၂. ဒုတိယဝဂ္ဂေါ

(၁၃) ၄. ပရဝိတာရဏကထာ

၃၂၂. အတ္ထိ အရဟတော ပရဝိတာရဏာတိ? အာမန္တာ. အရဟာ ပရနေယျော ပရပတ္တိယော ပရပစ္စယော ပရပဋိဗဒ္ဓဘူ၊ န ဇာနာတိ န ပဿတိ သမ္မူဠှော အသမ္ပဇာနောတိ? န ဟေဝံ ဝတ္တဗ္ဗေ။ပေ။.

နနု အရဟာ န ပရနေယျော န ပရပတ္တိယော န ပရပစ္စယော န ပရပဋိဗဒ္ဓဘူ ဇာနာတိ ပဿတိ အသမ္မူဠှော သမ္ပဇာနောတိ? အာမန္တာ. ဟဉ္စိ အရဟာ န ပရနေယျော န ပရပတ္တိယော န ပရပစ္စယော န ပရပဋိဗဒ္ဓဘူ၊ ဇာနာတိ ပဿတိ အသမ္မူဠှော သမ္ပဇာနော၊ နော စ ဝတ ရေ ဝတ္တဗ္ဗေ – ‘‘အတ္ထိ အရဟတော ပရဝိတာရဏာ’’တိ.

အတ္ထိ ပုထုဇ္ဇနဿ ပရဝိတာရဏာ၊ သော စ ပရနေယျော ပရပတ္တိယော ပရပစ္စယော ပရပဋိဗဒ္ဓဘူ၊ န ဇာနာတိ န ပဿတိ သမ္မူဠှော အသမ္ပဇာနောတိ? အာမန္တာ. အတ္ထိ အရဟတော ပရဝိတာရဏာ၊ သော စ ပရနေယျော ပရပတ္တိယော ပရပစ္စယော ပရပဋိဗဒ္ဓဘူ၊ န ဇာနာတိ န ပဿတိ သမ္မူဠှော အသမ္ပဇာနောတိ? န ဟေဝံ ဝတ္တဗ္ဗေ။ပေ။.

အတ္ထိ အရဟတော ပရဝိတာရဏာ၊ သော စ န ပရနေယျော န ပရပတ္တိယော န ပရပစ္စယော န ပရပဋိဗဒ္ဓဘူ၊ ဇာနာတိ ပဿတိ အသမ္မူဠှော သမ္ပဇာနောတိ? အာမန္တာ. အတ္ထိ ပုထုဇ္ဇနဿ ပရဝိတာရဏာ၊ သော စ န ပရနေယျော န ပရပတ္တိယော န ပရပစ္စယော န ပရပဋိဗဒ္ဓဘူ၊ ဇာနာတိ ပဿတိ အသမ္မူဠှော သမ္ပဇာနောတိ? န ဟေဝံ ဝတ္တဗ္ဗေ။ပေ။.

အတ္ထိ အရဟတော ပရဝိတာရဏာတိ? အာမန္တာ. အတ္ထိ အရဟတော သတ္ထရိ ပရဝိတာရဏာ၊ ဓမ္မေ ပရဝိတာရဏာ၊ သံဃေ ပရဝိတာရဏာ၊ သိက္ခာယ ပရဝိတာရဏာ၊ ပုဗ္ဗန္တေ ပရဝိတာရဏာ၊ အပရန္တေ ပရဝိတာရဏာ၊ ပုဗ္ဗန္တာပရန္တေ ပရဝိတာရဏာ၊ ဣဒပ္ပစ္စယတာပဋိစ္စသမုပ္ပန္နေသု ဓမ္မေသု ပရဝိတာရဏာတိ? န ဟေဝံ ဝတ္တဗ္ဗေ။ပေ။.

နတ္ထိ အရဟတော သတ္ထရိ ပရဝိတာရဏာ၊ ဓမ္မေ ပရဝိတာရဏာ။ပေ။ ဣဒပစ္စယတာပဋိစ္စသမုပ္ပန္နေသု ဓမ္မေသု ပရဝိတာရဏာတိ? အာမန္တာ. ဟဉ္စိ နတ္ထိ အရဟတော သတ္ထရိ ပရဝိတာရဏာ၊ ဓမ္မေ ပရဝိတာရဏာ။ပေ။ ဣဒပ္ပစ္စယတာပဋိစ္စသမုပ္ပန္နေသု ဓမ္မေသု ပရဝိတာရဏာ၊ နော စ ဝတ ရေ ဝတ္တဗ္ဗေ – ‘‘အတ္ထိ အရဟတော ပရဝိတာရဏာ’’တိ.

