(၇၃) ၁. ဆဂတိကထာ

၅၀၃. ဆ ဂတိယောတိ? အာမန္တာ. နနု ပဉ္စ ဂတိယော ဝုတ္တာ ဘဂဝတာ – နိရယော၊ တိရစ္ဆာနယောနိ၊ ပေတ္တိဝိသယော၊ မနုဿာ၊ ဒေဝါတိ [မ. နိ. ၁.၁၅၃]? အာမန္တာ. ဟဉ္စိ ပဉ္စ ဂတိယော ဝုတ္တာ ဘဂဝတာ – နိရယော၊ တိရစ္ဆာနယောနိ၊ ပေတ္တိဝိသယော၊ မနုဿာ၊ ဒေဝါ၊ နော စ ဝတ ရေ ဝတ္တဗ္ဗေ – ‘‘ဆ ဂတိယော’’တိ.

ဆ ဂတိယောတိ? အာမန္တာ. နနု ကာလကဉ္စိကာ [ကာလကဉ္ဇိကာ (သီ. သျာ. ကံ.)၊ ကာဠကဉ္ဇကာ (ပီ.)] သုရာ ပေတာနံ သမာနဝဏ္ဏာ သမာနဘောဂါ သမာနာဟာရာ သမာနာယုကာ ပေတေဟိ သဟ အာဝါဟဝိဝါဟံ ဂစ္ဆန္တီတိ? အာမန္တာ. ဟဉ္စိ ကာလကဉ္စိကာ အသုရာ ပေတာနံ သမာနဝဏ္ဏာ သမာနဘောဂါ သမာနာဟာရာ သမာနာယုကာ ပေတေဟိ သဟ အာဝါဟဝိဝါဟံ ဂစ္ဆန္တိ၊ နော စ ဝတ ရေ ဝတ္တဗ္ဗေ – ‘‘ဆ ဂတိယော’’တိ.

ဆ ဂတိယောတိ? အာမန္တာ. နနု ဝေပစိတ္တိပရိသာ ဒေဝါနံ သမာနဝဏ္ဏာ သမာနဘောဂါ သမာနာဟာရာ သမာနာယုကာ ဒေဝေဟိ သဟ အာဝါဟဝိဝါဟံ ဂစ္ဆန္တီတိ? အာမန္တာ. ဟဉ္စိ ဝေပစိတ္တိပရိသာ ဒေဝါနံ သမာနဝဏ္ဏာ သမာနဘောဂါ သမာနာဟာရာ သမာနာယုကာ ဒေဝေဟိ သဟ အာဝါဟဝိဝါဟံ ဂစ္ဆန္တိ၊ နော စ ဝတ ရေ ဝတ္တဗ္ဗေ – ‘‘ဆ ဂတိယော’’တိ.

ဆ ဂတိယောတိ? အာမန္တာ. နနု ဝေပစိတ္တိပရိသာ ပုဗ္ဗဒေဝါတိ? အာမန္တာ. ဟဉ္စိ ဝေပစိတ္တိပရိသာ ပုဗ္ဗဒေဝါ၊ နော စ ဝတ ရေ ဝတ္တဗ္ဗေ – ‘‘ဆ ဂတိယော’’တိ.

၅၀၄. န ဝတ္တဗ္ဗံ – ‘‘ဆ ဂတိယော’’တိ? အာမန္တာ. နနု အတ္ထိ အသုရကာယောတိ၊ အာမန္တာ. ဟဉ္စိ အတ္ထိ အသုရကာယော၊ တေန ဝတ ရေ ဝတ္တဗ္ဗေ – ‘‘ဆ ဂတိယော’’တိ.

ဆဂတိကထာ နိဋ္ဌိတာ.