၈. အဋ္ဌမဝဂ္ဂေါ

(၇၉) ၇. ရူပဓာတုယာအာယတနကထာ

၅၁၉. အတ္ထိ သဠာယတနိကော အတ္တဘာဝေါ ရူပဓာတုယာတိ? အာမန္တာ. အတ္ထိ တတ္ထ ဃာနာယတနန္တိ? အာမန္တာ. အတ္ထိ တတ္ထ ဂန္ဓာယတနန္တိ? န ဟေဝံ ဝတ္တဗ္ဗေ။ပေ။ အတ္ထိ တတ္ထ ဇိဝှါယတနန္တိ? အာမန္တာ. အတ္ထိ တတ္ထ ရသာယတနန္တိ? န ဟေဝံ ဝတ္တဗ္ဗေ။ပေ။ အတ္ထိ တတ္ထ ကာယာယတနန္တိ? အာမန္တာ. အတ္ထိ တတ္ထ ဖောဋ္ဌဗ္ဗာယတနန္တိ? န ဟေဝံ ဝတ္တဗ္ဗေ။ပေ။.

နတ္ထိ တတ္ထ ဂန္ဓာယတနန္တိ? အာမန္တာ. နတ္ထိ တတ္ထ ဃာနာယတနန္တိ? န ဟေဝံ ဝတ္တဗ္ဗေ။ပေ။ နတ္ထိ တတ္ထ ရသာယတနန္တိ? အာမန္တာ. နတ္ထိ တတ္ထ ဇိဝှါယတနန္တိ? န ဟေဝံ ဝတ္တဗ္ဗေ။ပေ။ နတ္ထိ တတ္ထ ဖောဋ္ဌဗ္ဗာယတနန္တိ? အာမန္တာ. နတ္ထိ တတ္ထ ကာယာယတနန္တိ? န ဟေဝံ ဝတ္တဗ္ဗေ။ပေ။.

၅၂၀. အတ္ထိ တတ္ထ စက္ခာယတနံ၊ အတ္ထိ ရူပါယတနန္တိ? အာမန္တာ. အတ္ထိ တတ္ထ ဃာနာယတနံ၊ အတ္ထိ ဂန္ဓာယတနန္တိ? န ဟေဝံ ဝတ္တဗ္ဗေ။ပေ။ အတ္ထိ တတ္ထ စက္ခာယတနံ၊ အတ္ထိ ရူပါယတနန္တိ? အာမန္တာ. အတ္ထိ တတ္ထ ဇိဝှါယတနံ၊ အတ္ထိ ရသာယတနံ။ပေ။ အတ္ထိ တတ္ထ ကာယာယတနံ၊ အတ္ထိ ဖောဋ္ဌဗ္ဗာယတနန္တိ? န ဟေဝံ ဝတ္တဗ္ဗေ။ပေ။ အတ္ထိ တတ္ထ သောတာယတနံ၊ အတ္ထိ သဒ္ဒါယတနံ။ပေ။ အတ္ထိ တတ္ထ မနာယတနံ၊ အတ္ထိ ဓမ္မာယတနန္တိ? အာမန္တာ. အတ္ထိ တတ္ထ ဃာနာယတနံ၊ အတ္ထိ ဂန္ဓာယတနန္တိ? န ဟေဝံ ဝတ္တဗ္ဗေ။ပေ။ အတ္ထိ တတ္ထ မနာယတနံ၊ အတ္ထိ ဓမ္မာယတနန္တိ? အာမန္တာ. အတ္ထိ တတ္ထ ဇိဝှါယတနံ၊ အတ္ထိ ရသာယတနန္တိ။ပေ။ အတ္ထိ တတ္ထ ကာယာယတနံ၊ အတ္ထိ ဖောဋ္ဌဗ္ဗာယတနန္တိ? န ဟေဝံ ဝတ္တဗ္ဗေ။ပေ။.

