ဒုကနိက္ခေပံ

ဟေတုဂေါစ္ဆကံ

၁၀၅၉. ကတမေ ဓမ္မာ ဟေတူ? တယော ကုသလဟေတူ၊ တယော အကုသလဟေတူ၊ တယော အဗျာကတဟေတူ၊ နဝ ကာမာဝစရဟေတူ ဆ ရူပါဝစရဟေတူ၊ ဆ အရူပါဝစရဟေတူ၊ ဆ အပရိယာပန္နဟေတူ.

၁၀၆၀. တတ္ထ ကတမေ တယော ကုသလဟေတူ? အလောဘော၊ အဒေါသော၊ အမောဟော.

၁၀၆၁. တတ္ထ ကတမော အလောဘော? ယော အလောဘော အလုဗ္ဘနာ အလုဗ္ဘိတတ္တံ အသာရာဂေါ အသာရဇ္ဇနာ အသာရဇ္ဇိတတ္တံ အနဘိဇ္ဈာ အလောဘော ကုသလမူလံ – အယံ ဝုစ္စတိ အလောဘော.

၁၀၆၂. တတ္ထ ကတမော အဒေါသော? ယော အဒေါသော အဒုဿနာ အဒုဿိတတ္တံ မေတ္တိ မေတ္တာယနာ မေတ္တာယိတတ္တံ အနုဒ္ဒါ အနုဒ္ဒါယနာ အနုဒါယိတတ္တံ ဟိတေသိတာ အနုကမ္ပာ အဗျာပါဒေါ အဗျာပဇ္ဇော အဒေါသော ကုသလမူလံ – အယံ ဝုစ္စတိ အဒေါသော.

၁၀၆၃. တတ္ထ ကတမော အမောဟော? ဒုက္ခေ ဉာဏံ၊ ဒုက္ခသမုဒယေ ဉာဏံ၊ ဒုက္ခနိရောဓေ ဉာဏံ၊ ဒုက္ခနိရောဓဂါမိနိယာ ပဋိပဒါယ ဉာဏံ၊ ပုဗ္ဗန္တေ ဉာဏံ၊ အပရန္တေ ဉာဏံ၊ ပုဗ္ဗန္တာပရန္တေ ဉာဏံ၊ ဣဒပ္ပစ္စယတာ ပဋိစ္စသမုပ္ပန္နေသု ဓမ္မေသု ဉာဏံ၊ ယာ ဧဝရူပါ ပညာ ပဇာနနာ ဝိစယော ပဝိစယော ဓမ္မဝိစယော သလ္လက္ခဏာ ဥပလက္ခဏာ ပစ္စုပလက္ခဏာ ပဏ္ဍိစ္စံ ကောသလ္လံ နေပုညံ ဝေဘဗျာ စိန္တာ ဥပပရိက္ခာ ဘူရီ မေဓာ ပရိဏာယိကာ ဝိပဿနာ သမ္ပဇညံ ပတောဒေါ ပညာ ပညိန္ဒြိယံ ပညာဗလံ ပညာသတ္ထံ ပညာပါသာဒေါ ပညာအာလောကော ပညာဩဘာသော ပညာပဇ္ဇောတော ပညာရတနံ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ အမောဟော.

ဣမေ တယော ကုသလဟေတူ.

၁၀၆၄. တတ္ထ ကတမေ တယော အကုသလဟေတူ? လောဘော၊ ဒေါသော၊ မောဟော.

