၈. အဋ္ဌမဝဂ္ဂေါ

(၇၄) ၂. အန္တရာဘဝကထာ

၅၀၅. အတ္ထိ အန္တရာဘဝေါတိ? အာမန္တာ. ကာမဘဝေါတိ? န ဟေဝံ ဝတ္တဗ္ဗေ။ပေ။ အတ္ထိ အန္တရာဘဝေါတိ? အာမန္တာ. ရူပဘဝေါတိ? န ဟေဝံ ဝတ္တဗ္ဗေ။ပေ။ အတ္ထိ အန္တရာဘဝေါတိ? အာမန္တာ. အရူပဘဝေါတိ? န ဟေဝံ ဝတ္တဗ္ဗေ။ပေ။ အတ္ထိ အန္တရာဘဝေါတိ? အာမန္တာ. ကာမဘဝဿ စ ရူပဘဝဿ စ အန္တရေ အတ္ထိ အန္တရာဘဝေါတိ? န ဟေဝံ ဝတ္တဗ္ဗေ။ပေ။ အတ္ထိ အန္တရာဘဝေါတိ? အာမန္တာ. ရူပဘဝဿ စ အရူပဘဝဿ စ အန္တရေ အတ္ထိ အန္တရာဘဝေါတိ? န ဟေဝံ ဝတ္တဗ္ဗေ။ပေ။.

ကာမဘဝဿ စ ရူပဘဝဿ စ အန္တရေ နတ္ထိ အန္တရာဘဝေါတိ? အာမန္တာ. ဟဉ္စိ ကာမဘဝဿ စ ရူပဘဝဿ စ အန္တရေ နတ္ထိ အန္တရာဘဝေါ၊ နော စ ဝတ ရေ ဝတ္တဗ္ဗေ – ‘‘အတ္ထိ အန္တရာဘဝေါ’’တိ. ရူပဘဝဿ စ အရူပဘဝဿ စ အန္တရေ နတ္ထိ အန္တရာဘဝေါတိ? အာမန္တာ. ဟဉ္စိ ရူပဘဝဿ စ အရူပဘဝဿ စ အန္တရေ နတ္ထိ အန္တရာဘဝေါ၊ နော စ ဝတ ရေ ဝတ္တဗ္ဗေ – ‘‘အတ္ထိ အန္တရာဘဝေါ’’တိ.

၅၀၆. အတ္ထိ အန္တရာဘဝေါတိ? အာမန္တာ. ပဉ္စမီ သာ ယောနိ၊ ဆဋ္ဌမီ သာ ဂတိ၊ အဋ္ဌမီ သာ ဝိညာဏဋ္ဌိတိ၊ ဒသမော သော သတ္တာဝါသောတိ? န ဟေဝံ ဝတ္တဗ္ဗေ။ပေ။ အတ္ထိ အန္တရာဘဝေါတိ? အာမန္တာ. အန္တရာဘဝေါ ဘဝေါ ဂတိ သတ္တာဝါသော သံသာရော ယောနိ ဝိညာဏဋ္ဌိတိ အတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ။ အတ္ထိ အန္တရာဘဝူပဂံ ကမ္မန္တိ? န ဟေဝံ ဝတ္တဗ္ဗေ။ပေ။ အတ္ထိ အန္တရာဘဝူပဂါ သတ္တာတိ? န ဟေဝံ ဝတ္တဗ္ဗေ။ပေ။ အန္တရာဘဝေ သတ္တာ ဇာယန္တိ ဇီယန္တိ မီယန္တိ စဝန္တိ ဥပပဇ္ဇန္တီတိ? န ဟေဝံ ဝတ္တဗ္ဗေ။ပေ။ အန္တရာဘဝေ အတ္ထိ ရူပံ ဝေဒနာ သညာ သင်္ခါရာ ဝိညာဏန္တိ? န ဟေဝံ ဝတ္တဗ္ဗေ။ပေ။ အန္တရာဘဝေါ ပဉ္စဝေါကာရဘဝေါတိ? န ဟေဝံ ဝတ္တဗ္ဗေ။ပေ။.

