၂. ဒုတိယဝဂ္ဂေါ

(၁၁) ၂. အညာဏကထာ

၃၁၄. အတ္ထိ အရဟတော အညာဏန္တိ? အာမန္တာ. အတ္ထိ အရဟတော အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာနုသယော အဝိဇ္ဇာပရိယုဋ္ဌာနံ အဝိဇ္ဇာသံယောဇနံ အဝိဇ္ဇာနီဝရဏန္တိ? န ဟေဝံ ဝတ္တဗ္ဗေ. နတ္ထိ အရဟတော အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာနုသယော အဝိဇ္ဇာပရိယုဋ္ဌာနံ အဝိဇ္ဇာသံယောဇနံ အဝိဇ္ဇာနီဝရဏန္တိ? အာမန္တာ. ဟဉ္စိ နတ္ထိ အရဟတော အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာနုသယော အဝိဇ္ဇာပရိယုဋ္ဌာနံ အဝိဇ္ဇာသံယောဇနံ အဝိဇ္ဇာနီဝရဏံ၊ နော စ ဝတ ရေ ဝတ္တဗ္ဗေ – ‘‘အတ္ထိ အရဟတော အညာဏ’’န္တိ.

အတ္ထိ ပုထုဇ္ဇနဿ အညာဏံ၊ အတ္ထိ တဿ အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာနုသယော အဝိဇ္ဇာပရိယုဋ္ဌာနံ အဝိဇ္ဇာသံယောဇနံ အဝိဇ္ဇာနီဝရဏန္တိ? အာမန္တာ. အတ္ထိ အရဟတော အညာဏံ၊ အတ္ထိ တဿ အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာနုသယော အဝိဇ္ဇာပရိယုဋ္ဌာနံ အဝိဇ္ဇာသံယောဇနံ အဝိဇ္ဇာနီဝရဏန္တိ? န ဟေဝံ ဝတ္တဗ္ဗေ.

အတ္ထိ အရဟတော အညာဏံ၊ နတ္ထိ တဿ အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာနုသယော အဝိဇ္ဇာပရိယုဋ္ဌာနံ အဝိဇ္ဇာသံယောဇနံ အဝိဇ္ဇာနီဝရဏန္တိ? အာမန္တာ. အတ္ထိ ပုထုဇ္ဇနဿ အညာဏံ၊ နတ္ထိ တဿ အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာနုသယော အဝိဇ္ဇာပရိယုဋ္ဌာနံ အဝိဇ္ဇာသံယောဇနံ အဝိဇ္ဇာနီဝရဏန္တိ? န ဟေဝံ ဝတ္တဗ္ဗေ.

အတ္ထိ အရဟတော အညာဏန္တိ? အာမန္တာ. အရဟာ အညာဏပကတော ပါဏံ ဟနေယျ၊ အဒိန္နံ အာဒိယေယျ၊ မုသာ ဘဏေယျ၊ ပိသုဏံ ဘဏေယျ၊ ဖရုသံ ဘဏေယျ၊ သမ္ဖံ ပလပေယျ၊ သန္ဓိံ ဆိန္ဒေယျ၊ နိလ္လောပံ ဟရေယျ၊ ဧကာဂါရိယံ ကရေယျ၊ ပရိပန္ထေ တိဋ္ဌေယျ၊ ပရဒါရံ ဂစ္ဆေယျ၊ ဂါမဃာတံ ကရေယျ၊ နိဂမဃာတံ ကရေယျာတိ? န ဟေဝံ ဝတ္တဗ္ဗေ.

အတ္ထိ ပုထုဇ္ဇနဿ အညာဏံ၊ ပုထုဇ္ဇနော အညာဏပကတော ပါဏံ ဟနေယျ၊ အဒိန္နံ အာဒိယေယျ၊ မုသာ ဘဏေယျ။ပေ။ ဂါမဃာတံ ကရေယျ၊ နိဂမဃာတံ ကရေယျာတိ? အာမန္တာ. အတ္ထိ အရဟတော အညာဏံ၊ အရဟာ အညာဏပကတော ပါဏံ ဟနေယျ၊ အဒိန္နံ အာဒိယေယျ။ပေ။ ဂါမဃာတံ ကရေယျ၊ နိဂမဃာတံ ကရေယျာတိ? န ဟေဝံ ဝတ္တဗ္ဗေ.

