(၁၈) ၉. အနုပုဗ္ဗာဘိသမယကထာ

၃၃၉. အနုပုဗ္ဗာဘိသမယောတိ? အာမန္တာ. အနုပုဗ္ဗေန သောတာပတ္တိမဂ္ဂံ ဘာဝေတီတိ? န ဟေဝံ ဝတ္တဗ္ဗေ. အနုပုဗ္ဗေန သောတာပတ္တိမဂ္ဂံ ဘာဝေတီတိ? အာမန္တာ. အနုပုဗ္ဗေန သောတာပတ္တိဖလံ သစ္ဆိကရောတီတိ? န ဟေဝံ ဝတ္တဗ္ဗေ.

အနုပုဗ္ဗာဘိသမယောတိ? အာမန္တာ. အနုပုဗ္ဗေန သကဒါဂါမိမဂ္ဂံ ဘာဝေတီတိ? န ဟေဝံ ဝတ္တဗ္ဗေ. အနုပုဗ္ဗေန သကဒါဂါမိမဂ္ဂံ ဘာဝေတီတိ? အာမန္တာ. အနုပုဗ္ဗေန သကဒါဂါမိဖလံ သစ္ဆိကရောတီတိ? န ဟေဝံ ဝတ္တဗ္ဗေ.

အနုပုဗ္ဗာဘိသမယောတိ? အာမန္တာ. အနုပုဗ္ဗေန အနာဂါမိမဂ္ဂံ ဘာဝေတီတိ? န ဟေဝံ ဝတ္တဗ္ဗေ. အနုပုဗ္ဗေန အနာဂါမိမဂ္ဂံ ဘာဝေတီတိ? အာမန္တာ. အနုပုဗ္ဗေန အနာဂါမိဖလံ သစ္ဆိကရောတီတိ? န ဟေဝံ ဝတ္တဗ္ဗေ.

အနုပုဗ္ဗာဘိသမယောတိ? အာမန္တာ. အနုပုဗ္ဗေန အရဟတ္တမဂ္ဂံ ဘာဝေတီတိ? န ဟေဝံ ဝတ္တဗ္ဗေ. အနုပုဗ္ဗေန အရဟတ္တမဂ္ဂံ ဘာဝေတီတိ? အာမန္တာ. အနုပုဗ္ဗေန အရဟတ္တဖလံ သစ္ဆိကရောတီတိ? န ဟေဝံ ဝတ္တဗ္ဗေ.

၃၄၀. သောတာပတ္တိဖလသစ္ဆိကိရိယာယ ပဋိပန္နော ပုဂ္ဂလော ဒုက္ခဒဿနေန ကိံ ဇဟတီတိ? သက္ကာယဒိဋ္ဌိံ၊ ဝိစိကိစ္ဆံ၊ သီလဗ္ဗတပရာမာသံ၊ တဒေကဋ္ဌေ စ ကိလေသေ စတုဘာဂံ ဇဟတီတိ. စတုဘာဂံ သောတာပန္နော၊ စတုဘာဂံ န သောတာပန္နော၊ စတုဘာဂံ သောတာပတ္တိဖလပ္ပတ္တော ပဋိလဒ္ဓေါ အဓိဂတော သစ္ဆိကတော ဥပသမ္ပဇ္ဇ ဝိဟရတိ၊ ကာယေန ဖုသိတွာ ဝိဟရတိ၊ စတုဘာဂံ န ကာယေန ဖုသိတွာ ဝိဟရတိ၊ စတုဘာဂံ သတ္တက္ခတ္တုပရမော ကောလင်္ကောလော ဧကဗီဇီ ဗုဒ္ဓေ အဝေစ္စပ္ပသာဒေန သမန္နာဂတော၊ ဓမ္မေ။ပေ။ သံဃေ။ပေ။ အရိယကန္တေဟိ သီလေဟိ သမန္နာဂတော စတုဘာဂံ န အရိယကန္တေဟိ သီလေဟိ သမန္နာဂတောတိ? န ဟေဝံ ဝတ္တဗ္ဗေ.

