၁၂. ဥပါဒါပညတ္တာနုယောဂေါ

၉၅. ရူပံ ဥပါဒါယ ပုဂ္ဂလဿ ပညတ္တီတိ? အာမန္တာ. ရူပံ အနိစ္စံ သင်္ခတံ ပဋိစ္စသမုပ္ပန္နံ ခယဓမ္မံ ဝယဓမ္မံ ဝိရာဂဓမ္မံ နိရောဓဓမ္မံ ဝိပရိဏာမဓမ္မန္တိ? အာမန္တာ? ပုဂ္ဂလောပိ အနိစ္စော သင်္ခတော ပဋိစ္စသမုပ္ပန္နော ခယဓမ္မော ဝယဓမ္မော ဝိရာဂဓမ္မော နိရောဓဓမ္မော ဝိပရိဏာမဓမ္မောတိ? န ဟေဝံ ဝတ္တဗ္ဗေ။ပေ။.

၉၆. ဝေဒနံ ဥပါဒါယ။ သညံ ဥပါဒါယ။ သင်္ခါရေ ဥပါဒါယ။ ဝိညာဏံ ဥပါဒါယ ပုဂ္ဂလဿ ပညတ္တီတိ? အာမန္တာ. ဝိညာဏံ အနိစ္စံ သင်္ခတံ ပဋိစ္စသမုပ္ပန္နံ ခယဓမ္မံ ဝယဓမ္မံ ဝိရာဂဓမ္မံ နိရောဓဓမ္မံ ဝိပရိဏာမဓမ္မန္တိ? အာမန္တာ. ပုဂ္ဂလောပိ အနိစ္စော သင်္ခတော ပဋိစ္စသမုပ္ပန္နော ခယဓမ္မော ဝယဓမ္မော ဝိရာဂဓမ္မော နိရောဓဓမ္မော ဝိပရိဏာမဓမ္မောတိ? န ဟေဝံ ဝတ္တဗ္ဗေ။ပေ။.

၉၇. ရူပံ ဥပါဒါယ ပုဂ္ဂလဿ ပညတ္တီတိ? အာမန္တာ. နီလံ ရူပံ ဥပါဒါယ နီလကဿ ပုဂ္ဂလဿ ပညတ္တီတိ? န ဟေဝံ ဝတ္တဗ္ဗေ။ပေ။ ပီတံ ရူပံ ဥပါဒါယ။ လောဟိတံ ရူပံ ဥပါဒါယ။ ဩဒါတံ ရူပံ ဥပါဒါယ။ သနိဒဿနံ ရူပံ ဥပါဒါယ။ အနိဒဿနံ ရူပံ ဥပါဒါယ။ သပ္ပဋိဃံ ရူပံ ဥပါဒါယ။ အပ္ပဋိဃံ ရူပံ ဥပါဒါယ အပ္ပဋိဃဿ ပုဂ္ဂလဿ ပညတ္တီတိ? န ဟေဝံ ဝတ္တဗ္ဗေ။ပေ။.

၉၈. ဝေဒနံ ဥပါဒါယ ပုဂ္ဂလဿ ပညတ္တီတိ? အာမန္တာ. ကုသလံ ဝေဒနံ ဥပါဒါယ ကုသလဿ ပုဂ္ဂလဿ ပညတ္တီတိ? န ဟေဝံ ဝတ္တဗ္ဗေ။ပေ။ ကုသလံ ဝေဒနံ ဥပါဒါယ ကုသလဿ ပုဂ္ဂလဿ ပညတ္တီတိ? အာမန္တာ. ကုသလာ ဝေဒနာ သဖလာ သဝိပါကာ ဣဋ္ဌဖလာ ကန္တဖလာ မနုညဖလာ အသေစနကဖလာ သုခုဒြယာ သုခဝိပါကာတိ? အာမန္တာ. ကုသလောပိ ပုဂ္ဂလော သဖလော သဝိပါကော ဣဋ္ဌဖလော ကန္တဖလော မနုညဖလော အသေစနကဖလော သုခုဒြယော သုခဝိပါကောတိ? န ဟေဝံ ဝတ္တဗ္ဗေ။ပေ။.

