၉. နဝမဝဂ္ဂေါ

(၈၄) ၁. အာနိသံသဒဿာဝီကထာ

၅၄၇. အာနိသံသဒဿာဝိဿ သံယောဇနာနံ ပဟာနန္တိ? အာမန္တာ. နနု သင်္ခါရေ အနိစ္စတော မနသိကရောတော သံယောဇနာ ပဟီယန္တီတိ? အာမန္တာ. ဟဉ္စိ သင်္ခါရေ အနိစ္စတော မနသိကရောတော သံယောဇနာ ပဟီယန္တိ၊ နော စ ဝတ ရေ ဝတ္တဗ္ဗေ – ‘‘အာနိသံသဒဿာဝိဿ သံယောဇနာနံ ပဟာန’’န္တိ.

နနု သင်္ခါရေ ဒုက္ခတော။ပေ။ ရောဂတော။ ဂဏ္ဍတော။ သလ္လတော။ အဃတော။ အာဗာဓတော။ ပရတော။ ပလောကတော။ ဤတိတော။ ဥပဒ္ဒဝတော။ ဘယတော။ ဥပသဂ္ဂတော။ စလတော။ ပဘင်္ဂုတော။ အဒ္ဓုဝတော။ အတာဏတော။ အလေဏတော။ အသရဏတော။ အသရဏီဘူတတော။ ရိတ္တတော။ တုစ္ဆတော။ သုညတော။ အနတ္တတော။ အာဒီနဝတော။ပေ။ ဝိပရိဏာမဓမ္မတော မနသိကရောတော သံယောဇနာ ပဟီယန္တီတိ? အာမန္တာ. ဟဉ္စိ သင်္ခါရေ ဝိပရိဏာမဓမ္မတော မနသိကရောတော သံယောဇနာ ပဟီယန္တိ၊ နော စ ဝတ ရေ ဝတ္တဗ္ဗေ – ‘‘အာနိသံသဒဿာဝိဿ သံယောဇနာနံ ပဟာန’’န္တိ.

သင်္ခါရေ စ အနိစ္စတော မနသိ ကရောတိ နိဗ္ဗာနေ စ အာနိသံသဒဿာဝီ ဟောတီတိ? န ဟေဝံ ဝတ္တဗ္ဗေ။ပေ။ သင်္ခါရေ စ အနိစ္စတော မနသိ ကရောတိ နိဗ္ဗာနေ စ အာနိသံသဒဿာဝီ ဟောတီတိ? အာမန္တာ. ဒွိန္နံ ဖဿာနံ။ပေ။ ဒွိန္နံ စိတ္တာနံ သမောဓာနံ ဟောတီတိ? န ဟေဝံ ဝတ္တဗ္ဗေ။ပေ။ သင်္ခါရေ စ ဒုက္ခတော။ပေ။ ဝိပရိဏာမဓမ္မတော မနသိ ကရောတိ နိဗ္ဗာနေ စ အာနိသံသဒဿာဝီ ဟောတီတိ? န ဟေဝံ ဝတ္တဗ္ဗေ။ပေ။ သင်္ခါရေ စ ဝိပရိဏာမဓမ္မတော မနသိ ကရောတိ နိဗ္ဗာနေ စ အာနိသံသဒဿာဝီ ဟောတီတိ? အာမန္တာ. ဒွိန္နံ ဖဿာနံ။ပေ။ ဒွိန္နံ စိတ္တာနံ သမောဓာနံ ဟောတီတိ? န ဟေဝံ ဝတ္တဗ္ဗေ။ပေ။.

၅၄၈. န ဝတ္တဗ္ဗံ – ‘‘အာနိသံသဒဿာဝိဿ သံယောဇနာနံ ပဟာန’’န္တိ? အာမန္တာ. နနု ဝုတ္တံ ဘဂဝတာ – ‘‘ဣဓ၊ ဘိက္ခဝေ၊ ဘိက္ခု နိဗ္ဗာနေ သုခါနုပဿီ ဝိဟရတိ သုခသညီ သုခပဋိသံဝေဒီ၊ သတတံ သမိတံ အဗ္ဗောကိဏ္ဏံ စေတသာ အဓိမုစ္စမာနော ပညာယ ပရိယောဂါဟမာနော’’တိ [အ. နိ. ၇.၁၉]! အတ္ထေဝ သုတ္တန္တောတိ? အာမန္တာ. တေန ဟိ အာနိသံသဒဿာဝိဿ သံယောဇနာနံ ပဟာနန္တိ.

အာနိသံသဒဿာဝီကထာ နိဋ္ဌိတာ.

၉. နဝမဝဂ္ဂေါ

(၈၅) ၂. အမတာရမ္မဏကထာ

၅၄၉. အမတာရမ္မဏံ သံယောဇနန္တိ? အာမန္တာ. အမတံ သံယောဇနိယံ ဂန္ထနိယံ ဩဃနိယံ ယောဂနိယံ နီဝရဏိယံ ပရာမဋ္ဌံ ဥပါဒါနိယံ သံကိလေသိယန္တိ? န ဟေဝံ ဝတ္တဗ္ဗေ။ပေ။ နနု အမတံ အသံယောဇနိယံ အဂန္ထနိယံ။ပေ။ အသံကိလေသိယန္တိ? အာမန္တာ. ဟဉ္စိ အမတံ အသံယောဇနိယံ။ပေ။ အသံကိလေသိယံ၊ နော စ ဝတ ရေ ဝတ္တဗ္ဗေ – ‘‘အမတာရမ္မဏံ သံယောဇန’’န္တိ.

အမတံ အာရဗ္ဘ ရာဂေါ ဥပ္ပဇ္ဇတီတိ? အာမန္တာ. အမတံ ရာဂဋ္ဌာနိယံ ရဇနိယံ ကမနိယံ မဒနိယံ ဗန္ဓနိယံ မုစ္ဆနိယန္တိ? န ဟေဝံ ဝတ္တဗ္ဗေ။ပေ။ နနု အမတံ န ရာဂဋ္ဌာနိယံ န ရဇနိယံ န ကမနိယံ န မဒနိယံ န ဗန္ဓနိယံ န မုစ္ဆနိယန္တိ? အာမန္တာ. ဟဉ္စိ အမတံ န ရာဂဋ္ဌာနိယံ န ရဇနိယံ န ကမနိယံ န မဒနိယံ န ဗန္ဓနိယံ န မုစ္ဆနိယံ၊ နော စ ဝတ ရေ ဝတ္တဗ္ဗေ – ‘‘အမတံ အာရဗ္ဘ ရာဂေါ ဥပ္ပဇ္ဇတီ’’တိ.

အမတံ အာရဗ္ဘ ဒေါသော ဥပ္ပဇ္ဇတီတိ? အာမန္တာ. အမတံ ဒေါသဋ္ဌာနိယံ ကောပဋ္ဌာနိယံ ပဋိဃဋ္ဌာနိယန္တိ? န ဟေဝံ ဝတ္တဗ္ဗေ။ပေ။ နနု အမတံ န ဒေါသဋ္ဌာနိယံ န ကောပဋ္ဌာနိယံ န ပဋိဃဋ္ဌာနိယန္တိ? အာမန္တာ. ဟဉ္စိ အမတံ န ဒေါသဋ္ဌာနိယံ န ကောပဋ္ဌာနိယံ န ပဋိဃဋ္ဌာနိယံ၊ နော စ ဝတ ရေ ဝတ္တဗ္ဗေ – ‘‘အမတံ အာရဗ္ဘ ဒေါသော ဥပ္ပဇ္ဇတီ’’တိ.

