၇. စတုက္ကနယသံသန္ဒနံ

၄၆. ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာတိ? အာမန္တာ. ရူပံ ပုဂ္ဂလောတိ? န ဟေဝံ ဝတ္တဗ္ဗေ.

အာဇာနာဟိ နိဂ္ဂဟံ. ဟဉ္စိ ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊ တေန ဝတ ရေ ဝတ္တဗ္ဗေ – ‘‘ရူပံ ပုဂ္ဂလော’’တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊’ နော စ ဝတ္တဗ္ဗေ – ‘ရူပံ ပုဂ္ဂလော’’’တိ မိစ္ဆာ.

နော စေ ပန ဝတ္တဗ္ဗေ – ‘‘ရူပံ ပုဂ္ဂလော’’တိ၊ နော စ ဝတ ရေ ဝတ္တဗ္ဗေ – ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊’ နော စ ဝတ္တဗ္ဗေ – ‘ရူပံ ပုဂ္ဂလော’’’တိ မိစ္ဆာ။ပေ။.

၄၇. ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာတိ? အာမန္တာ. ရူပသ္မိံ ပုဂ္ဂလော။ပေ။ အညတြ ရူပါ ပုဂ္ဂလော။ပေ။ ပုဂ္ဂလသ္မိံ ရူပန္တိ? န ဟေဝံ ဝတ္တဗ္ဗေ.

အာဇာနာဟိ နိဂ္ဂဟံ. ဟဉ္စိ ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊ တေန ဝတ ရေ ဝတ္တဗ္ဗေ – ‘‘ပုဂ္ဂလသ္မိံ ရူပ’’န္တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊’ နော စ ဝတ္တဗ္ဗေ – ‘ပုဂ္ဂလသ္မိံ ရူပ’’’န္တိ မိစ္ဆာ.

နော စေ ပန ဝတ္တဗ္ဗေ – ‘‘ပုဂ္ဂလသ္မိံ ရူပ’’န္တိ၊ နော စ ဝတ ရေ ဝတ္တဗ္ဗေ – ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊’ နော စ ဝတ္တဗ္ဗေ – ‘ပုဂ္ဂလသ္မိံ ရူပ’’’န္တိ မိစ္ဆာ။ပေ။.

၄၈. ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာတိ? အာမန္တာ. ဝေဒနာ ပုဂ္ဂလော။ပေ။ ဝေဒနာယ ပုဂ္ဂလော။ပေ။ အညတြ ဝေဒနာယ ပုဂ္ဂလော။ပေ။ ပုဂ္ဂလသ္မိံ ဝေဒနာ။ပေ။.

သညာ ပုဂ္ဂလော။ပေ။ သညာယ ပုဂ္ဂလော။ပေ။ အညတြ သညာယ ပုဂ္ဂလော။ပေ။ ပုဂ္ဂလသ္မိံ သညာ။ပေ။.

သင်္ခါရာ ပုဂ္ဂလော။ပေ။ သင်္ခါရေသု ပုဂ္ဂလော။ပေ။ အညတြ သင်္ခါရေဟိ ပုဂ္ဂလော။ပေ။ ပုဂ္ဂလသ္မိံ သင်္ခါရာ။ပေ။.

ဝိညာဏံ ပုဂ္ဂလော။ပေ။ ဝိညာဏသ္မိံ ပုဂ္ဂလော။ပေ။ အညတြ ဝိညာဏာ ပုဂ္ဂလော။ပေ။ ပုဂ္ဂလသ္မိံ ဝိညာဏန္တိ? န ဟေဝံ ဝတ္တဗ္ဗေ.

အာဇာနာဟိ နိဂ္ဂဟံ. ဟဉ္စိ ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊ တေန ဝတ ရေ ဝတ္တဗ္ဗေ – ‘‘ပုဂ္ဂလသ္မိံ ဝိညာဏ’’န္တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊’ နော စ ဝတ္တဗ္ဗေ – ‘ပုဂ္ဂလသ္မိံ ဝိညာဏ’’’န္တိ မိစ္ဆာ.

