၁၁. ဂတိအနုယောဂေါ

၆၉. ပုဂ္ဂလော သန္ဓာဝတိ အသ္မာ လောကာ ပရံ လောကံ၊ ပရသ္မာ လောကာ ဣမံ လောကန္တိ? အာမန္တာ. သော ပုဂ္ဂလော သန္ဓာဝတိ အသ္မာ လောကာ ပရံ လောကံ၊ ပရသ္မာ လောကာ ဣမံ လောကန္တိ? န ဟေဝံ ဝတ္တဗ္ဗေ ။ပေ။.

၇၀. ပုဂ္ဂလော သန္ဓာဝတိ အသ္မာ လောကာ ပရံ လောကံ၊ ပရသ္မာ လောကာ ဣမံ လောကန္တိ? အာမန္တာ. အညော ပုဂ္ဂလော သန္ဓာဝတိ အသ္မာ လောကာ ပရံ လောကံ၊ ပရသ္မာ လောကာ ဣမံ လောကန္တိ? န ဟေဝံ ဝတ္တဗ္ဗေ။ပေ။.

၇၁. ပုဂ္ဂလော သန္ဓာဝတိ အသ္မာ လောကာ ပရံ လောကံ၊ ပရသ္မာ လောကာ ဣမံ လောကန္တိ? အာမန္တာ. သော စ အညော စ သန္ဓာဝတိ အသ္မာ လောကာ ပရံ လောကံ၊ ပရသ္မာ လောကာ ဣမံ လောကန္တိ? န ဟေဝံ ဝတ္တဗ္ဗေ။ပေ။.

၇၂. ပုဂ္ဂလော သန္ဓာဝတိ အသ္မာ လောကာ ပရံ လောကံ၊ ပရသ္မာ လောကာ ဣမံ လောကန္တိ? အာမန္တာ. နေဝ သော သန္ဓာဝတိ၊ န အညော သန္ဓာဝတိ အသ္မာ လောကာ ပရံ လောကံ၊ ပရသ္မာ လောကာ ဣမံ လောကန္တိ? န ဟေဝံ ဝတ္တဗ္ဗေ။ပေ။.

၇၃. ပုဂ္ဂလော သန္ဓာဝတိ အသ္မာ လောကာ ပရံ လောကံ၊ ပရသ္မာ လောကာ ဣမံ လောကန္တိ? အာမန္တာ. သော ပုဂ္ဂလော သန္ဓာဝတိ၊ အညော ပုဂ္ဂလော သန္ဓာဝတိ၊ သော စ အညော စ သန္ဓာဝတိ၊ နေဝ သော သန္ဓာဝတိ န အညော သန္ဓာဝတိ အသ္မာ လောကာ ပရံ လောကံ၊ ပရသ္မာ လောကာ ဣမံ လောကန္တိ? န ဟေဝံ ဝတ္တဗ္ဗေ။ပေ။.

၇၄. န ဝတ္တဗ္ဗံ – ‘‘ပုဂ္ဂလော သန္ဓာဝတိ အသ္မာ လောကာ ပရံ လောကံ၊ ပရသ္မာ လောကာ ဣမံ လောက’’န္တိ? အာမန္တာ. နနု ဝုတ္တံ ဘဂဝတာ –

‘‘သ သတ္တက္ခတ္တုပရမံ၊ သန္ဓာဝိတွာန ပုဂ္ဂလော၊

ဒုက္ခဿန္တကရော ဟောတိ၊ သဗ္ဗသံယောဇနက္ခယာ’’တိ [သံ. နိ. ၂.၁၃၃၊ ဣတိဝု. ၂၄ ဣတိဝုတ္တကေပိ].

အတ္ထေဝ သုတ္တန္တောတိ? အာမန္တာ. တေန ဟိ ပုဂ္ဂလော သန္ဓာဝတိ အသ္မာ လောကာ ပရံ လောကံ၊ ပရသ္မာ လောကာ ဣမံ လောကန္တိ.

