(၂၀) ၁၁. နိရောဓကထာ

၃၅၃. ဒွေ နိရောဓာတိ? အာမန္တာ. ဒွေ ဒုက္ခနိရောဓာတိ? န ဟေဝံ ဝတ္တဗ္ဗေ။ပေ။ ဒွေ ဒုက္ခနိရောဓာတိ? အာမန္တာ. ဒွေ နိရောဓသစ္စာနီတိ? န ဟေဝံ ဝတ္တဗ္ဗေ။ပေ။ ဒွေ နိရောဓသစ္စာနီတိ? အာမန္တာ. ဒွေ ဒုက္ခသစ္စာနီတိ? န ဟေဝံ ဝတ္တဗ္ဗေ။ပေ။ ဒွေ နိရောဓသစ္စာနီတိ? အာမန္တာ. ဒွေ သမုဒယသစ္စာနီတိ? န ဟေဝံ ဝတ္တဗ္ဗေ။ပေ။ ဒွေ နိရောဓသစ္စာနီတိ? အာမန္တာ. ဒွေ မဂ္ဂသစ္စာနီတိ? န ဟေဝံ ဝတ္တဗ္ဗေ။ပေ။.

ဒွေ နိရောဓသစ္စာနီတိ? အာမန္တာ. ဒွေ တာဏာနိ။ပေ။ ဒွေ လေဏာနိ။ ဒွေ သရဏာနိ။ ဒွေ ပရာယဏာနိ။ ဒွေ အစ္စုတာနိ။ ဒွေ အမတာနိ။ ဒွေ နိဗ္ဗာနာနီတိ? န ဟေဝံ ဝတ္တဗ္ဗေ။ပေ။.

ဒွေ နိဗ္ဗာနာနီတိ? အာမန္တာ. အတ္ထိ ဒွိန္နံ နိဗ္ဗာနာနံ ဥစ္စနီစတာ ဟီနပဏီတတာ ဥက္ကံသာဝကံသော သီမာ ဝါ ဘေဒေါ ဝါ ရာဇိ ဝါ အန္တရိကာ ဝါတိ? န ဟေဝံ ဝတ္တဗ္ဗေ။ပေ။.

ဒွေ နိရောဓာတိ? အာမန္တာ. နနု အပ္ပဋိသင်္ခါနိရုဒ္ဓေ သင်္ခါရေ ပဋိသင်္ခါ နိရောဓေန္တီတိ? အာမန္တာ. ဟဉ္စိ အပ္ပဋိသင်္ခါနိရုဒ္ဓေ သင်္ခါရေ ပဋိသင်္ခါ နိရောဓေန္တိ၊ နော စ ဝတ ရေ ဝတ္တဗ္ဗေ – ‘‘ဒွေ နိရောဓာ’’တိ.

န ဝတ္တဗ္ဗံ – ‘‘ဒွေ နိရောဓာ’’တိ? အာမန္တာ. နနု အပ္ပဋိသင်္ခါနိရုဒ္ဓါပိ သင်္ခါရာ အစ္စန္တဘဂ္ဂါ၊ ပဋိသင်္ခါနိရုဒ္ဓါပိ သင်္ခါရာ အစ္စန္တဘဂ္ဂါတိ? အာမန္တာ. ဟဉ္စိ အပ္ပဋိသင်္ခါနိရုဒ္ဓါပိ သင်္ခါရာ အစ္စန္တဘဂ္ဂါ၊ ပဋိသင်္ခါနိရုဒ္ဓါပိ သင်္ခါရာ အစ္စန္တဘဂ္ဂါ၊ တေန ဝတ ရေ ဝတ္တဗ္ဗေ – ‘‘ဒွေ နိရောဓာ’’တိ.

ဒွေ နိရောဓာတိ? အာမန္တာ. ပဋိသင်္ခါနိရုဒ္ဓါပိ [ပဋိသင်္ခါနိရုဒ္ဓါ (?)] သင်္ခါရာ အရိယမဂ္ဂံ အာဂမ္မ နိရုဒ္ဓါတိ? အာမန္တာ. အပ္ပဋိသင်္ခါနိရုဒ္ဓါ သင်္ခါရာ အရိယမဂ္ဂံ အာဂမ္မ နိရုဒ္ဓါတိ? န ဟေဝံ ဝတ္တဗ္ဗေ။ပေ။.

ဒွေ နိရောဓာတိ? အာမန္တာ. ပဋိသင်္ခါနိရုဒ္ဓါ သင်္ခါရာ န ပုန ဥပ္ပဇ္ဇန္တီတိ? အာမန္တာ. အပ္ပဋိသင်္ခါနိရုဒ္ဓါ သင်္ခါရာ န ပုန ဥပ္ပဇ္ဇန္တီတိ? န ဟေဝံ ဝတ္တဗ္ဗေ။ပေ။ တေန ဟိ န ဝတ္တဗ္ဗံ – ‘‘ဒွေ နိရောဓာ’’တိ.

နိရောဓကထာ နိဋ္ဌိတာ.

ဒုတိယဝဂ္ဂေါ.

တဿုဒ္ဒါနံ –

ပရူပဟာရော အညာဏံ၊ ကင်္ခါ ပရဝိတာရဏာ၊

ဝစီဘေဒေါ ဒုက္ခာဟာရော၊ စိတ္တဋ္ဌိတိ စ ကုက္ကုဠာ၊

အနုပုဗ္ဗာဘိသမယော၊ ဝေါဟာရော စ နိရောဓကောတိ.