(၁၉) ၁၀. ဝေါဟာရကထာ

၃၄၇. ဗုဒ္ဓဿ ဘဂဝတော ဝေါဟာရော လောကုတ္တရောတိ? အာမန္တာ. လောကုတ္တရေ သောတေ ပဋိဟညတိ နော လောကိယေ၊ လောကုတ္တရေန ဝိညာဏေန ပဋိဝိဇာနန္တိ နော လောကိယေန၊ သာဝကာ ပဋိဝိဇာနန္တိ နော ပုထုဇ္ဇနာတိ? န ဟေဝံ ဝတ္တဗ္ဗေ။ပေ။.

နနု ဗုဒ္ဓဿ ဘဂဝတော ဝေါဟာရော လောကိယေ သောတေ ပဋိဟညတီတိ? အာမန္တာ. ဟဉ္စိ ဗုဒ္ဓဿ ဘဂဝတော ဝေါဟာရော လောကိယေ သောတေ ပဋိဟညတိ၊ နော စ ဝတ ရေ ဝတ္တဗ္ဗေ – ‘‘ဗုဒ္ဓဿ ဘဂဝတော ဝေါဟာရော လောကုတ္တရော’’တိ.

နနု ဗုဒ္ဓဿ ဘဂဝတော ဝေါဟာရံ လောကိယေန ဝိညာဏေန ပဋိဝိဇာနန္တီတိ? အာမန္တာ. ဟဉ္စိ ဗုဒ္ဓဿ ဘဂဝတော ဝေါဟာရံ လောကိယေန ဝိညာဏေန ပဋိဝိဇာနန္တိ၊ နော စ ဝတ ရေ ဝတ္တဗ္ဗေ – ‘‘ဗုဒ္ဓဿ ဘဂဝတော ဝေါဟာရော လောကုတ္တရော’’တိ.

နနု ဗုဒ္ဓဿ ဘဂဝတော ဝေါဟာရံ ပုထုဇ္ဇနာ ပဋိဝိဇာနန္တီတိ? အာမန္တာ. ဟဉ္စိ ဗုဒ္ဓဿ ဘဂဝတော ဝေါဟာရံ ပုထုဇ္ဇနာ ပဋိဝိဇာနန္တိ၊ နော စ ဝတ ရေ ဝတ္တဗ္ဗေ – ‘‘ဗုဒ္ဓဿ ဘဂဝတော ဝေါဟာရော လောကုတ္တရော’’တိ.

၃၄၈. ဗုဒ္ဓဿ ဘဂဝတော ဝေါဟာရော လောကုတ္တရောတိ? အာမန္တာ. မဂ္ဂေါ ဖလံ နိဗ္ဗာနံ၊ သောတာပတ္တိမဂ္ဂေါ သောတာပတ္တိဖလံ၊ သကဒါဂါမိမဂ္ဂေါ သကဒါဂါမိဖလံ၊ အနာဂါမိမဂ္ဂေါ အနာဂါမိဖလံ၊ အရဟတ္တမဂ္ဂေါ အရဟတ္တဖလံ၊ သတိပဋ္ဌာနံ သမ္မပ္ပဓာနံ ဣဒ္ဓိပါဒေါ ဣန္ဒြိယံ ဗလံ ဗောဇ္ဈင်္ဂေါတိ? န ဟေဝံ ဝတ္တဗ္ဗေ။ပေ။.

ဗုဒ္ဓဿ ဘဂဝတော ဝေါဟာရော လောကုတ္တရောတိ? အာမန္တာ. အတ္ထိ ကေစိ ဗုဒ္ဓဿ ဘဂဝတော ဝေါဟာရံ သုဏန္တီတိ? အာမန္တာ. လောကုတ္တရော ဓမ္မော သောတဝိညေယျော၊ သောတသ္မိံ ပဋိဟညတိ၊ သောတဿ အာပါထံ အာဂစ္ဆတီတိ? န ဟေဝံ ဝတ္တဗ္ဗေ။ပေ။.