၇၅. န ဝတ္တဗ္ဗံ – ‘‘ပုဂ္ဂလော သန္ဓာဝတိ အသ္မာ လောကာ ပရံ လောကံ၊ ပရသ္မာ လောကာ ဣမံ လောက’’န္တိ? အာမန္တာ. နနု ဝုတ္တံ ဘဂဝတာ – ‘‘အနမတဂ္ဂေါယံ [အနမတဂ္ဂါယံ (က.)]၊ ဘိက္ခဝေ၊ သံသာရော. ပုဗ္ဗကောဋိ န ပညာယတိ၊ အဝိဇ္ဇာနီဝရဏာနံ သတ္တာနံ တဏှာသံယောဇနာနံ သန္ဓာဝတံ သံသရတ’’န္တိ [သံ. နိ. ၂.၁၂၄]! အတ္ထေဝ သုတ္တန္တောတိ? အာမန္တာ. တေန ဟိ ပုဂ္ဂလော သန္ဓာဝတိ အသ္မာ လောကာ ပရံ လောကံ၊ ပရသ္မာ လောကာ ဣမံ လောကန္တိ.

၇၆. ပုဂ္ဂလော သန္ဓာဝတိ အသ္မာ လောကာ ပရံ လောကံ၊ ပရသ္မာ လောကာ ဣမံ လောကန္တိ? အာမန္တာ. သွေဝ ပုဂ္ဂလော သန္ဓာဝတိ အသ္မာ လောကာ ပရံ လောကံ၊ ပရသ္မာ လောကာ ဣမံ လောကန္တိ? န ဟေဝံ ဝတ္တဗ္ဗေ။ပေ။.

၇၇. သွေဝ ပုဂ္ဂလော သန္ဓာဝတိ အသ္မာ လောကာ ပရံ လောကံ၊ ပရသ္မာ လောကာ ဣမံ လောကန္တိ? အာမန္တာ. အတ္ထိ ကောစိ မနုဿော ဟုတွာ ဒေဝေါ ဟောတီတိ? အာမန္တာ. သွေဝ မနုဿော သော ဒေဝေါတိ? န ဟေဝံ ဝတ္တဗ္ဗေ။ပေ။.

၇၈. သွေဝ မနုဿော သော ဒေဝေါတိ? အာမန္တာ. မနုဿော ဟုတွာ ဒေဝေါ ဟောတိ၊ ဒေဝေါ ဟုတွာ မနုဿော ဟောတိ၊ မနုဿဘူတော အညော၊ ဒေဝေါ အညော၊ မနုဿဘူတော သွေဝါယံ သန္ဓာဝတီတိ မိစ္ဆာ။ပေ။.

သစေ ဟိ သန္ဓာဝတိ သွေဝ ပုဂ္ဂလော ဣတော စုတော ပရံ လောကံ အနညော၊ ဟေဝံ မရဏံ န ဟေဟိတိ၊ ပါဏာတိပါတောပိ နုပလဗ္ဘတိ. ကမ္မံ အတ္ထိ၊ ကမ္မဝိပါကော အတ္ထိ၊ ကတာနံ ကမ္မာနံ ဝိပါကော အတ္ထိ၊ ကုသလာကုသလေ ဝိပစ္စမာနေ သွေဝါယံ သန္ဓာဝတီတိ မိစ္ဆာ.

၇၉. သွေဝ ပုဂ္ဂလော သန္ဓာဝတိ အသ္မာ လောကာ ပရံ လောကံ၊ ပရသ္မာ လောကာ ဣမံ လောကန္တိ? အာမန္တာ. အတ္ထိ ကောစိ မနုဿော ဟုတွာ ယက္ခော ဟောတိ၊ ပေတော ဟောတိ၊ နေရယိကော ဟောတိ၊ တိရစ္ဆာနဂတော ဟောတိ၊ ဩဋ္ဌော ဟောတိ၊ ဂေါဏော ဟောတိ၊ ဂဒြဘော ဟောတိ၊ သူကရော ဟောတိ၊ မဟိံသော [မဟိသော (သီ. သျာ. ကံ. ပီ.)] ဟောတီတိ? အာမန္တာ. သွေဝ မနုဿော သော မဟိံသောတိ? န ဟေဝံ ဝတ္တဗ္ဗေ။ပေ။.