အမတံ အာရဗ္ဘ မောဟော ဥပ္ပဇ္ဇတီတိ? အာမန္တာ. အမတံ မောဟဋ္ဌာနိယံ အညာဏကရဏံ အစက္ခုကရဏံ ပညာနိရောဓိယံ ဝိဃာတပက္ခိယံ အနိဗ္ဗာနသံဝတ္တနိယန္တိ? န ဟေဝံ ဝတ္တဗ္ဗေ။ပေ။ နနု အမတံ န မောဟဋ္ဌာနိယံ န အညာဏကရဏံ န အစက္ခုကရဏံ ပညာဗုဒ္ဓိယံ အဝိဃာတပက္ခိယံ နိဗ္ဗာနသံဝတ္တနိယန္တိ? အာမန္တာ. ဟဉ္စိ အမတံ န မောဟဋ္ဌာနိယံ န အညာဏကရဏံ။ပေ။ နိဗ္ဗာနသံဝတ္တနိယံ၊ နော စ ဝတ ရေ ဝတ္တဗ္ဗေ – ‘‘အမတံ အာရဗ္ဘ မောဟော ဥပ္ပဇ္ဇတီ’’တိ.

၅၅၀. ရူပံ အာရဗ္ဘ သံယောဇနာ ဥပ္ပဇ္ဇန္တိ၊ ရူပံ သံယောဇနိယံ ဂန္ထနိယံ။ပေ။ သံကိလေသိယန္တိ? အာမန္တာ. အမတံ အာရဗ္ဘ သံယောဇနာ ဥပ္ပဇ္ဇန္တိ၊ အမတံ သံယောဇနိယံ။ပေ။ သံကိလေသိယန္တိ? န ဟေဝံ ဝတ္တဗ္ဗေ။ပေ။.

ရူပံ အာရဗ္ဘ ရာဂေါ ဥပ္ပဇ္ဇတိ၊ ရူပံ ရာဂဋ္ဌာနိယံ ရဇနိယံ ကမနိယံ မဒနိယံ ဗန္ဓနိယံ မုစ္ဆနိယန္တိ? အာမန္တာ. အမတံ အာရဗ္ဘ ရာဂေါ ဥပ္ပဇ္ဇတိ၊ အမတံ ရာဂဋ္ဌာနိယံ။ပေ။ မုစ္ဆနိယန္တိ? န ဟေဝံ ဝတ္တဗ္ဗေ။ပေ။.

ရူပံ အာရဗ္ဘ ဒေါသော ဥပ္ပဇ္ဇတိ၊ ရူပံ ဒေါသဋ္ဌာနိယံ ကောပဋ္ဌာနိယံ ပဋိဃဋ္ဌာနိယန္တိ? အာမန္တာ. အမတံ အာရဗ္ဘ ဒေါသော ဥပ္ပဇ္ဇတိ၊ အမတံ ဒေါသဋ္ဌာနိယံ ကောပဋ္ဌာနိယံ ပဋိဃဋ္ဌာနိယန္တိ? န ဟေဝံ ဝတ္တဗ္ဗေ။ပေ။.

ရူပံ အာရဗ္ဘ မောဟော ဥပ္ပဇ္ဇတိ၊ ရူပံ မောဟဋ္ဌာနိယံ အညာဏကရဏံ။ပေ။ အနိဗ္ဗာနသံဝတ္တနိယန္တိ? အာမန္တာ. အမတံ အာရဗ္ဘ မောဟော ဥပ္ပဇ္ဇတိ၊ အမတံ မောဟဋ္ဌာနိယံ အညာဏကရဏံ။ပေ။ အနိဗ္ဗာနသံဝတ္တနိယန္တိ? န ဟေဝံ ဝတ္တဗ္ဗေ။ပေ။.

အမတံ အာရဗ္ဘ သံယောဇနာ ဥပ္ပဇ္ဇန္တိ၊ အမတံ အသံယောဇနိယံ အဂန္ထနိယံ အနောဃနိယံ အယောဂနိယံ အနီဝရဏိယံ အပရာမဋ္ဌံ အနုပါဒါနိယံ အသံကိလေသိယန္တိ? အာမန္တာ. ရူပံ အာရဗ္ဘ သံယောဇနာ ဥပ္ပဇ္ဇန္တိ၊ ရူပံ အသံယောဇနိယံ အဂန္ထနိယံ။ပေ။ အသံကိလေသိယန္တိ? န ဟေဝံ ဝတ္တဗ္ဗေ။ပေ။.

အမတံ အာရဗ္ဘ ရာဂေါ ဥပ္ပဇ္ဇတိ၊ အမတံ န ရာဂဋ္ဌာနိယံ န ရဇနိယံ န ကမနိယံ န မဒနိယံ န ဗန္ဓနိယံ န မုစ္ဆနိယန္တိ? အာမန္တာ. ရူပံ အာရဗ္ဘ ရာဂေါ ဥပ္ပဇ္ဇတိ၊ ရူပံ န ရာဂဋ္ဌာနိယံ။ပေ။ န မုစ္ဆနိယန္တိ? န ဟေဝံ ဝတ္တဗ္ဗေ။ပေ။.

အမတံ အာရဗ္ဘ ဒေါသော ဥပ္ပဇ္ဇတိ၊ အမတံ န ဒေါသဋ္ဌာနိယံ န ကောပဋ္ဌာနိယံ န ပဋိဃဋ္ဌာနိယန္တိ? အာမန္တာ. ရူပံ အာရဗ္ဘ ဒေါသော ဥပ္ပဇ္ဇတိ၊ ရူပံ န ဒေါသဋ္ဌာနိယံ န ကောပဋ္ဌာနိယံ န ပဋိဃဋ္ဌာနိယန္တိ? န ဟေဝံ ဝတ္တဗ္ဗေ။ပေ။.

အမတံ အာရဗ္ဘ မောဟော ဥပ္ပဇ္ဇတိ၊ အမတံ န မောဟဋ္ဌာနိယံ န အညာဏကရဏံ။ပေ။ နိဗ္ဗာနသံဝတ္တနိယန္တိ? အာမန္တာ. ရူပံ အာရဗ္ဘ မောဟော ဥပ္ပဇ္ဇတိ၊ ရူပံ န မောဟဋ္ဌာနိယံ န အညာဏကရဏံ။ပေ။ နိဗ္ဗာနသံဝတ္တနိယန္တိ? န ဟေဝံ ဝတ္တဗ္ဗေ။ပေ။.

၅၅၁. န ဝတ္တဗ္ဗံ – ‘‘အမတာရမ္မဏံ သံယောဇန’’န္တိ? အာမန္တာ. နနု ဝုတ္တံ ဘဂဝတာ – ‘‘နိဗ္ဗာနံ နိဗ္ဗာနတော သဉ္ဇာနာတိ၊ နိဗ္ဗာနံ နိဗ္ဗာနတော သဉ္ဇာနိတွာ နိဗ္ဗာနံ မညတိ၊ နိဗ္ဗာနသ္မိံ မညတိ၊ နိဗ္ဗာနတော မညတိ၊ နိဗ္ဗာနံ မေတိ မညတိ၊ နိဗ္ဗာနံ အဘိနန္ဒတီ’’တိ [မ. နိ. ၁.၆]! အတ္ထေဝ သုတ္တန္တောတိ? အာမန္တာ. တေန ဟိ အမတာရမ္မဏံ သံယောဇနန္တိ.

အမတာရမ္မဏကထာ နိဋ္ဌိတာ.

၉. နဝမဝဂ္ဂေါ

(၈၆) ၃. ရူပံ သာရမ္မဏန္တိကထာ

၅၅၂. ရူပံ သာရမ္မဏန္တိ? အာမန္တာ. အတ္ထိ တဿ အာဝဋ္ဋနာ အာဘောဂေါ သမန္နာဟာရော မနသိကာရော စေတနာ ပတ္ထနာ ပဏိဓီတိ? န ဟေဝံ ဝတ္တဗ္ဗေ။ပေ။ နနု နတ္ထိ တဿ အာဝဋ္ဋနာ အာဘောဂေါ။ပေ။ ပဏိဓီတိ? အာမန္တာ. ဟဉ္စိ နတ္ထိ တဿ အာဝဋ္ဋနာ အာဘောဂေါ။ပေ။ ပဏိဓိ၊ နော စ ဝတ ရေ ဝတ္တဗ္ဗေ – ‘‘ရူပံ သာရမ္မဏ’’န္တိ.

