(၁၆) ၇. စိတ္တဋ္ဌိတိကထာ

၃၃၅. ဧကံ စိတ္တံ ဒိဝသံ တိဋ္ဌတီတိ? အာမန္တာ. ဥပဍ္ဎဒိဝသော ဥပ္ပါဒက္ခဏော၊ ဥပဍ္ဎဒိဝသော ဝယက္ခဏောတိ? န ဟေဝံ ဝတ္တဗ္ဗေ.

ဧကံ စိတ္တံ ဒွေ ဒိဝသေ တိဋ္ဌတီတိ? အာမန္တာ. ဒိဝသော ဥပ္ပါဒက္ခဏော၊ ဒိဝသော ဝယက္ခဏောတိ? န ဟေဝံ ဝတ္တဗ္ဗေ.

ဧကံ စိတ္တံ စတ္တာရော ဒိဝသေ တိဋ္ဌတိ။ အဋ္ဌ ဒိဝသေ တိဋ္ဌတိ။ ဒသ ဒိဝသေ တိဋ္ဌတိ။ ဝီသတိ ဒိဝသေ တိဋ္ဌတိ။ မာသံ တိဋ္ဌတိ။ ဒွေ မာသေ တိဋ္ဌတိ။ စတ္တာရော မာသေ တိဋ္ဌတိ။ အဋ္ဌ မာသေ တိဋ္ဌတိ။ ဒသ မာသေ တိဋ္ဌတိ။ သံဝစ္ဆရံ တိဋ္ဌတိ။ ဒွေ ဝဿာနိ တိဋ္ဌတိ။ စတ္တာရိ ဝဿာနိ တိဋ္ဌတိ။ အဋ္ဌ ဝဿာနိ တိဋ္ဌတိ။ ဒသ ဝဿာနိ တိဋ္ဌတိ။ ဝီသတိ ဝဿာနိ တိဋ္ဌတိ။ တိံသ ဝဿာနိ တိဋ္ဌတိ။ စတ္တာရီသ ဝဿာနိ တိဋ္ဌတိ။ ပညာသ ဝဿာနိ တိဋ္ဌတိ။ ဝဿသတံ တိဋ္ဌတိ။ ဒွေ ဝဿသတာနိ တိဋ္ဌတိ။ စတ္တာရိ ဝဿသတာနိ တိဋ္ဌတိ။ ပဉ္စ ဝဿသတာနိ တိဋ္ဌတိ။ ဝဿသဟဿံ တိဋ္ဌတိ။ ဒွေ ဝဿသဟဿာနိ တိဋ္ဌတိ။ စတ္တာရိ ဝဿသဟဿာနိ တိဋ္ဌတိ။ အဋ္ဌ ဝဿသဟဿာနိ တိဋ္ဌတိ။ သောဠသ ဝဿသဟဿာနိ တိဋ္ဌတိ။ ကပ္ပံ တိဋ္ဌတိ။ ဒွေ ကပ္ပေ တိဋ္ဌတိ။ စတ္တာရော ကပ္ပေ တိဋ္ဌတိ။ အဋ္ဌ ကပ္ပေ တိဋ္ဌတိ။ သောဠသ ကပ္ပေ တိဋ္ဌတိ။ ဗာတ္တိံသ ကပ္ပေ တိဋ္ဌတိ။ စတုသဋ္ဌိ ကပ္ပေ တိဋ္ဌတိ။ ပဉ္စ ကပ္ပသတာနိ တိဋ္ဌတိ။ ကပ္ပသဟဿာနိ တိဋ္ဌတိ။ ဒွေ ကပ္ပသဟဿာနိ တိဋ္ဌတိ။ စတ္တာရိ ကပ္ပသဟဿာနိ တိဋ္ဌတိ။ အဋ္ဌ ကပ္ပသဟဿာနိ တိဋ္ဌတိ။ သောဠသ ကပ္ပသဟဿာနိ တိဋ္ဌတိ။ ဝီသတိ ကပ္ပသဟဿာနိ တိဋ္ဌတိ။ စတ္တာရီသ ကပ္ပသဟဿာနိ တိဋ္ဌတိ။ သဋ္ဌိ ကပ္ပသဟဿာနိ တိဋ္ဌတိ။ စတုရာသီတိ ကပ္ပသဟဿာနိ တိဋ္ဌတီတိ? အာမန္တာ. ဒွေစတ္တာရီသ ကပ္ပသဟဿာနိ ဥပ္ပါဒက္ခဏော၊ ဒွေစတ္တာရီသ ကပ္ပသဟဿာနိ ဝယက္ခဏောတိ? န ဟေဝံ ဝတ္တဗ္ဗေ.