၉၉. ဝေဒနံ ဥပါဒါယ ပုဂ္ဂလဿ ပညတ္တီတိ? အာမန္တာ. အကုသလံ ဝေဒနံ ဥပါဒါယ အကုသလဿ ပုဂ္ဂလဿ ပညတ္တီတိ? န ဟေဝံ ဝတ္တဗ္ဗေ။ပေ။ အကုသလံ ဝေဒနံ ဥပါဒါယ အကုသလဿ ပုဂ္ဂလဿ ပညတ္တီတိ? အာမန္တာ. အကုသလာ ဝေဒနာ သဖလာ သဝိပါကာ အနိဋ္ဌဖလာ အကန္တဖလာ အမနုညဖလာ သေစနကဖလာ ဒုက္ခုဒြယာ ဒုက္ခဝိပါကာတိ? အာမန္တာ. အကုသလောပိ ပုဂ္ဂလော သဖလော သဝိပါကော အနိဋ္ဌဖလော အကန္တဖလော အမနုညဖလော သေစနကဖလော ဒုက္ခုဒြယော ဒုက္ခဝိပါကောတိ? န ဟေဝံ ဝတ္တဗ္ဗေ။ပေ။.

၁၀၀. ဝေဒနံ ဥပါဒါယ ပုဂ္ဂလဿ ပညတ္တီတိ? အာမန္တာ. အဗျာကတံ ဝေဒနံ ဥပါဒါယ အဗျာကတဿ ပုဂ္ဂလဿ ပညတ္တီတိ? န ဟေဝံ ဝတ္တဗ္ဗေ။ပေ။ အဗျာကတံ ဝေဒနံ ဥပါဒါယ အဗျာကတဿ ပုဂ္ဂလဿ ပညတ္တီတိ? အာမန္တာ. အဗျာကတာ ဝေဒနာ အနိစ္စာ သင်္ခတာ ပဋိစ္စသမုပ္ပန္နာ ခယဓမ္မာ ဝယဓမ္မာ ဝိရာဂဓမ္မာ နိရောဓဓမ္မာ ဝိပရိဏာမဓမ္မာတိ? အာမန္တာ. အဗျာကတောပိ ပုဂ္ဂလော အနိစ္စော သင်္ခတော ပဋိစ္စသမုပ္ပန္နော ခယဓမ္မော ဝယဓမ္မော ဝိရာဂဓမ္မော နိရောဓဓမ္မော ဝိပရိဏာမဓမ္မောတိ? န ဟေဝံ ဝတ္တဗ္ဗေ။ပေ။.

၁၀၁. သညံ ဥပါဒါယ။ သင်္ခါရေ ဥပါဒါယ။ ဝိညာဏံ ဥပါဒါယ ပုဂ္ဂလဿ ပညတ္တီတိ? အာမန္တာ. ကုသလံ ဝိညာဏံ ဥပါဒါယ ကုသလဿ ပုဂ္ဂလဿ ပညတ္တီတိ? န ဟေဝံ ဝတ္တဗ္ဗေ။ပေ။ ကုသလံ ဝိညာဏံ ဥပါဒါယ ကုသလဿ ပုဂ္ဂလဿ ပညတ္တီတိ? အာမန္တာ. ကုသလံ ဝိညာဏံ သဖလံ သဝိပါကံ ဣဋ္ဌဖလံ ကန္တဖလံ မနုညဖလံ အသေစနကဖလံ သုခုဒြယံ သုခဝိပါကန္တိ? အာမန္တာ. ကုသလောပိ ပုဂ္ဂလော သဖလော သဝိပါကော ဣဋ္ဌဖလော ကန္တဖလော မနုညဖလော အသေစနကဖလော သုခုဒြယော သုခဝိပါကောတိ? န ဟေဝံ ဝတ္တဗ္ဗေ။ပေ။.

၁၀၂. ဝိညာဏံ ဥပါဒါယ ပုဂ္ဂလဿ ပညတ္တီတိ? အာမန္တာ. အကုသလံ ဝိညာဏံ ဥပါဒါယ အကုသလဿ ပုဂ္ဂလဿ ပညတ္တီတိ? န ဟေဝံ ဝတ္တဗ္ဗေ။ပေ။ အကုသလံ ဝိညာဏံ ဥပါဒါယ အကုသလဿ ပုဂ္ဂလဿ ပညတ္တီတိ? အာမန္တာ. အကုသလံ ဝိညာဏံ သဖလံ သဝိပါကံ အနိဋ္ဌဖလံ အကန္တဖလံ အမနုညဖလံ သေစနကဖလံ ဒုက္ခုဒြယံ ဒုက္ခဝိပါကန္တိ? အာမန္တာ. အကုသလောပိ ပုဂ္ဂလော သဖလော သဝိပါကော အနိဋ္ဌဖလော အကန္တဖလော အမနုညဖလော သေစနကဖလော ဒုက္ခုဒြယော ဒုက္ခဝိပါကောတိ? န ဟေဝံ ဝတ္တဗ္ဗေ။ပေ။.