သမုဒယဒဿနေန။ပေ။ နိရောဓဒဿနေန။ပေ။ မဂ္ဂဒဿနေန ကိံ ဇဟတီတိ? သက္ကာယဒိဋ္ဌိံ၊ ဝိစိကိစ္ဆံ၊ သီလဗ္ဗတပရာမာသံ၊ တဒေကဋ္ဌေ စ ကိလေသေ စတုဘာဂံ ဇဟတီတိ. စတုဘာဂံ သောတာပန္နော၊ စတုဘာဂံ န သောတာပန္နော၊ စတုဘာဂံ သောတာပတ္တိဖလပ္ပတ္တော ပဋိလဒ္ဓေါ အဓိဂတော သစ္ဆိကတော ဥပသမ္ပဇ္ဇ ဝိဟရတိ၊ ကာယေန ဖုသိတွာ ဝိဟရတိ၊ စတုဘာဂံ န ကာယေန ဖုသိတွာ ဝိဟရတိ၊ စတုဘာဂံ သတ္တက္ခတ္တုပရမော ကောလင်္ကောလော ဧကဗီဇီ ဗုဒ္ဓေ အဝေစ္စပ္ပသာဒေန သမန္နာဂတော၊ ဓမ္မေ။ပေ။ သံဃေ။ပေ။ အရိယကန္တေဟိ သီလေဟိ သမန္နာဂတော၊ စတုဘာဂံ န အရိယကန္တေဟိ သီလေဟိ သမန္နာဂတောတိ? န ဟေဝံ ဝတ္တဗ္ဗေ။ပေ။.

၃၄၁. သကဒါဂါမိဖလသစ္ဆိကိရိယာယ ပဋိပန္နော ပုဂ္ဂလော ဒုက္ခဒဿနေန ကိံ ဇဟတီတိ? ဩဠာရိကံ ကာမရာဂံ၊ ဩဠာရိကံ ဗျာပါဒံ၊ တဒေကဋ္ဌေ စ ကိလေသေ စတုဘာဂံ ဇဟတီတိ. စတုဘာဂံ သကဒါဂါမီ၊ စတုဘာဂံ န သကဒါဂါမီ၊ စတုဘာဂံ သကဒါဂါမိဖလပ္ပတ္တော ပဋိလဒ္ဓေါ အဓိဂတော သစ္ဆိကတော ဥပသမ္ပဇ္ဇ ဝိဟရတိ၊ ကာယေန ဖုသိတွာ ဝိဟရတိ၊ စတုဘာဂံ န ကာယေန ဖုသိတွာ ဝိဟရတီတိ? န ဟေဝံ ဝတ္တဗ္ဗေ။ပေ။ သမုဒယဒဿနေန။ပေ။ နိရောဓဒဿနေန။ပေ။ မဂ္ဂဒဿနေန ကိံ ဇဟတီတိ? ဩဠာရိကံ ကာမရာဂံ၊ ဩဠာရိကံ ဗျာပါဒံ၊ တဒေကဋ္ဌေ စ ကိလေသေ စတုဘာဂံ ဇဟတီတိ. စတုဘာဂံ သကဒါဂါမီ၊ စတုဘာဂံ န သကဒါဂါမီ၊ စတုဘာဂံ သကဒါဂါမိဖလပ္ပတ္တော ပဋိလဒ္ဓေါ အဓိဂတော သစ္ဆိကတော ဥပသမ္ပဇ္ဇ ဝိဟရတိ၊ ကာယေန ဖုသိတွာ ဝိဟရတိ၊ စတုဘာဂံ န ကာယေန ဖုသိတွာ ဝိဟရတီတိ? န ဟေဝံ ဝတ္တဗ္ဗေ။ပေ။.