နော စေ ပန ဝတ္တဗ္ဗေ – ‘‘ပုဂ္ဂလသ္မိံ ဝိညာဏ’’န္တိ၊ နော စ ဝတ ရေ ဝတ္တဗ္ဗေ – ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊’ နော စ ဝတ္တဗ္ဗေ – ‘ပုဂ္ဂလသ္မိံ ဝိညာဏ’’’န္တိ မိစ္ဆာ။ပေ။.

၄၉. ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာတိ? အာမန္တာ. စက္ခာယတနံ ပုဂ္ဂလော။ပေ။ စက္ခာယတနသ္မိံ ပုဂ္ဂလော။ပေ။ အညတြ စက္ခာယတနာ ပုဂ္ဂလော။ပေ။ ပုဂ္ဂလသ္မိံ စက္ခာယတနံ။ပေ။ ဓမ္မာယတနံ ပုဂ္ဂလော။ပေ။ ဓမ္မာယတနသ္မိံ ပုဂ္ဂလော။ပေ။ အညတြ ဓမ္မာယတနာ ပုဂ္ဂလော။ပေ။ ပုဂ္ဂလသ္မိံ ဓမ္မာယတနံ။ပေ။.

စက္ခုဓာတု ပုဂ္ဂလော။ပေ။ စက္ခုဓာတုယာ ပုဂ္ဂလော။ပေ။ အညတြ စက္ခုဓာတုယာ ပုဂ္ဂလော။ပေ။ ပုဂ္ဂလသ္မိံ စက္ခုဓာတု။ပေ။ ဓမ္မဓာတု ပုဂ္ဂလော။ပေ။ ဓမ္မဓာတုယာ ပုဂ္ဂလော။ပေ။ အညတြ ဓမ္မဓာတုယာ ပုဂ္ဂလော။ပေ။ ပုဂ္ဂလသ္မိံ ဓမ္မဓာတု။ပေ။.

စက္ခုန္ဒြိယံ ပုဂ္ဂလော။ပေ။ စက္ခုန္ဒြိယသ္မိံ ပုဂ္ဂလော။ပေ။ အညတြ စက္ခုန္ဒြိယာ ပုဂ္ဂလော ။ပေ။ ပုဂ္ဂလသ္မိံ စက္ခုန္ဒြိယံ။ပေ။ အညာတာဝိန္ဒြိယံ ပုဂ္ဂလော။ပေ။ အညာတာဝိန္ဒြိယသ္မိံ ပုဂ္ဂလော။ပေ။ အညတြ အညာတာဝိန္ဒြိယာ ပုဂ္ဂလော။ပေ။ ပုဂ္ဂလသ္မိံ အညာတာဝိန္ဒြိယန္တိ? န ဟေဝံ ဝတ္တဗ္ဗေ.

အာဇာနာဟိ နိဂ္ဂဟံ. ဟဉ္စိ ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊ တေန ဝတ ရေ ဝတ္တဗ္ဗေ – ‘‘ပုဂ္ဂလသ္မိံ အညာတာဝိန္ဒြိယ’’န္တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊’ နော စ ဝတ္တဗ္ဗေ – ‘ပုဂ္ဂလသ္မိံ အညာတာဝိန္ဒြိယ’’’န္တိ မိစ္ဆာ.

နော စေ ပန ဝတ္တဗ္ဗေ – ‘‘ပုဂ္ဂလသ္မိံ အညာတာဝိန္ဒြိယ’’န္တိ၊ နော စ ဝတ ရေ ဝတ္တဗ္ဗေ – ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊’ နော စ ဝတ္တဗ္ဗေ – ‘ပုဂ္ဂလသ္မိံ အညာတာဝိန္ဒြိယ’’’န္တိ မိစ္ဆာ။ပေ။.

