၁၉. ပဋိဝေဓာနုယောဂေါ

၂၀၁. န ဝတ္တဗ္ဗံ – ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ? အာမန္တာ. နနု သောတာပန္နော အတ္ထီတိ? အာမန္တာ. ဟဉ္စိ သောတာပန္နော အတ္ထိ၊ တေန ဝတ ရေ ဝတ္တဗ္ဗေ – ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ.

၂၀၂. န ဝတ္တဗ္ဗံ – ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ? အာမန္တာ. နနု သကဒါဂါမီ အတ္ထိ။ပေ။ အနာဂါမီ အတ္ထိ။ အရဟာ အတ္ထိ။ ဥဘတောဘာဂဝိမုတ္တော အတ္ထိ။ ပညာဝိမုတ္တော အတ္ထိ။ ကာယသက္ခိ [ကာယသက္ခီ (သျာ.)] အတ္ထိ။ ဒိဋ္ဌိပ္ပတ္တော အတ္ထိ။ သဒ္ဓါဝိမုတ္တော အတ္ထိ။ ဓမ္မာနုသာရီ အတ္ထိ။ သဒ္ဓါနုသာရီ အတ္ထီတိ? အာမန္တာ.

ဟဉ္စိ သဒ္ဓါနုသာရီ အတ္ထိ၊ တေန ဝတ ရေ ဝတ္တဗ္ဗေ – ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ.

၂၀၃. သောတာပန္နော အတ္ထီတိ ကတွာ တေန စ ကာရဏေန ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာတိ? အာမန္တာ. အတ္ထိ ကောစိ န သောတာပန္နော ဟုတွာ သောတာပန္နော ဟောတီတိ? အာမန္တာ. အတ္ထိ ကောစိ န ပုဂ္ဂလော ဟုတွာ ပုဂ္ဂလော ဟောတီတိ? န ဟေဝံ ဝတ္တဗ္ဗေ။ပေ။.

၂၀၄. အတ္ထိ ကောစိ န သကဒါဂါမီ ဟုတွာ။ န အနာဂါမီ ဟုတွာ။ န အရဟာ ဟုတွာ။ န ဥဘတောဘာဂဝိမုတ္တော ဟုတွာ။ န ပညာဝိမုတ္တော ဟုတွာ။ န ကာယသက္ခိ ဟုတွာ။ န ဒိဋ္ဌိပ္ပတ္တော ဟုတွာ။ န သဒ္ဓါဝိမုတ္တော ဟုတွာ။ န ဓမ္မာနုသာရီ ဟုတွာ။ န သဒ္ဓါနုသာရီ ဟုတွာ သဒ္ဓါနုသာရီ ဟောတီတိ? အာမန္တာ. အတ္ထိ ကောစိ န ပုဂ္ဂလော ဟုတွာ ပုဂ္ဂလော ဟောတီတိ? န ဟေဝံ ဝတ္တဗ္ဗေ။ပေ။.

၂၀၅. သောတာပန္နော အတ္ထီတိ ကတွာ တေန စ ကာရဏေန ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာတိ? အာမန္တာ. အတ္ထိ ကောစိ သောတာပန္နော ဟုတွာ န သောတာပန္နော ဟောတီတိ? အာမန္တာ. အတ္ထိ ကောစိ ပုဂ္ဂလော ဟုတွာ န ပုဂ္ဂလော ဟောတီတိ? န ဟေဝံ ဝတ္တဗ္ဗေ။ပေ။.

အတ္ထိ ကောစိ သကဒါဂါမီ ဟုတွာ။ အနာဂါမီ ဟုတွာ န အနာဂါမီ ဟောတီတိ? အာမန္တာ. အတ္ထိ ကောစိ ပုဂ္ဂလော ဟုတွာ န ပုဂ္ဂလော ဟောတီတိ? န ဟေဝံ ဝတ္တဗ္ဗေ။ပေ။.

ပဋိဝေဓာနုယောဂေါ.