၅၀၇. အတ္ထိ ကာမဘဝေါ၊ ကာမဘဝေါ ဘဝေါ ဂတိ သတ္တာဝါသော သံသာရော ယောနိ ဝိညာဏဋ္ဌိတိ အတ္တဘာဝပဋိလာဘောတိ? အာမန္တာ. အတ္ထိ အန္တရာဘဝေါ၊ အန္တရာဘဝေါ ဘဝေါ ဂတိ သတ္တာဝါသော သံသာရော ယောနိ ဝိညာဏဋ္ဌိတိ အတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ။ အတ္ထိ ကာမဘဝူပဂံ ကမ္မန္တိ? အာမန္တာ. အတ္ထိ အန္တရာဘဝူပဂံ ကမ္မန္တိ? န ဟေဝံ ဝတ္တဗ္ဗေ။ပေ။ အတ္ထိ ကာမဘဝူပဂါ သတ္တာတိ? အာမန္တာ. အတ္ထိ အန္တရာဘဝူပဂါ သတ္တာတိ? န ဟေဝံ ဝတ္တဗ္ဗေ။ပေ။ ကာမဘဝေ သတ္တာ ဇာယန္တိ ဇီယန္တိ မီယန္တိ စဝန္တိ ဥပပဇ္ဇန္တီတိ? အာမန္တာ. အန္တရာဘဝေ သတ္တာ ဇာယန္တိ ဇီယန္တိ မီယန္တိ စဝန္တိ ဥပပဇ္ဇန္တီတိ? န ဟေဝံ ဝတ္တဗ္ဗေ။ပေ။ ကာမဘဝေ အတ္ထိ ရူပံ ဝေဒနာ သညာ သင်္ခါရာ ဝိညာဏန္တိ? အာမန္တာ. အန္တရာဘဝေ အတ္ထိ ရူပံ ဝေဒနာ သညာ သင်္ခါရာ ဝိညာဏန္တိ? န ဟေဝံ ဝတ္တဗ္ဗေ။ပေ။ ကာမဘဝေါ ပဉ္စဝေါကာရဘဝေါတိ? အာမန္တာ. အန္တရာဘဝေါ ပဉ္စဝေါကာရဘဝေါတိ? န ဟေဝံ ဝတ္တဗ္ဗေ။ပေ။.

အတ္ထိ ရူပဘဝေါ၊ ရူပဘဝေါ ဘဝေါ ဂတိ သတ္တာဝါသော သံသာရော ယောနိ ဝိညာဏဋ္ဌိတိ အတ္တဘာဝပဋိလာဘောတိ? အာမန္တာ. အတ္ထိ အန္တရာဘဝေါ၊ အန္တရာဘဝေါ ဘဝေါ ဂတိ သတ္တာဝါသော သံသာရော ယောနိ ဝိညာဏဋ္ဌိတိ အတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ။ အတ္ထိ ရူပဘဝူပဂံ ကမ္မန္တိ? အာမန္တာ. အတ္ထိ အန္တရာဘဝူပဂံ ကမ္မန္တိ? န ဟေဝံ ဝတ္တဗ္ဗေ။ပေ။ အတ္ထိ ရူပဘဝူပဂါ သတ္တာတိ? အာမန္တာ. အတ္ထိ အန္တရာဘဝူပဂါ သတ္တာတိ? န ဟေဝံ ဝတ္တဗ္ဗေ။ပေ။ ရူပဘဝေ သတ္တာ ဇာယန္တိ ဇီယန္တိ မီယန္တိ စဝန္တိ ဥပပဇ္ဇန္တီတိ? အာမန္တာ. အန္တရာဘဝေ သတ္တာ ဇာယန္တိ ဇီယန္တိ မီယန္တိ စဝန္တိ ဥပပဇ္ဇန္တီတိ? န ဟေဝံ ဝတ္တဗ္ဗေ။ပေ။ ရူပဘဝေ အတ္ထိ ရူပံ ဝေဒနာ သညာ သင်္ခါရာ ဝိညာဏန္တိ? အာမန္တာ. အန္တရာဘဝေ အတ္ထိ ရူပံ ဝေဒနာ သညာ သင်္ခါရာ ဝိညာဏန္တိ? န ဟေဝံ ဝတ္တဗ္ဗေ။ပေ။ ရူပဘဝေါ ပဉ္စဝေါကာရဘဝေါတိ? အာမန္တာ. အန္တရာဘဝေါ ပဉ္စဝေါကာရဘဝေါတိ? န ဟေဝံ ဝတ္တဗ္ဗေ။ပေ။.