၅၀. ပုဂ္ဂလော နုပလဗ္ဘတိ သစ္စိကဋ္ဌပရမတ္ထေနာတိ? အာမန္တာ. ဝုတ္တံ ဘဂဝတာ – ‘‘အတ္ထိ ပုဂ္ဂလော အတ္တဟိတာယ ပဋိပန္နော’’တိ? အာမန္တာ. ရူပံ ပုဂ္ဂလောတိ? န ဟေဝံ ဝတ္တဗ္ဗေ.

အာဇာနာဟိ ပဋိကမ္မံ. ဟဉ္စိ ဝုတ္တံ ဘဂဝတာ – ‘‘အတ္ထိ ပုဂ္ဂလော အတ္တဟိတာယ ပဋိပန္နော၊’’ တေန ဝတ ရေ ဝတ္တဗ္ဗေ – ‘‘ရူပံ ပုဂ္ဂလော’’တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ဝုတ္တံ ဘဂဝတာ – အတ္ထိ ပုဂ္ဂလော အတ္တဟိတာယ ပဋိပန္နော၊’ နော စ ဝတ္တဗ္ဗေ – ‘ရူပံ ပုဂ္ဂလောတိ’’’ မိစ္ဆာ.

နော စေ ပန ဝတ္တဗ္ဗေ – ‘‘ရူပံ ပုဂ္ဂလော’’တိ၊ နော စ ဝတ ရေ ဝတ္တဗ္ဗေ – ‘‘ဝုတ္တံ ဘဂဝတာ – ‘အတ္ထိ ပုဂ္ဂလော အတ္တဟိတာယ ပဋိပန္နော’’’တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ဝုတ္တံ ဘဂဝတာ – အတ္ထိ ပုဂ္ဂလော အတ္တဟိတာယ ပဋိပန္နော၊’ နော စ ဝတ္တဗ္ဗေ – ‘ရူပံ ပုဂ္ဂလော’’’တိ မိစ္ဆာ။ပေ။.

၅၁. ပုဂ္ဂလော နုပလဗ္ဘတိ သစ္စိကဋ္ဌပရမတ္ထေနာတိ? အာမန္တာ. ဝုတ္တံ ဘဂဝတာ – ‘‘အတ္ထိ ပုဂ္ဂလော အတ္တဟိတာယ ပဋိပန္နော’’တိ? အာမန္တာ. ရူပသ္မိံ ပုဂ္ဂလော။ပေ။ အညတြ ရူပါ ပုဂ္ဂလော။ပေ။ ပုဂ္ဂလသ္မိံ ရူပံ။ပေ။.

ဝေဒနာ ပုဂ္ဂလော။ပေ။ ဝေဒနာယ ပုဂ္ဂလော။ပေ။ အညတြ ဝေဒနာယ ပုဂ္ဂလော။ပေ။ ပုဂ္ဂလသ္မိံ ဝေဒနာ။ပေ။.

အာဇာနာဟိ ပဋိကမ္မံ. ဟဉ္စိ ဝုတ္တံ ဘဂဝတာ – ‘‘အတ္ထိ ပုဂ္ဂလော အတ္တဟိတာယ ပဋိပန္နော၊’’ တေန ဝတ ရေ ဝတ္တဗ္ဗေ – ‘‘ပုဂ္ဂလသ္မိံ ဝိညာဏ’’န္တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ဝုတ္တံ ဘဂဝတာ – အတ္ထိ ပုဂ္ဂလော အတ္တဟိတာယ ပဋိပန္နော၊’ နော စ ဝတ္တဗ္ဗေ – ‘ပုဂ္ဂလသ္မိံ ဝိညာဏ’’’န္တိ မိစ္ဆာ.

နော စေ ပန ဝတ္တဗ္ဗေ – ‘‘ပုဂ္ဂလသ္မိံ ဝိညာဏ’’န္တိ၊ နော စ ဝတ ရေ ဝတ္တဗ္ဗေ – ‘‘ဝုတ္တံ ဘဂဝတာ – ‘အတ္ထိ ပုဂ္ဂလော အတ္တဟိတာယ ပဋိပန္နော’’’တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ဝုတ္တံ ဘဂဝတာ – အတ္ထိ ပုဂ္ဂလော အတ္တဟိတာယ ပဋိပန္နော၊’ နော စ ဝတ္တဗ္ဗေ – ‘ပုဂ္ဂလသ္မိံ ဝိညာဏ’’’န္တိ မိစ္ဆာ။ပေ။.