အတ္ထိ အရဟတော အညာဏံ၊ န စ အရဟာ အညာဏပကတော ပါဏံ ဟနေယျ၊ အဒိန္နံ အာဒိယေယျ။ပေ။ ဂါမဃာတံ ကရေယျ၊ နိဂမဃာတံ ကရေယျာတိ? အာမန္တာ. အတ္ထိ ပုထုဇ္ဇနဿ အညာဏံ၊ န စ ပုထုဇ္ဇနော အညာဏပကတော ပါဏံ ဟနေယျ၊ အဒိန္နံ အာဒိယေယျ။ပေ။ ဂါမဃာတံ ကရေယျ၊ နိဂမဃာတံ ကရေယျာတိ? န ဟေဝံ ဝတ္တဗ္ဗေ.

အတ္ထိ အရဟတော အညာဏန္တိ? အာမန္တာ. အတ္ထိ အရဟတော သတ္ထရိ အညာဏံ၊ ဓမ္မေ အညာဏံ၊ သံဃေ အညာဏံ၊ သိက္ခာယ အညာဏံ၊ ပုဗ္ဗန္တေ အညာဏံ၊ အပရန္တေ အညာဏံ၊ ပုဗ္ဗန္တာပရန္တေ အညာဏံ၊ ဣဒပ္ပစ္စယတာပဋိစ္စသမုပ္ပန္နေသု ဓမ္မေသု အညာဏန္တိ? န ဟေဝံ ဝတ္တဗ္ဗေ.

နတ္ထိ အရဟတော သတ္ထရိ အညာဏံ၊ ဓမ္မေ အညာဏံ၊ သံဃေ အညာဏံ၊ သိက္ခာယ အညာဏံ၊ ပုဗ္ဗန္တေ အညာဏံ၊ အပရန္တေ အညာဏံ၊ ပုဗ္ဗန္တာပရန္တေ အညာဏံ၊ ဣဒပ္ပစ္စယတာပဋိစ္စသမုပ္ပန္နေသု ဓမ္မေသု အညာဏန္တိ? အာမန္တာ. ဟဉ္စိ နတ္ထိ အရဟတော သတ္ထရိ အညာဏံ၊ ဓမ္မေ အညာဏံ၊ သံဃေ အညာဏံ။ပေ။ ဣဒပ္ပစ္စယတာပဋိစ္စသမုပ္ပန္နေသု ဓမ္မေသု အညာဏံ၊ နော စ ဝတ ရေ ဝတ္တဗ္ဗေ – ‘‘အတ္ထိ အရဟတော အညာဏ’’န္တိ.

အတ္ထိ ပုထုဇ္ဇနဿ အညာဏံ၊ အတ္ထိ တဿ သတ္ထရိ အညာဏံ၊ ဓမ္မေ အညာဏံ၊ သံဃေ အညာဏံ။ပေ။ ဣဒပ္ပစ္စယတာပဋိစ္စသမုပ္ပန္နေသု ဓမ္မေသု အညာဏန္တိ? အာမန္တာ. အတ္ထိ အရဟတော အညာဏံ၊ အတ္ထိ တဿ သတ္ထရိ အညာဏံ၊ ဓမ္မေ အညာဏံ၊ သံဃေ အညာဏံ။ပေ။ ဣဒပ္ပစ္စယတာပဋိစ္စသမုပ္ပန္နေသု ဓမ္မေသု အညာဏန္တိ? န ဟေဝံ ဝတ္တဗ္ဗေ.

အတ္ထိ အရဟတော အညာဏံ၊ နတ္ထိ တဿ သတ္ထရိ အညာဏံ၊ ဓမ္မေ အညာဏံ၊ သံဃေ အညာဏံ။ပေ။ ဣဒပ္ပစ္စယတာပဋိစ္စသမုပ္ပန္နေသု ဓမ္မေသု အညာဏန္တိ? အာမန္တာ. အတ္ထိ ပုထုဇ္ဇနဿ အညာဏံ၊ နတ္ထိ တဿ သတ္ထရိ အညာဏံ၊ ဓမ္မေ အညာဏံ၊ သံဃေ အညာဏံ။ပေ။ ဣဒပ္ပစ္စယတာပဋိစ္စသမုပ္ပန္နေသု ဓမ္မေသု အညာဏန္တိ? န ဟေဝံ ဝတ္တဗ္ဗေ.