၁၀၃. ဝိညာဏံ ဥပါဒါယ ပုဂ္ဂလဿ ပညတ္တီတိ? အာမန္တာ. အဗျာကတံ ဝိညာဏံ ဥပါဒါယ အဗျာကတဿ ပုဂ္ဂလဿ ပညတ္တီတိ? န ဟေဝံ ဝတ္တဗ္ဗေ။ပေ။ အဗျာကတံ ဝိညာဏံ ဥပါဒါယ အဗျာကတဿ ပုဂ္ဂလဿ ပညတ္တီတိ? အာမန္တာ. အဗျာကတံ ဝိညာဏံ အနိစ္စံ သင်္ခတံ ပဋိစ္စသမုပ္ပန္နံ ခယဓမ္မံ ဝယဓမ္မံ ဝိရာဂဓမ္မံ နိရောဓဓမ္မံ ဝိပရိဏာမဓမ္မန္တိ? အာမန္တာ. အဗျာကတောပိ ပုဂ္ဂလော အနိစ္စော သင်္ခတော ပဋိစ္စသမုပ္ပန္နော ခယဓမ္မော ဝယဓမ္မော ဝိရာဂဓမ္မော နိရောဓဓမ္မော ဝိပရိဏာမဓမ္မောတိ? န ဟေဝံ ဝတ္တဗ္ဗေ။ပေ။.

၁၀၄. စက္ခုံ ဥပါဒါယ ‘‘စက္ခုမာ ပုဂ္ဂလော’’တိ ဝတ္တဗ္ဗောတိ? အာမန္တာ. စက္ခုမှိ နိရုဒ္ဓေ ‘‘စက္ခုမာ ပုဂ္ဂလော နိရုဒ္ဓေါ’’တိ ဝတ္တဗ္ဗောတိ? န ဟေဝံ ဝတ္တဗ္ဗေ။ပေ။ သောတံ ဥပါဒါယ။ ဃာနံ ဥပါဒါယ။ ဇိဝှံ ဥပါဒါယ။ ကာယံ ဥပါဒါယ။ မနံ ဥပါဒါယ ‘‘မနဝါ ပုဂ္ဂလော’’တိ ဝတ္တဗ္ဗောတိ? အာမန္တာ. မနမှိ နိရုဒ္ဓေ ‘‘မနဝါ ပုဂ္ဂလော နိရုဒ္ဓေါ’’တိ ဝတ္တဗ္ဗောတိ? န ဟေဝံ ဝတ္တဗ္ဗေ.

၁၀၅. မိစ္ဆာဒိဋ္ဌိံ ဥပါဒါယ ‘‘မိစ္ဆာဒိဋ္ဌိယော ပုဂ္ဂလော’’တိ ဝတ္တဗ္ဗောတိ? အာမန္တာ. မိစ္ဆာဒိဋ္ဌိယာ နိရုဒ္ဓါယ ‘‘မိစ္ဆာဒိဋ္ဌိယော ပုဂ္ဂလော နိရုဒ္ဓေါ’’တိ ဝတ္တဗ္ဗောတိ? န ဟေဝံ ဝတ္တဗ္ဗေ. မိစ္ဆာသင်္ကပ္ပံ ဥပါဒါယ။ မိစ္ဆာဝါစံ ဥပါဒါယ။ မိစ္ဆာကမ္မန္တံ ဥပါဒါယ။ မိစ္ဆာအာဇီဝံ ဥပါဒါယ ။ မိစ္ဆာဝါယာမံ ဥပါဒါယ။ မိစ္ဆာသတိံ ဥပါဒါယ။ မိစ္ဆာသမာဓိံ ဥပါဒါယ ‘‘မိစ္ဆာသမာဓိယော ပုဂ္ဂလော’’တိ ဝတ္တဗ္ဗောတိ? အာမန္တာ. မိစ္ဆာသမာဓိမှိ နိရုဒ္ဓေ ‘‘မိစ္ဆာသမာဓိယော ပုဂ္ဂလော နိရုဒ္ဓေါ’’တိ ဝတ္တဗ္ဗောတိ? န ဟေဝံ ဝတ္တဗ္ဗေ.

