(၈၃) ၁၁. ကမ္မဟေတုကထာ

၅၄၆. ကမ္မဟေတု အရဟာ အရဟတ္တာ ပရိဟာယတီတိ? အာမန္တာ. ကမ္မဟေတု သောတာပန္နော သောတာပတ္တိဖလာ ပရိဟာယတီတိ? န ဟေဝံ ဝတ္တဗ္ဗေ။ပေ။ ကမ္မဟေတု အရဟာ အရဟတ္တာ ပရိဟာယတီတိ? အာမန္တာ. ကမ္မဟေတု သကဒါဂါမီ။ပေ။ အနာဂါမီ အနာဂါမိဖလာ ပရိဟာယတီတိ? န ဟေဝံ ဝတ္တဗ္ဗေ။ပေ။.

ကမ္မဟေတု သောတာပန္နော သောတာပတ္တိဖလာ န ပရိဟာယတီတိ? အာမန္တာ. ကမ္မဟေတု အရဟာ အရဟတ္တာ န ပရိဟာယတီတိ? န ဟေဝံ ဝတ္တဗ္ဗေ ။ပေ။ ကမ္မဟေတု သကဒါဂါမီ။ပေ။ အနာဂါမီ အနာဂါမိဖလာ န ပရိဟာယတီတိ? အာမန္တာ. ကမ္မဟေတု အရဟာ အရဟတ္တာ န ပရိဟာယတီတိ? န ဟေဝံ ဝတ္တဗ္ဗေ။ပေ။.

ကမ္မဟေတု အရဟာ အရဟတ္တာ ပရိဟာယတီတိ? အာမန္တာ. ပါဏာတိပါတကမ္မဿ ဟေတူတိ? န ဟေဝံ ဝတ္တဗ္ဗေ။ပေ။ အဒိန္နာဒါနကမ္မဿ ဟေတု။ပေ။ ကာမေသုမိစ္ဆာစာရကမ္မဿ ဟေတု။ မုသာဝါဒကမ္မဿ ဟေတု။ ပိသုဏဝါစာကမ္မဿ ဟေတု။ ဖရုသဝါစာကမ္မဿ ဟေတု။ သမ္ဖပ္ပလာပကမ္မဿ ဟေတု။ မာတုဃာတကမ္မဿ [မာတုဃာတကကမ္မဿ (သျာ.)၊ မာတုဃာတိကမ္မဿ (က.) တထာ ပိတုဃာတအရဟန္တဃာတကမ္မဿာတိပဒေသု] ဟေတု။ ပိတုဃာတကမ္မဿ ဟေတု။ အရဟန္တဃာတကမ္မဿ ဟေတု။ ရုဟိရုပ္ပါဒကမ္မဿ ဟေတု။ပေ။ သံဃဘေဒကမ္မဿ ဟေတူတိ? န ဟေဝံ ဝတ္တဗ္ဗေ။ပေ။.

ကတမဿ ကမ္မဿ ဟေတူတိ? ဟန္ဒ ဟိ အရဟန္တာနံ အဗ္ဘာစိက္ခတီတိ. အရဟန္တာနံ အဗ္ဘာစိက္ခနကမ္မဿ ဟေတု အရဟာ အရဟတ္တာ ပရိဟာယတီတိ? အာမန္တာ. ယေ ကေစိ အရဟန္တာနံ အဗ္ဘာစိက္ခန္တိ၊ သဗ္ဗေ တေ အရဟတ္တံ သစ္ဆိကရောန္တီတိ? န ဟေဝံ ဝတ္တဗ္ဗေ။ပေ။.

ကမ္မဟေတုကထာ နိဋ္ဌိတာ.

အဋ္ဌမဝဂ္ဂေါ.

တဿုဒ္ဒါနံ –

ဆ ဂတိယော၊ အန္တရာဘဝေါ၊ ပဉ္စေဝ ကာမဂုဏာ ကာမဓာတု၊ ပဉ္စေဝ အာယတနာ ကာမာ၊ ရူပိနော ဓမ္မာ ရူပဓာတု၊ အရူပိနော ဓမ္မာ အရူပဓာတု၊ သဠာယတနိကော အတ္တဘာဝေါ ရူပဓာတုယာ၊ အတ္ထိ ရူပံ အရူပေသု၊ ရူပံ ကမ္မံ၊ ရူပံ ဇီဝိတံ၊ ကမ္မဟေတုကာ ပရိဟာယတီတိ.