၃၁၅. အတ္ထိ အရဟတော အညာဏန္တိ? အာမန္တာ. နနု အရဟတော ရာဂေါ ပဟီနော ဥစ္ဆိန္နမူလော တာလာဝတ္ထုကတော အနဘာဝင်္ကတော အာယတိံ အနုပ္ပါဒဓမ္မောတိ? အာမန္တာ. ဟဉ္စိ အရဟတော ရာဂေါ ပဟီနော ဥစ္ဆိန္နမူလော တာလာဝတ္ထုကတော အနဘာဝင်္ကတော အာယတိံ အနုပ္ပါဒဓမ္မော၊ နော စ ဝတ ရေ ဝတ္တဗ္ဗေ – ‘‘အတ္ထိ အရဟတော အညာဏ’’န္တိ.

အတ္ထိ အရဟတော အညာဏန္တိ? အာမန္တာ. နနု အရဟတော ဒေါသော ပဟီနော။ပေ။ မောဟော ပဟီနော။ပေ။ အနောတ္တပ္ပံ ပဟီနံ ဥစ္ဆိန္နမူလံ တာလာဝတ္ထုကတံ အနဘာဝင်္ကတံ အာယတိံ အနုပ္ပါဒဓမ္မန္တိ? အာမန္တာ. ဟဉ္စိ အရဟတော အနောတ္တပ္ပံ ပဟီနံ ဥစ္ဆိန္နမူလံ တာလာဝတ္ထုကတံ အနဘာဝင်္ကတံ အာယတိံ အနုပ္ပါဒဓမ္မံ၊ နော စ ဝတ ရေ ဝတ္တဗ္ဗေ – ‘‘အတ္ထိ အရဟတော အညာဏ’’န္တိ.

အတ္ထိ အရဟတော အညာဏန္တိ? အာမန္တာ. နနု အရဟတော ရာဂပ္ပဟာနာယ မဂ္ဂေါ ဘာဝိတော။ပေ။ ဗောဇ္ဈင်္ဂါ ဘာဝိတာတိ? အာမန္တာ. ဟဉ္စိ အရဟတော ရာဂပ္ပဟာနာယ ဗောဇ္ဈင်္ဂါ ဘာဝိတာ၊ နော စ ဝတ ရေ ဝတ္တဗ္ဗေ – ‘‘အတ္ထိ အရဟတော အညာဏ’’န္တိ.

အတ္ထိ အရဟတော အညာဏန္တိ? အာမန္တာ. နနု အရဟတော ဒေါသပ္ပဟာနာယ။ပေ။ မောဟပ္ပဟာနာယ။ပေ။ အနောတ္တပ္ပပဟာနာယ မဂ္ဂေါ ဘာဝိတော ။ပေ။ ဗောဇ္ဈင်္ဂါ ဘာဝိတာတိ? အာမန္တာ. ဟဉ္စိ အရဟတော အနောတ္တပ္ပပဟာနာယ ဗောဇ္ဈင်္ဂါ ဘာဝိတာ၊ နော စ ဝတ ရေ ဝတ္တဗ္ဗေ – ‘‘အတ္ထိ အရဟတော အညာဏ’’န္တိ.

အတ္ထိ အရဟတော အညာဏန္တိ? အာမန္တာ. နနု အရဟာ ဝီတရာဂေါ ဝီတဒေါသော ဝီတမောဟော။ပေ။ သစ္ဆိကာတဗ္ဗံ သစ္ဆိကတန္တိ? အာမန္တာ. ဟဉ္စိ အရဟာ ဝီတရာဂေါ။ပေ။ သစ္ဆိကာတဗ္ဗံ သစ္ဆိကတံ၊ နော စ ဝတ ရေ ဝတ္တဗ္ဗေ – ‘‘အတ္ထိ အရဟတော အညာဏ’’န္တိ.

၃၁၆. အတ္ထိ အရဟတော အညာဏန္တိ? သဓမ္မကုသလဿ အရဟတော အတ္ထိ အညာဏံ၊ ပရဓမ္မကုသလဿ အရဟတော နတ္ထိ အညာဏန္တိ. သဓမ္မကုသလဿ အရဟတော အတ္ထိ အညာဏန္တိ? အာမန္တာ. ပရဓမ္မကုသလဿ အရဟတော အတ္ထိ အညာဏန္တိ? န ဟေဝံ ဝတ္တဗ္ဗေ။ပေ။.

ပရဓမ္မကုသလဿ အရဟတော နတ္ထိ အညာဏန္တိ? အာမန္တာ. သဓမ္မကုသလဿ အရဟတော နတ္ထိ အညာဏန္တိ? န ဟေဝံ ဝတ္တဗ္ဗေ။ပေ။.