၁၀၆. သမ္မာဒိဋ္ဌိံ ဥပါဒါယ ‘‘သမ္မာဒိဋ္ဌိယော ပုဂ္ဂလော’’တိ ဝတ္တဗ္ဗောတိ? အာမန္တာ. သမ္မာဒိဋ္ဌိယာ နိရုဒ္ဓါယ ‘‘သမ္မာဒိဋ္ဌိယော ပုဂ္ဂလော နိရုဒ္ဓေါ’’တိ ဝတ္တဗ္ဗောတိ? န ဟေဝံ ဝတ္တဗ္ဗေ။ပေ။ သမ္မာသင်္ကပ္ပံ ဥပါဒါယ။ သမ္မာဝါစံ ဥပါဒါယ။ သမ္မာကမ္မန္တံ ဥပါဒါယ။ သမ္မာအာဇီဝံ ဥပါဒါယ။ သမ္မာဝါယာမံ ဥပါဒါယ။ သမ္မာသတိံ ဥပါဒါယ။ သမ္မာသမာဓိံ ဥပါဒါယ ‘‘သမ္မာသမာဓိယော ပုဂ္ဂလော’’တိ ဝတ္တဗ္ဗောတိ? အာမန္တာ. သမ္မာသမာဓိမှိ နိရုဒ္ဓေ ‘‘သမ္မာသမာဓိယော ပုဂ္ဂလော နိရုဒ္ဓေါ’’တိ ဝတ္တဗ္ဗောတိ? န ဟေဝံ ဝတ္တဗ္ဗေ။ပေ။.

၁၀၇. ရူပံ ဥပါဒါယ၊ ဝေဒနံ ဥပါဒါယ ပုဂ္ဂလဿ ပညတ္တီတိ? အာမန္တာ. ဒွိန္နံ ခန္ဓာနံ ဥပါဒါယ ဒွိန္နံ ပုဂ္ဂလာနံ ပညတ္တီတိ? န ဟေဝံ ဝတ္တဗ္ဗေ။ပေ။ ရူပံ ဥပါဒါယ၊ ဝေဒနံ ဥပါဒါယ၊ သညံ ဥပါဒါယ၊ သင်္ခါရေ ဥပါဒါယ၊ ဝိညာဏံ ဥပါဒါယ ပုဂ္ဂလဿ ပညတ္တီတိ? အာမန္တာ. ပဉ္စန္နံ ခန္ဓာနံ ဥပါဒါယ ပဉ္စန္နံ ပုဂ္ဂလာနံ ပညတ္တီတိ? န ဟေဝံ ဝတ္တဗ္ဗေ။ပေ။.

၁၀၈. စက္ခာယတနံ ဥပါဒါယ၊ သောတာယတနံ ဥပါဒါယ ပုဂ္ဂလဿ ပညတ္တီတိ? အာမန္တာ. ဒွိန္နံ အာယတနာနံ ဥပါဒါယ ဒွိန္နံ ပုဂ္ဂလာနံ ပညတ္တီတိ? န ဟေဝံ ဝတ္တဗ္ဗေ။ပေ။ စက္ခာယတနံ ဥပါဒါယ၊ သောတာယတနံ ဥပါဒါယ။ပေ။ ဓမ္မာယတနံ ဥပါဒါယ ပုဂ္ဂလဿ ပညတ္တီတိ? အာမန္တာ. ဒွါဒသန္နံ အာယတနာနံ ဥပါဒါယ ဒွါဒသန္နံ ပုဂ္ဂလာနံ ပညတ္တီတိ? န ဟေဝံ ဝတ္တဗ္ဗေ။ပေ။.

၁၀၉. စက္ခုဓာတုံ ဥပါဒါယ၊ သောတဓာတုံ ဥပါဒါယ ပုဂ္ဂလဿ ပညတ္တီတိ? အာမန္တာ. ဒွိန္နံ ဓာတူနံ ဥပါဒါယ ဒွိန္နံ ပုဂ္ဂလာနံ ပညတ္တီတိ? န ဟေဝံ ဝတ္တဗ္ဗေ။ပေ။ စက္ခုဓာတုံ ဥပါဒါယ၊ သောတဓာတုံ ဥပါဒါယ။ပေ။ ဓမ္မဓာတုံ ဥပါဒါယ ပုဂ္ဂလဿ ပညတ္တီတိ? အာမန္တာ. အဋ္ဌာရသန္နံ ဓာတူနံ ဥပါဒါယ အဋ္ဌာရသန္နံ ပုဂ္ဂလာနံ ပညတ္တီတိ? န ဟေဝံ ဝတ္တဗ္ဗေ။ပေ။.

