၈. အဋ္ဌမဝဂ္ဂေါ

(၇၅) ၃. ကာမဂုဏကထာ

၅၁၀. ပဉ္စေဝ ကာမဂုဏာ ကာမဓာတူတိ? အာမန္တာ. နနု အတ္ထိ တပ္ပဋိသညုတ္တော ဆန္ဒောတိ? အာမန္တာ. ဟဉ္စိ အတ္ထိ တပ္ပဋိသညုတ္တော ဆန္ဒော၊ နော စ ဝတ ရေ ဝတ္တဗ္ဗေ – ‘‘ပဉ္စေဝ ကာမဂုဏာ ကာမဓာတူ’’တိ. နနု အတ္ထိ တပ္ပဋိသညုတ္တော ရာဂေါ တပ္ပဋိသညုတ္တော ဆန္ဒော တပ္ပဋိသညုတ္တော ဆန္ဒရာဂေါ တပ္ပဋိသညုတ္တော သင်္ကပ္ပေါ တပ္ပဋိသညုတ္တော ရာဂေါ တပ္ပဋိသညုတ္တော သင်္ကပ္ပရာဂေါ တပ္ပဋိသညုတ္တာ ပီတိ တပ္ပဋိသညုတ္တံ သောမနဿံ တပ္ပဋိသညုတ္တံ ပီတိသောမနဿန္တိ? အာမန္တာ. ဟဉ္စိ အတ္ထိ တပ္ပဋိသညုတ္တံ ပီတိသောမနဿံ၊ နော စ ဝတ ရေ ဝတ္တဗ္ဗေ – ‘‘ပဉ္စေဝ ကာမဂုဏာ ကာမဓာတူ’’တိ.

ပဉ္စေဝ ကာမဂုဏာ ကာမဓာတူတိ? အာမန္တာ. မနုဿာနံ စက္ခု န ကာမဓာတူတိ? န ဟေဝံ ဝတ္တဗ္ဗေ။ပေ။ မနုဿာနံ သောတံ။ပေ။ မနုဿာနံ ဃာနံ။ပေ။ မနုဿာနံ ဇိဝှါ။ပေ။ မနုဿာနံ ကာယော။ပေ။ မနုဿာနံ မနော န ကာမဓာတူတိ? န ဟေဝံ ဝတ္တဗ္ဗေ။ပေ။.

မနုဿာနံ မနော န ကာမဓာတူတိ? အာမန္တာ. နနု ဝုတ္တံ ဘဂဝတာ –

‘‘ပဉ္စ ကာမဂုဏာ လောကေ၊ မနောစ္ဆဋ္ဌာ ပဝေဒိတာ၊

ဧတ္ထ ဆန္ဒံ ဝိရာဇေတွာ၊ ဧဝံ ဒုက္ခာ ပမုစ္စတီ’’တိ [သု. နိ. ၁၇၃၊ သံ. နိ. ၁.၃၀].

အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘မနုဿာနံ မနော န ကာမဓာတူ’’တိ.

၅၁၁. ပဉ္စေဝ ကာမဂုဏာ ကာမဓာတူတိ? အာမန္တာ. ကာမဂုဏာ ဘဝေါ ဂတိ သတ္တာဝါသော သံသာရော ယောနိ ဝိညာဏဋ္ဌိတိ အတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ။ အတ္ထိ ကာမဂုဏူပဂံ ကမ္မန္တိ? န ဟေဝံ ဝတ္တဗ္ဗေ။ပေ။ အတ္ထိ ကာမဂုဏူပဂါ သတ္တာတိ? န ဟေဝံ ဝတ္တဗ္ဗေ။ပေ။ ကာမဂုဏေ သတ္တာ ဇာယန္တိ ဇီယန္တိ မီယန္တိ စဝန္တိ ဥပပဇ္ဇန္တီတိ? န ဟေဝံ ဝတ္တဗ္ဗေ။ပေ။ ကာမဂုဏေ အတ္ထိ ရူပံ ဝေဒနာ သညာ သင်္ခါရာ ဝိညာဏန္တိ? န ဟေဝံ ဝတ္တဗ္ဗေ။ပေ။ ကာမဂုဏာ ပဉ္စဝေါကာရဘဝေါတိ? န ဟေဝံ ဝတ္တဗ္ဗေ။ပေ။ ကာမဂုဏေ သမ္မာသမ္ဗုဒ္ဓါ ဥပ္ပဇ္ဇန္တိ၊ ပစ္စေကသမ္ဗုဒ္ဓါ ဥပ္ပဇ္ဇန္တိ၊ သာဝကယုဂံ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ။.