ဧကံ စိတ္တံ ဒိဝသံ တိဋ္ဌတီတိ? အာမန္တာ. အတ္ထညေ ဓမ္မာ ဧကာဟံ ဗဟုမ္ပိ ဥပ္ပဇ္ဇိတွာ နိရုဇ္ဈန္တီတိ? အာမန္တာ. တေ ဓမ္မာ စိတ္တေန လဟုပရိဝတ္တာတိ? န ဟေဝံ ဝတ္တဗ္ဗေ.

တေ ဓမ္မာ စိတ္တေန လဟုပရိဝတ္တာတိ? အာမန္တာ. နနု ဝုတ္တံ ဘဂဝတာ – ‘‘နာဟံ၊ ဘိက္ခဝေ၊ အညံ ဧကဓမ္မမ္ပိ သမနုပဿာမိ ဧဝံ လဟုပရိဝတ္တံ ယထယိဒံ စိတ္တံ. ယာဝဉ္စိဒံ၊ ဘိက္ခဝေ၊ ဥပမာပိ န သုကရာ ယာဝ လဟုပရိဝတ္တံ စိတ္တ’’န္တိ [အ. နိ. ၁.၄၈]. အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘တေ ဓမ္မာ စိတ္တေန လဟုပရိဝတ္တာ’’တိ.

တေ ဓမ္မာ စိတ္တေန လဟုပရိဝတ္တာတိ? အာမန္တာ. နနု ဝုတ္တံ ဘဂဝတာ – ‘‘သေယျထာပိ၊ ဘိက္ခဝေ၊ မက္ကဋော အရညေ ပဝနေ စရမာနော သာခံ ဂဏှတိ၊ တံ မုဉ္စိတွာ အညံ ဂဏှတိ၊ တံ မုဉ္စိတွာ အညံ ဂဏှတိ၊ ဧဝမေဝ ခေါ၊ ဘိက္ခဝေ၊ ယမိဒံ [ယဒိဒံ (ဗဟူသု)] ဝုစ္စတိ စိတ္တံ ဣတိပိ မနော ဣတိပိ ဝိညာဏံ ဣတိပိ တံ ရတ္တိယာ စ ဒိဝသဿ စ အညဒေဝ ဥပ္ပဇ္ဇတိ အညံ နိရုဇ္ဈတီ’’တိ [သံ. နိ. ၂.၆၁]. အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘တေ ဓမ္မာ စိတ္တေန လဟုပရိဝတ္တာ’’တိ.

၃၃၆. ဧကံ စိတ္တံ ဒိဝသံ တိဋ္ဌတီတိ? အာမန္တာ. စက္ခုဝိညာဏံ ဒိဝသံ တိဋ္ဌတီတိ? န ဟေဝံ ဝတ္တဗ္ဗေ. သောတဝိညာဏံ။ပေ။ ဃာနဝိညာဏံ။ ဇိဝှါဝိညာဏံ။ ကာယဝိညာဏံ။ အကုသလံ စိတ္တံ။ ရာဂသဟဂတံ။ ဒေါသသဟဂတံ။ မောဟသဟဂတံ။ မာနသဟဂတံ။ ဒိဋ္ဌိသဟဂတံ။ ဝိစိကိစ္ဆာသဟဂတံ။ ထိနသဟဂတံ။ ဥဒ္ဓစ္စသဟဂတံ။ အဟိရိကသဟဂတံ။ အနောတ္တပ္ပသဟဂတံ စိတ္တံ ဒိဝသံ တိဋ္ဌတီတိ? န ဟေဝံ ဝတ္တဗ္ဗေ။ပေ။.