သဓမ္မကုသလဿ အရဟတော ရာဂေါ ပဟီနော၊ အတ္ထိ တဿ အညာဏန္တိ? အာမန္တာ. ပရဓမ္မကုသလဿ အရဟတော ရာဂေါ ပဟီနော၊ အတ္ထိ တဿ အညာဏန္တိ? န ဟေဝံ ဝတ္တဗ္ဗေ။ပေ။.

သဓမ္မကုသလဿ အရဟတော ဒေါသော ပဟီနော။ပေ။ မောဟော ပဟီနော။ပေ။ အနောတ္တပ္ပံ ပဟီနံ၊ အတ္ထိ တဿ အညာဏန္တိ? အာမန္တာ. ပရဓမ္မကုသလဿ အရဟတော အနောတ္တပ္ပံ ပဟီနံ၊ အတ္ထိ တဿ အညာဏန္တိ? န ဟေဝံ ဝတ္တဗ္ဗေ။ပေ။.

သဓမ္မကုသလဿ အရဟတော ရာဂပ္ပဟာနာယ မဂ္ဂေါ ဘာဝိတော။ပေ။ ဗောဇ္ဈင်္ဂါ ဘာဝိတာ၊ အတ္ထိ တဿ အညာဏန္တိ? အာမန္တာ. ပရဓမ္မကုသလဿ အရဟတော ရာဂပ္ပဟာနာယ ဗောဇ္ဈင်္ဂါ ဘာဝိတာ၊ အတ္ထိ တဿ အညာဏန္တိ? န ဟေဝံ ဝတ္တဗ္ဗေ။ပေ။.

သဓမ္မကုသလဿ အရဟတော ဒေါသပ္ပဟာနာယ။ပေ။ မောဟပ္ပဟာနာယ။ပေ။ အနောတ္တပ္ပပဟာနာယ မဂ္ဂေါ ဘာဝိတော။ပေ။ ဗောဇ္ဈင်္ဂါ ဘာဝိတာ၊ အတ္ထိ တဿ အညာဏန္တိ? အာမန္တာ. ပရဓမ္မကုသလဿ အရဟတော အနောတ္တပ္ပပဟာနာယ ဗောဇ္ဈင်္ဂါ ဘာဝိတာ၊ အတ္ထိ တဿ အညာဏန္တိ? န ဟေဝံ ဝတ္တဗ္ဗေ။ပေ။.

သဓမ္မကုသလော အရဟာ ဝီတရာဂေါ ဝီတဒေါသော ဝီတမောဟော။ပေ။ သစ္ဆိကာတဗ္ဗံ သစ္ဆိကတံ၊ အတ္ထိ တဿ အညာဏန္တိ? အာမန္တာ. ပရဓမ္မကုသလော အရဟာ ဝီတရာဂေါ ဝီတဒေါသော ဝီတမောဟော။ပေ။ သစ္ဆိကာတဗ္ဗံ သစ္ဆိကတံ၊ အတ္ထိ တဿ အညာဏန္တိ? န ဟေဝံ ဝတ္တဗ္ဗေ။ပေ။.

ပရဓမ္မကုသလဿ အရဟတော ရာဂေါ ပဟီနော၊ နတ္ထိ တဿ အညာဏန္တိ? အာမန္တာ. သဓမ္မကုသလဿ အရဟတော ရာဂေါ ပဟီနော၊ နတ္ထိ တဿ အညာဏန္တိ? န ဟေဝံ ဝတ္တဗ္ဗေ။ပေ။.

ပရဓမ္မကုသလဿ အရဟတော ဒေါသော ပဟီနော။ပေ။ မောဟော ပဟီနော။ပေ။ အနောတ္တပ္ပံ ပဟီနံ၊ နတ္ထိ တဿ အညာဏန္တိ? အာမန္တာ. သဓမ္မကုသလဿ အရဟတော အနောတ္တပ္ပံ ပဟီနံ၊ နတ္ထိ တဿ အညာဏန္တိ? န ဟေဝံ ဝတ္တဗ္ဗေ။ပေ။.