၃၄၂. အနာဂါမိဖလသစ္ဆိကိရိယာယ ပဋိပန္နော ပုဂ္ဂလော ဒုက္ခဒဿနေန ကိံ ဇဟတီတိ? အဏုသဟဂတံ ကာမရာဂံ၊ အဏုသဟဂတံ ဗျာပါဒံ၊ တဒေကဋ္ဌေ စ ကိလေသေ စတုဘာဂံ ဇဟတီတိ. စတုဘာဂံ အနာဂါမီ၊ စတုဘာဂံ န အနာဂါမီ၊ စတုဘာဂံ အနာဂါမိဖလပ္ပတ္တော ပဋိလဒ္ဓေါ အဓိဂတော သစ္ဆိကတော ဥပသမ္ပဇ္ဇ ဝိဟရတိ၊ ကာယေန ဖုသိတွာ ဝိဟရတိ၊ စတုဘာဂံ န ကာယေန ဖုသိတွာ ဝိဟရတိ၊ စတုဘာဂံ အန္တရာပရိနိဗ္ဗာယီ။ပေ။ ဥပဟစ္စပရိနိဗ္ဗာယီ။ အသင်္ခါရပရိနိဗ္ဗာယီ။ သသင်္ခါရပရိနိဗ္ဗာယီ။ ဥဒ္ဓံသောတော အကနိဋ္ဌဂါမီ၊ စတုဘာဂံ န ဥဒ္ဓံသောတော န အကနိဋ္ဌဂါမီတိ? န ဟေဝံ ဝတ္တဗ္ဗေ။ပေ။.

သမုဒယဒဿနေန။ပေ။ နိရောဓဒဿနေန။ပေ။ မဂ္ဂဒဿနေန ကိံ ဇဟတီတိ? အဏုသဟဂတံ ကာမရာဂံ၊ အဏုသဟဂတံ ဗျာပါဒံ၊ တဒေကဋ္ဌေ စ ကိလေသေ စတုဘာဂံ ဇဟတီတိ. စတုဘာဂံ အနာဂါမီ၊ စတုဘာဂံ န အနာဂါမီ၊ စတုဘာဂံ အနာဂါမိဖလပ္ပတ္တော ပဋိလဒ္ဓေါ အဓိဂတော သစ္ဆိကတော ဥပသမ္ပဇ္ဇ ဝိဟရတိ၊ ကာယေန ဖုသိတွာ ဝိဟရတိ၊ စတုဘာဂံ န ကာယေန ဖုသိတွာ ဝိဟရတိ၊ စတုဘာဂံ အန္တရာပရိနိဗ္ဗာယီ။ပေ။ ဥပဟစ္စပရိနိဗ္ဗာယီ။ အသင်္ခါရပရိနိဗ္ဗာယီ။ သသင်္ခါရပရိနိဗ္ဗာယီ။ ဥဒ္ဓံသောတော အကနိဋ္ဌဂါမီ၊ စတုဘာဂံ န ဥဒ္ဓံသောတော အကနိဋ္ဌဂါမီတိ? န ဟေဝံ ဝတ္တဗ္ဗေ။ပေ။.