ဧကံ စိတ္တံ ဒိဝသံ တိဋ္ဌတီတိ? အာမန္တာ. ယေနေဝ စိတ္တေန စက္ခုနာ ရူပံ ပဿတိ၊ တေနေဝ စိတ္တေန သောတေန သဒ္ဒံ သုဏာတိ။ပေ။ ဃာနေန ဂန္ဓံ ဃာယတိ။ ဇိဝှါယ ရသံ သာယတိ။ ကာယေန ဖောဋ္ဌဗ္ဗံ ဖုသတိ။ မနသာ ဓမ္မံ ဝိဇာနာတိ။ပေ။ ယေနေဝ စိတ္တေန မနသာ ဓမ္မံ ဝိဇာနာတိ၊ တေနေဝ စိတ္တေန စက္ခုနာ ရူပံ ပဿတိ။ပေ။ သောတေန သဒ္ဒံ သုဏာတိ။ ဃာနေန ဂန္ဓံ ဃာယတိ။ ဇိဝှါယ ရသံ သာယတိ။ပေ။ ကာယေန ဖောဋ္ဌဗ္ဗံ ဖုသတီတိ? န ဟေဝံ ဝတ္တဗ္ဗေ။ပေ။.

ဧကံ စိတ္တံ ဒိဝသံ တိဋ္ဌတီတိ? အာမန္တာ. ယေနေဝ စိတ္တေန အဘိက္ကမတိ၊ တေနေဝ စိတ္တေန ပဋိက္ကမတိ၊ ယေနေဝ စိတ္တေန ပဋိက္ကမတိ၊ တေနေဝ စိတ္တေန အဘိက္ကမတိ၊ ယေနေဝ စိတ္တေန အာလောကေတိ၊ တေနေဝ စိတ္တေန ဝိလောကေတိ၊ ယေနေဝ စိတ္တေန ဝိလောကေတိ၊ တေနေဝ စိတ္တေန အာလောကေတိ၊ ယေနေဝ စိတ္တေန သမိဉ္ဇေတိ၊ တေနေဝ စိတ္တေန ပသာရေတိ၊ ယေနေဝ စိတ္တေန ပသာရေတိ၊ တေနေဝ စိတ္တေန သမိဉ္ဇေတီတိ? န ဟေဝံ ဝတ္တဗ္ဗေ။ပေ။.

၃၃၇. အာကာသာနဉ္စာယတနူပဂါနံ ဒေဝါနံ ဧကံ စိတ္တံ ယာဝတာယုကံ တိဋ္ဌတီတိ? အာမန္တာ. မနုဿာနံ ဧကံ စိတ္တံ ယာဝတာယုကံ တိဋ္ဌတီတိ? န ဟေဝံ ဝတ္တဗ္ဗေ.

အာကာသာနဉ္စာယတနူပဂါနံ ဒေဝါနံ ဧကံ စိတ္တံ ယာဝတာယုကံ တိဋ္ဌတီတိ? အာမန္တာ. စာတုမဟာရာဇိကာနံ ဒေဝါနံ။ပေ။ တာဝတိံသာနံ ဒေဝါနံ။ ယာမာနံ ဒေဝါနံ။ တုသိတာနံ ဒေဝါနံ။ နိမ္မာနရတီနံ ဒေဝါနံ။ ပရနိမ္မိတဝသဝတ္တီနံ ဒေဝါနံ။ ဗြဟ္မပါရိသဇ္ဇာနံ ဒေဝါနံ။ ဗြဟ္မပုရောဟိတာနံ ဒေဝါနံ။ မဟာဗြဟ္မာနံ ဒေဝါနံ။ ပရိတ္တာဘာနံ ဒေဝါနံ။ အပ္ပမာဏာဘာနံ ဒေဝါနံ။ အာဘဿရာနံ ဒေဝါနံ။ ပရိတ္တသုဘာနံ ဒေဝါနံ။ အပ္ပမာဏသုဘာနံ ဒေဝါနံ။ သုဘကိဏှာနံ ဒေဝါနံ ။ ဝေဟပ္ဖလာနံ ဒေဝါနံ။ အဝိဟာနံ ဒေဝါနံ။ အတပ္ပါနံ ဒေဝါနံ။ သုဒဿာနံ ဒေဝါနံ။ သုဒဿီနံ ဒေဝါနံ။ အကနိဋ္ဌာနံ ဒေဝါနံ ဧကံ စိတ္တံ ယာဝတာယုကံ တိဋ္ဌတီတိ? န ဟေဝံ ဝတ္တဗ္ဗေ.

အာကာသာနဉ္စာယတနူပဂါနံ ဒေဝါနံ ဝီသတိ ကပ္ပသဟဿာနိ အာယုပ္ပမာဏံ၊ အာကာသာနဉ္စာယတနူပဂါနံ ဒေဝါနံ ဧကံ စိတ္တံ ဝီသတိ ကပ္ပသဟဿာနိ တိဋ္ဌတီတိ? အာမန္တာ. မနုဿာနံ ဝဿသတံ အာယုပ္ပမာဏံ၊ မနုဿာနံ ဧကံ စိတ္တံ ဝဿသတံ တိဋ္ဌတီတိ? န ဟေဝံ ဝတ္တဗ္ဗေ.

