၁၅-၁၈. ဉာတကာနုယောဂါဒိ

၁၉၇. န ဝတ္တဗ္ဗံ – ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ? အာမန္တာ. နနု မာတာ အတ္ထီတိ? အာမန္တာ. ဟဉ္စိ မာတာ အတ္ထိ၊ တေန ဝတ ရေ ဝတ္တဗ္ဗေ – ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ.

၁၉၈. န ဝတ္တဗ္ဗံ – ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ? အာမန္တာ. နနု ပိတာ အတ္ထိ။ပေ။ ဘာတာ အတ္ထိ။ ဘဂိနီ အတ္ထိ။ ခတ္တိယော အတ္ထိ ။ ဗြာဟ္မဏော အတ္ထိ။ ဝေဿော အတ္ထိ။ သုဒ္ဒေါ အတ္ထိ။ ဂဟဋ္ဌော အတ္ထိ။ ပဗ္ဗဇိတော အတ္ထိ။ ဒေဝေါ အတ္ထိ။ မနုဿော အတ္ထီတိ? အာမန္တာ. ဟဉ္စိ မနုဿော အတ္ထိ၊ တေန ဝတ ရေ ဝတ္တဗ္ဗေ – ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ.

၁၉၉. မာတာ အတ္ထီတိ ကတွာ တေန စ ကာရဏေန ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာတိ? အာမန္တာ. အတ္ထိ ကောစိ န မာတာ ဟုတွာ မာတာ ဟောတီတိ? အာမန္တာ. အတ္ထိ ကောစိ န ပုဂ္ဂလော ဟုတွာ ပုဂ္ဂလော ဟောတီတိ? န ဟေဝံ ဝတ္တဗ္ဗေ။ပေ။ အတ္ထိ ကောစိ န ပိတာ ဟုတွာ။ပေ။ န ဘာတာ ဟုတွာ။ န ဘဂိနီ ဟုတွာ။ န ခတ္တိယော ဟုတွာ။ န ဗြာဟ္မဏော ဟုတွာ။ န ဝေဿော ဟုတွာ။ န သုဒ္ဒေါ ဟုတွာ။ န ဂဟဋ္ဌော ဟုတွာ။ န ပဗ္ဗဇိတော ဟုတွာ။ န ဒေဝေါ ဟုတွာ။ န မနုဿော ဟုတွာ မနုဿော ဟောတီတိ? အာမန္တာ. အတ္ထိ ကောစိ န ပုဂ္ဂလော ဟုတွာ ပုဂ္ဂလော ဟောတီတိ? န ဟေဝံ ဝတ္တဗ္ဗေ။ပေ။.

၂၀၀. မာတာ အတ္ထီတိ ကတွာ တေန စ ကာရဏေန ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာတိ? အာမန္တာ. အတ္ထိ ကောစိ မာတာ ဟုတွာ န မာတာ ဟောတီတိ? အာမန္တာ. အတ္ထိ ကောစိ ပုဂ္ဂလော ဟုတွာ န ပုဂ္ဂလော ဟောတီတိ? န ဟေဝံ ဝတ္တဗ္ဗေ။ပေ။.

အတ္ထိ ကောစိ ပိတာ ဟုတွာ။ ဘာတာ ဟုတွာ။ ဘဂိနီ ဟုတွာ။ ခတ္တိယော ဟုတွာ။ ဗြာဟ္မဏော ဟုတွာ။ ဝေဿော ဟုတွာ။ သုဒ္ဒေါ ဟုတွာ။ ဂဟဋ္ဌော ဟုတွာ။ ပဗ္ဗဇိတော ဟုတွာ။ ဒေဝေါ ဟုတွာ။ မနုဿော ဟုတွာ န မနုဿော ဟောတီတိ? အာမန္တာ. အတ္ထိ ကောစိ ပုဂ္ဂလော ဟုတွာ န ပုဂ္ဂလော ဟောတီတိ? န ဟေဝံ ဝတ္တဗ္ဗေ။ပေ။.