ပရဓမ္မကုသလဿ အရဟတော ရာဂပ္ပဟာနာယ မဂ္ဂေါ ဘာဝိတော။ပေ။ ဗောဇ္ဈင်္ဂါ ဘာဝိတာ။ပေ။ ဒေါသပ္ပဟာနာယ မောဟပ္ပဟာနာယ။ပေ။ အနောတ္တပ္ပပဟာနာယ မဂ္ဂေါ ဘာဝိတော။ပေ။ ဗောဇ္ဈင်္ဂါ ဘာဝိတာ၊ နတ္ထိ တဿ အညာဏန္တိ? အာမန္တာ. သဓမ္မကုသလဿ အရဟတော အနောတ္တပ္ပပဟာနာယ ဗောဇ္ဈင်္ဂါ ဘာဝိတာ၊ နတ္ထိ တဿ အညာဏန္တိ? န ဟေဝံ ဝတ္တဗ္ဗေ။ပေ။.

ပရဓမ္မကုသလော အရဟာ ဝီတရာဂေါ ဝီတဒေါသော ဝီတမောဟော။ပေ။ သစ္ဆိကာတဗ္ဗံ သစ္ဆိကတံ၊ နတ္ထိ တဿ အညာဏန္တိ? အာမန္တာ. သဓမ္မကုသလော အရဟာ ဝီတရာဂေါ ဝီတဒေါသော ဝီတမောဟော ။ပေ။ သစ္ဆိကာတဗ္ဗံ သစ္ဆိကတံ၊ နတ္ထိ တဿ အညာဏန္တိ? န ဟေဝံ ဝတ္တဗ္ဗေ။ပေ။.

၃၁၇. အတ္ထိ အရဟတော အညာဏန္တိ? အာမန္တာ. နနု ဝုတ္တံ ဘဂဝတာ – ‘‘ဇာနတောဟံ [ဇာနတာဟံ (သီ.)၊ ဇာနတွာဟံ (သျာ. ပီ. က.)]၊ ဘိက္ခဝေ၊ ပဿတော အာသဝါနံ ခယံ ဝဒါမိ၊ နော အဇာနတော နော အပဿတော. ကိဉ္စ၊ ဘိက္ခဝေ၊ ဇာနတော ကိံ ပဿတော အာသဝါနံ ခယော ဟောတိ? ‘ဣတိ ရူပံ၊ ဣတိ ရူပဿ သမုဒယော၊ ဣတိ ရူပဿ အတ္ထင်္ဂမော၊ ဣတိ ဝေဒနာ။ပေ။ ဣတိ သညာ။ ဣတိ သင်္ခါရာ။ ဣတိ ဝိညာဏံ၊ ဣတိ ဝိညာဏဿ သမုဒယော၊ ဣတိ ဝိညာဏဿ အတ္ထင်္ဂမော’တိ – ဧဝံ ခေါ၊ ဘိက္ခဝေ၊ ဇာနတော ဧဝံ ပဿတော အာသဝါနံ ခယော ဟောတီ’’တိ [သံ. နိ. ၃.၁၀၁၊ ဣတိဝု. ၁၀၂၊ သံ. နိ. ၅.၁၀၉၅]. အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘အတ္ထိ အရဟတော အညာဏ’’န္တိ.

အတ္ထိ အရဟတော အညာဏန္တိ? အာမန္တာ. နနု ဝုတ္တံ ဘဂဝတာ – ‘‘ဇာနတောဟံ၊ ဘိက္ခဝေ၊ ပဿတော အာသဝါနံ ခယံ ဝဒါမိ၊ နော အဇာနတော နော အပဿတော. ကိဉ္စ၊ ဘိက္ခဝေ၊ ဇာနတော ကိံ ပဿတော အာသဝါနံ ခယော ဟောတိ? ‘ဣဒံ ဒုက္ခ’န္တိ – ဘိက္ခဝေ၊ ဇာနတော ပဿတော အာသဝါနံ ခယော ဟောတိ၊ ‘အယံ ဒုက္ခသမုဒယော’တိ – ဇာနတော ပဿတော အာသဝါနံ ခယော ဟောတိ၊ ‘အယံ ဒုက္ခနိရောဓော’တိ – ဇာနတော ပဿတော အာသဝါနံ ခယော ဟောတိ၊ ‘အယံ ဒုက္ခနိရောဓဂါမိနီ ပဋိပဒါ’တိ – ဇာနတော ပဿတော အာသဝါနံ ခယော ဟောတိ. ဧဝံ ခေါ၊ ဘိက္ခဝေ၊ ဇာနတော ဧဝံ ပဿတော အာသဝါနံ ခယော ဟောတီ’’တိ [သံ. နိ. ၅.၁၀၉၅]. အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘အတ္ထိ အရဟတော အညာဏ’’န္တိ.

