၃. တတိယဝဂ္ဂေါ

(၃၁) ၁၁. အသညကထာ

၃၈၁. အသညသတ္တေသု သညာ အတ္ထီတိ? အာမန္တာ. သညာဘဝေါ သညာဂတိ သညာသတ္တာဝါသော သညာသံသာရော သညာယောနိ သညတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ။.

နနု အသညဘဝေါ အသညဂတိ အသညသတ္တာဝါသော အသညသံသာရော အသညယောနိ အသညတ္တဘာဝပဋိလာဘောတိ? အာမန္တာ. ဟဉ္စိ အသညဘဝေါ အသညဂတိ အသညသတ္တာဝါသော အသညသံသာရော အသညယောနိ အသညတ္တဘာဝပဋိလာဘော၊ နော စ ဝတ ရေ ဝတ္တဗ္ဗေ – ‘‘အသညသတ္တေသု သညာ အတ္ထီ’’တိ.

အသညသတ္တေသု သညာ အတ္ထီတိ? အာမန္တာ. ပဉ္စဝေါကာရဘဝေါ ဂတိ သတ္တာဝါသော သံသာရော ယောနိ အတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ။.

နနု ဧကဝေါကာရဘဝေါ ဂတိ သတ္တာဝါသော သံသာရော ယောနိ အတ္တဘာဝပဋိလာဘောတိ? အာမန္တာ. ဟဉ္စိ ဧကဝေါကာရဘဝေါ ဂတိ သတ္တာဝါသော သံသာရော ယောနိ အတ္တဘာဝပဋိလာဘော၊ နော စ ဝတ ရေ ဝတ္တဗ္ဗေ – ‘‘အသညသတ္တေသု သညာ အတ္ထီ’’တိ.

အသညသတ္တေသု သညာ အတ္ထီတိ? အာမန္တာ. တာယ သညာယ သညာကရဏီယံ ကရောတီတိ? န ဟေဝံ ဝတ္တဗ္ဗေ။ပေ။.

၃၈၂. မနုဿေသု သညာ အတ္ထိ၊ သော စ သညာဘဝေါ သညာဂတိ သညာသတ္တာဝါသော သညာသံသာရော သညာယောနိ သညတ္တဘာဝပဋိလာဘောတိ? အာမန္တာ. အသညသတ္တေသု သညာ အတ္ထိ၊ သော စ သညာဘဝေါ သညာဂတိ သတ္တာဝါသော သံသာရော ယောနိ အတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ။.

မနုဿေသု သညာ အတ္ထိ၊ သော စ ပဉ္စဝေါကာရဘဝေါ ဂတိ သတ္တာဝါသော သံသာရော ယောနိ အတ္တဘာဝပဋိလာဘောတိ? အာမန္တာ. အသညသတ္တေသု သညာ အတ္ထိ၊ သော စ ပဉ္စဝေါကာရဘဝေါ ဂတိ သတ္တာဝါသော သံသာရော ယောနိ အတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ။.

မနုဿေသု သညာ အတ္ထိ၊ တာယ သညာယ သညာကရဏီယံ ကရောတီတိ? အာမန္တာ. အသညသတ္တေသု သညာ အတ္ထိ၊ တာယ သညာယ သညာကရဏီယံ ကရောတီတိ? န ဟေဝံ ဝတ္တဗ္ဗေ။ပေ။.

အသညသတ္တေသု သညာ အတ္ထိ၊ သော စ အသညဘဝေါ အသညဂတိ အသညသတ္တာဝါသော အသညသံသာရော အသညယောနိ အသညတ္တဘာဝပဋိလာဘောတိ? အာမန္တာ. မနုဿေသု သညာ အတ္ထိ၊ သော စ အသညဘဝေါ အသညဂတိ။ပေ။ အသညတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ။.

အသညသတ္တေသု သညာ အတ္ထိ၊ သော စ ဧကဝေါကာရဘဝေါ ဂတိ သတ္တာဝါသော သံသာရော ယောနိ အတ္တဘာဝပဋိလာဘောတိ? အာမန္တာ. မနုဿေသု သညာ အတ္ထိ၊ သော စ ဧကဝေါကာရဘဝေါ ဂတိ။ပေ။ အတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ။.

အသညသတ္တေသု သညာ အတ္ထိ၊ န စ တာယ သညာယ သညာကရဏီယံ ကရောတီတိ? အာမန္တာ. မနုဿေသု သညာ အတ္ထိ၊ န စ တာယ သညာယ သညာကရဏီယံ ကရောတီတိ? န ဟေဝံ ဝတ္တဗ္ဗေ။ပေ။.

၃၈၃. န ဝတ္တဗ္ဗံ – ‘‘အသညသတ္တေသု သညာ အတ္ထီ’’တိ? အာမန္တာ. နနု ဝုတ္တံ ဘဂဝတာ – ‘‘သန္တိ၊ ဘိက္ခဝေ၊ အသညသတ္တာ နာမ ဒေဝါ၊ သညုပ္ပါဒါ စ ပန တေ ဒေဝါ တမှာ ကာယာ စဝန္တီ’’တိ [ဒီ. နိ. ၁.၆၈]! အတ္ထေဝ သုတ္တန္တောတိ? အာမန္တာ. တေန ဟိ အသညသတ္တေသု သညာ အတ္ထီတိ.

အသညသတ္တေသု သညာ အတ္ထီတိ? ကိဉ္စိ [ကဉ္စိ (သျာ.)] ကာလေ အတ္ထိ၊ ကိဉ္စိ ကာလေ နတ္ထီတိ. ကိဉ္စိ ကာလေ သညသတ္တာ ကိဉ္စိ ကာလေ အသညသတ္တာ၊ ကိဉ္စိ ကာလေ သညဘဝေါ ကိဉ္စိ ကာလေ အသညဘဝေါ၊ ကိဉ္စိ ကာလေ ပဉ္စဝေါကာရဘဝေါ ကိဉ္စိ ကာလေ ဧကဝေါကာရဘဝေါတိ? န ဟေဝံ ဝတ္တဗ္ဗေ။ပေ။.

အသညသတ္တေသု သညာ ကိဉ္စိ ကာလေ အတ္ထိ၊ ကိဉ္စိ ကာလေ နတ္ထီတိ? အာမန္တာ. ကံ ကာလံ အတ္ထိ၊ ကံ ကာလံ နတ္ထီတိ? စုတိကာလေ ဥပပတ္တိကာလေ အတ္ထိ၊ ဌိတိကာလေ နတ္ထီတိ. စုတိကာလေ ဥပပတ္တိကာလေ သညသတ္တာ၊ ဌိတိကာလေ အသညသတ္တာ၊ စုတိကာလေ ဥပပတ္တိကာလေ သညဘဝေါ၊ ဌိတိကာလေ အသညဘဝေါ၊ စုတိကာလေ ဥပပတ္တိကာလေ ပဉ္စဝေါကာရဘဝေါ၊ ဌိတိကာလေ ဧကဝေါကာရဘဝေါတိ? န ဟေဝံ ဝတ္တဗ္ဗေ။ပေ။.

အသညကထာ နိဋ္ဌိတာ.