၁၁၀. စက္ခုန္ဒြိယံ ဥပါဒါယ၊ သောတိန္ဒြိယံ ဥပါဒါယ ပုဂ္ဂလဿ ပညတ္တီတိ? အာမန္တာ. ဒွိန္နံ ဣန္ဒြိယာနံ ဥပါဒါယ ဒွိန္နံ ပုဂ္ဂလာနံ ပညတ္တီတိ? န ဟေဝံ ဝတ္တဗ္ဗေ။ပေ။ စက္ခုန္ဒြိယံ ဥပါဒါယ၊ သောတိန္ဒြိယံ ဥပါဒါယ။ပေ။ အညာတာဝိန္ဒြိယံ ဥပါဒါယ ပုဂ္ဂလဿ ပညတ္တီတိ? အာမန္တာ. ဗာဝီသတီနံ [ဗာဝီသတိယာ (?)] ဣန္ဒြိယာနံ ဥပါဒါယ ဗာဝီသတီနံ ပုဂ္ဂလာနံ ပညတ္တီတိ? န ဟေဝံ ဝတ္တဗ္ဗေ။ပေ။.

၁၁၁. ဧကဝေါကာရဘဝံ ဥပါဒါယ ဧကဿ ပုဂ္ဂလဿ ပညတ္တီတိ? အာမန္တာ. စတုဝေါကာရဘဝံ ဥပါဒါယ စတုန္နံ ပုဂ္ဂလာနံ ပညတ္တီတိ? န ဟေဝံ ဝတ္တဗ္ဗေ။ပေ။ ဧကဝေါကာရဘဝံ ဥပါဒါယ ဧကဿ ပုဂ္ဂလဿ ပညတ္တီတိ? အာမန္တာ. ပဉ္စဝေါကာရဘဝံ ဥပါဒါယ ပဉ္စန္နံ ပုဂ္ဂလာနံ ပညတ္တီတိ? န ဟေဝံ ဝတ္တဗ္ဗေ။ပေ။ ဧကဝေါကာရဘဝေ ဧကောဝ ပုဂ္ဂလောတိ? အာမန္တာ. စတုဝေါကာရဘဝေ စတ္တာရောဝ [စတ္တာရော (?)] ပုဂ္ဂလာတိ? န ဟေဝံ ဝတ္တဗ္ဗေ။ပေ။ ဧကဝေါကာရဘဝေ ဧကောဝ ပုဂ္ဂလောတိ? အာမန္တာ. ပဉ္စဝေါကာရဘဝေ ပဉ္စေဝ ပုဂ္ဂလာတိ? န ဟေဝံ ဝတ္တဗ္ဗေ။ပေ။.

၁၁၂. ယထာ ရုက္ခံ ဥပါဒါယ ဆာယာယ ပညတ္တိ၊ ဧဝမေဝံ ရူပံ ဥပါဒါယ ပုဂ္ဂလဿ ပညတ္တီတိ? ( ) [(အာမန္တာ) (?) ဧဝံ အနန္တရဝါရတ္တယေပိ] ယထာ ရုက္ခံ ဥပါဒါယ ဆာယာယ ပညတ္တိ၊ ရုက္ခောပိ အနိစ္စော ဆာယာပိ အနိစ္စာ၊ ဧဝမေဝံ ရူပံ ဥပါဒါယ ပုဂ္ဂလဿ ပညတ္တိ၊ ရူပမ္ပိ အနိစ္စံ ပုဂ္ဂလောပိ အနိစ္စောတိ? န ဟေဝံ ဝတ္တဗ္ဗေ။ပေ။ ယထာ ရုက္ခံ ဥပါဒါယ ဆာယာယ ပညတ္တိ၊ အညော ရုက္ခော အညာ ဆာယာ၊ ဧဝမေဝံ ရူပံ ဥပါဒါယ ပုဂ္ဂလဿ ပညတ္တိ၊ အညံ ရူပံ အညော ပုဂ္ဂလောတိ? န ဟေဝံ ဝတ္တဗ္ဗေ။ပေ။.

၁၁၃. ယထာ ဂါမံ ဥပါဒါယ ဂါမိကဿ ပညတ္တိ၊ ဧဝမေဝံ ရူပံ ဥပါဒါယ ပုဂ္ဂလဿ ပညတ္တီတိ? ယထာ ဂါမံ ဥပါဒါယ ဂါမိကဿ ပညတ္တိ၊ အညော ဂါမော အညော ဂါမိကော၊ ဧဝမေဝံ ရူပံ ဥပါဒါယ ပုဂ္ဂလဿ ပညတ္တိ၊ အညံ ရူပံ အညော ပုဂ္ဂလောတိ? န ဟေဝံ ဝတ္တဗ္ဗေ။ပေ။.