နနု လောကုတ္တရော ဓမ္မော န သောတဝိညေယျော၊ န သောတသ္မိံ ပဋိဟညတိ၊ န သောတဿ အာပါထံ အာဂစ္ဆတီတိ? အာမန္တာ. ဟဉ္စိ လောကုတ္တရော ဓမ္မော န သောတဝိညေယျော၊ န သောတသ္မိံ ပဋိဟညတိ၊ န သောတဿ အာပါထံ အာဂစ္ဆတိ၊ နော စ ဝတ ရေ ဝတ္တဗ္ဗေ – ‘‘ဗုဒ္ဓဿ ဘဂဝတော ဝေါဟာရော လောကုတ္တရော’’တိ.

၃၄၉. ဗုဒ္ဓဿ ဘဂဝတော ဝေါဟာရော လောကုတ္တရောတိ? အာမန္တာ. အတ္ထိ ကေစိ ဗုဒ္ဓဿ ဘဂဝတော ဝေါဟာရေ ရဇ္ဇေယျုန္တိ? အာမန္တာ. လောကုတ္တရော ဓမ္မော ရာဂဋ္ဌာနိယော ရဇနီယော ကမနီယော မဒနီယော ဗန္ဓနီယော မုစ္ဆနီယောတိ? န ဟေဝံ ဝတ္တဗ္ဗေ။ပေ။.

နနု လောကုတ္တရော ဓမ္မော န ရာဂဋ္ဌာနိယော န ရဇနီယော န ကမနီယော န မဒနီယော န ဗန္ဓနီယော န မုစ္ဆနီယောတိ? အာမန္တာ. ဟဉ္စိ လောကုတ္တရော ဓမ္မော န ရာဂဋ္ဌာနိယော န ရဇနီယော န ကမနီယော န မဒနီယော န ဗန္ဓနီယော န မုစ္ဆနီယော၊ နော စ ဝတ ရေ ဝတ္တဗ္ဗေ – ‘‘ဗုဒ္ဓဿ ဘဂဝတော ဝေါဟာရော လောကုတ္တရော’’တိ.

ဗုဒ္ဓဿ ဘဂဝတော ဝေါဟာရော လောကုတ္တရောတိ? အာမန္တာ. အတ္ထိ ကေစိ ဗုဒ္ဓဿ ဘဂဝတော ဝေါဟာရေ ဒုဿေယျုန္တိ? အာမန္တာ. လောကုတ္တရော ဓမ္မော ဒေါသဋ္ဌာနိယော ကောပဋ္ဌာနိယော ပဋိဃဋ္ဌာနိယောတိ? န ဟေဝံ ဝတ္တဗ္ဗေ။ပေ။.

နနု လောကုတ္တရော ဓမ္မော န ဒေါသဋ္ဌာနိယော န ကောပဋ္ဌာနိယော န ပဋိဃဋ္ဌာနိယောတိ? အာမန္တာ. ဟဉ္စိ လောကုတ္တရော ဓမ္မော န ဒေါသဋ္ဌာနိယော န ကောပဋ္ဌာနိယော န ပဋိဃဋ္ဌာနိယော၊ နော စ ဝတ ရေ ဝတ္တဗ္ဗေ – ‘‘ဗုဒ္ဓဿ ဘဂဝတော ဝေါဟာရော လောကုတ္တရော’’တိ.

ဗုဒ္ဓဿ ဘဂဝတော ဝေါဟာရော လောကုတ္တရောတိ? အာမန္တာ. အတ္ထိ ကေစိ ဗုဒ္ဓဿ ဘဂဝတော ဝေါဟာရေ မုယှေယျုန္တိ? အာမန္တာ. လောကုတ္တရော ဓမ္မော မောဟဋ္ဌာနိယော အညာဏကရဏော အစက္ခုကရဏော ပညာနိရောဓိကော ဝိဃာတပက္ခိကော အနိဗ္ဗာနသံဝတ္တနိကောတိ? န ဟေဝံ ဝတ္တဗ္ဗေ။ပေ။.