၃၄၃. အရဟတ္တသစ္ဆိကိရိယာယ ပဋိပန္နော ပုဂ္ဂလော ဒုက္ခဒဿနေန ကိံ ဇဟတီတိ? ရူပရာဂံ၊ အရူပရာဂံ၊ မာနံ၊ ဥဒ္ဓစ္စံ၊ အဝိဇ္ဇံ၊ တဒေကဋ္ဌေ စ ကိလေသေ စတုဘာဂံ ဇဟတီတိ. စတုဘာဂံ အရဟာ၊ စတုဘာဂံ န အရဟာ၊ စတုဘာဂံ အရဟတ္တပ္ပတ္တော ပဋိလဒ္ဓေါ အဓိဂတော သစ္ဆိကတော ဥပသမ္ပဇ္ဇ ဝိဟရတိ၊ ကာယေန ဖုသိတွာ ဝိဟရတိ၊ စတုဘာဂံ န ကာယေန ဖုသိတွာ ဝိဟရတိ၊ စတုဘာဂံ ဝီတရာဂေါ။ပေ။ ဝီတဒေါသော။ ဝီတမောဟော။ပေ။ ကတကရဏီယော ဩဟိတဘာရော အနုပ္ပတ္တသဒတ္ထော ပရိက္ခီဏဘဝသံယောဇနော သမ္မဒညာဝိမုတ္တော ဥက္ခိတ္တပလိဃော သင်္ကိဏ္ဏပရိခေါ အဗ္ဗူဠှေသိကော နိရဂ္ဂဠော အရိယော ပန္နဒ္ဓဇော ပန္နဘာရော ဝိသညုတ္တော သုဝိဇိတဝိဇယော၊ ဒုက္ခံ တဿ ပရိညာတံ၊ သမုဒယော ပဟီနော၊ နိရောဓော သစ္ဆိကတော၊ မဂ္ဂေါ ဘာဝိတော၊ အဘိညေယျံ အဘိညာတံ၊ ပရိညေယျံ ပရိညာတံ၊ ပဟာတဗ္ဗံ ပဟီနံ၊ ဘာဝေတဗ္ဗံ ဘာဝိတံ။ပေ။ သစ္ဆိကာတဗ္ဗံ သစ္ဆိကတံ၊ စတုဘာဂံ သစ္ဆိကာတဗ္ဗံ န သစ္ဆိကတန္တိ? န ဟေဝံ ဝတ္တဗ္ဗေ။ပေ။.

သမုဒယဒဿနေန ။ နိရောဓဒဿနေန။ မဂ္ဂဒဿနေန ကိံ ဇဟတီတိ? ရူပရာဂံ၊ အရူပရာဂံ၊ မာနံ၊ ဥဒ္ဓစ္စံ၊ အဝိဇ္ဇံ၊ တဒေကဋ္ဌေ စ ကိလေသေ စတုဘာဂံ ဇဟတီတိ. စတုဘာဂံ အရဟာ၊ စတုဘာဂံ န အရဟာ၊ စတုဘာဂံ အရဟတ္တပ္ပတ္တော ပဋိလဒ္ဓေါ အဓိဂတော သစ္ဆိကတော ဥပသမ္ပဇ္ဇ ဝိဟရတိ၊ ကာယေန ဖုသိတွာ ဝိဟရတိ၊ စတုဘာဂံ န ကာယေန ဖုသိတွာ ဝိဟရတိ၊ စတုဘာဂံ ဝီတရာဂေါ။ ဝီတဒေါသော။ ဝီတမောဟော။ ကတကရဏီယော ဩဟိတဘာရော အနုပ္ပတ္တသဒတ္ထော ပရိက္ခီဏဘဝသံယောဇနော သမ္မဒညာဝိမုတ္တော ဥက္ခိတ္တပလိဃော သင်္ကိဏ္ဏပရိခေါ အဗ္ဗူဠှေသိကော နိရဂ္ဂဠော အရိယော ပန္နဒ္ဓဇော ပန္နဘာရော ဝိသညုတ္တော သုဝိဇိတဝိဇယော၊ ဒုက္ခံ တဿ ပရိညာတံ၊ သမုဒယော ပဟီနော၊ နိရောဓော သစ္ဆိကတော၊ မဂ္ဂေါ ဘာဝိတော၊ အဘိညေယျံ အဘိညာတံ၊ ပရိညေယျံ ပရိညာတံ၊ ပဟာတဗ္ဗံ ပဟီနံ၊ ဘာဝေတဗ္ဗံ ဘာဝိတံ။ပေ။ သစ္ဆိကာတဗ္ဗံ သစ္ဆိကတံ၊ စတုဘာဂံ သစ္ဆိကာတဗ္ဗံ န သစ္ဆိကတန္တိ? န ဟေဝံ ဝတ္တဗ္ဗေ။ပေ။.