အတ္ထိ တတ္ထ ဃာနာယတနံ၊ နတ္ထိ ဂန္ဓာယတနန္တိ? အာမန္တာ. အတ္ထိ တတ္ထ စက္ခာယတနံ၊ နတ္ထိ ရူပါယတနန္တိ? န ဟေဝံ ဝတ္တဗ္ဗေ။ပေ။ အတ္ထိ တတ္ထ ဃာနာယတနံ၊ နတ္ထိ ဂန္ဓာယတနန္တိ? အာမန္တာ. အတ္ထိ တတ္ထ သောတာယတနံ၊ နတ္ထိ သဒ္ဒါယတနံ။ပေ။ အတ္ထိ တတ္ထ မနာယတနံ၊ နတ္ထိ ဓမ္မာယတနန္တိ? န ဟေဝံ ဝတ္တဗ္ဗေ။ပေ။ အတ္ထိ တတ္ထ ဇိဝှါယတနံ၊ နတ္ထိ ရသာယတနံ။ပေ။ အတ္ထိ တတ္ထ ကာယာယတနံ၊ နတ္ထိ ဖောဋ္ဌဗ္ဗာယတနန္တိ? အာမန္တာ. အတ္ထိ တတ္ထ စက္ခာယတနံ၊ နတ္ထိ ရူပါယတနန္တိ? န ဟေဝံ ဝတ္တဗ္ဗေ။ပေ။ အတ္ထိ တတ္ထ ကာယာယတနံ၊ နတ္ထိ ဖောဋ္ဌဗ္ဗာယတနန္တိ? အာမန္တာ. အတ္ထိ တတ္ထ သောတာယတနံ၊ နတ္ထိ သဒ္ဒါယတနံ ။ပေ။ အတ္ထိ တတ္ထ မနာယတနံ၊ နတ္ထိ ဓမ္မာယတနန္တိ? န ဟေဝံ ဝတ္တဗ္ဗေ။ပေ။.

၅၂၁. အတ္ထိ တတ္ထ စက္ခာယတနံ အတ္ထိ ရူပါယတနံ၊ တေန စက္ခုနာ တံ ရူပံ ပဿတီတိ? အာမန္တာ. အတ္ထိ တတ္ထ ဃာနာယတနံ အတ္ထိ ဂန္ဓာယတနံ၊ တေန ဃာနေန တံ ဂန္ဓံ ဃာယတီတိ? န ဟေဝံ ဝတ္တဗ္ဗေ။ပေ။ အတ္ထိ တတ္ထ စက္ခာယတနံ အတ္ထိ ရူပါယတနံ၊ တေန စက္ခုနာ တံ ရူပံ ပဿတီတိ? အာမန္တာ. အတ္ထိ တတ္ထ ဇိဝှါယတနံ အတ္ထိ ရသာယတနံ၊ တာယ ဇိဝှါယ တံ ရသံ သာယတိ။ပေ။ အတ္ထိ တတ္ထ ကာယာယတနံ အတ္ထိ ဖောဋ္ဌဗ္ဗာယတနံ၊ တေန ကာယေန တံ ဖောဋ္ဌဗ္ဗံ ဖုသတီတိ? န ဟေဝံ ဝတ္တဗ္ဗေ။ပေ။.

အတ္ထိ တတ္ထ သောတာယတနံ အတ္ထိ သဒ္ဒါယတနံ။ပေ။ အတ္ထိ တတ္ထ မနာယတနံ အတ္ထိ ဓမ္မာယတနံ၊ တေန မနေန တံ ဓမ္မံ ဝိဇာနာတီတိ? အာမန္တာ. အတ္ထိ တတ္ထ ဃာနာယတနံ အတ္ထိ ဂန္ဓာယတနံ၊ တေန ဃာနေန တံ ဂန္ဓံ ဃာယတီတိ? န ဟေဝံ ဝတ္တဗ္ဗေ။ပေ။ အတ္ထိ တတ္ထ မနာယတနံ အတ္ထိ ဓမ္မာယတနံ၊ တေန မနေန တံ ဓမ္မံ ဝိဇာနာတီတိ? အာမန္တာ. အတ္ထိ တတ္ထ ဇိဝှါယတနံ အတ္ထိ ရသာယတနံ။ပေ။ အတ္ထိ တတ္ထ ကာယာယတနံ အတ္ထိ ဖောဋ္ဌဗ္ဗာယတနံ၊ တေန ကာယေန တံ ဖောဋ္ဌဗ္ဗံ ဖုသတီတိ? န ဟေဝံ ဝတ္တဗ္ဗေ။ပေ။.