အတ္ထိ အရူပဘဝေါ၊ အရူပဘဝေါ ဘဝေါ ဂတိ သတ္တာဝါသော သံသာရော ယောနိ ဝိညာဏဋ္ဌိတိ အတ္တဘာဝပဋိလာဘောတိ? အာမန္တာ. အတ္ထိ အန္တရာဘဝေါ၊ အန္တရာဘဝေါ ဘဝေါ ဂတိ သတ္တာဝါသော သံသာရော ယောနိ ဝိညာဏဋ္ဌိတိ အတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ။ အတ္ထိ အရူပဘဝူပဂံ ကမ္မန္တိ? အာမန္တာ. အတ္ထိ အန္တရာဘဝူပဂံ ကမ္မန္တိ? န ဟေဝံ ဝတ္တဗ္ဗေ။ပေ။ အတ္ထိ အရူပဘဝူပဂါ သတ္တာတိ? အာမန္တာ. အတ္ထိ အန္တရာဘဝူပဂါ သတ္တာတိ? န ဟေဝံ ဝတ္တဗ္ဗေ။ပေ။ အရူပဘဝေ သတ္တာ ဇာယန္တိ ဇီယန္တိ မီယန္တိ စဝန္တိ ဥပပဇ္ဇန္တီတိ? အာမန္တာ. အန္တရာဘဝေ သတ္တာ ဇာယန္တိ ဇီယန္တိ မီယန္တိ စဝန္တိ ဥပပဇ္ဇန္တီတိ? န ဟေဝံ ဝတ္တဗ္ဗေ။ပေ။ အရူပဘဝေ အတ္ထိ ဝေဒနာ သညာ သင်္ခါရာ ဝိညာဏန္တိ? အာမန္တာ. အန္တရာဘဝေ အတ္ထိ ဝေဒနာ သညာ သင်္ခါရာ ဝိညာဏန္တိ? န ဟေဝံ ဝတ္တဗ္ဗေ။ပေ။ အရူပဘဝေါ စတုဝေါကာရဘဝေါတိ? အာမန္တာ. အန္တရာဘဝေါ စတုဝေါကာရဘဝေါတိ? န ဟေဝံ ဝတ္တဗ္ဗေ။ပေ။.

၅၀၈. အတ္ထိ အန္တရာဘဝေါတိ? အာမန္တာ. သဗ္ဗေသညေဝ သတ္တာနံ အတ္ထိ အန္တရာဘဝေါတိ? န ဟေဝံ ဝတ္တဗ္ဗေ ။ပေ။ သဗ္ဗေသညေဝ သတ္တာနံ နတ္ထိ အန္တရာဘဝေါတိ? အာမန္တာ. ဟဉ္စိ သဗ္ဗေသညေဝ သတ္တာနံ နတ္ထိ အန္တရာဘဝေါ၊ နော စ ဝတ ရေ ဝတ္တဗ္ဗေ – ‘‘အတ္ထိ အန္တရာဘဝေါ’’တိ.

အတ္ထိ အန္တရာဘဝေါတိ? အာမန္တာ. အာနန္တရိယဿ ပုဂ္ဂလဿ အတ္ထိ အန္တရာဘဝေါတိ? န ဟေဝံ ဝတ္တဗ္ဗေ။ပေ။ အာနန္တရိယဿ ပုဂ္ဂလဿ နတ္ထိ အန္တရာဘဝေါတိ? အာမန္တာ. ဟဉ္စိ အာနန္တရိယဿ ပုဂ္ဂလဿ နတ္ထိ အန္တရာဘဝေါ၊ နော စ ဝတ ရေ ဝတ္တဗ္ဗေ – ‘‘အတ္ထိ အန္တရာဘဝေါ’’တိ.