ဖဿော သာရမ္မဏော၊ အတ္ထိ တဿ အာဝဋ္ဋနာ အာဘောဂေါ။ပေ။ ပဏိဓီတိ? အာမန္တာ. ရူပံ သာရမ္မဏံ၊ အတ္ထိ တဿ အာဝဋ္ဋနာ အာဘောဂေါ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။.

ဝေဒနာ။ပေ။ သညာ စေတနာ စိတ္တံ သဒ္ဓါ ဝီရိယံ သတိ သမာဓိ ပညာ ရာဂေါ ဒေါသော မောဟော မာနော ဒိဋ္ဌိ ဝိစိကိစ္ဆာ ထိနံ ဥဒ္ဓစ္စံ အဟိရိကံ။ပေ။ အနောတ္တပ္ပံ သာရမ္မဏံ၊ အတ္ထိ တဿ အာဝဋ္ဋနာ အာဘောဂေါ။ပေ။ ပဏိဓီတိ? အာမန္တာ. ရူပံ သာရမ္မဏံ၊ အတ္ထိ တဿ အာဝဋ္ဋနာ အာဘောဂေါ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။.

ရူပံ သာရမ္မဏံ၊ နတ္ထိ တဿ အာဝဋ္ဋနာ အာဘောဂေါ။ပေ။ ပဏိဓီတိ? အာမန္တာ. ဖဿော သာရမ္မဏော၊ နတ္ထိ တဿ အာဝဋ္ဋနာ အာဘောဂေါ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။.

ရူပံ သာရမ္မဏံ၊ နတ္ထိ တဿ အာဝဋ္ဋနာ အာဘောဂေါ။ပေ။ ပဏိဓီတိ? အာမန္တာ. ဝေဒနာ။ပေ။ အနောတ္တပ္ပံ သာရမ္မဏံ၊ နတ္ထိ တဿ အာဝဋ္ဋနာ အာဘောဂေါ။ပေ။ ပဏိဓီတိ? န ဟေဝံ ဝတ္တဗ္ဗေ။ပေ။.

၅၅၃. န ဝတ္တဗ္ဗံ – ‘‘ရူပံ သာရမ္မဏ’’န္တိ? အာမန္တာ. နနု ရူပံ သပ္ပစ္စယန္တိ? အာမန္တာ. ဟဉ္စိ ရူပံ သပ္ပစ္စယံ၊ တေန ဝတ ရေ ဝတ္တဗ္ဗေ – ‘‘ရူပံ သာရမ္မဏ’’န္တိ.

ရူပံ သာရမ္မဏန္တိကထာ နိဋ္ဌိတာ.

၉. နဝမဝဂ္ဂေါ

(၈၇) ၄. အနုသယာ အနာရမ္မဏကထာ

၅၅၄. အနုသယာ အနာရမ္မဏာတိ? အာမန္တာ. ရူပံ နိဗ္ဗာနံ စက္ခာယတနံ။ပေ။ ဖောဋ္ဌဗ္ဗာယတနန္တိ? န ဟေဝံ ဝတ္တဗ္ဗေ။ပေ။.

ကာမရာဂါနုသယော အနာရမ္မဏောတိ? အာမန္တာ. ကာမရာဂေါ ကာမရာဂပရိယုဋ္ဌာနံ ကာမရာဂသံယောဇနံ ကာမောဃော ကာမယောဂေါ ကာမစ္ဆန္ဒနီဝရဏံ အနာရမ္မဏန္တိ? န ဟေဝံ ဝတ္တဗ္ဗေ။ပေ။ ကာမရာဂေါ ကာမရာဂပရိယုဋ္ဌာနံ ကာမရာဂသံယောဇနံ ကာမောဃော ကာမယောဂေါ ကာမစ္ဆန္ဒနီဝရဏံ သာရမ္မဏန္တိ? အာမန္တာ. ကာမရာဂါနုသယော သာရမ္မဏောတိ? န ဟေဝံ ဝတ္တဗ္ဗေ။ပေ။.

ကာမရာဂါနုသယော အနာရမ္မဏောတိ? အာမန္တာ. ကတမက္ခန္ဓပရိယာပန္နောတိ? သင်္ခါရက္ခန္ဓပရိယာပန္နောတိ. သင်္ခါရက္ခန္ဓော အနာရမ္မဏောတိ? န ဟေဝံ ဝတ္တဗ္ဗေ။ပေ။ သင်္ခါရက္ခန္ဓော အနာရမ္မဏောတိ? အာမန္တာ. ဝေဒနာက္ခန္ဓော သညာက္ခန္ဓော ဝိညာဏက္ခန္ဓော အနာရမ္မဏောတိ? န ဟေဝံ ဝတ္တဗ္ဗေ။ပေ။.

ကာမရာဂါနုသယော သင်္ခါရက္ခန္ဓပရိယာပန္နော အနာရမ္မဏောတိ? အာမန္တာ. ကာမရာဂေါ သင်္ခါရက္ခန္ဓပရိယာပန္နော အနာရမ္မဏောတိ? န ဟေဝံ ဝတ္တဗ္ဗေ။ပေ။ ကာမရာဂေါ သင်္ခါရက္ခန္ဓပရိယာပန္နော သာရမ္မဏောတိ? အာမန္တာ. ကာမရာဂါနုသယော သင်္ခါရက္ခန္ဓပရိယာပန္နော သာရမ္မဏောတိ? န ဟေဝံ ဝတ္တဗ္ဗေ။ပေ။.

ကာမရာဂါနုသယော သင်္ခါရက္ခန္ဓပရိယာပန္နော အနာရမ္မဏော၊ ကာမရာဂေါ သင်္ခါရက္ခန္ဓပရိယာပန္နော သာရမ္မဏောတိ? အာမန္တာ. သင်္ခါရက္ခန္ဓော ဧကဒေသော သာရမ္မဏော ဧကဒေသော အနာရမ္မဏောတိ? န ဟေဝံ ဝတ္တဗ္ဗေ။ပေ။ သင်္ခါရက္ခန္ဓော ဧကဒေသော သာရမ္မဏော ဧကဒေသော အနာရမ္မဏောတိ? အာမန္တာ. ဝေဒနာက္ခန္ဓော သညာက္ခန္ဓော ဝိညာဏက္ခန္ဓော ဧကဒေသော သာရမ္မဏော ဧကဒေသော အနာရမ္မဏောတိ? န ဟေဝံ ဝတ္တဗ္ဗေ။ပေ။.

၅၅၅. ပဋိဃာနုသယော မာနာနုသယော ဒိဋ္ဌာနုသယော ဝိစိကိစ္ဆာနုသယော ဘဝရာဂါနုသယော အဝိဇ္ဇာနုသယော အနာရမ္မဏောတိ? အာမန္တာ. အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာနုသယော အဝိဇ္ဇာပရိယုဋ္ဌာနံ အဝိဇ္ဇာသံယောဇနံ အဝိဇ္ဇာနီဝရဏံ အနာရမ္မဏန္တိ? န ဟေဝံ ဝတ္တဗ္ဗေ။ပေ။ အဝိဇ္ဇာ အဝိဇ္ဇောဃော။ပေ။ အဝိဇ္ဇာနီဝရဏံ သာရမ္မဏန္တိ? အာမန္တာ. အဝိဇ္ဇာနုသယော သာရမ္မဏောတိ? န ဟေဝံ ဝတ္တဗ္ဗေ။ပေ။.