၁၀၆၅. တတ္ထ ကတမော လောဘော? ယော ရာဂေါ သာရာဂေါ အနုနယော အနုရောဓော နန္ဒီ နန္ဒီရာဂေါ [နန္ဒိရာဂေါ (သီ.)] စိတ္တဿ သာရာဂေါ ဣစ္ဆာ မုစ္ဆာ အဇ္ဈောသာနံ ဂေဓော ပလိဂေဓော သင်္ဂေါ ပင်္ကော ဧဇာ မာယာ ဇနိကာ သဉ္ဇနနီ သိဗ္ဗိနီ [သိဗ္ဗနီ (သီ.)] ဇာလိနီ သရိတာ ဝိသတ္တိကာ သုတ္တံ ဝိသဋာ အာယူဟိနီ [အာယူဟနီ (သီ. သျာ.)] ဒုတိယာ ပဏိဓိ ဘဝနေတ္တိ ဝနံ ဝနထော သန္ထဝေါ သိနေဟော အပေက္ခာ ပဋိဗန္ဓု အာသာ အာသိသနာ အာသိသိတတ္တံ [အာသိံသနာ အာသိံသိတတ္တံ (သီ. သျာ.)] ရူပါသာ သဒ္ဒါသာ ဂန္ဓာသာ ရသာသာ ဖောဋ္ဌဗ္ဗာသာ လာဘာသာ ဓနာသာ ပုတ္တာသာ ဇီဝိတာသာ ဇပ္ပါ ပဇပ္ပါ အဘိဇပ္ပါ ဇပ္ပါ ဇပ္ပနာ ဇပ္ပိတတ္တံ လောလုပ္ပံ လောလုပ္ပါယနာ လောလုပ္ပါယိတတ္တံ ပုစ္ဆဉ္ဇိကတာ [ပုဉ္စိကတာ (သျာ.) ပုစ္ဆိကတာ (သီ.)] သာဓုကမျတာ အဓမ္မရာဂေါ ဝိသမလောဘော နိကန္တိ နိကာမနာ ပတ္ထနာ ပိဟနာ သမ္ပတ္ထနာ ကာမတဏှာ ဘဝတဏှာ ဝိဘဝတဏှာ ရူပတဏှာ အရူပတဏှာ နိရောဓတဏှာ ရူပတဏှာ သဒ္ဒတဏှာ ဂန္ဓတဏှာ ရသတဏှာ ဖောဋ္ဌဗ္ဗတဏှာ ဓမ္မတဏှာ ဩဃော ယောဂေါ ဂန္ထော ဥပါဒါနံ အာဝရဏံ နီဝရဏံ ဆာဒနံ ဗန္ဓနံ ဥပက္ကိလေသော အနုသယော ပရိယုဋ္ဌာနံ လတာ ဝေဝိစ္ဆံ ဒုက္ခမူလံ ဒုက္ခနိဒါနံ ဒုက္ခပ္ပဘဝေါ မာရပါသော မာရဗဠိသံ မာရဝိသယော တဏှာနဒီ တဏှာဇာလံ တဏှာဂဒ္ဒုလံ တဏှာသမုဒ္ဒေါ အဘိဇ္ဈာ လောဘော အကုသလမူလံ – အယံ ဝုစ္စတိ လောဘော.

၁၀၆၆. တတ္ထ ကတမော ဒေါသော? အနတ္ထံ မေ အစရီတိ အာဃာတော ဇာယတိ၊ အနတ္ထံ မေ စရတီတိ အာဃာတော ဇာယတိ၊ အနတ္ထံ မေ စရိဿတီတိ အာဃာတော ဇာယတိ၊ ပိယဿ မေ မနာပဿ အနတ္ထံ အစရိ။ပေ။ အနတ္ထံ စရတိ။ပေ။ အနတ္ထံ စရိဿတီတိ အာဃာတော ဇာယတိ၊ အပ္ပိယဿ မေ အမနာပဿ အတ္ထံ အစရိ။ပေ။ အတ္ထံ စရတိ။ပေ။ အတ္ထံ စရိဿတီတိ အာဃာတော ဇာယတိ၊ အဋ္ဌာနေ ဝါ ပန အာဃာတော ဇာယတိ. ယော ဧဝရူပေါ စိတ္တဿ အာဃာတော ပဋိဃာတော ပဋိဃံ ပဋိဝိရောဓော ကောပေါ ပကောပေါ သမ္ပကောပေါ ဒေါသော ပဒေါသော သမ္ပဒေါသော စိတ္တဿ ဗျာပတ္တိ မနောပဒေါသော ကောဓော ကုဇ္ဈနာ ကုဇ္ဈိတတ္တံ ဒေါသော ဒုဿနာ ဒုဿိတတ္တံ ဗျာပတ္တိ ဗျာပဇ္ဇနာ ဗျာပဇ္ဇိတတ္တံ ဝိရောဓော ပဋိဝိရောဓော စဏ္ဍိက္ကံ အသုရောပေါ အနတ္တမနတာ စိတ္တဿ – အယံ ဝုစ္စတိ ဒေါသော.