၈၀. သွေဝ မနုဿော သော မဟိံသောတိ? အာမန္တာ. မနုဿော ဟုတွာ မဟိံသော ဟောတိ၊ မဟိံသော ဟုတွာ မနုဿော ဟောတိ၊ မနုဿဘူတော အညော၊ မဟိံသော အညော၊ မနုဿဘူတော သွေဝါယံ သန္ဓာဝတီတိ မိစ္ဆာ။ပေ။.

၈၁. သွေဝ ပုဂ္ဂလော သန္ဓာဝတိ အသ္မာ လောကာ ပရံ လောကံ၊ ပရသ္မာ လောကာ ဣမံ လောကန္တိ? အာမန္တာ. အတ္ထိ ကောစိ ခတ္တိယော ဟုတွာ ဗြာဟ္မဏော ဟောတီတိ? အာမန္တာ. သွေဝ ခတ္တိယော သော ဗြာဟ္မဏောတိ? န ဟေဝံ ဝတ္တဗ္ဗေ။ပေ။.

၈၂. အတ္ထိ ကောစိ ခတ္တိယော ဟုတွာ ဝေဿော ဟောတိ၊ သုဒ္ဒေါ ဟောတီတိ? အာမန္တာ. သွေဝ ခတ္တိယော သော သုဒ္ဒေါတိ? န ဟေဝံ ဝတ္တဗ္ဗေ။ပေ။.

၈၃. အတ္ထိ ကောစိ ဗြာဟ္မဏော ဟုတွာ ဝေဿော ဟောတိ၊ သုဒ္ဒေါ ဟောတိ၊ ခတ္တိယော ဟောတီတိ? အာမန္တာ. သွေဝ ဗြာဟ္မဏော သော ခတ္တိယောတိ? န ဟေဝံ ဝတ္တဗ္ဗေ။ပေ။.

၈၄. အတ္ထိ ကောစိ ဝေဿော ဟုတွာ သုဒ္ဒေါ ဟောတိ၊ ခတ္တိယော ဟောတိ၊ ဗြာဟ္မဏော ဟောတီတိ? အာမန္တာ. သွေဝ ဝေဿော သော ဗြာဟ္မဏောတိ? န ဟေဝံ ဝတ္တဗ္ဗေ။ပေ။.

၈၅. အတ္ထိ ကောစိ သုဒ္ဒေါ ဟုတွာ ခတ္တိယော ဟောတိ၊ ဗြာဟ္မဏော ဟောတိ၊ ဝေဿော ဟောတီတိ? အာမန္တာ. သွေဝ သုဒ္ဒေါ သော ဝေဿောတိ? န ဟေဝံ ဝတ္တဗ္ဗေ။ပေ။.

၈၆. သွေဝ ပုဂ္ဂလော သန္ဓာဝတိ အသ္မာ လောကာ ပရံ လောကံ၊ ပရသ္မာ လောကာ ဣမံ လောကန္တိ? အာမန္တာ. ဟတ္ထစ္ဆိန္နော ဟတ္ထစ္ဆိန္နောဝ ဟောတိ၊ ပါဒစ္ဆိန္နော ပါဒစ္ဆိန္နောဝ ဟောတိ၊ ဟတ္ထပါဒစ္ဆိန္နော ဟတ္ထပါဒစ္ဆိန္နောဝ ဟောတိ၊ ကဏ္ဏစ္ဆိန္နော။ နာသစ္ဆိန္နော။ ကဏ္ဏနာသစ္ဆိန္နော။ အင်္ဂုလိစ္ဆိန္နော။ အဠစ္ဆိန္နော။ ကဏ္ဍရစ္ဆိန္နော။ ကုဏိဟတ္ထကော။ ဖဏဟတ္ထကော။ ကုဋ္ဌိယော။ ဂဏ္ဍိယော။ ကိလာသိယော။ သောသိယော။ အပမာရိယော။ ဩဋ္ဌော။ ဂေါဏော။ ဂဒြဘော။ သူကရော။ မဟိံသော မဟိံသောဝ ဟောတီတိ? န ဟေဝံ ဝတ္တဗ္ဗေ။ပေ။.