အဝိဇ္ဇာနုသယော အနာရမ္မဏောတိ? အာမန္တာ. ကတမက္ခန္ဓပရိယာပန္နောတိ? သင်္ခါရက္ခန္ဓပရိယာပန္နောတိ. သင်္ခါရက္ခန္ဓော အနာရမ္မဏောတိ? န ဟေဝံ ဝတ္တဗ္ဗေ။ပေ။ သင်္ခါရက္ခန္ဓော အနာရမ္မဏောတိ? အာမန္တာ. ဝေဒနာက္ခန္ဓော သညာက္ခန္ဓော ဝိညာဏက္ခန္ဓော အနာရမ္မဏောတိ? န ဟေဝံ ဝတ္တဗ္ဗေ။ပေ။.

အဝိဇ္ဇာနုသယော သင်္ခါရက္ခန္ဓပရိယာပန္နော အနာရမ္မဏောတိ? အာမန္တာ. အဝိဇ္ဇာ သင်္ခါရက္ခန္ဓပရိယာပန္နာ အနာရမ္မဏာတိ? န ဟေဝံ ဝတ္တဗ္ဗေ။ပေ။ အဝိဇ္ဇာ သင်္ခါရက္ခန္ဓပရိယာပန္နာ သာရမ္မဏာတိ? အာမန္တာ. အဝိဇ္ဇာနုသယော သင်္ခါရက္ခန္ဓပရိယာပန္နော သာရမ္မဏောတိ? န ဟေဝံ ဝတ္တဗ္ဗေ။ပေ။.

အဝိဇ္ဇာနုသယော သင်္ခါရက္ခန္ဓပရိယာပန္နော အနာရမ္မဏော၊ အဝိဇ္ဇာ သင်္ခါရက္ခန္ဓပရိယာပန္နာ သာရမ္မဏာတိ? အာမန္တာ. သင်္ခါရက္ခန္ဓော ဧကဒေသော သာရမ္မဏော ဧကဒေသော အနာရမ္မဏောတိ? န ဟေဝံ ဝတ္တဗ္ဗေ။ပေ။ သင်္ခါရက္ခန္ဓော ဧကဒေသော သာရမ္မဏော ဧကဒေသော အနာရမ္မဏောတိ? အာမန္တာ. ဝေဒနာက္ခန္ဓော သညာက္ခန္ဓော ဝိညာဏက္ခန္ဓော ဧကဒေသော သာရမ္မဏော ဧကဒေသော အနာရမ္မဏောတိ? န ဟေဝံ ဝတ္တဗ္ဗေ။ပေ။.

၅၅၆. န ဝတ္တဗ္ဗံ – ‘‘အနုသယာ အနာရမ္မဏာ’’တိ? အာမန္တာ. ပုထုဇ္ဇနော ကုသလာဗျာကတေ စိတ္တေ ဝတ္တမာနေ သာနုသယောတိ ဝတ္တဗ္ဗောတိ? အာမန္တာ. အတ္ထိ တေသံ အနုသယာနံ အာရမ္မဏန္တိ? န ဟေဝံ ဝတ္တဗ္ဗေ။ပေ။ တေန ဟိ အနုသယာ အနာရမ္မဏာတိ. ပုထုဇ္ဇနော ကုသလာဗျာကတေ စိတ္တေ ဝတ္တမာနေ သရာဂေါတိ ဝတ္တဗ္ဗောတိ? အာမန္တာ. အတ္ထိ တဿ ရာဂဿ အာရမ္မဏန္တိ? န ဟေဝံ ဝတ္တဗ္ဗေ။ပေ။. တေန ဟိ ရာဂေါ အနာရမ္မဏောတိ.

အနုသယာ အနာရမ္မဏာတိကထာ နိဋ္ဌိတာ.

၉. နဝမဝဂ္ဂေါ

(၈၈) ၅. ဉာဏံ အနာရမ္မဏန္တိကထာ

၅၅၇. ဉာဏံ အနာရမ္မဏန္တိ? အာမန္တာ. ရူပံ နိဗ္ဗာနံ စက္ခာယတနံ။ပေ။ ဖောဋ္ဌဗ္ဗာယတနန္တိ? န ဟေဝံ ဝတ္တဗ္ဗေ။ပေ။ ဉာဏံ အနာရမ္မဏန္တိ? အာမန္တာ. ပညာ ပညိန္ဒြိယံ ပညာဗလံ သမ္မာဒိဋ္ဌိ ဓမ္မဝိစယသမ္ဗောဇ္ဈင်္ဂေါ အနာရမ္မဏောတိ? န ဟေဝံ ဝတ္တဗ္ဗေ။ပေ။ ပညာ ပညိန္ဒြိယံ ပညာဗလံ သမ္မာဒိဋ္ဌိ ဓမ္မဝိစယသမ္ဗောဇ္ဈင်္ဂေါ သာရမ္မဏောတိ? အာမန္တာ. ဉာဏံ သာရမ္မဏန္တိ? န ဟေဝံ ဝတ္တဗ္ဗေ။ပေ။.

ဉာဏံ အနာရမ္မဏန္တိ? အာမန္တာ. ကတမက္ခန္ဓပရိယာပန္နန္တိ? သင်္ခါရက္ခန္ဓပရိယာပန္နန္တိ. သင်္ခါရက္ခန္ဓော အနာရမ္မဏောတိ? န ဟေဝံ ဝတ္တဗ္ဗေ။ပေ။ သင်္ခါရက္ခန္ဓော အနာရမ္မဏောတိ? အာမန္တာ. ဝေဒနာက္ခန္ဓော သညာက္ခန္ဓော ဝိညာဏက္ခန္ဓော အနာရမ္မဏောတိ? န ဟေဝံ ဝတ္တဗ္ဗေ။ပေ။ ဉာဏံ သင်္ခါရက္ခန္ဓပရိယာပန္နံ အနာရမ္မဏန္တိ? အာမန္တာ. ပညာ သင်္ခါရက္ခန္ဓပရိယာပန္နာ အနာရမ္မဏာတိ? န ဟေဝံ ဝတ္တဗ္ဗေ။ပေ။ ပညာ သင်္ခါရက္ခန္ဓပရိယာပန္နာ သာရမ္မဏာတိ? အာမန္တာ. ဉာဏံ သင်္ခါရက္ခန္ဓပရိယာပန္နံ သာရမ္မဏန္တိ? န ဟေဝံ ဝတ္တဗ္ဗေ။ပေ။.

ဉာဏံ သင်္ခါရက္ခန္ဓပရိယာပန္နံ အနာရမ္မဏံ၊ ပညာ သင်္ခါရက္ခန္ဓပရိယာပန္နာ သာရမ္မဏာတိ? အာမန္တာ. သင်္ခါရက္ခန္ဓော ဧကဒေသော သာရမ္မဏော ဧကဒေသော အနာရမ္မဏောတိ? န ဟေဝံ ဝတ္တဗ္ဗေ။ပေ။ သင်္ခါရက္ခန္ဓော ဧကဒေသော သာရမ္မဏော ဧကဒေသော အနာရမ္မဏောတိ? အာမန္တာ. ဝေဒနာက္ခန္ဓော သညာက္ခန္ဓော ဝိညာဏက္ခန္ဓော ဧကဒေသော သာရမ္မဏော ဧကဒေသော အနာရမ္မဏောတိ? န ဟေဝံ ဝတ္တဗ္ဗေ။ပေ။.