၃၄၄. သောတာပတ္တိဖလသစ္ဆိကိရိယာယ ပဋိပန္နော ပုဂ္ဂလော ဒုက္ခံ ဒက္ခန္တော ပဋိပန္နကောတိ ဝတ္တဗ္ဗောတိ? အာမန္တာ. ဒုက္ခေ ဒိဋ္ဌေ ဖလေ ဌိတောတိ ဝတ္တဗ္ဗောတိ? န ဟေဝံ ဝတ္တဗ္ဗေ. သမုဒယံ ဒက္ခန္တော။ပေ။ နိရောဓံ ဒက္ခန္တော ပဋိပန္နကောတိ ဝတ္တဗ္ဗောတိ? အာမန္တာ. နိရောဓေ ဒိဋ္ဌေ ဖလေ ဌိတောတိ ဝတ္တဗ္ဗောတိ? န ဟေဝံ ဝတ္တဗ္ဗေ.

သောတာပတ္တိဖလသစ္ဆိကိရိယာယ ပဋိပန္နော ပုဂ္ဂလော မဂ္ဂံ ဒက္ခန္တော ပဋိပန္နကောတိ ဝတ္တဗ္ဗော၊ မဂ္ဂေ ဒိဋ္ဌေ ဖလေ ဌိတောတိ ဝတ္တဗ္ဗောတိ? အာမန္တာ. ဒုက္ခံ ဒက္ခန္တော ပဋိပန္နကောတိ ဝတ္တဗ္ဗော၊ ဒုက္ခေ ဒိဋ္ဌေ ဖလေ ဌိတောတိ ဝတ္တဗ္ဗောတိ? န ဟေဝံ ဝတ္တဗ္ဗေ။ပေ။ မဂ္ဂံ ဒက္ခန္တော ပဋိပန္နကောတိ ဝတ္တဗ္ဗော၊ မဂ္ဂေ ဒိဋ္ဌေ ဖလေ ဌိတောတိ ဝတ္တဗ္ဗောတိ? အာမန္တာ. သမုဒယံ ဒက္ခန္တော။ပေ။ နိရောဓံ ဒက္ခန္တော ပဋိပန္နကောတိ ဝတ္တဗ္ဗော၊ နိရောဓေ ဒိဋ္ဌေ ဖလေ ဌိတောတိ ဝတ္တဗ္ဗောတိ? န ဟေဝံ ဝတ္တဗ္ဗေ။ပေ။.

သောတာပတ္တိဖလသစ္ဆိကိရိယာယ ပဋိပန္နော ပုဂ္ဂလော ဒုက္ခံ ဒက္ခန္တော ပဋိပန္နကောတိ ဝတ္တဗ္ဗော၊ ဒုက္ခေ ဒိဋ္ဌေ န ဝတ္တဗ္ဗံ – ‘‘ဖလေ ဌိတောတိ ဝတ္တဗ္ဗော’’တိ? အာမန္တာ. မဂ္ဂံ ဒက္ခန္တော ပဋိပန္နကောတိ ဝတ္တဗ္ဗော၊ မဂ္ဂေ ဒိဋ္ဌေ န ဝတ္တဗ္ဗံ – ‘‘ဖလေ ဌိတောတိ ဝတ္တဗ္ဗော’’တိ? န ဟေဝံ ဝတ္တဗ္ဗေ။ပေ။ သမုဒယံ ဒက္ခန္တော။ နိရောဓံ ဒက္ခန္တော ပဋိပန္နကောတိ ဝတ္တဗ္ဗော၊ နိရောဓေ ဒိဋ္ဌေ န ဝတ္တဗ္ဗံ – ‘‘ဖလေ ဌိတောတိ ဝတ္တဗ္ဗော’’တိ? အာမန္တာ. မဂ္ဂံ ဒက္ခန္တော ‘‘ပဋိပန္နကော’’တိ ဝတ္တဗ္ဗော၊ မဂ္ဂေ ဒိဋ္ဌေ န ဝတ္တဗ္ဗံ – ‘‘ဖလေ ဌိတောတိ ဝတ္တဗ္ဗော’’တိ? န ဟေဝံ ဝတ္တဗ္ဗေ။ပေ။.

