၁၄. အဘိညာနုယောဂေါ

၁၉၃. န ဝတ္တဗ္ဗံ – ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ? အာမန္တာ. နနု အတ္ထိ ကောစိ ဣဒ္ဓိံ ဝိကုဗ္ဗတီတိ? အာမန္တာ. ဟဉ္စိ အတ္ထိ ကောစိ ဣဒ္ဓိံ ဝိကုဗ္ဗတိ၊ တေန ဝတ ရေ ဝတ္တဗ္ဗေ – ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ.

၁၉၄. န ဝတ္တဗ္ဗံ – ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ? အာမန္တာ. နနု အတ္ထိ ကောစိ ဒိဗ္ဗာယ သောတဓာတုယာ သဒ္ဒံ သုဏာတိ။ပေ။ ပရစိတ္တံ ဝိဇာနာတိ။ ပုဗ္ဗေနိဝါသံ အနုဿရတိ။ ဒိဗ္ဗေန စက္ခုနာ ရူပံ ပဿတိ။ အာသဝါနံ ခယံ သစ္ဆိကရောတီတိ? အာမန္တာ. ဟဉ္စိ အတ္ထိ ကောစိ အာသဝါနံ ခယံ သစ္ဆိကရောတိ၊ တေန ဝတ ရေ ဝတ္တဗ္ဗေ – ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ.

၁၉၅. အတ္ထိ ကောစိ ဣဒ္ဓိံ ဝိကုဗ္ဗတီတိ ကတွာ တေန စ ကာရဏေန ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာတိ? အာမန္တာ. ယော ဣဒ္ဓိံ ဝိကုဗ္ဗတိ၊ သွေဝ ပုဂ္ဂလော? ယော ဣဒ္ဓိံ န ဝိကုဗ္ဗတိ၊ န သော ပုဂ္ဂလောတိ? န ဟေဝံ ဝတ္တဗ္ဗေ။ပေ။.

၁၉၆. ယော ဒိဗ္ဗာယ သောတဓာတုယာ သဒ္ဒံ သုဏာတိ။ပေ။ ယော ပရစိတ္တံ ဝိဇာနာတိ။ ယော ပုဗ္ဗေနိဝါသံ အနုဿရတိ။ ယော ဒိဗ္ဗေန စက္ခုနာ ရူပံ ပဿတိ။ ယော အာသဝါနံ ခယံ သစ္ဆိကရောတိ၊ သွေဝ ပုဂ္ဂလော? ယော အာသဝါနံ ခယံ န သစ္ဆိကရောတိ၊ န သော ပုဂ္ဂလောတိ? န ဟေဝံ ဝတ္တဗ္ဗေ။ပေ။.

အဘိညာနုယောဂေါ.