အတ္ထိ ပုထုဇ္ဇနဿ ပရဝိတာရဏာ၊ အတ္ထိ တဿ သတ္ထရိ ပရဝိတာရဏာ၊ ဓမ္မေ ပရဝိတာရဏာ။ပေ။ ဣဒပ္ပစ္စယတာပဋိစ္စသမုပ္ပန္နေသု ဓမ္မေသု ပရဝိတာရဏာတိ? အာမန္တာ. အတ္ထိ အရဟတော ပရဝိတာရဏာ၊ အတ္ထိ တဿ သတ္ထရိ ပရဝိတာရဏာ၊ ဓမ္မေ ပရဝိတာရဏာ။ပေ။ ဣဒပ္ပစ္စယတာပဋိစ္စသမုပ္ပန္နေသု ဓမ္မေသု ပရဝိတာရဏာတိ? န ဟေဝံ ဝတ္တဗ္ဗေ။ပေ။.

အတ္ထိ အရဟတော ပရဝိတာရဏာ၊ နတ္ထိ တဿ သတ္ထရိ ပရဝိတာရဏာ၊ ဓမ္မေ ပရဝိတာရဏာ။ပေ။ ဣဒပ္ပစ္စယတာပဋိစ္စသမုပ္ပန္နေသု ဓမ္မေသု ပရဝိတာရဏာတိ? အာမန္တာ. အတ္ထိ ပုထုဇ္ဇနဿ ပရဝိတာရဏာ၊ နတ္ထိ တဿ သတ္ထရိ ပရဝိတာရဏာ၊ ဓမ္မေ ပရဝိတာရဏာ။ပေ။ ဣဒပ္ပစ္စယတာပဋိစ္စသမုပ္ပန္နေသု ဓမ္မေသု ပရဝိတာရဏာတိ? န ဟေဝံ ဝတ္တဗ္ဗေ။ပေ။.

၃၂၃. အတ္ထိ အရဟတော ပရဝိတာရဏာတိ? အာမန္တာ. နနု အရဟတော ရာဂေါ ပဟီနော ဥစ္ဆိန္နမူလော တာလာဝတ္ထုကတော အနဘာဝင်္ကတော အာယတိံ အနုပ္ပါဒဓမ္မောတိ? အာမန္တာ. ဟဉ္စိ အရဟတော ရာဂေါ ပဟီနော ဥစ္ဆိန္နမူလော တာလာဝတ္ထုကတော အနဘာဝင်္ကတော အာယတိံ အနုပ္ပါဒဓမ္မော၊ နော စ ဝတ ရေ ဝတ္တဗ္ဗေ – ‘‘အတ္ထိ အရဟတော ပရဝိတာရဏာ’’တိ.

အတ္ထိ အရဟတော ပရဝိတာရဏာတိ? အာမန္တာ. နနု အရဟတော ဒေါသော ပဟီနော။ပေ။ မောဟော ပဟီနော။ပေ။ အနောတ္တပ္ပံ ပဟီနံ ဥစ္ဆိန္နမူလံ တာလာဝတ္ထုကတံ အနဘာဝင်္ကတံ အာယတိံ အနုပ္ပါဒဓမ္မံ။ပေ။ ရာဂပ္ပဟာနာယ မဂ္ဂေါ ဘာဝိတော။ပေ။ ဗောဇ္ဈင်္ဂါ ဘာဝိတာ။ပေ။ ဒေါသပ္ပဟာနာယ။ပေ။ အနောတ္တပ္ပပဟာနာယ မဂ္ဂေါ ဘာဝိတော။ပေ။ ဗောဇ္ဈင်္ဂါ ဘာဝိတာ။ပေ။ နနု အရဟာ ဝီတရာဂေါ ဝီတဒေါသော ဝီတမောဟော။ပေ။ သစ္ဆိကာတဗ္ဗံ သစ္ဆိကတန္တိ? အာမန္တာ. ဟဉ္စိ အရဟာ ဝီတရာဂေါ ဝီတဒေါသော ဝီတမောဟော သစ္ဆိကာတဗ္ဗံ သစ္ဆိကတံ၊ နော စ ဝတ ရေ ဝတ္တဗ္ဗေ – ‘‘အတ္ထိ အရဟတော ပရဝိတာရဏာ’’တိ.

