၂၀. သံဃာနုယောဂေါ

၂၀၆. န ဝတ္တဗ္ဗံ – ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ? အာမန္တာ. နနု စတ္တာရော ပုရိသယုဂါ အဋ္ဌ ပုရိသပုဂ္ဂလာ အတ္ထီတိ? အာမန္တာ. ဟဉ္စိ စတ္တာရော ပုရိသယုဂါ အဋ္ဌ ပုရိသပုဂ္ဂလာ အတ္ထိ၊ တေန ဝတ ရေ ဝတ္တဗ္ဗေ – ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ.

၂၀၇. စတ္တာရော ပုရိသယုဂါ အဋ္ဌ ပုရိသပုဂ္ဂလာ အတ္ထီတိ ကတွာ တေန စ ကာရဏေန ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာတိ? အာမန္တာ. စတ္တာရော ပုရိသယုဂါ အဋ္ဌ ပုရိသပုဂ္ဂလာ ဗုဒ္ဓပါတုဘာဝါ ပါတုဘဝန္တီတိ? အာမန္တာ. ပုဂ္ဂလော ဗုဒ္ဓပါတုဘာဝါ ပါတုဘဝတီတိ? န ဟေဝံ ဝတ္တဗ္ဗေ။ပေ။.

ပုဂ္ဂလော ဗုဒ္ဓပါတုဘာဝါ ပါတုဘဝတီတိ? အာမန္တာ. ဗုဒ္ဓဿ ဘဂဝတော ပရိနိဗ္ဗုတေ ဥစ္ဆိန္နော ပုဂ္ဂလော၊ နတ္ထိ ပုဂ္ဂလောတိ? န ဟေဝံ ဝတ္တဗ္ဗေ။ပေ။.

သံဃာနုယောဂေါ.