၈. အဋ္ဌမဝဂ္ဂေါ

(၇၆) ၄. ကာမကထာ

၅၁၃. ပဉ္စေဝါယတနာ ကာမာတိ? အာမန္တာ. နနု အတ္ထိ တပ္ပဋိသံယုတ္တော ဆန္ဒောတိ? အာမန္တာ. ဟဉ္စိ အတ္ထိ တပ္ပဋိသံယုတ္တော ဆန္ဒော၊ နော စ ဝတ ရေ ဝတ္တဗ္ဗေ – ‘‘ပဉ္စေဝါယတနာ ကာမာ’’တိ. နနု အတ္ထိ တပ္ပဋိသံယုတ္တော ရာဂေါ တပ္ပဋိသံယုတ္တော ဆန္ဒော တပ္ပဋိသံယုတ္တော ဆန္ဒရာဂေါ တပ္ပဋိသံယုတ္တော သင်္ကပ္ပေါ တပ္ပဋိသံယုတ္တော ရာဂေါ တပ္ပဋိသံယုတ္တော သင်္ကပ္ပရာဂေါ တပ္ပဋိသံယုတ္တာ ပီတိ တပ္ပဋိသံယုတ္တံ သောမနဿံ တပ္ပဋိသံယုတ္တံ ပီတိသောမနဿန္တိ? အာမန္တာ. ဟဉ္စိ အတ္ထိ တပ္ပဋိသံယုတ္တံ ပီတိသောမနဿံ၊ နော စ ဝတ ရေ ဝတ္တဗ္ဗေ – ‘‘ပဉ္စေဝါယတနာ ကာမာ’’တိ.

၅၁၄. န ဝတ္တဗ္ဗံ – ‘‘ပဉ္စေဝါယတနာ ကာမာ’’တိ? အာမန္တာ. နနု ဝုတ္တံ ဘဂဝတာ – ‘‘ပဉ္စိမေ၊ ဘိက္ခဝေ၊ ကာမဂုဏာ! ကတမေ ပဉ္စ? စက္ခုဝိညေယျာ ရူပါ။ပေ။ ကာယဝိညေယျာ ဖောဋ္ဌဗ္ဗာ ဣဋ္ဌာ ကန္တာ မနာပါ ပိယရူပါ ကာမူပသံဟိတာ ရဇနီယာ – ဣမေ ခေါ၊ ဘိက္ခဝေ၊ ပဉ္စ ကာမဂုဏာ’’တိ. အတ္ထေဝ သုတ္တန္တောတိ? အာမန္တာ. တေန ဟိ ပဉ္စေဝါယတနာ ကာမာတိ.

ပဉ္စေဝါယတနာ ကာမာတိ? အာမန္တာ. နနု ဝုတ္တံ ဘဂဝတာ – ‘‘ပဉ္စိမေ၊ ဘိက္ခဝေ၊ ကာမဂုဏာ! ကတမေ ပဉ္စ? စက္ခုဝိညေယျာ ရူပါ။ပေ။ ကာယဝိညေယျာ ဖောဋ္ဌဗ္ဗာ ဣဋ္ဌာ ကန္တာ မနာပါ ပိယရူပါ ကာမူပသံဟိတာ ရဇနီယာ – ဣမေ ခေါ၊ ဘိက္ခဝေ၊ ပဉ္စ ကာမဂုဏာ. အပိ စ၊ ဘိက္ခဝေ၊ နေတေ ကာမာ ကာမဂုဏာ နာမေတေ အရိယဿ ဝိနယေ ဝုစ္စ’’န္တိ –

‘‘သင်္ကပ္ပရာဂေါ ပုရိသဿ ကာမော၊

န တေ ကာမာ ယာနိ စိတြာနိ လောကေ၊

သင်္ကပ္ပရာဂေါ ပုရိသဿ ကာမော၊

တိဋ္ဌန္တိ စိတြာနိ တထေဝ လောကေ၊

အထေတ္ထ ဓီရာ ဝိနယန္တိ ဆန္ဒ’’န္တိ [အ. နိ. ၆.၆၃ နိဗ္ဗေဓိကသုတ္တေ].

အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘ပဉ္စေဝါယတနာ ကာမာ’’တိ.

ကာမကထာ နိဋ္ဌိတာ.