၃၂၄. အတ္ထိ အရဟတော ပရဝိတာရဏာတိ? သဓမ္မကုသလဿ အရဟတော အတ္ထိ ပရဝိတာရဏာ၊ ပရဓမ္မကုသလဿ အရဟတော နတ္ထိ ပရဝိတာရဏာတိ. သဓမ္မကုသလဿ အရဟတော အတ္ထိ ပရဝိတာရဏာတိ? အာမန္တာ. ပရဓမ္မကုသလဿ အရဟတော အတ္ထိ ပရဝိတာရဏာတိ? န ဟေဝံ ဝတ္တဗ္ဗေ။ပေ။.

ပရဓမ္မကုသလဿ အရဟတော နတ္ထိ ပရဝိတာရဏာတိ? အာမန္တာ. သဓမ္မကုသလဿ အရဟတော နတ္ထိ ပရဝိတာရဏာတိ? န ဟေဝံ ဝတ္တဗ္ဗေ။ပေ။.

သဓမ္မကုသလဿ အရဟတော ရာဂေါ ပဟီနော၊ အတ္ထိ တဿ ပရဝိတာရဏာတိ? အာမန္တာ. ပရဓမ္မကုသလဿ အရဟတော ရာဂေါ ပဟီနော၊ အတ္ထိ တဿ ပရဝိတာရဏာတိ? န ဟေဝံ ဝတ္တဗ္ဗေ.

သဓမ္မကုသလဿ အရဟတော ဒေါသော ပဟီနော။ပေ။ မောဟော ပဟီနော။ပေ။ အနောတ္တပ္ပံ ပဟီနံ ။ပေ။ ရာဂပ္ပဟာနာယ မဂ္ဂေါ ဘာဝိတော။ပေ။ ဗောဇ္ဈင်္ဂါ ဘာဝိတာ။ပေ။ ဒေါသပ္ပဟာနာယ။ပေ။ အနောတ္တပ္ပပဟာနာယ မဂ္ဂေါ ဘာဝိတော။ပေ။ ဗောဇ္ဈင်္ဂါ ဘာဝိတာ။ပေ။ သဓမ္မကုသလော အရဟာ ဝီတရာဂေါ ဝီတဒေါသော ဝီတမောဟော။ပေ။ သစ္ဆိကာတဗ္ဗံ သစ္ဆိကတံ၊ အတ္ထိ တဿ ပရဝိတာရဏာတိ? အာမန္တာ. ပရဓမ္မကုသလော အရဟာ ဝီတရာဂေါ ဝီတဒေါသော ဝီတမောဟော။ပေ။ သစ္ဆိကာတဗ္ဗံ သစ္ဆိကတံ၊ အတ္ထိ တဿ ပရဝိတာရဏာတိ? န ဟေဝံ ဝတ္တဗ္ဗေ။ပေ။.

ပရဓမ္မကုသလဿ အရဟတော ရာဂေါ ပဟီနော၊ နတ္ထိ တဿ ပရဝိတာရဏာတိ? အာမန္တာ. သဓမ္မကုသလဿ အရဟတော ရာဂေါ ပဟီနော၊ နတ္ထိ တဿ ပရဝိတာရဏာတိ? န ဟေဝံ ဝတ္တဗ္ဗေ.