န အာနန္တရိယဿ ပုဂ္ဂလဿ အတ္ထိ အန္တရာဘဝေါတိ? အာမန္တာ. အာနန္တရိယဿ ပုဂ္ဂလဿ အတ္ထိ အန္တရာဘဝေါတိ? န ဟေဝံ ဝတ္တဗ္ဗေ။ပေ။ အာနန္တရိယဿ ပုဂ္ဂလဿ နတ္ထိ အန္တရာဘဝေါတိ? အာမန္တာ. န အာနန္တရိယဿ ပုဂ္ဂလဿ နတ္ထိ အန္တရာဘဝေါတိ? န ဟေဝံ ဝတ္တဗ္ဗေ။ပေ။ နိရယူပဂဿ ပုဂ္ဂလဿ။ပေ။ အသညသတ္တူပဂဿ ပုဂ္ဂလဿ ။ပေ။ အရူပူပဂဿ ပုဂ္ဂလဿ အတ္ထိ အန္တရာဘဝေါတိ? န ဟေဝံ ဝတ္တဗ္ဗေ။ပေ။ အရူပူပဂဿ ပုဂ္ဂလဿ နတ္ထိ အန္တရာဘဝေါတိ? အာမန္တာ. ဟဉ္စိ အရူပူပဂဿ ပုဂ္ဂလဿ နတ္ထိ အန္တရာဘဝေါ၊ နော စ ဝတ ရေ ဝတ္တဗ္ဗေ – ‘‘အတ္ထိ အန္တရာဘဝေါ’’တိ.

န အရူပူပဂဿ ပုဂ္ဂလဿ အတ္ထိ အန္တရာဘဝေါတိ? အာမန္တာ. အရူပူပဂဿ ပုဂ္ဂလဿ အတ္ထိ အန္တရာဘဝေါတိ? န ဟေဝံ ဝတ္တဗ္ဗေ။ပေ။ အရူပူပဂဿ ပုဂ္ဂလဿ နတ္ထိ အန္တရာဘဝေါတိ? အာမန္တာ. န အရူပူပဂဿ ပုဂ္ဂလဿ နတ္ထိ အန္တရာဘဝေါတိ? န ဟေဝံ ဝတ္တဗ္ဗေ။ပေ။.

၅၀၉. န ဝတ္တဗ္ဗံ အတ္ထိ အန္တရာဘဝေါတိ? အာမန္တာ. နနု အန္တရာပရိနိဗ္ဗာယီ ပုဂ္ဂလော အတ္ထီတိ? အာမန္တာ. ဟဉ္စိ အန္တရာပရိနိဗ္ဗာယီ ပုဂ္ဂလော အတ္ထိ၊ တေန ဝတ ရေ [နော စ ဝတ ရေ (သီ. က.)၊ နော ဝတ ရေ (သျာ.)] ဝတ္တဗ္ဗေ – ‘‘အတ္ထိ အန္တရာဘဝေါ’’တိ.

အန္တရာပရိနိဗ္ဗာယီ ပုဂ္ဂလော အတ္ထီတိ ကတွာ အတ္ထိ အန္တရာဘဝေါတိ? အာမန္တာ. ဥပဟစ္စပရိနိဗ္ဗာယီ ပုဂ္ဂလော အတ္ထီတိ ကတွာ အတ္ထိ ဥပဟစ္စဘဝေါတိ? န ဟေဝံ ဝတ္တဗ္ဗေ။ပေ။ အန္တရာပရိနိဗ္ဗာယီ ပုဂ္ဂလော အတ္ထီတိ ကတွာ အတ္ထိ အန္တရာဘဝေါတိ? အာမန္တာ. အသင်္ခါရပရိနိဗ္ဗာယီ ပုဂ္ဂလော။ပေ။ သသင်္ခါရပရိနိဗ္ဗာယီ ပုဂ္ဂလော အတ္ထီတိ ကတွာ အတ္ထိ သသင်္ခါရဘဝေါတိ? န ဟေဝံ ဝတ္တဗ္ဗေ။ပေ။.

အန္တရာဘဝကထာ နိဋ္ဌိတာ.