၁၁၄. ယထာ ရဋ္ဌံ ဥပါဒါယ ရညော ပညတ္တိ၊ ဧဝမေဝံ ရူပံ ဥပါဒါယ ပုဂ္ဂလဿ ပညတ္တီတိ? ယထာ ရဋ္ဌံ ဥပါဒါယ ရညော ပညတ္တိ၊ အညံ ရဋ္ဌံ အညော ရာဇာ၊ ဧဝမေဝံ ရူပံ ဥပါဒါယ ပုဂ္ဂလဿ ပညတ္တိ၊ အညံ ရူပံ အညော ပုဂ္ဂလောတိ? န ဟေဝံ ဝတ္တဗ္ဗေ။ပေ။.

၁၁၅. ယထာ န နိဂဠော နေဂဠိကော၊ ယဿ နိဂဠော သော နေဂဠိကော၊ ဧဝမေဝံ န ရူပံ ရူပဝါ၊ ယဿ ရူပံ သော ရူပဝါတိ? ယထာ န နိဂဠော နေဂဠိကော၊ ယဿ နိဂဠော သော နေဂဠိကော၊ အညော နိဂဠော အညော နေဂဠိကော၊ ဧဝမေဝံ န ရူပံ ရူပဝါ၊ ယဿ ရူပံ သော ရူပဝါ၊ အညံ ရူပံ အညော ရူပဝါတိ? န ဟေဝံ ဝတ္တဗ္ဗေ။ပေ။.

၁၁၆. စိတ္တေ စိတ္တေ ပုဂ္ဂလဿ ပညတ္တီတိ? အာမန္တာ. စိတ္တေ စိတ္တေ ပုဂ္ဂလော ဇာယတိ ဇီယတိ မီယတိ စဝတိ ဥပပဇ္ဇတီတိ? န ဟေဝံ ဝတ္တဗ္ဗေ။ပေ။ ဒုတိယေ စိတ္တေ ဥပ္ပန္နေ န ဝတ္တဗ္ဗံ သောတိ ဝါ အညောတိ ဝါတိ? အာမန္တာ. ဒုတိယေ စိတ္တေ ဥပ္ပန္နေ န ဝတ္တဗ္ဗံ ကုမာရကောတိ ဝါ ကုမာရိကာတိ ဝါတိ? ဝတ္တဗ္ဗံ.

အာဇာနာဟိ နိဂ္ဂဟံ. ဟဉ္စိ ဒုတိယေ စိတ္တေ ဥပ္ပန္နေ န ဝတ္တဗ္ဗံ – ‘‘သောတိ ဝါ အညောတိ ဝါ၊’’ တေန ဝတ ရေ ဝတ္တဗ္ဗေ – ‘‘ဒုတိယေ စိတ္တေ ဥပ္ပန္နေ န ဝတ္တဗ္ဗံ – ‘ကုမာရကောတိ ဝါ ကုမာရိကာတိ ဝါ’’’တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ဒုတိယေ စိတ္တေ ဥပ္ပန္နေ န ဝတ္တဗ္ဗံ – သောတိ ဝါ အညောတိ ဝါ၊ ဒုတိယေ စိတ္တေ ဥပ္ပန္နေ ဝတ္တဗ္ဗံ – ကုမာရကောတိ ဝါ ကုမာရိကာတိ ဝါ’’’တိ မိစ္ဆာ.

ဟဉ္စိ ဝါ ပန ဒုတိယေ စိတ္တေ ဥပ္ပန္နေ ဝတ္တဗ္ဗံ – ‘‘ကုမာရကောတိ ဝါ ကုမာရိကာ’’တိ ဝါ၊ တေန ဝတ ရေ ဝတ္တဗ္ဗေ – ‘‘ဒုတိယေ စိတ္တေ ဥပ္ပန္နေ ဝတ္တဗ္ဗံ – ‘သောတိ ဝါ အညောတိ ဝါ’’’တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ဒုတိယေ စိတ္တေ ဥပ္ပန္နေ န ဝတ္တဗ္ဗံ – သောတိ ဝါ အညောတိ ဝါ၊ ဒုတိယေ စိတ္တေ ဥပ္ပန္နေ ဝတ္တဗ္ဗံ – ကုမာရကောတိ ဝါ ကုမာရိကာတိ ဝါ’’’တိ မိစ္ဆာ.

၁၁၇. ဒုတိယေ စိတ္တေ ဥပ္ပန္နေ န ဝတ္တဗ္ဗံ – ‘‘သောတိ ဝါ အညောတိ ဝါ’’တိ? အာမန္တာ. ဒုတိယေ စိတ္တေ ဥပ္ပန္နေ န ဝတ္တဗ္ဗံ – ‘‘ဣတ္ထီတိ ဝါ ပုရိသောတိ ဝါ ဂဟဋ္ဌောတိ ဝါ ပဗ္ဗဇိတောတိ ဝါ ဒေဝေါတိ ဝါ မနုဿောတိ ဝါ’’တိ? ဝတ္တဗ္ဗံ.