၁၀၆၇. တတ္ထ ကတမော မောဟော? ဒုက္ခေ အညာဏံ၊ ဒုက္ခသမုဒယေ အညာဏံ၊ ဒုက္ခနိရောဓေ အညာဏံ၊ ဒုက္ခနိရောဓဂါမိနိယာ ပဋိပဒါယ အညာဏံ၊ ပုဗ္ဗန္တေ အညာဏံ၊ အပရန္တေ အညာဏံ၊ ပုဗ္ဗန္တာပရန္တေ အညာဏံ၊ ဣဒပ္ပစ္စယတာ ပဋိစ္စသမုပ္ပန္နေသု ဓမ္မေသု အညာဏံ၊ ယံ ဧဝရူပံ အညာဏံ အဒဿနံ အနဘိသမယော အနနုဗောဓော အသမ္ဗောဓော အပ္ပဋိဝေဓော အသံဂါဟနာ အပရိယောဂါဟနာ အသမပေက္ခနာ အပစ္စဝေက္ခဏာ အပစ္စက္ခကမ္မံ ဒုမ္မေဇ္ဈံ ဗာလျံ အသမ္ပဇညံ မောဟော ပမောဟော သမ္မောဟော အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာနုသယော အဝိဇ္ဇာပရိယုဋ္ဌာနံ အဝိဇ္ဇာလင်္ဂီ မောဟော အကုသလမူလံ – အယံ ဝုစ္စတိ မောဟော.

ဣမေ တယော အကုသလဟေတူ.

၁၀၆၈. တတ္ထ ကတမေ တယော အဗျာကတဟေတူ? ကုသလာနံ ဝါ ဓမ္မာနံ ဝိပါကတော ကိရိယာဗျာကတေသု ဝါ ဓမ္မေသု အလောဘော အဒေါသော အမောဟော – ဣမေ တယော အဗျာကတဟေတူ.

၁၀၆၉. တတ္ထ ကတမေ နဝ ကာမာဝစရဟေတူ? တယော ကုသလဟေတူ၊ တယော အကုသလဟေတူ၊ တယော အဗျာကတဟေတူ – ဣမေ နဝ ကာမာဝစရဟေတူ.

၁၀၇၀. တတ္ထ ကတမေ ဆ ရူပါဝစရဟေတူ? တယော ကုသလဟေတူ၊ တယော အဗျာကတဟေတူ – ဣမေ ဆ ရူပါဝစရဟေတူ.

၁၀၇၁. တတ္ထ ကတမေ ဆ အရူပါဝစရဟေတူ? တယော ကုသလဟေတူ၊ တယော အဗျာကတဟေတူ – ဣမေ ဆ အရူပါဝစရဟေတူ.

၁၀၇၂. တတ္ထ ကတမေ ဆ အပရိယာပန္နဟေတူ? တယော ကုသလဟေတူ၊ တယော အဗျာကတဟေတူ – ဣမေ ဆ အပရိယာပန္နဟေတူ.

၁၀၇၃. တတ္ထ ကတမေ တယော ကုသလဟေတူ? အလောဘော၊ အဒေါသော၊ အမောဟော.

၁၀၇၄. တတ္ထ ကတမော အလောဘော? ယော အလောဘော အလုဗ္ဘနာ အလုဗ္ဘိတတ္တံ အသာရာဂေါ အသာရဇ္ဇနာ အသာရဇ္ဇိတတ္တံ အနဘိဇ္ဈာ အလောဘော ကုသလမူလံ – အယံ ဝုစ္စတိ အလောဘော.

၁၀၇၅. တတ္ထ ကတမော အဒေါသော? ယော အဒေါသော အဒုဿနာ အဒုဿိတတ္တံ။ပေ။ အဗျာပါဒေါ အဗျာပဇ္ဇော အဒေါသော ကုသလမူလံ – အယံ ဝုစ္စတိ အဒေါသော.

