(၇၈) ၆. အရူပဓာတုကထာ

၅၁၇. အရူပိနော ဓမ္မာ အရူပဓာတူတိ? အာမန္တာ. ဝေဒနာ ဘဝေါ ဂတိ သတ္တာဝါသော သံသာရော ယောနိ ဝိညာဏဋ္ဌိတိ အတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ။ အတ္ထိ ဝေဒနူပဂံ ကမ္မန္တိ? န ဟေဝံ ဝတ္တဗ္ဗေ။ပေ။ အတ္ထိ ဝေဒနူပဂါ သတ္တာတိ? န ဟေဝံ ဝတ္တဗ္ဗေ။ပေ။ ဝေဒနာယ သတ္တာ ဇာယန္တိ ဇီယန္တိ မီယန္တိ စဝန္တိ ဥပပဇ္ဇန္တီတိ? န ဟေဝံ ဝတ္တဗ္ဗေ။ပေ။ ဝေဒနာယ အတ္ထိ ဝေဒနာ သညာ သင်္ခါရာ ဝိညာဏန္တိ? န ဟေဝံ ဝတ္တဗ္ဗေ။ပေ။ ဝေဒနာ စတုဝေါကာရဘဝေါတိ? န ဟေဝံ ဝတ္တဗ္ဗေ။ပေ။.

အရူပဓာတု ဘဝေါ ဂတိ။ပေ။ အတ္တဘာဝပဋိလာဘောတိ? အာမန္တာ. ဝေဒနာ ဘဝေါ ဂတိ။ပေ။ အတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ။ အတ္ထိ အရူပဓာတူပဂံ ကမ္မန္တိ? အာမန္တာ. အတ္ထိ ဝေဒနူပဂံ ကမ္မန္တိ? န ဟေဝံ ဝတ္တဗ္ဗေ။ပေ။ အတ္ထိ အရူပဓာတူပဂါ သတ္တာတိ? အာမန္တာ. အတ္ထိ ဝေဒနူပဂါ သတ္တာတိ? န ဟေဝံ ဝတ္တဗ္ဗေ။ပေ။.

အရူပဓာတုယာ သတ္တာ ဇာယန္တိ ဇီယန္တိ မီယန္တိ စဝန္တိ ဥပပဇ္ဇန္တီတိ? အာမန္တာ. ဝေဒနာယ သတ္တာ ဇာယန္တိ ဇီယန္တိ မီယန္တိ စဝန္တိ ဥပပဇ္ဇန္တီတိ? န ဟေဝံ ဝတ္တဗ္ဗေ။ပေ။ အရူပဓာတုယာ အတ္ထိ ဝေဒနာ သညာ သင်္ခါရာ ဝိညာဏန္တိ? အာမန္တာ. ဝေဒနာယ အတ္ထိ ဝေဒနာ သညာ သင်္ခါရာ ဝိညာဏန္တိ? န ဟေဝံ ဝတ္တဗ္ဗေ။ပေ။ အရူပဓာတု စတုဝေါကာရဘဝေါတိ? အာမန္တာ. ဝေဒနာ စတုဝေါကာရဘဝေါတိ? န ဟေဝံ ဝတ္တဗ္ဗေ။ပေ။.

၅၁၈. အရူပိနော ဓမ္မာ အရူပဓာတု၊ ကာမဓာတုယာ အတ္ထိ ဝေဒနာ သညာ သင်္ခါရာ ဝိညာဏန္တိ? အာမန္တာ. သာဝ ကာမဓာတု၊ သာ အရူပဓာတူတိ? န ဟေဝံ ဝတ္တဗ္ဗေ။ပေ။ သာဝ ကာမဓာတု၊ သာ အရူပဓာတူတိ? အာမန္တာ. ကာမဘဝေန သမန္နာဂတော ပုဂ္ဂလော ဒွီဟိ ဘဝေဟိ သမန္နာဂတော ဟောတိ – ကာမဘဝေန စ အရူပဘဝေန စာတိ? န ဟေဝံ ဝတ္တဗ္ဗေ။ပေ။.

ရူပိနော ဓမ္မာ ရူပဓာတု၊ အရူပိနော ဓမ္မာ အရူပဓာတု၊ ကာမဓာတုယာ အတ္ထိ ရူပံ ဝေဒနာ သညာ သင်္ခါရာ ဝိညာဏန္တိ? အာမန္တာ. သာဝ ကာမဓာတု၊ သာ ရူပဓာတု၊ သာ အရူပဓာတူတိ? န ဟေဝံ ဝတ္တဗ္ဗေ။ပေ။ သာဝ ကာမဓာတု၊ သာ ရူပဓာတု၊ သာ အရူပဓာတူတိ? အာမန္တာ. ကာမဘဝေန သမန္နာဂတော ပုဂ္ဂလော တီဟိ ဘဝေဟိ သမန္နာဂတော ဟောတိ – ကာမဘဝေန စ ရူပဘဝေန စ အရူပဘဝေန စာတိ? န ဟေဝံ ဝတ္တဗ္ဗေ။ပေ။.

အရူပဓာတုကထာ နိဋ္ဌိတာ.