၁၀. ပညတ္တာနုယောဂေါ

၆၁. ရူပဓာတုယာ ရူပီ ပုဂ္ဂလောတိ? အာမန္တာ. ကာမဓာတုယာ ကာမီ ပုဂ္ဂလောတိ? န ဟေဝံ ဝတ္တဗ္ဗေ။ပေ။.

၆၂. ရူပဓာတုယာ ရူပိနော သတ္တာတိ? အာမန္တာ. ကာမဓာတုယာ ကာမိနော သတ္တာတိ? န ဟေဝံ ဝတ္တဗ္ဗေ။ပေ။.

၆၃. အရူပဓာတုယာ အရူပီ ပုဂ္ဂလောတိ? အာမန္တာ. ကာမဓာတုယာ ကာမီ ပုဂ္ဂလောတိ? န ဟေဝံ ဝတ္တဗ္ဗေ။ပေ။.

၆၄. အရူပဓာတုယာ အရူပိနော သတ္တာတိ? အာမန္တာ. ကာမဓာတုယာ ကာမိနော သတ္တာတိ? န ဟေဝံ ဝတ္တဗ္ဗေ။ပေ။.

၆၅. ရူပဓာတုယာ ရူပီ ပုဂ္ဂလော အရူပဓာတုယာ အရူပီ ပုဂ္ဂလော၊ အတ္ထိ စ ကောစိ ရူပဓာတုယာ စုတော အရူပဓာတုံ ဥပပဇ္ဇတီတိ? အာမန္တာ. ရူပီ ပုဂ္ဂလော ဥပစ္ဆိန္နော၊ အရူပီ ပုဂ္ဂလော ဇာတောတိ? န ဟေဝံ ဝတ္တဗ္ဗေ။ပေ။.

၆၆. ရူပဓာတုယာ ရူပိနော သတ္တာ အရူပဓာတုယာ အရူပိနော သတ္တာ၊ အတ္ထိ စ ကောစိ ရူပဓာတုယာ စုတော အရူပဓာတုံ ဥပပဇ္ဇတီတိ? အာမန္တာ. ရူပီ သတ္တော ဥပစ္ဆိန္နော၊ အရူပီ သတ္တော ဇာတောတိ? န ဟေဝံ ဝတ္တဗ္ဗေ။ပေ။.

၆၇. ကာယောတိ ဝါ သရီရန္တိ ဝါ၊ သရီရန္တိ ဝါ ကာယောတိ ဝါ၊ ကာယံ အပ္ပိယံ ကရိတွာ ဧသေသေ ဧကဋ္ဌေ သမေ သမဘာဂေ တဇ္ဇာတေတိ? အာမန္တာ. ပုဂ္ဂလောတိ ဝါ ဇီဝေါတိ ဝါ၊ ဇီဝေါတိ ဝါ ပုဂ္ဂလောတိ ဝါ၊ ပုဂ္ဂလံ အပ္ပိယံ ကရိတွာ ဧသေသေ ဧကဋ္ဌေ သမေ သမဘာဂေ တဇ္ဇာတေတိ? အာမန္တာ. အညော ကာယော၊ အညော ပုဂ္ဂလောတိ? အာမန္တာ. အညံ ဇီဝံ၊ အညံ သရီရန္တိ? န ဟေဝံ ဝတ္တဗ္ဗေ.

အာဇာနာဟိ နိဂ္ဂဟံ. ဟဉ္စိ ကာယောတိ ဝါ သရီရန္တိ ဝါ၊ သရီရန္တိ ဝါ ကာယောတိ ဝါ၊ ကာယံ အပ္ပိယံ ကရိတွာ ဧသေသေ ဧကဋ္ဌေ သမေ သမဘာဂေ တဇ္ဇာတေ၊ ပုဂ္ဂလောတိ ဝါ ဇီဝေါတိ ဝါ၊ ဇီဝေါတိ ဝါ ပုဂ္ဂလောတိ ဝါ၊ ပုဂ္ဂလံ အပ္ပိယံ ကရိတွာ ဧသေသေ ဧကဋ္ဌေ သမေ သမဘာဂေ တဇ္ဇာတေ၊ အညော ကာယော အညော ပုဂ္ဂလော၊ တေန ဝတ ရေ ဝတ္တဗ္ဗေ – ‘‘အညံ ဇီဝံ အညံ သရီရ’’န္တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ကာယောတိ ဝါ သရီရန္တိ ဝါ၊ သရီရန္တိ ဝါ ကာယောတိ ဝါ၊ ကာယံ အပ္ပိယံ ကရိတွာ ဧသေသေ ဧကဋ္ဌေ သမေ သမဘာဂေ တဇ္ဇာတေ၊ ပုဂ္ဂလောတိ ဝါ ဇီဝေါတိ ဝါ၊ ဇီဝေါတိ ဝါ ပုဂ္ဂလောတိ ဝါ၊ ပုဂ္ဂလံ အပ္ပိယံ ကရိတွာ ဧသေသေ ဧကဋ္ဌေ သမေ သမဘာဂေ တဇ္ဇာတေ၊ အညော ကာယော အညော ပုဂ္ဂလော၊’ နော စ ဝတ္တဗ္ဗေ – ‘အညံ ဇီဝံ အညံ သရီရ’’’န္တိ မိစ္ဆာ.