၁၀၇၆. တတ္ထ ကတမော အမောဟော? ဒုက္ခေ ဉာဏံ၊ ဒုက္ခသမုဒယေ ဉာဏံ၊ ဒုက္ခနိရောဓေ ဉာဏံ၊ ဒုက္ခနိရောဓဂါမိနိယာ ပဋိပဒါယ ဉာဏံ၊ ပုဗ္ဗန္တေ ဉာဏံ၊ အပရန္တေ ဉာဏံ၊ ပုဗ္ဗန္တာပရန္တေ ဉာဏံ၊ ဣဒပ္ပစ္စယတာ ပဋိစ္စသမုပ္ပန္နေသု ဓမ္မေသု ဉာဏံ၊ ယာ ဧဝရူပါ ပညာ ပဇာနနာ ဝိစယော ပဝိစယော ဓမ္မဝိစယော သလ္လက္ခဏာ ဥပလက္ခဏာ ပစ္စုပလက္ခဏာ ပဏ္ဍိစ္စံ ကောသလ္လံ နေပုညံ ဝေဘဗျာ စိန္တာ ဥပပရိက္ခာ ဘူရီ မေဓာ ပရိဏာယိကာ ဝိပဿနာ သမ္ပဇညံ ပတောဒေါ ပညာ ပညိန္ဒြိယံ ပညာဗလံ ပညာသတ္ထံ ပညာပါသာဒေါ ပညာအာလောကော ပညာဩဘာသော ပညာပဇ္ဇောတော ပညာရတနံ အမောဟော ဓမ္မဝိစယော သမ္မာဒိဋ္ဌိ ဓမ္မဝိစယသမ္ဗောဇ္ဈင်္ဂေါ မဂ္ဂင်္ဂံ မဂ္ဂပရိယာပန္နံ – အယံ ဝုစ္စတိ အမောဟော.

ဣမေ တယော ကုသလဟေတူ.

၁၀၇၇. တတ္ထ ကတမေ တယော အဗျာကတဟေတူ? ကုသလာနံ ဓမ္မာနံ ဝိပါကတော အလောဘော အဒေါသော အမောဟော – ဣမေ တယော အဗျာကတဟေတူ. ဣမေ ဆ အပရိယာပန္နဟေတူ – ဣမေ ဓမ္မာ ဟေတူ.

၁၀၇၈. ကတမေ ဓမ္မာ န ဟေတူ? တေ ဓမ္မေ ဌပေတွာ၊ အဝသေသာ ကုသလာကုသလာဗျာကတာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ အပရိယာပန္နာ၊ ဝေဒနာက္ခန္ဓော။ပေ။ ဝိညာဏက္ခန္ဓော၊ သဗ္ဗဉ္စ ရူပံ၊ အသင်္ခတာ စ ဓာတု – ဣမေ ဓမ္မာ န ဟေတူ.

၁၀၇၉. ကတမေ ဓမ္မာ သဟေတုကာ? တေဟိ ဓမ္မေဟိ ယေ ဓမ္မာ သဟေတုကာ ဝေဒနာက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ သဟေတုကာ.

၁၀၈၀. ကတမေ ဓမ္မာ အဟေတုကာ? တေဟိ ဓမ္မေဟိ ယေ ဓမ္မာ အဟေတုကာ ဝေဒနာက္ခန္ဓော။ပေ။ ဝိညာဏက္ခန္ဓော၊ သဗ္ဗဉ္စ ရူပံ၊ အသင်္ခတာ စ ဓာတု – ဣမေ ဓမ္မာ အဟေတုကာ.

၁၀၈၁. ကတမေ ဓမ္မာ ဟေတုသမ္ပယုတ္တာ? တေဟိ ဓမ္မေဟိ ယေ ဓမ္မာ သမ္ပယုတ္တာ ဝေဒနာက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ ဟေတုသမ္ပယုတ္တာ.

၁၀၈၂. ကတမေ ဓမ္မာ ဟေတုဝိပ္ပယုတ္တာ? တေဟိ ဓမ္မေဟိ ယေ ဓမ္မာ ဝိပ္ပယုတ္တာ ဝေဒနာက္ခန္ဓော။ပေ။ ဝိညာဏက္ခန္ဓော၊ သဗ္ဗဉ္စ ရူပံ၊ အသင်္ခတာ စ ဓာတု – ဣမေ ဓမ္မာ ဟေတုဝိပ္ပယုတ္တာ.

၁၀၈၃. ကတမေ ဓမ္မာ ဟေတူ စေဝ သဟေတုကာ စ? လောဘော မောဟေန ဟေတု စေဝ သဟေတုကော စ၊ မောဟော လောဘေန ဟေတု စေဝ သဟေတုကော စ၊ ဒေါသော မောဟေန ဟေတု စေဝ သဟေတုကော စ၊ မောဟော ဒေါသေန ဟေတု စေဝ သဟေတုကော စ၊ အလောဘော အဒေါသော အမောဟော၊ တေ အညမညံ ဟေတူ စေဝ သဟေတုကာ စ – ဣမေ ဓမ္မာ ဟေတူ စေဝ သဟေတုကာ စ.