ပရဓမ္မကုသလဿ အရဟတော ဒေါသော ပဟီနော၊ မောဟော ပဟီနော။ပေ။ အနောတ္တပ္ပံ ပဟီနံ။ပေ။ ရာဂပ္ပဟာနာယ မဂ္ဂေါ ဘာဝိတော။ပေ။ ဗောဇ္ဈင်္ဂါ ဘာဝိတာ။ပေ။ ဒေါသပ္ပဟာနာယ။ပေ။ အနောတ္တပ္ပပဟာနာယ မဂ္ဂေါ ဘာဝိတော။ပေ။ ဗောဇ္ဈင်္ဂါ ဘာဝိတာ။ပေ။ ပရဓမ္မကုသလော အရဟာ ဝီတရာဂေါ ဝီတဒေါသော ဝီတမောဟော။ပေ။ သစ္ဆိကာတဗ္ဗံ သစ္ဆိကတံ၊ နတ္ထိ တဿ ပရဝိတာရဏာတိ? အာမန္တာ. သဓမ္မကုသလော အရဟာ ဝီတရာဂေါ ဝီတဒေါသော ဝီတမောဟော။ပေ။ သစ္ဆိကာတဗ္ဗံ သစ္ဆိကတံ၊ နတ္ထိ တဿ ပရဝိတာရဏာတိ? န ဟေဝံ ဝတ္တဗ္ဗေ။ပေ။.

၃၂၅. အတ္ထိ အရဟတော ပရဝိတာရဏာတိ? အာမန္တာ. နနု ဝုတ္တံ ဘဂဝတာ – ‘‘ဇာနတောဟံ၊ ဘိက္ခဝေ၊ ပဿတော အာသဝါနံ ခယံ ဝဒါမိ၊ နော အဇာနတော နော အပဿတော! ကိဉ္စ၊ ဘိက္ခဝေ၊ ဇာနတော ကိံ ပဿတော အာသဝါနံ ခယော ဟောတိ? ‘ဣတိ ရူပံ’။ပေ။ ‘ဣတိ ဝိညာဏဿ အတ္ထင်္ဂမော’တိ – ဧဝံ ခေါ၊ ဘိက္ခဝေ၊ ဇာနတော ဧဝံ ပဿတော အာသဝါနံ ခယော ဟောတီ’’တိ. အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘အတ္ထိ အရဟတော ပရဝိတာရဏာ’’တိ.

အတ္ထိ အရဟတော ပရဝိတာရဏာတိ? အာမန္တာ. နနု ဝုတ္တံ ဘဂဝတာ – ‘‘ဇာနတောဟံ၊ ဘိက္ခဝေ၊ ပဿတော အာသဝါနံ ခယံ ဝဒါမိ၊ နော အဇာနတော နော အပဿတော! ကိဉ္စ၊ ဘိက္ခဝေ၊ ဇာနတော ကိံ ပဿတော အာသဝါနံ ခယော ဟောတိ? ‘ဣဒံ ဒုက္ခ’န္တိ – ဘိက္ခဝေ၊ ဇာနတော ပဿတော အာသဝါနံ ခယော ဟောတိ၊ ‘အယံ ဒုက္ခသမုဒယော’တိ။ပေ။ ‘အယံ ဒုက္ခနိရောဓော’တိ။ပေ။ ‘အယံ ဒုက္ခနိရောဓဂါမိနီ ပဋိပဒါ’တိ – ဇာနတော ပဿတော အာသဝါနံ ခယော ဟောတိ. ဧဝံ ခေါ၊ ဘိက္ခဝေ၊ ဇာနတော ဧဝံ ပဿတော အာသဝါနံ ခယော ဟောတီ’’တိ. အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘အတ္ထိ အရဟတော ပရဝိတာရဏာ’’တိ.

အတ္ထိ အရဟတော ပရဝိတာရဏာတိ? အာမန္တာ. နနု ဝုတ္တံ ဘဂဝတာ – ‘‘သဗ္ဗံ၊ ဘိက္ခဝေ၊ အနဘိဇာနံ အပရိဇာနံ အဝိရာဇယံ အပ္ပဇဟံ အဘဗ္ဗော ဒုက္ခက္ခယာယ၊ သဗ္ဗဉ္စ ခေါ၊ ဘိက္ခဝေ၊ အဘိဇာနံ ပရိဇာနံ ဝိရာဇယံ ပဇဟံ ဘဗ္ဗော ဒုက္ခက္ခယာယာ’’တိ! အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘အတ္ထိ အရဟတော ပရဝိတာရဏာ’’တိ.

အတ္ထိ အရဟတော ပရဝိတာရဏာတိ? အာမန္တာ. နနု ဝုတ္တံ ဘဂဝတာ – ‘‘သဟာဝဿ ဒဿနသမ္ပဒါယ။ပေ။ ဆစ္စာဘိဌာနာနိ အဘဗ္ဗ ကာတု’’န္တိ. အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘အတ္ထိ အရဟတော ပရဝိတာရဏာ’’တိ.