[သကဝါဒီပုစ္ဆာလက္ခဏံ] သောတာပတ္တိဖလသစ္ဆိကိရိယာယ ပဋိပန္နော ပုဂ္ဂလော ဒုက္ခံ ဒက္ခန္တော ပဋိပန္နကောတိ ဝတ္တဗ္ဗော၊ ဒုက္ခေ ဒိဋ္ဌေ န ဝတ္တဗ္ဗံ – ‘‘ဖလေ ဌိတောတိ ဝတ္တဗ္ဗော’’တိ? အာမန္တာ. နိရတ္ထိယံ ဒုက္ခဒဿနန္တိ? န ဟေဝံ ဝတ္တဗ္ဗေ။ပေ။ သမုဒယံ ဒက္ခန္တော။ပေ။ နိရောဓံ ဒက္ခန္တော ပဋိပန္နကောတိ ဝတ္တဗ္ဗော၊ နိရောဓေ ဒိဋ္ဌေ န ဝတ္တဗ္ဗံ – ‘‘ဖလေ ဌိတောတိ ဝတ္တဗ္ဗော’’တိ? အာမန္တာ. နိရတ္ထိယံ နိရောဓဒဿနန္တိ? န ဟေဝံ ဝတ္တဗ္ဗေ။ပေ။.

၃၄၅. [ပရဝါဒီပုစ္ဆာလက္ခဏံ] ဒုက္ခေ ဒိဋ္ဌေ စတ္တာရိ သစ္စာနိ ဒိဋ္ဌာနိ ဟောန္တီတိ? အာမန္တာ. ဒုက္ခသစ္စံ စတ္တာရိ သစ္စာနီတိ? န ဟေဝံ ဝတ္တဗ္ဗေ။ပေ။.

[သကဝါဒီပုစ္ဆာလက္ခဏံ] ရူပက္ခန္ဓေ အနိစ္စတော ဒိဋ္ဌေ ပဉ္စက္ခန္ဓာ အနိစ္စတော ဒိဋ္ဌာ ဟောန္တီတိ? အာမန္တာ. ရူပက္ခန္ဓော ပဉ္စက္ခန္ဓာတိ? န ဟေဝံ ဝတ္တဗ္ဗေ။ပေ။.

[သကဝါဒီပုစ္ဆာလက္ခဏံ] စက္ခာယတနေ အနိစ္စတော ဒိဋ္ဌေ ဒွါဒသာယတနာနိ အနိစ္စတော ဒိဋ္ဌာနိ ဟောန္တီတိ? အာမန္တာ. စက္ခာယတနံ ဒွါဒသာယတနာနီတိ? န ဟေဝံ ဝတ္တဗ္ဗေ။ပေ။.

[သကဝါဒီပုစ္ဆာလက္ခဏံ] စက္ခုဓာတုယာ အနိစ္စတော ဒိဋ္ဌာယ အဋ္ဌာရသ ဓာတုယော အနိစ္စတော ဒိဋ္ဌာ ဟောန္တီတိ? အာမန္တာ. စက္ခုဓာတု အဋ္ဌာရသ ဓာတုယောတိ? န ဟေဝံ ဝတ္တဗ္ဗေ။ပေ။.

[သကဝါဒီပုစ္ဆာလက္ခဏံ] စက္ခုန္ဒြိယေ အနိစ္စတော ဒိဋ္ဌေ ဗာဝီသတိန္ဒြိယာနိ အနိစ္စတော ဒိဋ္ဌာနိ ဟောန္တီတိ? အာမန္တာ. စက္ခုန္ဒြိယံ ဗာဝီသတိန္ဒြိယာနီတိ? န ဟေဝံ ဝတ္တဗ္ဗေ။ပေ။.