နနု လောကုတ္တရော ဓမ္မော န မောဟဋ္ဌာနိယော န အညာဏကရဏော န အစက္ခုကရဏော ပညာဝုဒ္ဓိကော အဝိဃာတပက္ခိကော နိဗ္ဗာနသံဝတ္တနိကောတိ? အာမန္တာ. ဟဉ္စိ လောကုတ္တရော ဓမ္မော န မောဟဋ္ဌာနိယော န အညာဏကရဏော န အစက္ခုကရဏော ပညာဝုဒ္ဓိကော အဝိဃာတပက္ခိကော နိဗ္ဗာနသံဝတ္တနိကော၊ နော စ ဝတ ရေ ဝတ္တဗ္ဗေ – ‘‘ဗုဒ္ဓဿ ဘဂဝတော ဝေါဟာရော လောကုတ္တရော’’တိ.

၃၅၀. ဗုဒ္ဓဿ ဘဂဝတော ဝေါဟာရော လောကုတ္တရောတိ? အာမန္တာ. ယေ ကေစိ ဗုဒ္ဓဿ ဘဂဝတော ဝေါဟာရံ သုဏန္တိ၊ သဗ္ဗေ တေ မဂ္ဂံ ဘာဝေန္တီတိ? န ဟေဝံ ဝတ္တဗ္ဗေ။ပေ။.

ယေ ကေစိ ဗုဒ္ဓဿ ဘဂဝတော ဝေါဟာရံ သုဏန္တိ၊ သဗ္ဗေ တေ မဂ္ဂံ ဘာဝေန္တီတိ? အာမန္တာ. ဗာလပုထုဇ္ဇနာ ဗုဒ္ဓဿ ဘဂဝတော ဝေါဟာရံ သုဏန္တိ၊ ဗာလပုထုဇ္ဇနာ မဂ္ဂံ ဘာဝေန္တီတိ? န ဟေဝံ ဝတ္တဗ္ဗေ။ပေ။ မာတုဃာတကော မဂ္ဂံ ဘာဝေတိ။ပေ။ ပိတုဃာတကော။ အရဟန္တဃာတကော။ ရုဟိရုပ္ပါဒကော။ သံဃဘေဒကော ဗုဒ္ဓဿ ဘဂဝတော ဝေါဟာရံ သုဏာတိ၊ သံဃဘေဒကော မဂ္ဂံ ဘာဝေတီတိ? န ဟေဝံ ဝတ္တဗ္ဗေ။ပေ။.

၃၅၁. လဗ္ဘာ သောဝဏ္ဏမယာယ လဋ္ဌိယာ ဓညပုဉ္ဇောပိ သုဝဏ္ဏပုဉ္ဇောပိ အာစိက္ခိတုန္တိ? အာမန္တာ. ဧဝမေဝံ ဘဂဝါ လောကုတ္တရေန ဝေါဟာရေန လောကိယမ္ပိ လောကုတ္တရမ္ပိ ဓမ္မံ ဝေါဟရတီတိ.

လဗ္ဘာ ဧလဏ္ဍိယာယ လဋ္ဌိယာ ဓညပုဉ္ဇောပိ သုဝဏ္ဏပုဉ္ဇောပိ အာစိက္ခိတုန္တိ? အာမန္တာ. ဧဝမေဝံ ဘဂဝါ လောကိယေန ဝေါဟာရေန လောကိယမ္ပိ လောကုတ္တရမ္ပိ ဓမ္မံ ဝေါဟရတီတိ.

၃၅၂. ဗုဒ္ဓဿ ဘဂဝတော ဝေါဟာရော လောကိယံ ဝေါဟရန္တဿ လောကိယော ဟောတိ၊ လောကုတ္တရံ ဝေါဟရန္တဿ လောကုတ္တရော ဟောတီတိ? အာမန္တာ. လောကိယံ ဝေါဟရန္တဿ လောကိယေ သောတေ ပဋိဟညတိ၊ လောကုတ္တရံ ဝေါဟရန္တဿ လောကုတ္တရေ သောတေ ပဋိဟညတိ၊ လောကိယံ ဝေါဟရန္တဿ လောကိယေန ဝိညာဏေန ပဋိဝိဇာနန္တိ၊ လောကုတ္တရံ ဝေါဟရန္တဿ လောကုတ္တရေန ဝိညာဏေန ပဋိဝိဇာနန္တိ၊ လောကိယံ ဝေါဟရန္တဿ ပုထုဇ္ဇနာ ပဋိဝိဇာနန္တိ၊ လောကုတ္တရံ ဝေါဟရန္တဿ သာဝကာ ပဋိဝိဇာနန္တီတိ? န ဟေဝံ ဝတ္တဗ္ဗေ။ပေ။.