၅၅၈. န ဝတ္တဗ္ဗံ – ‘‘ဉာဏံ အနာရမ္မဏ’’န္တိ? အာမန္တာ. အရဟာ စက္ခုဝိညာဏသမင်္ဂီ ဉာဏီတိ ဝတ္တဗ္ဗောတိ? အာမန္တာ. အတ္ထိ တဿ ဉာဏဿ အာရမ္မဏန္တိ? န ဟေဝံ ဝတ္တဗ္ဗေ။ပေ။ တေန ဟိ ဉာဏံ အနာရမ္မဏန္တိ. အရဟာ စက္ခုဝိညာဏသမင်္ဂီ ပညဝါတိ ဝတ္တဗ္ဗောတိ? အာမန္တာ. အတ္ထိ တာယ ပညာယ အာရမ္မဏန္တိ? န ဟေဝံ ဝတ္တဗ္ဗေ။ပေ။. တေန ဟိ ပညာ အနာရမ္မဏာတိ.

ဉာဏံ အနာရမ္မဏန္တိကထာ နိဋ္ဌိတာ.

၉. နဝမဝဂ္ဂေါ

(၈၉) ၆. အတီတာနာဂတာရမ္မဏကထာ

၅၅၉. အတီတာရမ္မဏံ စိတ္တံ အနာရမ္မဏန္တိ? အာမန္တာ. နနု အတီတာရမ္မဏန္တိ? အာမန္တာ. ဟဉ္စိ အတီတာရမ္မဏံ၊ နော စ ဝတ ရေ ဝတ္တဗ္ဗေ – ‘‘အတီတာရမ္မဏံ စိတ္တံ အနာရမ္မဏ’’န္တိ. အတီတာရမ္မဏံ စိတ္တံ အနာရမ္မဏန္တိ မိစ္ဆာ. ဟဉ္စိ ဝါ ပန အနာရမ္မဏံ၊ နော စ ဝတ ရေ ဝတ္တဗ္ဗေ – ‘‘အတီတာရမ္မဏ’’န္တိ. အနာရမ္မဏံ အတီတာရမ္မဏန္တိ မိစ္ဆာ.

အတီတာရမ္မဏံ စိတ္တံ အနာရမ္မဏန္တိ? အာမန္တာ. နနု အတီတံ အာရဗ္ဘ အတ္ထိ အာဝဋ္ဋနာ။ပေ။ ပဏိဓီတိ? အာမန္တာ. ဟဉ္စိ အတီတံ အာရဗ္ဘ အတ္ထိ အာဝဋ္ဋနာ။ပေ။ ပဏိဓိ၊ နော စ ဝတ ရေ ဝတ္တဗ္ဗေ – ‘‘အတီတာရမ္မဏံ စိတ္တံ အနာရမ္မဏ’’န္တိ.

၅၆၀. အနာဂတာရမ္မဏံ စိတ္တံ အနာရမ္မဏန္တိ? အာမန္တာ. နနု အနာဂတာရမ္မဏန္တိ? အာမန္တာ. ဟဉ္စိ အနာဂတာရမ္မဏံ၊ နော စ ဝတ ရေ ဝတ္တဗ္ဗေ – ‘‘အနာဂတာရမ္မဏံ စိတ္တံ အနာရမ္မဏ’’န္တိ. အနာဂတာရမ္မဏံ စိတ္တံ အနာရမ္မဏန္တိ မိစ္ဆာ. ဟဉ္စိ ဝါ ပန အနာရမ္မဏံ၊ နော စ ဝတ ရေ ဝတ္တဗ္ဗေ – ‘‘အနာဂတာရမ္မဏ’’န္တိ. အနာရမ္မဏံ အနာဂတာရမ္မဏန္တိ မိစ္ဆာ.

အနာဂတာရမ္မဏံ စိတ္တံ အနာရမ္မဏန္တိ? အာမန္တာ. နနု အနာဂတံ အာရဗ္ဘ အတ္ထိ အာဝဋ္ဋနာ။ပေ။ ပဏိဓီတိ? အာမန္တာ. ဟဉ္စိ အနာဂတံ အာရဗ္ဘ အတ္ထိ အာဝဋ္ဋနာ။ပေ။ ပဏိဓိ၊ နော စ ဝတ ရေ ဝတ္တဗ္ဗေ – ‘‘အနာဂတာရမ္မဏံ စိတ္တံ အနာရမ္မဏ’’န္တိ.

ပစ္စုပ္ပန္နံ အာရဗ္ဘ အတ္ထိ အာဝဋ္ဋနာ။ပေ။ ပဏိဓိ၊ ပစ္စုပ္ပန္နာရမ္မဏံ စိတ္တံ သာရမ္မဏန္တိ? အာမန္တာ. အတီတံ အာရဗ္ဘ အတ္ထိ အာဝဋ္ဋနာ။ပေ။ ပဏိဓိ၊ အတီတာရမ္မဏံ စိတ္တံ သာရမ္မဏန္တိ? န ဟေဝံ ဝတ္တဗ္ဗေ။ပေ။ ပစ္စုပ္ပန္နံ အာရဗ္ဘ အတ္ထိ အာဝဋ္ဋနာ။ပေ။ ပဏိဓိ၊ ပစ္စုပ္ပန္နာရမ္မဏံ စိတ္တံ သာရမ္မဏန္တိ? အာမန္တာ. အနာဂတံ အာရဗ္ဘ အတ္ထိ အာဝဋ္ဋနာ။ပေ။ ပဏိဓိ၊ အနာဂတာရမ္မဏံ စိတ္တံ သာရမ္မဏန္တိ? န ဟေဝံ ဝတ္တဗ္ဗေ။ပေ။.

အတီတံ အာရဗ္ဘ အတ္ထိ အာဝဋ္ဋနာ။ပေ။ ပဏိဓိ၊ အတီတာရမ္မဏံ စိတ္တံ အနာရမ္မဏန္တိ? အာမန္တာ. ပစ္စုပ္ပန္နံ အာရဗ္ဘ အတ္ထိ အာဝဋ္ဋနာ။ပေ။ ပဏိဓိ၊ ပစ္စုပ္ပန္နာရမ္မဏံ စိတ္တံ အနာရမ္မဏန္တိ? န ဟေဝံ ဝတ္တဗ္ဗေ။ပေ။.

အနာဂတံ အာရဗ္ဘ အတ္ထိ အာဝဋ္ဋနာ။ပေ။ ပဏိဓိ၊ အနာဂတာရမ္မဏံ စိတ္တံ အနာရမ္မဏန္တိ? အာမန္တာ. ပစ္စုပ္ပန္နံ အာရဗ္ဘ အတ္ထိ အာဝဋ္ဋနာ။ပေ။ ပဏိဓိ၊ ပစ္စုပ္ပန္နာရမ္မဏံ စိတ္တံ အနာရမ္မဏန္တိ? န ဟေဝံ ဝတ္တဗ္ဗေ။ပေ။.

၅၆၁. န ဝတ္တဗ္ဗံ – ‘‘အတီတာနာဂတာရမ္မဏံ စိတ္တံ အနာရမ္မဏ’’န္တိ? အာမန္တာ. နနု အတီတာနာဂတံ နတ္ထီတိ? အာမန္တာ. ဟဉ္စိ အတီတာနာဂတံ နတ္ထိ၊ တေန ဝတ ရေ ဝတ္တဗ္ဗေ – ‘‘အတီတာနာဂတာရမ္မဏံ စိတ္တံ အနာရမ္မဏ’’န္တိ။ပေ။.

အတီတာနာဂတာရမ္မဏကထာ နိဋ္ဌိတာ.