၁၀၈၄. ကတမေ ဓမ္မာ သဟေတုကာ စေဝ န စ ဟေတူ? တေဟိ ဓမ္မေဟိ ယေ ဓမ္မာ သဟေတုကာ တေ ဓမ္မေ ဌပေတွာ၊ ဝေဒနာက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ သဟေတုကာ စေဝ န စ ဟေတူ.

၁၀၈၅. ကတမေ ဓမ္မာ ဟေတူ စေဝ ဟေတုသမ္ပယုတ္တာ စ? လောဘော မောဟေန ဟေတု စေဝ ဟေတုသမ္ပယုတ္တော စ၊ မောဟော လောဘေန ဟေတု စေဝ ဟေတုသမ္ပယုတ္တော စ၊ ဒေါသော မောဟေန ဟေတု စေဝ ဟေတုသမ္ပယုတ္တော စ၊ မောဟော ဒေါသေန ဟေတု စေဝ ဟေတုသမ္ပယုတ္တော စ၊ အလောဘော အဒေါသော အမောဟော၊ တေ အညမညံ ဟေတူ စေဝ ဟေတုသမ္ပယုတ္တာ စ – ဣမေ ဓမ္မာ ဟေတူ စေဝ ဟေတုသမ္ပယုတ္တာ စ.

၁၀၈၆. ကတမေ ဓမ္မာ ဟေတုသမ္ပယုတ္တာ စေဝ န စ ဟေတူ? တေဟိ ဓမ္မေဟိ ယေ ဓမ္မာ သမ္ပယုတ္တာ တေ ဓမ္မေ ဌပေတွာ၊ ဝေဒနာက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ ဟေတုသမ္ပယုတ္တာ စေဝ န စ ဟေတူ.

၁၀၈၇. ကတမေ ဓမ္မာ န ဟေတူ သဟေတုကာ? တေဟိ ဓမ္မေဟိ ယေ ဓမ္မာ န ဟေတူ သဟေတုကာ ဝေဒနာက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ န ဟေတူ သဟေတုကာ.

၁၀၈၈. ကတမေ ဓမ္မာ န ဟေတူ အဟေတုကာ? တေဟိ ဓမ္မေဟိ ယေ ဓမ္မာ န ဟေတူ အဟေတုကာ ဝေဒနာက္ခန္ဓော။ပေ။ ဝိညာဏက္ခန္ဓော၊ သဗ္ဗဉ္စ ရူပံ၊ အသင်္ခတာ စ ဓာတု – ဣမေ ဓမ္မာ န ဟေတူ အဟေတုကာ.

စူဠန္တရဒုကံ

၁၀၈၉. ကတမေ ဓမ္မာ သပ္ပစ္စယာ? ပဉ္စက္ခန္ဓာ – ရူပက္ခန္ဓော၊ ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော၊ ဝိညာဏက္ခန္ဓော – ဣမေ ဓမ္မာ သပ္ပစ္စယာ.

၁၀၉၀. ကတမေ ဓမ္မာ အပ္ပစ္စယာ? အသင်္ခတာ ဓာတု – ဣမေ ဓမ္မာ အပ္ပစ္စယာ.

၁၀၉၁. ကတမေ ဓမ္မာ သင်္ခတာ? ယေဝ တေ ဓမ္မာ သပ္ပစ္စယာ၊ တေဝ တေ ဓမ္မာ သင်္ခတာ.

၁၀၉၂. ကတမေ ဓမ္မာ အသင်္ခတာ? ယော ဧဝ သော ဓမ္မော အပ္ပစ္စယော၊ သော ဧဝ သော ဓမ္မော အသင်္ခတော.

၁၀၉၃. ကတမေ ဓမ္မာ သနိဒဿနာ? ရူပါယတနံ – ဣမေ ဓမ္မာ သနိဒဿနာ.

၁၀၉၄. ကတမေ ဓမ္မာ အနိဒဿနာ? စက္ခာယတနံ။ပေ။ ဖောဋ္ဌဗ္ဗာယတနံ၊ ဝေဒနာက္ခန္ဓော။ပေ။ ဝိညာဏက္ခန္ဓော၊ ယဉ္စ ရူပံ အနိဒဿနံ အပ္ပဋိဃံ ဓမ္မာယတနပရိယာပန္နံ၊ အသင်္ခတာ စ ဓာတု – ဣမေ ဓမ္မာ အနိဒဿနာ.