အတ္ထိ အရဟတော ပရဝိတာရဏာတိ? အာမန္တာ. နနု ဝုတ္တံ ဘဂဝတာ – ‘‘ယသ္မိံ၊ ဘိက္ခဝေ၊ သမယေ အရိယသာဝကဿ ဝိရဇံ ဝီတမလံ ဓမ္မစက္ခုံ ဥဒပါဒိ – ‘ယံ ကိဉ္စိ သမုဒယဓမ္မံ၊ သဗ္ဗံ တံ နိရောဓဓမ္မ’န္တိ၊ သဟ ဒဿနုပ္ပါဒါ၊ ဘိက္ခဝေ၊ အရိယသာဝကဿ တီဏိ သံယောဇနာနိ ပဟီယန္တိ – သက္ကာယဒိဋ္ဌိ၊ ဝိစိကိစ္ဆာ၊ သီလဗ္ဗတပရာမာသော’’တိ! အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘အတ္ထိ အရဟတော ပရဝိတာရဏာ’’တိ.

အတ္ထိ အရဟတော ပရဝိတာရဏာတိ? အာမန္တာ. နနု ဝုတ္တံ ဘဂဝတာ –

‘‘နာဟံ သဟိဿာမိ [ဂမိဿာမိ (သီ. သျာ. က.)၊ သမီဟာမိ (ပီ.)] ပမောစနာယ၊

ကထင်္ကထိံ ဓောတက ကဉ္စိ [ကိဉ္စိ (က.)] လောကေ၊

ဓမ္မဉ္စ သေဋ္ဌံ အဘိဇာနမာနော၊

ဧဝံ တုဝံ ဩဃမိမံ တရေသီ’’တိ [သု. နိ. ၁၀၇၀ သုတ္တနိပါတေ၊ စူဠနိ. ၃၃ ဓောတကမာဏဝပုစ္ဆာနိဒ္ဒေသ].

အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘အတ္ထိ အရဟတော ပရဝိတာရဏာ’’တိ.

န ဝတ္တဗ္ဗံ – ‘‘အတ္ထိ အရဟတော ပရဝိတာရဏာ’’တိ? အာမန္တာ. နနု အရဟတော ဣတ္ထိပုရိသာနံ နာမဂေါတ္တံ ပရေ ဝိတာရေယျုံ၊ မဂ္ဂါမဂ္ဂံ ပရေ ဝိတာရေယျုံ၊ တိဏကဋ္ဌဝနပ္ပတီနံ နာမံ ပရေ ဝိတာရေယျုန္တိ? အာမန္တာ. ဟဉ္စိ အရဟတော ဣတ္ထိပုရိသာနံ နာမဂေါတ္တံ ပရေ ဝိတာရေယျုံ၊ မဂ္ဂါမဂ္ဂံ ပရေ ဝိတာရေယျုံ၊ တိဏကဋ္ဌဝနပ္ပတီနံ နာမံ ပရေ ဝိတာရေယျုံ၊ တေန ဝတ ရေ ဝတ္တဗ္ဗေ – ‘‘အတ္ထိ အရဟတော ပရဝိတာရဏာ’’တိ.

အရဟတော ဣတ္ထိပုရိသာနံ နာမဂေါတ္တံ ပရေ ဝိတာရေယျုံ၊ မဂ္ဂါမဂ္ဂံ ပရေ ဝိတာရေယျုံ၊ တိဏကဋ္ဌဝနပ္ပတီနံ နာမံ ပရေ ဝိတာရေယျုန္တိ၊ အတ္ထိ အရဟတော ပရဝိတာရဏာတိ? အာမန္တာ. အရဟတော သောတာပတ္တိဖလံ ဝါ သကဒါဂါမိဖလံ ဝါ အနာဂါမိဖလံ ဝါ အရဟတ္တံ ဝါ ပရေ ဝိတာရေယျုန္တိ? န ဟေဝံ ဝတ္တဗ္ဗေ။ပေ။.

ပရဝိတာရဏကထာ နိဋ္ဌိတာ.