အတ္ထိ အရဟတော အညာဏန္တိ? အာမန္တာ. နနု ဝုတ္တံ ဘဂဝတာ – ‘‘သဗ္ဗံ၊ ဘိက္ခဝေ၊ အနဘိဇာနံ အပရိဇာနံ အဝိရာဇယံ အပ္ပဇဟံ အဘဗ္ဗော ဒုက္ခက္ခယာယ၊ သဗ္ဗဉ္စ ခေါ၊ ဘိက္ခဝေ၊ အဘိဇာနံ ပရိဇာနံ ဝိရာဇယံ ပဇဟံ ဘဗ္ဗော ဒုက္ခက္ခယာယာ’’တိ [သံ. နိ. ၄.၂၆၊ ဣတိဝု. ၇ ဣတိဝုတ္တကေပိ]! အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘အတ္ထိ အရဟတော အညာဏ’’န္တိ.

အတ္ထိ အရဟတော အညာဏန္တိ? အာမန္တာ. နနု ဝုတ္တံ ဘဂဝတာ –

‘‘သဟာဝဿ ဒဿနသမ္ပဒါယ၊

တယဿု ဓမ္မာ ဇဟိတာ ဘဝန္တိ၊

သက္ကာယဒိဋ္ဌီ ဝိစိကိစ္ဆိတဉ္စ၊

သီလဗ္ဗတံ ဝါပိ ယဒတ္ထိ ကိဉ္စိ၊

စတူဟပါယေဟိ စ ဝိပ္ပမုတ္တော၊

ဆစ္စာဘိဌာနာနိ အဘဗ္ဗ ကာတု’’န္တိ.

အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘အတ္ထိ အရဟတော အညာဏ’’န္တိ.

အတ္ထိ အရဟတော အညာဏန္တိ? အာမန္တာ. နနု ဝုတ္တံ ဘဂဝတာ – ‘‘ယသ္မိံ၊ ဘိက္ခဝေ၊ သမယေ အရိယသာဝကဿ ဝိရဇံ ဝီတမလံ ဓမ္မစက္ခုံ ဥဒပါဒိ – ‘ယံ ကိဉ္စိ သမုဒယဓမ္မံ သဗ္ဗံ တံ နိရောဓဓမ္မ’န္တိ၊ သဟ ဒဿနုပ္ပါဒါ၊ ဘိက္ခဝေ၊ အရိယသာဝကဿ တီဏိ သံယောဇနာနိ ပဟီယန္တိ – သက္ကာယဒိဋ္ဌိ၊ ဝိစိကိစ္ဆာ၊ သီလဗ္ဗတပရာမာသော’’တိ. အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘အတ္ထိ အရဟတော အညာဏ’’န္တိ.

န ဝတ္တဗ္ဗံ – ‘‘အတ္ထိ အရဟတော အညာဏ’’န္တိ? အာမန္တာ. နနု အရဟာ ဣတ္ထိပုရိသာနံ နာမဂေါတ္တံ န ဇာနေယျ၊ မဂ္ဂါမဂ္ဂံ န ဇာနေယျ၊ တိဏကဋ္ဌဝနပ္ပတီနံ နာမံ န ဇာနေယျာတိ? အာမန္တာ. ဟဉ္စိ အရဟာ ဣတ္ထိပုရိသာနံ နာမဂေါတ္တံ န ဇာနေယျ၊ မဂ္ဂါမဂ္ဂံ န ဇာနေယျ၊ တိဏကဋ္ဌဝနပ္ပတီနံ နာမံ န ဇာနေယျ၊ တေန ဝတ ရေ ဝတ္တဗ္ဗေ – ‘‘အတ္ထိ အရဟတော အညာဏ’’န္တိ.

အရဟာ ဣတ္ထိပုရိသာနံ နာမဂေါတ္တံ န ဇာနေယျ၊ မဂ္ဂါမဂ္ဂံ န ဇာနေယျ၊ တိဏကဋ္ဌဝနပ္ပတီနံ နာမံ န ဇာနေယျာတိ၊ အတ္ထိ အရဟတော အညာဏန္တိ? အာမန္တာ. အရဟာ သောတာပတ္တိဖလံ ဝါ သကဒါဂါမိဖလံ ဝါ အနာဂါမိဖလံ ဝါ အရဟတ္တံ ဝါ န ဇာနေယျာတိ? န ဟေဝံ ဝတ္တဗ္ဗေ။ပေ။.

အညာဏကထာ နိဋ္ဌိတာ.