၈. လက္ခဏယုတ္တိကထာ

၅၃. ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာတိ? အာမန္တာ. ပုဂ္ဂလော သပ္ပစ္စယော။ပေ။ ပုဂ္ဂလော အပ္ပစ္စယော။ ပုဂ္ဂလော သင်္ခတော ။ ပုဂ္ဂလော အသင်္ခတော။ ပုဂ္ဂလော သဿတော ။ ပုဂ္ဂလော အသဿတော။ ပုဂ္ဂလော သနိမိတ္တော။ ပုဂ္ဂလော အနိမိတ္တောတိ? န ဟေဝံ ဝတ္တဗ္ဗေ. (သံခိတ္တံ)

၅၄. ပုဂ္ဂလော နုပလဗ္ဘတိ သစ္စိကဋ္ဌပရမတ္ထေနာတိ? အာမန္တာ. ဝုတ္တံ ဘဂဝတာ – ‘‘အတ္ထိ ပုဂ္ဂလော အတ္တဟိတာယ ပဋိပန္နော’’တိ? အာမန္တာ. ပုဂ္ဂလော သပ္ပစ္စယော။ပေ။ ပုဂ္ဂလော အပ္ပစ္စယော။ ပုဂ္ဂလော သင်္ခတော။ ပုဂ္ဂလော အသင်္ခတော။ ပုဂ္ဂလော သဿတော။ ပုဂ္ဂလော အသဿတော။ ပုဂ္ဂလော သနိမိတ္တော။ ပုဂ္ဂလော အနိမိတ္တောတိ? န ဟေဝံ ဝတ္တဗ္ဗေ. (သံခိတ္တံ)

လက္ခဏယုတ္တိကထာ.