၉. နဝမဝဂ္ဂေါ

(၉၀) ၇. ဝိတက္ကာနုပတိတကထာ

၅၆၂. သဗ္ဗံ စိတ္တံ ဝိတက္ကာနုပတိတန္တိ? အာမန္တာ. သဗ္ဗံ စိတ္တံ ဝိစာရာနုပတိတံ ပီတာနုပတိတံ သုခါနုပတိတံ ဒုက္ခာနုပတိတံ သောမနဿာနုပတိတံ ဒေါမနဿာနုပတိတံ ဥပေက္ခာနုပတိတံ သဒ္ဓါနုပတိတံ ဝီရိယာနုပတိတံ သတာနုပတိတံ သမာဓာနုပတိတံ ပညာနုပတိတံ ရာဂါနုပတိတံ ဒေါသာနုပတိတံ။ပေ။ အနောတ္တပ္ပါနုပတိတန္တိ? န ဟေဝံ ဝတ္တဗ္ဗေ။ပေ။.

သဗ္ဗံ စိတ္တံ ဝိတက္ကာနုပတိတန္တိ? အာမန္တာ. နနု အတ္ထိ အဝိတက္ကော ဝိစာရမတ္တော သမာဓီတိ? အာမန္တာ. ဟဉ္စိ အတ္ထိ အဝိတက္ကော ဝိစာရမတ္တော သမာဓိ၊ နော စ ဝတ ရေ ဝတ္တဗ္ဗေ – ‘‘သဗ္ဗံ စိတ္တံ ဝိတက္ကာနုပတိတ’’န္တိ.

သဗ္ဗံ စိတ္တံ ဝိတက္ကာနုပတိတန္တိ? အာမန္တာ. နနု အတ္ထိ အဝိတက္ကော အဝိစာရော သမာဓီတိ? အာမန္တာ. ဟဉ္စိ အတ္ထိ အဝိတက္ကော အဝိစာရော သမာဓိ၊ နော စ ဝတ ရေ ဝတ္တဗ္ဗေ – ‘‘သဗ္ဗံ စိတ္တံ ဝိတက္ကာနုပတိတ’’န္တိ. သဗ္ဗံ စိတ္တံ ဝိတက္ကာနုပတိတန္တိ? အာမန္တာ. နနု တယော သမာဓီ ဝုတ္တာ ဘဂဝတာ – သဝိတက္ကော သဝိစာရော သမာဓိ၊ အဝိတက္ကော ဝိစာရမတ္တော သမာဓိ၊ အဝိတက္ကော အဝိစာရော သမာဓီတိ [ဒီ. နိ. ၃.၃၀၅၊ ၃၅၃]? အာမန္တာ. ဟဉ္စိ တယော သမာဓီ ဝုတ္တာ ဘဂဝတာ – သဝိတက္ကော သဝိစာရော သမာဓိ၊ အဝိတက္ကော ဝိစာရမတ္တော သမာဓိ၊ အဝိတက္ကော အဝိစာရော သမာဓိ၊ နော စ ဝတ ရေ ဝတ္တဗ္ဗေ – ‘‘သဗ္ဗံ စိတ္တံ ဝိတက္ကာနုပတိတ’’န္တိ.

ဝိတက္ကာနုပတိတကထာ နိဋ္ဌိတာ.

၉. နဝမဝဂ္ဂေါ

(၉၁) ၈. ဝိတက္ကဝိပ္ဖါရသဒ္ဒကထာ

၅၆၃. သဗ္ဗသော ဝိတက္ကယတော ဝိစာရယတော ဝိတက္ကဝိပ္ဖါရော သဒ္ဒေါတိ? အာမန္တာ. သဗ္ဗသော ဖုသယတော ဖဿဝိပ္ဖါရော သဒ္ဒေါ၊ သဗ္ဗသော ဝေဒယတော ဝေဒနာဝိပ္ဖါရော သဒ္ဒေါ၊ သဗ္ဗသော သဉ္ဇာနတော သညာဝိပ္ဖါရော သဒ္ဒေါ၊ သဗ္ဗသော စေတယတော စေတနာဝိပ္ဖါရော သဒ္ဒေါ၊ သဗ္ဗသော စိန္တယတော စိတ္တဝိပ္ဖါရော သဒ္ဒေါ၊ သဗ္ဗသော သရတော သတိဝိပ္ဖါရော သဒ္ဒေါ၊ သဗ္ဗသော ပဇာနတော ပညာဝိပ္ဖါရော သဒ္ဒေါတိ? န ဟေဝံ ဝတ္တဗ္ဗေ။ပေ။.

သဗ္ဗသော ဝိတက္ကယတော ဝိစာရယတော ဝိတက္ကဝိပ္ဖါရော သဒ္ဒေါတိ? အာမန္တာ. ဝိတက္ကဝိပ္ဖါရော သဒ္ဒေါ သောတဝိညေယျော သောတသ္မိံ ပဋိဟညတိ သောတဿ အာပါထံ အာဂစ္ဆတီတိ? န ဟေဝံ ဝတ္တဗ္ဗေ။ပေ။. နနု ဝိတက္ကဝိပ္ဖါရော သဒ္ဒေါ န သောတဝိညေယျော န သောတသ္မိံ ပဋိဟညတိ န သောတဿ အာပါထံ အာဂစ္ဆတီတိ? အာမန္တာ. ဟဉ္စိ ဝိတက္ကဝိပ္ဖါရော သဒ္ဒေါ န သောတဝိညေယျော န သောတသ္မိံ ပဋိဟညတိ န သောတဿ အာပါထံ အာဂစ္ဆတိ၊ နော စ ဝတ ရေ ဝတ္တဗ္ဗေ – ‘‘သဗ္ဗသော ဝိတက္ကယတော ဝိစာရယတော ဝိတက္ကဝိပ္ဖါရော သဒ္ဒေါ’’တိ.

ဝိတက္ကဝိပ္ဖါရသဒ္ဒကထာ နိဋ္ဌိတာ.

၉. နဝမဝဂ္ဂေါ

(၉၂) ၉. န ယထာစိတ္တဿ ဝါစာတိကထာ

၅၆၄. န ယထာစိတ္တဿ ဝါစာတိ? အာမန္တာ. အဖဿကဿ ဝါစာ အဝေဒနကဿ ဝါစာ အသညကဿ ဝါစာ အစေတနကဿ ဝါစာ အစိတ္တကဿ ဝါစာတိ? န ဟေဝံ ဝတ္တဗ္ဗေ။ပေ။ နနု သဖဿကဿ ဝါစာ သဝေဒနကဿ ဝါစာ သသညကဿ ဝါစာ သစေတနကဿ ဝါစာ သစိတ္တကဿ ဝါစာတိ? အာမန္တာ. ဟဉ္စိ သဖဿကဿ ဝါစာ။ပေ။ သစိတ္တကဿ ဝါစာ၊ နော စ ဝတ ရေ ဝတ္တဗ္ဗေ – ‘‘န ယထာစိတ္တဿ ဝါစာ’’တိ.

န ယထာစိတ္တဿ ဝါစာတိ? အာမန္တာ. အနာဝဋ္ဋေန္တဿ [အနာဝဋ္ဋန္တဿ (ပီ.)၊ အနာဝဇ္ဇန္တဿ (သီ. သျာ. က.) ကထာ. ၄၈၄ ပဿိတဗ္ဗံ] ဝါစာ။ပေ။ အနာဘောဂဿ ဝါစာ။ပေ။ အပ္ပဏိဒဟန္တဿ ဝါစာတိ? န ဟေဝံ ဝတ္တဗ္ဗေ။ပေ။ နနု အာဝဋ္ဋေန္တဿ ဝါစာ အာဘောဂဿ ဝါစာ။ပေ။ ပဏိဒဟန္တဿ ဝါစာတိ? အာမန္တာ. ဟဉ္စိ အာဝဋ္ဋေန္တဿ ဝါစာ အာဘောဂဿ ဝါစာ ပဏိဒဟန္တဿ ဝါစာ၊ နော စ ဝတ ရေ ဝတ္တဗ္ဗေ – ‘‘န ယထာစိတ္တဿ ဝါစာ’’တိ.