၈၇. န ဝတ္တဗ္ဗံ – ‘‘သွေဝ ပုဂ္ဂလော သန္ဓာဝတိ အသ္မာ လောကာ ပရံ လောကံ၊ ပရသ္မာ လောကာ ဣမံ လောက’’န္တိ? အာမန္တာ. နနု သောတာပန္နော ပုဂ္ဂလော မနုဿလောကာ စုတော ဒေဝလောကံ ဥပပန္နော တတ္ထပိ သောတာပန္နောဝ ဟောတီတိ? အာမန္တာ.

ဟဉ္စိ သောတာပန္နော ပုဂ္ဂလော မနုဿလောကာ စုတော ဒေဝလောကံ ဥပပန္နော တတ္ထပိ သောတာပန္နောဝ ဟောတိ၊ တေန ဝတ ရေ ဝတ္တဗ္ဗေ – ‘‘သွေဝ ပုဂ္ဂလော သန္ဓာဝတိ အသ္မာ လောကာ ပရံ လောကံ၊ ပရသ္မာ လောကာ ဣမံ လောက’’န္တိ.

၈၈. သောတာပန္နော ပုဂ္ဂလော မနုဿလောကာ စုတော ဒေဝလောကံ ဥပပန္နော တတ္ထပိ သောတာပန္နောဝ ဟောတီတိ ကတွာ တေန စ ကာရဏေန သွေဝ ပုဂ္ဂလော သန္ဓာဝတိ အသ္မာ လောကာ ပရံ လောကံ၊ ပရသ္မာ လောကာ ဣမံ လောကန္တိ? အာမန္တာ. သောတာပန္နော ပုဂ္ဂလော မနုဿလောကာ စုတော ဒေဝလောကံ ဥပပန္နော တတ္ထပိ မနုဿော ဟောတီတိ ကတွာ? န ဟေဝံ ဝတ္တဗ္ဗေ။ပေ။.

၈၉. သွေဝ ပုဂ္ဂလော သန္ဓာဝတိ အသ္မာ လောကာ ပရံ လောကံ၊ ပရသ္မာ လောကာ ဣမံ လောကန္တိ? အာမန္တာ. အနညော အဝိဂတော သန္ဓာဝတီတိ? န ဟေဝံ ဝတ္တဗ္ဗေ။ပေ။.

၉၀. အနညော အဝိဂတော သန္ဓာဝတီတိ? အာမန္တာ. ဟတ္ထစ္ဆိန္နော ဟတ္ထစ္ဆိန္နောဝ ဟောတိ၊ ပါဒစ္ဆိန္နော ပါဒစ္ဆိန္နောဝ ဟောတိ၊ ဟတ္ထပါဒစ္ဆိန္နော ဟတ္ထပါဒစ္ဆိန္နောဝ ဟောတိ၊ ကဏ္ဏစ္ဆိန္နော။ နာသစ္ဆိန္နော။ ကဏ္ဏနာသစ္ဆိန္နော။ အင်္ဂုလိစ္ဆိန္နော။ အဠစ္ဆိန္နော။ ကဏ္ဍရစ္ဆိန္နော။ ကုဏိဟတ္ထကော။ ဖဏဟတ္ထကော။ ကုဋ္ဌိယော။ ဂဏ္ဍိယော။ ကိလာသိယော။ သောသိယော။ အပမာရိယော။ ဩဋ္ဌော။ ဂေါဏော။ ဂဒြဘော။ သူကရော။ မဟိံသော မဟိံသောဝ ဟောတီတိ? န ဟေဝံ ဝတ္တဗ္ဗေ။ပေ။.

၉၁. သွေဝ ပုဂ္ဂလော သန္ဓာဝတိ အသ္မာ လောကာ ပရံ လောကံ၊ ပရသ္မာ လောကာ ဣမံ လောကန္တိ? အာမန္တာ. သရူပေါ သန္ဓာဝတီတိ? န ဟေဝံ ဝတ္တဗ္ဗေ။ပေ။ သရူပေါ သန္ဓာဝတီတိ? အာမန္တာ. တံ ဇီဝံ တံ သရီရန္တိ? န ဟေဝံ ဝတ္တဗ္ဗေ။ပေ။.