အာဇာနာဟိ နိဂ္ဂဟံ. ဟဉ္စိ ဒုတိယေ စိတ္တေ ဥပ္ပန္နေ န ဝတ္တဗ္ဗံ – ‘‘သောတိ ဝါ အညောတိ ဝါ၊’’ တေန ဝတ ရေ ဝတ္တဗ္ဗေ – ‘‘ဒုတိယေ စိတ္တေ ဥပ္ပန္နေ န ဝတ္တဗ္ဗံ – ‘ဒေဝေါတိ ဝါ မနုဿောတိ ဝါ’’’တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ဒုတိယေ စိတ္တေ ဥပ္ပန္နေ န ဝတ္တဗ္ဗံ – သောတိ ဝါ အညောတိ ဝါ၊ ဒုတိယေ စိတ္တေ ဥပ္ပန္နေ ဝတ္တဗ္ဗံ – ဒေဝေါတိ ဝါ မနုဿောတိ ဝါ’’’တိ မိစ္ဆာ.

ဟဉ္စိ ဝါ ပန ဒုတိယေ စိတ္တေ ဥပ္ပန္နေ ဝတ္တဗ္ဗံ – ‘‘ဒေဝေါတိ ဝါ မနုဿောတိ ဝါ၊’’ တေန ဝတ ရေ ဝတ္တဗ္ဗေ – ‘‘ဒုတိယေ စိတ္တေ ဥပ္ပန္နေ ဝတ္တဗ္ဗံ – ‘သောတိ ဝါ အညောတိ ဝါ’’’တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ဒုတိယေ စိတ္တေ ဥပ္ပန္နေ န ဝတ္တဗ္ဗံ – သောတိ ဝါ အညောတိ ဝါ၊ ဒုတိယေ စိတ္တေ ဥပ္ပန္နေ ဝတ္တဗ္ဗံ – ဒေဝေါတိ ဝါ မနုဿောတိ ဝါ’’’တိ မိစ္ဆာ။ပေ။.

၁၁၈. န ဝတ္တဗ္ဗံ – ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ? အာမန္တာ. နနု ယော ပဿတိ ယံ ပဿတိ ယေန ပဿတိ၊ သော ပဿတိ တံ ပဿတိ တေန ပဿတီတိ? အာမန္တာ. ဟဉ္စိ ယော ပဿတိ ယံ ပဿတိ ယေန ပဿတိ၊ သော ပဿတိ တံ ပဿတိ တေန ပဿတိ၊ တေန ဝတ ရေ ဝတ္တဗ္ဗေ – ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ.

၁၁၉. န ဝတ္တဗ္ဗံ – ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ? အာမန္တာ. နနု ယော သုဏာတိ။ပေ။ ယော ဃာယတိ။ ယော သာယတိ။ ယော ဖုသတိ။ ယော ဝိဇာနာတိ ယံ ဝိဇာနာတိ ယေန ဝိဇာနာတိ၊ သော ဝိဇာနာတိ တံ ဝိဇာနာတိ တေန ဝိဇာနာတီတိ? အာမန္တာ. ဟဉ္စိ ယော ဝိဇာနာတိ ယံ ဝိဇာနာတိ ယေန ဝိဇာနာတိ၊ သော ဝိဇာနာတိ တံ ဝိဇာနာတိ တေန ဝိဇာနာတိ၊ တေန ဝတ ရေ ဝတ္တဗ္ဗေ – ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ.

၁၂၀. ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာတိ? အာမန္တာ. နနု ယော န ပဿတိ ယံ န ပဿတိ ယေန န ပဿတိ၊ သော န ပဿတိ တံ န ပဿတိ တေန န ပဿတီတိ? အာမန္တာ. ဟဉ္စိ ယော န ပဿတိ ယံ န ပဿတိ ယေန န ပဿတိ၊ သော န ပဿတိ တံ န ပဿတိ တေန န ပဿတိ၊ နော စ ဝတ ရေ ဝတ္တဗ္ဗေ – ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ.

ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာတိ? အာမန္တာ. နနု ယော န သုဏာတိ။ပေ။ ယော န ဃာယတိ။ ယော န သာယတိ။ ယော န ဖုသတိ။ ယော န ဝိဇာနာတိ ယံ န ဝိဇာနာတိ ယေန န ဝိဇာနာတိ၊ သော န ဝိဇာနာတိ တံ န ဝိဇာနာတိ တေန န ဝိဇာနာတီတိ? အာမန္တာ. ဟဉ္စိ ယော န ဝိဇာနာတိ ယံ န ဝိဇာနာတိ ယေန န ဝိဇာနာတိ၊ သော န ဝိဇာနာတိ တံ န ဝိဇာနာတိ တေန န ဝိဇာနာတိ၊ နော စ ဝတ ရေ ဝတ္တဗ္ဗေ – ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ.

၁၂၁. န ဝတ္တဗ္ဗံ – ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ? အာမန္တာ. နနု ဝုတ္တံ ဘဂဝတာ – ‘‘ပဿာမဟံ၊ ဘိက္ခဝေ၊ ဒိဗ္ဗေန စက္ခုနာ ဝိသုဒ္ဓေန အတိက္ကန္တမာနုသကေန သတ္တေ စဝမာနေ ဥပပဇ္ဇမာနေ ဟီနေ ပဏီတေ သုဝဏ္ဏေ ဒုဗ္ဗဏ္ဏေ၊ သုဂတေ ဒုဂ္ဂတေ ယထာကမ္မူပဂေ သတ္တေ ပဇာနာမီ’’တိ [မ. နိ. ၁.၂၁၃ ထောကံ ဝိသဒိသံ]! အတ္ထေဝ သုတ္တန္တောတိ? အာမန္တာ. တေန ဟိ ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာတိ.

၁၂၂. ဝုတ္တံ ဘဂဝတာ – ‘‘ပဿာမဟံ၊ ဘိက္ခဝေ၊ ဒိဗ္ဗေန စက္ခုနာ ဝိသုဒ္ဓေန အတိက္ကန္တမာနုသကေန သတ္တေ စဝမာနေ ဥပပဇ္ဇမာနေ ဟီနေ ပဏီတေ သုဝဏ္ဏေ ဒုဗ္ဗဏ္ဏေ၊ သုဂတေ ဒုဂ္ဂတေ ယထာကမ္မူပဂေ သတ္တေ ပဇာနာမီ’’တိ ကတွာ တေနေဝ ကာရဏေန ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာတိ? အာမန္တာ. ဘဂဝါ ဒိဗ္ဗေန စက္ခုနာ ဝိသုဒ္ဓေန အတိက္ကန္တမာနုသကေန ရူပံ ပဿတိ ပုဂ္ဂလံ ပဿတီတိ? ရူပံ ပဿတိ. ရူပံ ပုဂ္ဂလော၊ ရူပံ စဝတိ၊ ရူပံ ဥပပဇ္ဇတိ၊ ရူပံ ယထာကမ္မူပဂန္တိ? န ဟေဝံ ဝတ္တဗ္ဗေ.

ဘဂဝါ ဒိဗ္ဗေန စက္ခုနာ ဝိသုဒ္ဓေန အတိက္ကန္တမာနုသကေန ရူပံ ပဿတိ ပုဂ္ဂလံ ပဿတီတိ? ပုဂ္ဂလံ ပဿတိ. ပုဂ္ဂလော ရူပံ ရူပါယတနံ ရူပဓာတု နီလံ ပီတကံ လောဟိတကံ ဩဒါတံ စက္ခုဝိညေယျံ စက္ခုသ္မိံ ပဋိဟညတိ၊ စက္ခုဿ အာပါထံ အာဂစ္ဆတီတိ? န ဟေဝံ ဝတ္တဗ္ဗေ.

ဘဂဝါ ဒိဗ္ဗေန စက္ခုနာ ဝိသုဒ္ဓေန အတိက္ကန္တမာနုသကေန ရူပံ ပဿတိ ပုဂ္ဂလံ ပဿတီတိ? ဥဘော ပဿတိ. ဥဘော ရူပံ ရူပါယတနံ ရူပဓာတု၊ ဥဘော နီလာ၊ ဥဘော ပီတကာ၊ ဥဘော လောဟိတကာ၊ ဥဘော ဩဒါတာ၊ ဥဘော စက္ခုဝိညေယျာ၊ ဥဘော စက္ခုသ္မိံ ပဋိဟညန္တိ၊ ဥဘော စက္ခုဿ အာပါထံ အာဂစ္ဆန္တိ၊ ဥဘော စဝန္တိ၊ ဥဘော ဥပပဇ္ဇန္တိ၊ ဥဘော ယထာကမ္မူပဂါတိ? န ဟေဝံ ဝတ္တဗ္ဗေ.

ဥပါဒါပညတ္တာနုယောဂေါ.