(၃၀) ၁၀. သံဝရကထာ

၃၇၉. အတ္ထိ ဒေဝေသု သံဝရောတိ? အာမန္တာ. အတ္ထိ ဒေဝေသု အသံဝရောတိ? န ဟေဝံ ဝတ္တဗ္ဗေ။ပေ။.

နတ္ထိ ဒေဝေသု အသံဝရောတိ? အာမန္တာ. နတ္ထိ ဒေဝေသု သံဝရောတိ? န ဟေဝံ ဝတ္တဗ္ဗေ။ပေ။.

နနု အသံဝရာ သံဝရော သီလံ၊ အတ္ထိ ဒေဝေသု သံဝရောတိ? အာမန္တာ. အတ္ထိ ဒေဝေသု အသံဝရော၊ ယမှာ အသံဝရာ သံဝရော သီလန္တိ? န ဟေဝံ ဝတ္တဗ္ဗေ။ပေ။.

အာဇာနာဟိ နိဂ္ဂဟံ. ဟဉ္စိ အသံဝရာ သံဝရော သီလံ၊ အတ္ထိ ဒေဝေသု သံဝရော၊ တေန ဝတ ရေ ဝတ္တဗ္ဗေ – ‘‘အတ္ထိ ဒေဝေသု အသံဝရော၊ ယမှာ အသံဝရာ သံဝရော သီလ’’န္တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘အသံဝရာ သံဝရော သီလံ၊ အတ္ထိ ဒေဝေသု သံဝရော၊’ နော စ ဝတ္တဗ္ဗေ – ‘အတ္ထိ ဒေဝေသု အသံဝရော၊ ယမှာ အသံဝရာ သံဝရော သီလ’’’န္တိ မိစ္ဆာ.

နော စေ ပန ဝတ္တဗ္ဗေ – ‘‘အတ္ထိ ဒေဝေသု အသံဝရော၊ ယမှာ အသံဝရာ သံဝရော သီလ’’န္တိ၊ နော စ ဝတ ရေ ဝတ္တဗ္ဗေ – ‘‘အသံဝရာ သံဝရော သီလံ၊ အတ္ထိ ဒေဝေသု သံဝရော’’တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ ‘အသံဝရာ သံဝရော သီလံ၊ အတ္ထိ ဒေဝေသု သံဝရော၊’ နော စ ဝတ္တဗ္ဗေ – ‘အတ္ထိ ဒေဝေသု အသံဝရော၊ ယမှာ အသံဝရာ သံဝရော သီလ’’’န္တိ မိစ္ဆာ.

အတ္ထိ မနုဿေသု သံဝရော၊ အတ္ထိ တတ္ထ အသံဝရောတိ? အာမန္တာ. အတ္ထိ ဒေဝေသု သံဝရော၊ အတ္ထိ တတ္ထ အသံဝရောတိ? န ဟေဝံ ဝတ္တဗ္ဗေ။ပေ။.

အတ္ထိ ဒေဝေသု သံဝရော၊ နတ္ထိ တတ္ထ အသံဝရောတိ? အာမန္တာ. အတ္ထိ မနုဿေသု သံဝရော၊ နတ္ထိ တတ္ထ အသံဝရောတိ? န ဟေဝံ ဝတ္တဗ္ဗေ။ပေ။.

၃၈၀. အတ္ထိ ဒေဝေသု ပါဏာတိပါတာ ဝေရမဏီတိ? အာမန္တာ. အတ္ထိ ဒေဝေသု ပါဏာတိပါတောတိ? န ဟေဝံ ဝတ္တဗ္ဗေ။ပေ။.

အတ္ထိ ဒေဝေသု သုရာမေရယမဇ္ဇပမာဒဋ္ဌာနာ ဝေရမဏီတိ? အာမန္တာ. အတ္ထိ ဒေဝေသု သုရာမေရယမဇ္ဇပမာဒဋ္ဌာနန္တိ? န ဟေဝံ ဝတ္တဗ္ဗေ။ပေ။.

နတ္ထိ ဒေဝေသု ပါဏာတိပါတောတိ? အာမန္တာ. နတ္ထိ ဒေဝေသု ပါဏာတိပါတာ ဝေရမဏီတိ? န ဟေဝံ ဝတ္တဗ္ဗေ။ပေ။.

နတ္ထိ ဒေဝေသု သုရာမေရယမဇ္ဇပမာဒဋ္ဌာနန္တိ? အာမန္တာ. နတ္ထိ ဒေဝေသု သုရာမေရယမဇ္ဇပမာဒဋ္ဌာနာ ဝေရမဏီတိ? န ဟေဝံ ဝတ္တဗ္ဗေ။ပေ။.

အတ္ထိ မနုဿေသု ပါဏာတိပါတာ ဝေရမဏိ၊ အတ္ထိ တတ္ထ ပါဏာတိပါတောတိ? အာမန္တာ. အတ္ထိ ဒေဝေသု ပါဏာတိပါတာ ဝေရမဏိ၊ အတ္ထိ တတ္ထ ပါဏာတိပါတောတိ? န ဟေဝံ ဝတ္တဗ္ဗေ။ပေ။.

အတ္ထိ မနုဿေသု သုရာမေရယမဇ္ဇပမာဒဋ္ဌာနာ ဝေရမဏိ၊ အတ္ထိ တတ္ထ သုရာမေရယမဇ္ဇပမာဒဋ္ဌာနန္တိ? အာမန္တာ. အတ္ထိ ဒေဝေသု သုရာမေရယမဇ္ဇပမာဒဋ္ဌာနာ ဝေရမဏိ၊ အတ္ထိ တတ္ထ သုရာမေရယမဇ္ဇပမာဒဋ္ဌာနန္တိ? န ဟေဝံ ဝတ္တဗ္ဗေ။ပေ။.

အတ္ထိ ဒေဝေသု ပါဏာတိပါတာ ဝေရမဏိ၊ နတ္ထိ တတ္ထ ပါဏာတိပါတောတိ? အာမန္တာ. အတ္ထိ မနုဿေသု ပါဏာတိပါတာ ဝေရမဏိ၊ နတ္ထိ တတ္ထ ပါဏာတိပါတောတိ? န ဟေဝံ ဝတ္တဗ္ဗေ။ပေ။.

အတ္ထိ ဒေဝေသု သုရာမေရယမဇ္ဇပမာဒဋ္ဌာနာ ဝေရမဏိ၊ နတ္ထိ တတ္ထ သုရာမေရယမဇ္ဇပမာဒဋ္ဌာနန္တိ? အာမန္တာ. အတ္ထိ မနုဿေသု သုရာမေရယမဇ္ဇပမာဒဋ္ဌာနာ ဝေရမဏိ၊ နတ္ထိ တတ္ထ သုရာမေရယမဇ္ဇပမာဒဋ္ဌာနန္တိ? န ဟေဝံ ဝတ္တဗ္ဗေ။ပေ။.

နတ္ထိ ဒေဝေသု သံဝရောတိ? အာမန္တာ. သဗ္ဗေ ဒေဝါ ပါဏာတိပါတိနော အဒိန္နာဒါယိနော ကာမေသုမိစ္ဆာစာရိနော မုသာဝါဒိနော သုရာမေရယမဇ္ဇပမာဒဋ္ဌာယိနောတိ? န ဟေဝံ ဝတ္တဗ္ဗေ။ပေ။ တေန ဟိ အတ္ထိ ဒေဝေသု သံဝရောတိ.

သံဝရကထာ နိဋ္ဌိတာ.