န ယထာစိတ္တဿ ဝါစာတိ? အာမန္တာ. နနု ဝါစာ စိတ္တသမုဋ္ဌာနာ စိတ္တေန သဟဇာတာ စိတ္တေန သဟ ဧကုပ္ပါဒါတိ? အာမန္တာ. ဟဉ္စိ ဝါစာ စိတ္တသမုဋ္ဌာနာ စိတ္တေန သဟဇာတာ စိတ္တေန သဟ ဧကုပ္ပါဒါ၊ နော စ ဝတ ရေ ဝတ္တဗ္ဗေ – ‘‘န ယထာစိတ္တဿ ဝါစာ’’တိ.

န ယထာစိတ္တဿ ဝါစာတိ? အာမန္တာ. န ဘဏိတုကာမော ဘဏတိ၊ န ကထေတုကာမော ကထေတိ၊ န အာလပိတုကာမော အာလပတိ၊ န ဝေါဟရိတုကာမော ဝေါဟရတီတိ? န ဟေဝံ ဝတ္တဗ္ဗေ။ပေ။ နနု ဘဏိတုကာမော ဘဏတိ၊ ကထေတုကာမော ကထေတိ၊ အာလပိတုကာမော အာလပတိ၊ ဝေါဟရိတုကာမော ဝေါဟရတီတိ? အာမန္တာ. ဟဉ္စိ ဘဏိတုကာမော ဘဏတိ၊ ကထေတုကာမော ကထေတိ၊ အာလပိတုကာမော အာလပတိ၊ ဝေါဟရိတုကာမော ဝေါဟရတိ၊ နော စ ဝတ ရေ ဝတ္တဗ္ဗေ – ‘‘န ယထာစိတ္တဿ ဝါစာ’’တိ.

၅၆၅. န ဝတ္တဗ္ဗံ – ‘‘န ယထာစိတ္တဿ ဝါစာ’’တိ? အာမန္တာ. နနု အတ္ထိ ကောစိ ‘‘အညံ ဘဏိဿာမီ’’တိ အညံ ဘဏတိ၊ ‘‘အညံ ကထေဿာမီ’’တိ အညံ ကထေတိ၊ ‘‘အညံ အာလပိဿာမီ’’တိ အညံ အာလပတိ၊ ‘‘အညံ ဝေါဟရိဿာမီ’’တိ အညံ ဝေါဟရတီတိ? အာမန္တာ. ဟဉ္စိ အတ္ထိ ကောစိ ‘‘အညံ ဘဏိဿာမီ’’တိ အညံ ဘဏတိ၊။ပေ။ ‘‘အညံ ဝေါဟရိဿာမီ’’တိ အညံ ဝေါဟရတိ၊ တေန ဝတ ရေ ဝတ္တဗ္ဗေ – ‘‘န ယထာစိတ္တဿ ဝါစာ’’တိ.

န ယထာစိတ္တဿ ဝါစာတိကထာ နိဋ္ဌိတာ.

၉. နဝမဝဂ္ဂေါ

(၉၃) ၁၀. န ယထာစိတ္တဿ ကာယကမ္မန္တိကထာ

၅၆၆. န ယထာစိတ္တဿ ကာယကမ္မန္တိ? အာမန္တာ. အဖဿကဿ ကာယကမ္မံ။ပေ။ အစိတ္တကဿ ကာယကမ္မန္တိ? န ဟေဝံ ဝတ္တဗ္ဗေ။ပေ။ နနု သဖဿကဿ ကာယကမ္မံ။ပေ။ သစိတ္တကဿ ကာယကမ္မန္တိ? အာမန္တာ. ဟဉ္စိ သဖဿကဿ ကာယကမ္မံ။ပေ။ သစိတ္တကဿ ကာယကမ္မံ၊ နော စ ဝတ ရေ ဝတ္တဗ္ဗေ – ‘‘န ယထာစိတ္တဿ ကာယကမ္မ’’န္တိ.

န ယထာစိတ္တဿ ကာယကမ္မန္တိ? အာမန္တာ. အနာဝဋ္ဋေန္တဿ ကာယကမ္မံ။ပေ။ အပ္ပဏိဒဟန္တဿ ကာယကမ္မန္တိ? န ဟေဝံ ဝတ္တဗ္ဗေ။ပေ။ နနု အာဝဋ္ဋေန္တဿ ကာယကမ္မံ။ပေ။ ပဏိဒဟန္တဿ ကာယကမ္မန္တိ? အာမန္တာ. ဟဉ္စိ အာဝဋ္ဋေန္တဿ ကာယကမ္မံ။ပေ။ ပဏိဒဟန္တဿ ကာယကမ္မံ၊ နော စ ဝတ ရေ ဝတ္တဗ္ဗေ – ‘‘န ယထာစိတ္တဿ ကာယကမ္မ’’န္တိ.

န ယထာစိတ္တဿ ကာယကမ္မန္တိ? အာမန္တာ. နနု ကာယကမ္မံ စိတ္တသမုဋ္ဌာနံ စိတ္တေန သဟဇာတံ စိတ္တေန သဟ ဧကုပ္ပါဒန္တိ? အာမန္တာ. ဟဉ္စိ ကာယကမ္မံ စိတ္တသမုဋ္ဌာနံ စိတ္တေန သဟဇာတံ စိတ္တေန သဟ ဧကုပ္ပါဒံ၊ နော စ ဝတ ရေ ဝတ္တဗ္ဗေ – ‘‘န ယထာစိတ္တဿ ကာယကမ္မ’’န္တိ.

န ယထာစိတ္တဿ ကာယကမ္မန္တိ? အာမန္တာ. န အဘိက္ကမိတုကာမော အဘိက္ကမတိ၊ န ပဋိက္ကမိတုကာမော ပဋိက္ကမတိ၊ န အာလောကေတုကာမော အာလောကေတိ၊ န ဝိလောကေတုကာမော ဝိလောကေတိ၊ န သမိဉ္ဇိတုကာမော သမိဉ္ဇေတိ၊ န ပသာရေတုကာမော ပသာရေတီတိ? န ဟေဝံ ဝတ္တဗ္ဗေ။ပေ။. နနု အဘိက္ကမိတုကာမော အဘိက္ကမတိ၊ ပဋိက္ကမိတုကာမော ပဋိက္ကမတိ၊ အာလောကေတုကာမော အာလောကေတိ၊ ဝိလောကေတုကာမော ဝိလောကေတိ၊ သမိဉ္ဇိတုကာမော သမိဉ္ဇေတိ၊ ပသာရေတုကာမော ပသာရေတီတိ? အာမန္တာ. ဟဉ္စိ အဘိက္ကမိတုကာမော အဘိက္ကမတိ။ပေ။ ပသာရေတုကာမော ပသာရေတိ၊ နော စ ဝတ ရေ ဝတ္တဗ္ဗေ – ‘‘န ယထာစိတ္တဿ ကာယကမ္မ’’န္တိ.

၅၆၇. န ဝတ္တဗ္ဗံ – ‘‘န ယထာစိတ္တဿ ကာယကမ္မ’’န္တိ? အာမန္တာ. နနု အတ္ထိ ကောစိ ‘‘အညတြ ဂစ္ဆိဿာမီ’’တိ အညတြ ဂစ္ဆတိ။ပေ။ ‘‘အညံ ပသာရေဿာမီ’’တိ အညံ ပသာရေတီတိ? အာမန္တာ. ဟဉ္စိ အတ္ထိ ကောစိ ‘‘အညတြ ဂစ္ဆိဿာမီ’’တိ အညတြ ဂစ္ဆတိ။ပေ။ ‘‘အညံ ပသာရေဿာမီ’’တိ အညံ ပသာရေတိ၊ တေန ဝတ ရေ ဝတ္တဗ္ဗေ – ‘‘န ယထာစိတ္တဿ ကာယကမ္မ’’န္တိ.