နော စေ ပန ဝတ္တဗ္ဗေ – ‘‘အညံ ဇီဝံ အညံ သရီရ’’န္တိ၊ နော စ ဝတ ရေ ဝတ္တဗ္ဗေ – ‘‘ကာယောတိ ဝါ သရီရန္တိ ဝါ၊ သရီရန္တိ ဝါ ကာယောတိ ဝါ၊ ကာယံ အပ္ပိယံ ကရိတွာ ဧသေသေ ဧကဋ္ဌေ သမေ သမဘာဂေ တဇ္ဇာတေ၊ ပုဂ္ဂလောတိ ဝါ ဇီဝေါတိ ဝါ၊ ဇီဝေါတိ ဝါ ပုဂ္ဂလောတိ ဝါ၊ ပုဂ္ဂလံ အပ္ပိယံ ကရိတွာ ဧသေသေ ဧကဋ္ဌေ သမေ သမဘာဂေ တဇ္ဇာတေ၊ အညော ကာယော အညော ပုဂ္ဂလော’’တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ကာယောတိ ဝါ သရီရန္တိ ဝါ၊ သရီရန္တိ ဝါ ကာယောတိ ဝါ၊ ကာယံ အပ္ပိယံ ကရိတွာ ဧသေသေ ဧကဋ္ဌေ သမေ သမဘာဂေ တဇ္ဇာတေ၊ ပုဂ္ဂလောတိ ဝါ ဇီဝေါတိ ဝါ၊ ဇီဝေါတိ ဝါ ပုဂ္ဂလောတိ ဝါ၊ ပုဂ္ဂလံ အပ္ပိယံ ကရိတွာ ဧသေသေ ဧကဋ္ဌေ သမေ သမဘာဂေ တဇ္ဇာတေ၊ အညော ကာယော အညော ပုဂ္ဂလော’၊ နော စ ဝတ္တဗ္ဗေ – ‘အညံ ဇီဝံ အညံ သရီရ’’’န္တိ မိစ္ဆာ။ပေ။.

၆၈. ကာယောတိ ဝါ သရီရန္တိ ဝါ၊ သရီရန္တိ ဝါ ကာယောတိ ဝါ၊ ကာယံ အပ္ပိယံ ကရိတွာ ဧသေသေ ဧကဋ္ဌေ သမေ သမဘာဂေ တဇ္ဇာတေတိ? အာမန္တာ. ဝုတ္တံ ဘဂဝတာ – ‘‘အတ္ထိ ပုဂ္ဂလော အတ္တဟိတာယ ပဋိပန္နော’’တိ? အာမန္တာ. အညော ကာယော အညော ပုဂ္ဂလောတိ? န ဟေဝံ ဝတ္တဗ္ဗေ.

အာဇာနာဟိ ပဋိကမ္မံ. ဟဉ္စိ ကာယောတိ ဝါ သရီရန္တိ ဝါ၊ သရီရန္တိ ဝါ ကာယောတိ ဝါ၊ ကာယံ အပ္ပိယံ ကရိတွာ ဧသေသေ ဧကဋ္ဌေ သမေ သမဘာဂေ တဇ္ဇာတေ၊ ဝုတ္တံ ဘဂဝတာ – ‘‘အတ္ထိ ပုဂ္ဂလော အတ္တဟိတာယ ပဋိပန္နော၊’’ တေန ဝတ ရေ ဝတ္တဗ္ဗေ – ‘‘အညော ကာယော အညော ပုဂ္ဂလော’’တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ကာယောတိ ဝါ သရီရန္တိ ဝါ၊ သရီရန္တိ ဝါ ကာယောတိ ဝါ၊ ကာယံ အပ္ပိယံ ကရိတွာ ဧသေသေ ဧကဋ္ဌေ သမေ သမဘာဂေ တဇ္ဇာတေ၊ ဝုတ္တံ ဘဂဝတာ – အတ္ထိ ပုဂ္ဂလော အတ္တဟိတာယ ပဋိပန္နော၊’ နော စ ဝတ္တဗ္ဗေ – ‘အညော ကာယော အညော ပုဂ္ဂလော’’’တိ မိစ္ဆာ.

နော စေ ပန ဝတ္တဗ္ဗေ – ‘‘အညော ကာယော အညော ပုဂ္ဂလော’’တိ၊ နော စ ဝတ ရေ ဝတ္တဗ္ဗေ – ‘‘ကာယောတိ ဝါ သရီရန္တိ ဝါ၊ သရီရန္တိ ဝါ ကာယောတိ ဝါ၊ ကာယံ အပ္ပိယံ ကရိတွာ ဧသေသေ ဧကဋ္ဌေ သမေ သမဘာဂေ တဇ္ဇာတေ၊ ဝုတ္တံ ဘဂဝတာ – ‘အတ္ထိ ပုဂ္ဂလော အတ္တဟိတာယ ပဋိပန္နော’’’တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ကာယောတိ ဝါ သရီရန္တိ ဝါ၊ သရီရန္တိ ဝါ ကာယောတိ ဝါ၊ ကာယံ အပ္ပိယံ ကရိတွာ ဧသေသေ ဧကဋ္ဌေ သမေ သမဘာဂေ တဇ္ဇာတေ၊ ဝုတ္တံ ဘဂဝတာ – အတ္ထိ ပုဂ္ဂလော အတ္တဟိတာယ ပဋိပန္နော၊’ နော စ ဝတ္တဗ္ဗေ – ‘အညော ကာယော အညော ပုဂ္ဂလော’’’တိ မိစ္ဆာ. (သံခိတ္တံ)

ပညတ္တာနုယောဂေါ.