ကာမဓာတု ဘဝေါ ဂတိ သတ္တာဝါသော သံသာရော ယောနိ ဝိညာဏဋ္ဌိတိ အတ္တဘာဝပဋိလာဘောတိ? အာမန္တာ. ကာမဂုဏာ ဘဝေါ ဂတိ သတ္တာဝါသော သံသာရော ယောနိ ဝိညာဏဋ္ဌိတိ အတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ။ အတ္ထိ ကာမဓာတူပဂံ ကမ္မန္တိ? အာမန္တာ. အတ္ထိ ကာမဂုဏူပဂံ ကမ္မန္တိ? န ဟေဝံ ဝတ္တဗ္ဗေ။ပေ။ အတ္ထိ ကာမဓာတူပဂါ သတ္တာတိ? အာမန္တာ. အတ္ထိ ကာမဂုဏူပဂါ သတ္တာတိ? န ဟေဝံ ဝတ္တဗ္ဗေ။ပေ။.

ကာမဓာတုယာ သတ္တာ ဇာယန္တိ ဇီယန္တိ မီယန္တိ စဝန္တိ ဥပပဇ္ဇန္တီတိ? အာမန္တာ. ကာမဂုဏေ သတ္တာ ဇာယန္တိ ဇီယန္တိ မီယန္တိ စဝန္တိ ဥပပဇ္ဇန္တီတိ? န ဟေဝံ ဝတ္တဗ္ဗေ ။ပေ။ ကာမဓာတုယာ အတ္ထိ ရူပံ ဝေဒနာ သညာ သင်္ခါရာ ဝိညာဏန္တိ? အာမန္တာ. ကာမဂုဏေ အတ္ထိ ရူပံ ဝေဒနာ သညာ သင်္ခါရာ ဝိညာဏန္တိ? န ဟေဝံ ဝတ္တဗ္ဗေ။ပေ။ ကာမဓာတု ပဉ္စဝေါကာရဘဝေါတိ? အာမန္တာ. ကာမဂုဏာ ပဉ္စဝေါကာရဘဝေါတိ? န ဟေဝံ ဝတ္တဗ္ဗေ။ပေ။ ကာမဓာတုယာ သမ္မာသမ္ဗုဒ္ဓါ ဥပ္ပဇ္ဇန္တိ၊ ပစ္စေကသဗုဒ္ဓါ ဥပ္ပဇ္ဇန္တိ၊ သာဝကယုဂံ ဥပ္ပဇ္ဇတီတိ? အာမန္တာ. ကာမဂုဏေ သမ္မာသမ္ဗုဒ္ဓါ ဥပ္ပဇ္ဇန္တိ၊ ပစ္စေကသမ္ဗုဒ္ဓါ ဥပ္ပဇ္ဇန္တိ၊ သာဝကယုဂံ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ။.

၅၁၂. န ဝတ္တဗ္ဗံ – ‘‘ပဉ္စေဝ ကာမဂုဏာ ကာမဓာတူ’’တိ? အာမန္တာ. နနု ဝုတ္တံ ဘဂဝတာ – ‘‘ပဉ္စိမေ၊ ဘိက္ခဝေ၊ ကာမဂုဏာ! ကတမေ ပဉ္စ? စက္ခုဝိညေယျာ ရူပါ ဣဋ္ဌာ ကန္တာ မနာပါ ပိယရူပါ ကာမူပသံဟိတာ ရဇနီယာ၊ သောတဝိညေယျာ သဒ္ဒါ။ပေ။ ဃာနဝိညေယျာ ဂန္ဓာ။ပေ။ ဇိဝှါဝိညေယျာ ရသာ။ပေ။ ကာယဝိညေယျာ ဖောဋ္ဌဗ္ဗာ ဣဋ္ဌာ ကန္တာ မနာပါ ပိယရူပါ ကာမူပသံဟိတာ ရဇနီယာ – ဣမေ ခေါ၊ ဘိက္ခဝေ၊ ပဉ္စ ကာမဂုဏာ’’တိ. အတ္ထေဝ သုတ္တန္တောတိ? အာမန္တာ. တေန ဟိ ပဉ္စေဝ ကာမဂုဏာ ကာမဓာတူတိ.

ကာမဂုဏကထာ နိဋ္ဌိတာ.