န ယထာစိတ္တဿ ကာယကမ္မန္တိကထာ နိဋ္ဌိတာ.

၉. နဝမဝဂ္ဂေါ

(၉၄) ၁၁. အတီတာနာဂတသမန္နာဂတကထာ

၅၆၈. အတီတေန သမန္နာဂတောတိ? အာမန္တာ. နနု အတီတံ နိရုဒ္ဓံ ဝိဂတံ ဝိပရိဏတံ အတ္ထင်္ဂတံ အဗ္ဘတ္ထင်္ဂတန္တိ? အာမန္တာ. ဟဉ္စိ အတီတံ နိရုဒ္ဓံ ဝိဂတံ ဝိပရိဏတံ အတ္ထင်္ဂတံ အဗ္ဘတ္ထင်္ဂတံ၊ နော စ ဝတ ရေ ဝတ္တဗ္ဗေ – ‘‘အတီတေန သမန္နာဂတော’’တိ.

အနာဂတေန သမန္နာဂတောတိ? အာမန္တာ. နနု အနာဂတံ အဇာတံ အဘူတံ အသဉ္ဇာတံ အနိဗ္ဗတ္တံ အနဘိနိဗ္ဗတ္တံ အပါတုဘူတန္တိ? အာမန္တာ. ဟဉ္စိ အနာဂတံ အဇာတံ အဘူတံ အသဉ္ဇာတံ အနိဗ္ဗတ္တံ အနဘိနိဗ္ဗတ္တံ အပါတုဘူတံ၊ နော စ ဝတ ရေ ဝတ္တဗ္ဗေ – ‘‘အနာဂတေန သမန္နာဂတော’’တိ.

၅၆၉. အတီတေန ရူပက္ခန္ဓေန သမန္နာဂတော၊ အနာဂတေန ရူပက္ခန္ဓေန သမန္နာဂတော၊ ပစ္စုပ္ပန္နေန ရူပက္ခန္ဓေန သမန္နာဂတောတိ? အာမန္တာ. တီဟိ ရူပက္ခန္ဓေဟိ သမန္နာဂတောတိ? န ဟေဝံ ဝတ္တဗ္ဗေ။ပေ။ အတီတေဟိ ပဉ္စဟိ ခန္ဓေဟိ သမန္နာဂတော၊ အနာဂတေဟိ ပဉ္စဟိ ခန္ဓေဟိ သမန္နာဂတော၊ ပစ္စုပ္ပန္နေဟိ ပဉ္စဟိ ခန္ဓေဟိ သမန္နာဂတောတိ? အာမန္တာ. ပန္နရသဟိ ခန္ဓေဟိ သမန္နာဂတောတိ? န ဟေဝံ ဝတ္တဗ္ဗေ။ပေ။.

အတီတေန စက္ခာယတနေန သမန္နာဂတော၊ အနာဂတေန စက္ခာယတနေန သမန္နာဂတော၊ ပစ္စုပ္ပန္နေန စက္ခာယတနေန သမန္နာဂတောတိ? အာမန္တာ. တီဟိ စက္ခာယတနေဟိ သမန္နာဂတောတိ? န ဟေဝံ ဝတ္တဗ္ဗေ။ပေ။ အတီတေဟိ ဒွါဒသဟိ အာယတနေဟိ သမန္နာဂတော၊ အနာဂတေဟိ ဒွါဒသဟိ အာယတနေဟိ သမန္နာဂတော၊ ပစ္စုပ္ပန္နေဟိ ဒွါဒသဟိ အာယတနေဟိ သမန္နာဂတောတိ? အာမန္တာ. ဆတ္တိံသာယတနေဟိ သမန္နာဂတောတိ? န ဟေဝံ ဝတ္တဗ္ဗေ။ပေ။.

အတီတာယ စက္ခုဓာတုယာ သမန္နာဂတော၊ အနာဂတာယ စက္ခုဓာတုယာ သမန္နာဂတော၊ ပစ္စုပ္ပန္နာယ စက္ခုဓာတုယာ သမန္နာဂတောတိ? အာမန္တာ. တီဟိ စက္ခုဓာတူဟိ သမန္နာဂတောတိ? န ဟေဝံ ဝတ္တဗ္ဗေ။ပေ။ အတီတာဟိ အဋ္ဌာရသဟိ ဓာတူဟိ သမန္နာဂတော၊ အနာဂတာဟိ အဋ္ဌာရသဟိ ဓာတူဟိ သမန္နာဂတော၊ ပစ္စုပ္ပန္နာဟိ အဋ္ဌာရသဟိ ဓာတူဟိ သမန္နာဂတောတိ? အာမန္တာ. စတုပညာသဓာတူဟိ သမန္နာဂတောတိ? န ဟေဝံ ဝတ္တဗ္ဗေ။ပေ။.

အတီတေန စက္ခုန္ဒြိယေန သမန္နာဂတော၊ အနာဂတေန စက္ခုန္ဒြိယေန သမန္နာဂတော၊ ပစ္စုပ္ပန္နေန စက္ခုန္ဒြိယေန သမန္နာဂတောတိ? အာမန္တာ. တီဟိ စက္ခုန္ဒြိယေဟိ သမန္နာဂတောတိ? န ဟေဝံ ဝတ္တဗ္ဗေ။ပေ။ အတီတေဟိ ဗာဝီသတိန္ဒြိယေဟိ သမန္နာဂတော၊ အနာဂတေဟိ ဗာဝီသတိန္ဒြိယေဟိ သမန္နာဂတော၊ ပစ္စုပ္ပန္နေဟိ ဗာဝီသတိန္ဒြိယေဟိ သမန္နာဂတောတိ? အာမန္တာ. ဆသဋ္ဌိန္ဒြိယေဟိ သမန္နာဂတောတိ? န ဟေဝံ ဝတ္တဗ္ဗေ။ပေ။.

၅၇၀. န ဝတ္တဗ္ဗံ – ‘‘အတီတာနာဂတေဟိ သမန္နာဂတော’’တိ? အာမန္တာ. နနု အတ္ထိ အဋ္ဌဝိမောက္ခဈာယီ စတုန္နံ ဈာနာနံ နိကာမလာဘီ နဝန္နံ အနုပုဗ္ဗဝိဟာရသမာပတ္တီနံ လာဘီတိ? အာမန္တာ. ဟဉ္စိ အတ္ထိ အဋ္ဌဝိမောက္ခဈာယီ စတုန္နံ ဈာနာနံ နိကာမလာဘီ နဝန္နံ အနုပုဗ္ဗဝိဟာရသမာပတ္တီနံ လာဘီ၊ တေန ဝတ ရေ ဝတ္တဗ္ဗေ – ‘‘အတီတာနာဂတေဟိ သမန္နာဂတော’’တိ.

အတီတာနာဂတသမန္နာဂတကထာ နိဋ္ဌိတာ.

နဝမဝဂ္ဂေါ.

တဿုဒ္ဒါနံ –

အာနိသံသဒဿာဝိဿ သံယောဇနာနံ ပဟာနံ၊ အမတာရမ္မဏံ သံယောဇနံ၊ ရူပံ သာရမ္မဏံ၊ အနုသယာ အနာရမ္မဏာ၊ ဧဝမေဝံ ဉာဏံ၊ အတီတာနာဂတာရမ္မဏံ စိတ္တံ၊ သဗ္ဗံ စိတ္တံ ဝိတက္ကာနုပတိတံ၊ သဗ္ဗသော ဝိတက္ကယတော ဝိစာရယတော ဝိတက္ကဝိပ္ဖါရော သဒ္ဒေါ၊ န ယထာစိတ္တဿ ဝါစာ၊ တထေဝ ကာယကမ္မံ အတီတာနာဂတေဟိ သမန္နာဂတောတိ.