အတ္ထိ တတ္ထ ဃာနာယတနံ အတ္ထိ ဂန္ဓာယတနံ၊ န စ တေန ဃာနေန တံ ဂန္ဓံ ဃာယတီတိ? အာမန္တာ. အတ္ထိ တတ္ထ စက္ခာယတနံ အတ္ထိ ရူပါယတနံ၊ န စ တေန စက္ခုနာ တံ ရူပံ ပဿတီတိ? န ဟေဝံ ဝတ္တဗ္ဗေ။ပေ။ အတ္ထိ တတ္ထ ဃာနာယတနံ အတ္ထိ ဂန္ဓာယတနံ၊ န စ တေန ဃာနေန တံ ဂန္ဓံ ဃာယတီတိ? အာမန္တာ. အတ္ထိ တတ္ထ သောတာယတနံ အတ္ထိ သဒ္ဒါယတနံ။ပေ။ အတ္ထိ တတ္ထ မနာယတနံ အတ္ထိ ဓမ္မာယတနံ၊ န စ တေန မနေန တံ ဓမ္မံ ဝိဇာနာတီတိ? န ဟေဝံ ဝတ္တဗ္ဗေ။ပေ။.

အတ္ထိ တတ္ထ ဇိဝှါယတနံ အတ္ထိ ရသာယတနံ။ပေ။ အတ္ထိ တတ္ထ ကာယာယတနံ အတ္ထိ ဖောဋ္ဌဗ္ဗာယတနံ၊ န စ တေန ကာယေန တံ ဖောဋ္ဌဗ္ဗံ ဖုသတီတိ? အာမန္တာ. အတ္ထိ တတ္ထ သောတာယတနံ အတ္ထိ သဒ္ဒါယတနံ။ပေ။ အတ္ထိ တတ္ထ မနာယတနံ အတ္ထိ ဓမ္မာယတနံ၊ န စ တေန မနေန တံ ဓမ္မံ ဝိဇာနာတီတိ? န ဟေဝံ ဝတ္တဗ္ဗေ။ပေ။.

၅၂၂. အတ္ထိ တတ္ထ ဃာနာယတနံ အတ္ထိ ဂန္ဓာယတနံ၊ တေန ဃာနေန တံ ဂန္ဓံ ဃာယတီတိ? အာမန္တာ. အတ္ထိ တတ္ထ မူလဂန္ဓော သာရဂန္ဓော တစဂန္ဓော ပတ္တဂန္ဓော ပုပ္ဖဂန္ဓော ဖလဂန္ဓော အာမဂန္ဓော ဝိဿဂန္ဓော သုဂန္ဓော ဒုဂ္ဂန္ဓောတိ? န ဟေဝံ ဝတ္တဗ္ဗေ။ပေ။.

အတ္ထိ တတ္ထ ဇိဝှါယတနံ အတ္ထိ ရသာယတနံ၊ တာယ ဇိဝှါယ တံ ရသံ သာယတီတိ? အာမန္တာ. အတ္ထိ တတ္ထ မူလရသော ခန္ဓရသော တစရသော ပတ္တရသော ပုပ္ဖရသော ဖလရသော အမ္ဗိလံ မဓုရံ တိတ္တကံ ကဋုကံ လောဏိယံ ခါရိယံ လမ္ဗိလံ ကသာဝေါ သာဒု အသာဒူတိ? န ဟေဝံ ဝတ္တဗ္ဗေ။ပေ။.

အတ္ထိ တတ္ထ ကာယာယတနံ အတ္ထိ ဖောဋ္ဌဗ္ဗာယတနံ၊ တေန ကာယေန တံ ဖောဋ္ဌဗ္ဗံ ဖုသတီတိ? အာမန္တာ. အတ္ထိ တတ္ထ ကက္ခဠံ မုဒုကံ သဏှံ ဖရုသံ သုခသမ္ဖဿံ ဒုက္ခသမ္ဖဿံ ဂရုကံ လဟုကန္တိ? န ဟေဝံ ဝတ္တဗ္ဗေ။ပေ။.

၅၂၃. န ဝတ္တဗ္ဗံ – ‘‘သဠာယတနိကော အတ္တဘာဝေါ ရူပဓာတုယာ’’တိ? အာမန္တာ. နနု အတ္ထိ တတ္ထ ဃာနနိမိတ္တံ ဇိဝှါနိမိတ္တံ ကာယနိမိတ္တန္တိ? အာမန္တာ. ဟဉ္စိ အတ္ထိ တတ္ထ ဃာနနိမိတ္တံ ဇိဝှါနိမိတ္တံ ကာယနိမိတ္တံ၊ တေန ဝတ ရေ ဝတ္တဗ္ဗေ – ‘‘သဠာယတနိကော အတ္တဘာဝေါ ရူပဓာတုယာ’’တိ.

ရူပဓာတုယာ အာယတနကထာ နိဋ္ဌိတာ.