အာကာသာနဉ္စာယတနူပဂါနံ ဒေဝါနံ ဝီသတိ ကပ္ပသဟဿာနိ အာယုပ္ပမာဏံ၊ အာကာသာနဉ္စာယတနူပဂါနံ ဒေဝါနံ ဧကံ စိတ္တံ ဝီသတိ ကပ္ပသဟဿာနိ တိဋ္ဌတီတိ? အာမန္တာ. စာတုမဟာရာဇိကာနံ ဒေဝါနံ ပဉ္စ ဝဿသတာနိ အာယုပ္ပမာဏံ၊ စာတုမဟာရာဇိကာနံ ဒေဝါနံ ဧကံ စိတ္တံ ပဉ္စ ဝဿသတာနိ တိဋ္ဌတိ။ ဝဿသဟဿံ တိဋ္ဌတိ။ ဒွေ ဝဿသဟဿာနိ တိဋ္ဌတိ။ စတ္တာရိ ဝဿသဟဿာနိ တိဋ္ဌတိ။ အဋ္ဌ ဝဿသဟဿာနိ တိဋ္ဌတိ။ သောဠသ ဝဿသဟဿာနိ တိဋ္ဌတိ။ ကပ္ပဿ တတိယဘာဂံ တိဋ္ဌတိ။ ဥပဍ္ဎကပ္ပံ တိဋ္ဌတိ။ ဧကံ ကပ္ပံ တိဋ္ဌတိ။ ဒွေ ကပ္ပေ တိဋ္ဌတိ။ စတ္တာရော ကပ္ပေ တိဋ္ဌတိ။ အဋ္ဌ ကပ္ပေ တိဋ္ဌတိ။ သောဠသ ကပ္ပေ တိဋ္ဌတိ။ ဗာတ္တိံသ ကပ္ပေ တိဋ္ဌတိ။ စတုသဋ္ဌိ ကပ္ပေ တိဋ္ဌတိ။ ပဉ္စ ကပ္ပသတာနိ တိဋ္ဌတိ။ ကပ္ပသဟဿံ တိဋ္ဌတိ။ ဒွေ ကပ္ပသဟဿာနိ တိဋ္ဌတိ။ စတ္တာရိ ကပ္ပသဟဿာနိ တိဋ္ဌတိ။ အဋ္ဌ ကပ္ပသဟဿာနိ တိဋ္ဌတိ။ အကနိဋ္ဌာနံ ဒေဝါနံ သောဠသ ကပ္ပသဟဿာနိ အာယုပ္ပမာဏံ၊ အကနိဋ္ဌာနံ ဒေဝါနံ ဧကံ စိတ္တံ သောဠသ ကပ္ပသဟဿာနိ တိဋ္ဌတီတိ? န ဟေဝံ ဝတ္တဗ္ဗေ.

အာကာသာနဉ္စာယတနူပဂါနံ ဒေဝါနံ စိတ္တံ မုဟုတ္တံ မုဟုတ္တံ ဥပ္ပဇ္ဇတိ မုဟုတ္တံ မုဟုတ္တံ နိရုဇ္ဈတီတိ? အာမန္တာ. အာကာသာနဉ္စာယတနူပဂါ ဒေဝါ မုဟုတ္တံ မုဟုတ္တံ စဝန္တိ မုဟုတ္တံ မုဟုတ္တံ ဥပ္ပဇ္ဇန္တီတိ? န ဟေဝံ ဝတ္တဗ္ဗေ.

အာကာသာနဉ္စာယတနူပဂါနံ ဒေဝါနံ ဧကံ စိတ္တံ ယာဝတာယုကံ တိဋ္ဌတီတိ? အာမန္တာ. အာကာသာနဉ္စာယတနူပဂါ ဒေဝါ ယေနေဝ စိတ္တေန ဥပ္ပဇ္ဇန္တိ၊ တေနေဝ စိတ္တေန စဝန္တီတိ? န ဟေဝံ ဝတ္တဗ္ဗေ။ပေ။.

စိတ္တဋ္ဌိတိကထာ နိဋ္ဌိတာ.