၉. ဝစနသောဓနံ

၅၅. ပုဂ္ဂလော ဥပလဗ္ဘတိ၊ ဥပလဗ္ဘတိ ပုဂ္ဂလောတိ? ပုဂ္ဂလော ဥပလဗ္ဘတိ၊ ဥပလဗ္ဘတိ ကေဟိစိ ပုဂ္ဂလော ကေဟိစိ န ပုဂ္ဂလောတိ. ပုဂ္ဂလော ကေဟိစိ ဥပလဗ္ဘတိ ကေဟိစိ န ဥပလဗ္ဘတီတိ? န ဟေဝံ ဝတ္တဗ္ဗေ။ပေ။.

၅၆. ပုဂ္ဂလော သစ္စိကဋ္ဌော၊ သစ္စိကဋ္ဌော ပုဂ္ဂလောတိ? ပုဂ္ဂလော သစ္စိကဋ္ဌော၊ သစ္စိကဋ္ဌော ကေဟိစိ ပုဂ္ဂလော ကေဟိစိ န ပုဂ္ဂလောတိ. ပုဂ္ဂလော ကေဟိစိ သစ္စိကဋ္ဌော ကေဟိစိ န သစ္စိကဋ္ဌောတိ? န ဟေဝံ ဝတ္တဗ္ဗေ။ပေ။.

၅၇. ပုဂ္ဂလော ဝိဇ္ဇမာနော၊ ဝိဇ္ဇမာနော ပုဂ္ဂလောတိ? ပုဂ္ဂလော ဝိဇ္ဇမာနော၊ ဝိဇ္ဇမာနော ကေဟိစိ ပုဂ္ဂလော ကေဟိစိ န ပုဂ္ဂလောတိ. ပုဂ္ဂလော ကေဟိစိ ဝိဇ္ဇမာနော ကေဟိစိ န ဝိဇ္ဇမာနောတိ? န ဟေဝံ ဝတ္တဗ္ဗေ။ပေ။.

၅၈. ပုဂ္ဂလော သံဝိဇ္ဇမာနော၊ သံဝိဇ္ဇမာနော ပုဂ္ဂလောတိ? ပုဂ္ဂလော သံဝိဇ္ဇမာနော၊ သံဝိဇ္ဇမာနော ကေဟိစိ ပုဂ္ဂလော ကေဟိစိ န ပုဂ္ဂလောတိ. ပုဂ္ဂလော ကေဟိစိ သံဝိဇ္ဇမာနော ကေဟိစိ န သံဝိဇ္ဇမာနောတိ? န ဟေဝံ ဝတ္တဗ္ဗေ။ပေ။.

၅၉. ပုဂ္ဂလော အတ္ထိ၊ အတ္ထိ ပုဂ္ဂလောတိ? ပုဂ္ဂလော အတ္ထိ၊ အတ္ထိ ကေဟိစိ ပုဂ္ဂလော ကေဟိစိ န ပုဂ္ဂလောတိ. ပုဂ္ဂလော ကေဟိစိ အတ္ထိ ကေဟိစိ နတ္ထီတိ? န ဟေဝံ ဝတ္တဗ္ဗေ။ပေ။.

၆၀. ပုဂ္ဂလော အတ္ထိ၊ အတ္ထိ န သဗ္ဗော ပုဂ္ဂလောတိ? အာမန္တာ။ပေ။ ပုဂ္ဂလော နတ္ထိ၊ နတ္ထိ န သဗ္ဗော ပုဂ္ဂလောတိ? န ဟေဝံ ဝတ္တဗ္ဗေ. (သံခိတ္တံ)

ဝစနသောဓနံ.