[သကဝါဒီပုစ္ဆာလက္ခဏံ] စတူဟိ ဉာဏေဟိ သောတာပတ္တိဖလံ သစ္ဆိကရောတီတိ? အာမန္တာ. စတ္တာရိ သောတာပတ္တိဖလာနီတိ? န ဟေဝံ ဝတ္တဗ္ဗေ။ပေ။ အဋ္ဌဟိ ဉာဏေဟိ သောတာပတ္တိဖလံ သစ္ဆိကရောတီတိ? အာမန္တာ. အဋ္ဌ သောတာပတ္တိဖလာနီတိ? န ဟေဝံ ဝတ္တဗ္ဗေ။ပေ။ ဒွါဒသဟိ ဉာဏေဟိ သောတာပတ္တိဖလံ သစ္ဆိကရောတီတိ? အာမန္တာ. ဒွါဒသ သောတာပတ္တိဖလာနီတိ? န ဟေဝံ ဝတ္တဗ္ဗေ။ပေ။ စတုစတ္တာရီသာယ ဉာဏေဟိ သောတာပတ္တိဖလံ သစ္ဆိကရောတီတိ? အာမန္တာ. စတုစတ္တာရီသံ သောတာပတ္တိဖလာနီတိ? န ဟေဝံ ဝတ္တဗ္ဗေ။ပေ။ သတ္တသတ္တတိယာ ဉာဏေဟိ သောတာပတ္တိဖလံ သစ္ဆိကရောတီတိ? အာမန္တာ. သတ္တသတ္တတိ သောတာပတ္တိဖလာနီတိ? န ဟေဝံ ဝတ္တဗ္ဗေ။ပေ။.

၃၄၆. န ဝတ္တဗ္ဗံ – ‘‘အနုပုဗ္ဗာဘိသမယော’’တိ? အာမန္တာ. နနု ဝုတ္တံ ဘဂဝတာ – ‘‘သေယျထာပိ၊ ဘိက္ခဝေ၊ မဟာသမုဒ္ဒေါ အနုပုဗ္ဗနိန္နော အနုပုဗ္ဗပေါဏော အနုပုဗ္ဗပဗ္ဘာရော၊ န အာယတကေနေဝ ပပါတော၊ ဧဝမေဝ ခေါ၊ ဘိက္ခဝေ၊ ဣမသ္မိံ ဓမ္မဝိနယေ အနုပုဗ္ဗသိက္ခာ အနုပုဗ္ဗကိရိယာ အနုပုဗ္ဗပဋိပဒါ၊ န အာယတကေနေဝ အညာပဋိဝေဓော’’တိ [စူဠဝ. ၃၈၅၊ အ. နိ. ၈.၂၀၊ ဥဒါ. ၄၅ ဥဒါနေ စ]. အတ္ထေဝ သုတ္တန္တောတိ? အာမန္တာ. တေန ဟိ အနုပုဗ္ဗာဘိသမယောတိ.

န ဝတ္တဗ္ဗံ – ‘‘အနုပုဗ္ဗာဘိသမယော’’တိ? အာမန္တာ. နနု ဝုတ္တံ ဘဂဝတာ –

‘‘အနုပုဗ္ဗေန မေဓာဝီ၊ ထောကံ ထောကံ ခဏေ ခဏေ၊

ကမ္မာရော ရဇတဿေဝ၊ နိဒ္ဓမေ မလမတ္တနော’’တိ [ဓ. ပ. ၂၃၉ ဓမ္မပဒေ].

အတ္ထေဝ သုတ္တန္တောတိ? အာမန္တာ. တေန ဟိ အနုပုဗ္ဗာဘိသမယောတိ.