သဝေဒနော။ပေ။ သသညော။ပေ။ သသင်္ခါရော။ပေ။ သဝိညာဏော သန္ဓာဝတီတိ? န ဟေဝံ ဝတ္တဗ္ဗေ။ပေ။ သဝိညာဏော သန္ဓာဝတီတိ? အာမန္တာ. တံ ဇီဝံ တံ သရီရန္တိ? န ဟေဝံ ဝတ္တဗ္ဗေ။ပေ။.

၉၂. သွေဝ ပုဂ္ဂလော သန္ဓာဝတိ အသ္မာ လောကာ ပရံ လောကံ၊ ပရသ္မာ လောကာ ဣမံ လောကန္တိ? အာမန္တာ. အရူပေါ သန္ဓာဝတီတိ? န ဟေဝံ ဝတ္တဗ္ဗေ။ပေ။ အရူပေါ သန္ဓာဝတီတိ? အာမန္တာ. အညံ ဇီဝံ အညံ သရီရန္တိ? န ဟေဝံ ဝတ္တဗ္ဗေ။ပေ။.

အဝေဒနော။ပေ။ အသညော။ပေ။ အသင်္ခါရော။ပေ။ အဝိညာဏော သန္ဓာဝတီတိ? န ဟေဝံ ဝတ္တဗ္ဗေ။ပေ။ အဝိညာဏော သန္ဓာဝတီတိ? အာမန္တာ. အညံ ဇီဝံ အညံ သရီရန္တိ? န ဟေဝံ ဝတ္တဗ္ဗေ။ပေ။.

၉၃. သွေဝ ပုဂ္ဂလော သန္ဓာဝတိ အသ္မာ လောကာ ပရံ လောကံ၊ ပရသ္မာ လောကာ ဣမံ လောကန္တိ? အာမန္တာ. ရူပံ သန္ဓာဝတီတိ? န ဟေဝံ ဝတ္တဗ္ဗေ။ပေ။ ရူပံ သန္ဓာဝတီတိ? အာမန္တာ. တံ ဇီဝံ တံ သရီရန္တိ? န ဟေဝံ ဝတ္တဗ္ဗေ။ပေ။.

ဝေဒနာ ။ပေ။ သညာ။ပေ။ သင်္ခါရာ။ပေ။ ဝိညာဏံ သန္ဓာဝတီတိ? န ဟေဝံ ဝတ္တဗ္ဗေ။ပေ။ ဝိညာဏံ သန္ဓာဝတီတိ? အာမန္တာ. တံ ဇီဝံ တံ သရီရန္တိ? န ဟေဝံ ဝတ္တဗ္ဗေ။ပေ။.

၉၄. သွေဝ ပုဂ္ဂလော သန္ဓာဝတိ အသ္မာ လောကာ ပရံ လောကံ၊ ပရသ္မာ လောကာ ဣမံ လောကန္တိ? အာမန္တာ. ရူပံ န သန္ဓာဝတီတိ? န ဟေဝံ ဝတ္တဗ္ဗေ။ပေ။ ရူပံ န သန္ဓာဝတီတိ? အာမန္တာ. အညံ ဇီဝံ အညံ သရီရန္တိ? န ဟေဝံ ဝတ္တဗ္ဗေ။ပေ။.

ဝေဒနာ ။ပေ။ သညာ။ပေ။ သင်္ခါရာ။ပေ။ ဝိညာဏံ န သန္ဓာဝတီတိ? န ဟေဝံ ဝတ္တဗ္ဗေ။ပေ။ ဝိညာဏံ န သန္ဓာဝတီတိ? အာမန္တာ. အညံ ဇီဝံ အညံ သရီရန္တိ? န ဟေဝံ ဝတ္တဗ္ဗေ. (သံခိတ္တံ).

ခန္ဓေသု ဘိဇ္ဇမာနေသု၊ သော စေ ဘိဇ္ဇတိ ပုဂ္ဂလော၊

ဥစ္ဆေဒါ ဘဝတိ ဒိဋ္ဌိ၊ ယာ ဗုဒ္ဓေန ဝိဝဇ္ဇိတာ.

ခန္ဓေသု ဘိဇ္ဇမာနေသု၊ နော စေ ဘိဇ္ဇတိ ပုဂ္ဂလော၊

ပုဂ္ဂလော သဿတော ဟောတိ၊ နိဗ္ဗာနေန သမသမောတိ.

ဂတိအနုယောဂေါ.