၅၂. ပုဂ္ဂလော နုပလဗ္ဘတိ သစ္စိကဋ္ဌပရမတ္ထေနာတိ? အာမန္တာ. ဝုတ္တံ ဘဂဝတာ – ‘‘အတ္ထိ ပုဂ္ဂလော အတ္တဟိတာယ ပဋိပန္နော’’တိ? အာမန္တာ. စက္ခာယတနံ ပုဂ္ဂလော။ပေ။ စက္ခာယတနသ္မိံ ပုဂ္ဂလော။ပေ။ အညတြ စက္ခာယတနာ ပုဂ္ဂလော။ပေ။ ပုဂ္ဂလသ္မိံ စက္ခာယတနံ။ပေ။ ဓမ္မာယတနံ ပုဂ္ဂလော။ပေ။ ဓမ္မာယတနသ္မိံ ပုဂ္ဂလော။ပေ။ အညတြ ဓမ္မာယတနာ ပုဂ္ဂလော။ပေ။ ပုဂ္ဂလသ္မိံ ဓမ္မာယတနံ။ပေ။.

စက္ခုန္ဒြိယံ ပုဂ္ဂလော။ပေ။ စက္ခုန္ဒြိယသ္မိံ ပုဂ္ဂလော။ပေ။ အညတြ စက္ခုန္ဒြိယာ ပုဂ္ဂလော။ပေ။ ပုဂ္ဂလသ္မိံ စက္ခုန္ဒြိယံ။ပေ။ အညာတာဝိန္ဒြိယံ ပုဂ္ဂလော။ပေ။ အညာတာဝိန္ဒြိယသ္မိံ ပုဂ္ဂလော။ပေ။ အညတြ အညာတာဝိန္ဒြိယာ ပုဂ္ဂလော။ပေ။ ပုဂ္ဂလသ္မိံ အညာတာဝိန္ဒြိယန္တိ? န ဟေဝံ ဝတ္တဗ္ဗေ.

အာဇာနာဟိ ပဋိကမ္မံ. ဟဉ္စိ ဝုတ္တံ ဘဂဝတာ – ‘‘အတ္ထိ ပုဂ္ဂလော အတ္တဟိတာယ ပဋိပန္နော၊’’ တေန ဝတ ရေ ဝတ္တဗ္ဗေ – ‘‘ပုဂ္ဂလသ္မိံ အညာတာဝိန္ဒြိယ’’န္တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ဝုတ္တံ ဘဂဝတာ – အတ္ထိ ပုဂ္ဂလော အတ္တဟိတာယ ပဋိပန္နော၊’ နော စ ဝတ္တဗ္ဗေ – ‘ပုဂ္ဂလသ္မိံ အညာတာဝိန္ဒြိယ’’’န္တိ မိစ္ဆာ.

နော စေ ပန ဝတ္တဗ္ဗေ – ‘‘ပုဂ္ဂလသ္မိံ အညာတာဝိန္ဒြိယ’’န္တိ၊ နော စ ဝတ ရေ ဝတ္တဗ္ဗေ – ‘‘ဝုတ္တံ ဘဂဝတာ – ‘အတ္ထိ ပုဂ္ဂလော အတ္တဟိတာယ ပဋိပန္နော’’’တိ. ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘ဝုတ္တံ ဘဂဝတာ – အတ္ထိ ပုဂ္ဂလော အတ္တဟိတာယ ပဋိပန္နော၊’ နော စ ဝတ္တဗ္ဗေ – ‘ပုဂ္ဂလသ္မိံ အညာတာဝိန္ဒြိယ’’’န္တိ မိစ္ဆာ။ပေ။.

စတုက္ကနယသံသန္ဒနံ.