုဝေါကာရဘဝေါ ဂတိ။ပေ။ အတ္တဘာဝပဋိလာဘောတိ? အာမန္တာ. အတ္ထိ ရူပံ ရူပဓာတုယာ [အရူပဓာတုယာ (သဗ္ဗတ္ထ)]၊ သော စ စတုဝေါကာရဘဝေါ ဂတိ။ပေ။ အတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ။.

၅၂၆. အတ္ထိ ရူပံ အရူပေသူတိ? အာမန္တာ. နနု ရူပါနံ နိဿရဏံ အရူပံ [ဣတိဝု. ၇၂၊ အ. နိ. ၅.၂၀၀၊ ဒီ. နိ. ၃.၃၂၁] ဝုတ္တံ ဘဂဝတာတိ? အာမန္တာ. ဟဉ္စိ ရူပါနံ နိဿရဏံ အရူပံ [ဣတိဝု. ၇၂၊ အ. နိ. ၅.၂၀၀၊ ဒီ. နိ. ၃.၃၂၁] ဝုတ္တံ ဘဂဝတာ၊ နော စ ဝတ ရေ ဝတ္တဗ္ဗေ – ‘‘အတ္ထိ ရူပံ အရူပေသူ’’တိ.

ရူပါနံ နိဿရဏံ အရူပံ ဝုတ္တံ ဘဂဝတာ၊ အတ္ထိ ရူပံ အရူပေသူတိ? အာမန္တာ. ကာမာနံ နိဿရဏံ နေက္ခမ္မံ ဝုတ္တံ ဘဂဝတာ၊ အတ္ထိ နေက္ခမ္မေသု ကာမာ၊ အတ္ထိ အနာသဝေသု အာသဝါ၊ အတ္ထိ အပရိယာပန္နေသု ပရိယာပန္နာတိ? န ဟေဝံ ဝတ္တဗ္ဗေ။ပေ။.

အရူပေ ရူပကထာ နိဋ္ဌိတာ.