အနုပုဗ္ဗာဘိသမယောတိ? အာမန္တာ. နနွာယသ္မာ ဂဝမ္ပတိ ထေရော ဘိက္ခူ ဧတဒဝေါစ – ‘‘သမ္မုခါ မေတံ၊ အာဝုသော၊ ဘဂဝတော သုတံ သမ္မုခါ ပဋိဂ္ဂဟိတံ – ‘ယော၊ ဘိက္ခဝေ၊ ဒုက္ခံ ပဿတိ ဒုက္ခသမုဒယမ္ပိ သော ပဿတိ၊ ဒုက္ခနိရောဓမ္ပိ ပဿတိ၊ ဒုက္ခနိရောဓဂါမိနိံ ပဋိပဒမ္ပိ ပဿတိ၊ ယော ဒုက္ခသမုဒယံ ပဿတိ ဒုက္ခမ္ပိ သော ပဿတိ၊ ဒုက္ခနိရောဓမ္ပိ ပဿတိ၊ ဒုက္ခနိရောဓဂါမိနိံ ပဋိပဒမ္ပိ ပဿတိ၊ ယော ဒုက္ခနိရောဓံ ပဿတိ ဒုက္ခမ္ပိ သော ပဿတိ၊ ဒုက္ခသမုဒယမ္ပိ ပဿတိ၊ ဒုက္ခနိရောဓဂါမိနိံ ပဋိပဒမ္ပိ ပဿတိ၊ ယော ဒုက္ခနိရောဓဂါမိနိံ ပဋိပဒံ ပဿတိ ဒုက္ခမ္ပိ သော ပဿတိ၊ ဒုက္ခသမုဒယမ္ပိ ပဿတိ၊ ဒုက္ခနိရောဓမ္ပိ ပဿတီ’’’တိ [သံ. နိ. ၅.၁၁၀၀]! အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘အနုပုဗ္ဗာဘိသမယော’’တိ.

အနုပုဗ္ဗာဘိသမယောတိ? အာမန္တာ. နနု ဝုတ္တံ ဘဂဝတာ –

‘‘သဟာဝဿ ဒဿနသမ္ပဒါယ၊

တယဿု ဓမ္မာ ဇဟိတာ ဘဝန္တိ၊

သက္ကာယဒိဋ္ဌီ ဝိစိကိစ္ဆိတဉ္စ၊

သီလဗ္ဗတံ ဝါပိ ယဒတ္ထိ ကိဉ္စိ၊

စတူဟပါယေဟိ စ ဝိပ္ပမုတ္တော၊

ဆစ္စာဘိဌာနာနိ အဘဗ္ဗ ကာတု’’န္တိ.

အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘အနုပုဗ္ဗာဘိသမယော’’တိ.

အနုပုဗ္ဗာဘိသမယောတိ? အာမန္တာ. နနု ဝုတ္တံ ဘဂဝတာ – ‘‘ယသ္မိံ၊ ဘိက္ခဝေ၊ သမယေ အရိယသာဝကဿ ဝိရဇံ ဝီတမလံ ဓမ္မစက္ခုံ ဥဒပါဒိ – ‘ယံ ကိဉ္စိ သမုဒယဓမ္မံ သဗ္ဗံ တံ နိရောဓဓမ္မ’န္တိ၊ သဟ ဒဿနုပ္ပါဒါ၊ ဘိက္ခဝေ၊ အရိယသာဝကဿ တီဏိ သံယောဇနာနိ ပဟီယန္တိ – သက္ကာယဒိဋ္ဌိ၊ ဝိစိကိစ္ဆာ၊ သီလဗ္ဗတပရာမာသော’’တိ! အတ္ထေဝ သုတ္တန္တောတိ? အာမန္တာ. တေန ဟိ န ဝတ္တဗ္ဗံ – ‘‘အနုပုဗ္ဗာဘိသမယော’’တိ.

အနုပုဗ္ဗာဘိသမယကထာ နိဋ္ဌိတာ.