န ဝတ္တဗ္ဗံ – ‘‘ဗုဒ္ဓဿ ဘဂဝတော ဝေါဟာရော လောကိယံ ဝေါဟရန္တဿ လောကိယော ဟောတိ၊ လောကုတ္တရံ ဝေါဟရန္တဿ လောကုတ္တရော ဟောတီတိ? အာမန္တာ. နနု ဘဂဝါ လောကိယမ္ပိ လောကုတ္တရမ္ပိ ဓမ္မံ ဝေါဟရတီတိ? အာမန္တာ. ဟဉ္စိ ဘဂဝါ လောကိယမ္ပိ လောကုတ္တရမ္ပိ ဓမ္မံ ဝေါဟရတိ၊ တေန ဝတ ရေ ဝတ္တဗ္ဗေ – ‘‘ဗုဒ္ဓဿ ဘဂဝတော ဝေါဟာရော လောကိယံ ဝေါဟရန္တဿ လောကိယော ဟောတိ၊ လောကုတ္တရံ ဝေါဟရန္တဿ လောကုတ္တရော ဟောတီ’’တိ.

ဗုဒ္ဓဿ ဘဂဝတော ဝေါဟာရော လောကိယံ ဝေါဟရန္တဿ လောကိယော ဟောတိ၊ လောကုတ္တရံ ဝေါဟရန္တဿ လောကုတ္တရော ဟောတီတိ? အာမန္တာ. မဂ္ဂံ ဝေါဟရန္တဿ မဂ္ဂေါ ဟောတိ၊ အမဂ္ဂံ ဝေါဟရန္တဿ အမဂ္ဂေါ ဟောတိ၊ ဖလံ ဝေါဟရန္တဿ ဖလံ ဟောတိ၊ အဖလံ ဝေါဟရန္တဿ အဖလံ ဟောတိ၊ နိဗ္ဗာနံ ဝေါဟရန္တဿ နိဗ္ဗာနံ ဟောတိ၊ အနိဗ္ဗာနံ ဝေါဟရန္တဿ အနိဗ္ဗာနံ ဟောတိ၊ သင်္ခတံ ဝေါဟရန္တဿ သင်္ခတံ ဟောတိ၊ အသင်္ခတံ ဝေါဟရန္တဿ အသင်္ခတံ ဟောတိ၊ ရူပံ ဝေါဟရန္တဿ ရူပံ ဟောတိ၊ အရူပံ ဝေါဟရန္တဿ အရူပံ ဟောတိ၊ ဝေဒနံ ဝေါဟရန္တဿ ဝေဒနာ ဟောတိ၊ အဝေဒနံ ဝေါဟရန္တဿ အဝေဒနာ ဟောတိ၊ သညံ ဝေါဟရန္တဿ သညာ ဟောတိ၊ အသညံ ဝေါဟရန္တဿ အသညာ ဟောတိ၊ သင်္ခါရေ ဝေါဟရန္တဿ သင်္ခါရာ ဟောန္တိ၊ အသင်္ခါရေ ဝေါဟရန္တဿ အသင်္ခါရာ ဟောန္တိ၊ ဝိညာဏံ ဝေါဟရန္တဿ ဝိညာဏံ ဟောတိ၊ အဝိညာဏံ ဝေါဟရန္တဿ အဝိညာဏံ ဟောတီတိ? န ဟေဝံ ဝတ္တဗ္ဗေ။ပေ။.

ဝေါဟာရကထာ နိဋ္ဌိတာ.