၁၀၉၅. ကတမေ ဓမ္မာ သပ္ပဋိဃာ? စက္ခာယတနံ။ပေ။ ဖောဋ္ဌဗ္ဗာယတနံ – ဣမေ ဓမ္မာ သပ္ပဋိဃာ.

၁၀၉၆. ကတမေ ဓမ္မာ အပ္ပဋိဃာ? ဝေဒနာက္ခန္ဓော။ပေ။ ဝိညာဏက္ခန္ဓော၊ ယဉ္စ ရူပံ အနိဒဿနံ အပ္ပဋိဃံ ဓမ္မာယတနပရိယာပန္နံ၊ အသင်္ခတာ စ ဓာတု – ဣမေ ဓမ္မာ အပ္ပဋိဃာ.

၁၀၉၇. ကတမေ ဓမ္မာ ရူပိနော? စတ္တာရော စ မဟာဘူတာ စတုန္နဉ္စ မဟာဘူတာနံ ဥပါဒါယ ရူပံ – ဣမေ ဓမ္မာ ရူပိနော.

၁၀၉၈. ကတမေ ဓမ္မာ အရူပိနော? ဝေဒနာက္ခန္ဓော။ပေ။ ဝိညာဏက္ခန္ဓော၊ အသင်္ခတာ စ ဓာတု – ဣမေ ဓမ္မာ အရူပိနော.

၁၀၉၉. ကတမေ ဓမ္မာ လောကိယာ? သာသဝါ ကုသလာကုသလာဗျာကတာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ ရူပက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ လောကိယာ.

၁၁၀၀. ကတမေ ဓမ္မာ လောကုတ္တရာ? အပရိယာပန္နာ မဂ္ဂါ စ၊ မဂ္ဂဖလာနိ စ၊ အသင်္ခတာ စ ဓာတု – ဣမေ ဓမ္မာ လောကုတ္တရာ.

၁၁၀၁. ကတမေ ဓမ္မာ ကေနစိ ဝိညေယျာ၊ ကေနစိ န ဝိညေယျာ? ယေ တေ ဓမ္မာ စက္ခုဝိညေယျာ၊ န တေ ဓမ္မာ သောတဝိညေယျာ၊ ယေ ဝါ ပန တေ ဓမ္မာ သောတဝိညေယျာ၊ န တေ ဓမ္မာ စက္ခုဝိညေယျာ. ယေ တေ ဓမ္မာ စက္ခုဝိညေယျာ၊ န တေ ဓမ္မာ ဃာနဝိညေယျာ၊ ယေ ဝါ ပန တေ ဓမ္မာ ဃာနဝိညေယျာ၊ န တေ ဓမ္မာ စက္ခုဝိညေယျာ. ယေ တေ ဓမ္မာ စက္ခုဝိညေယျာ၊ န တေ ဓမ္မာ ဇိဝှါဝိညေယျာ၊ ယေ ဝါ ပန တေ ဓမ္မာ ဇိဝှါဝိညေယျာ၊ န တေ ဓမ္မာ စက္ခုဝိညေယျာ. ယေ တေ ဓမ္မာ စက္ခုဝိညေယျာ၊ န တေ ဓမ္မာ ကာယဝိညေယျာ၊ ယေ ဝါ ပန တေ ဓမ္မာ ကာယဝိညေယျာ၊ န တေ ဓမ္မာ စက္ခုဝိညေယျာ. ယေ တေ ဓမ္မာ သောတဝိညေယျာ၊ န တေ ဓမ္မာ ဃာနဝိညေယျာ၊ ယေ ဝါ ပန တေ ဓမ္မာ ဃာနဝိညေယျာ၊ န တေ ဓမ္မာ သောတဝိညေယျာ. ယေ တေ ဓမ္မာ သောတဝိညေယျာ၊ န တေ ဓမ္မာ ဇိဝှါဝိညေယျာ၊ ယေ ဝါ ပန တေ ဓမ္မာ ဇိဝှါဝိညေယျာ၊ န တေ ဓမ္မာ သောတဝိညေယျာ. ယေ တေ ဓမ္မာ သောတဝိညေယျာ၊ န တေ ဓမ္မာ ကာယဝိညေယျာ၊ ယေ ဝါ ပန တေ ဓမ္မာ ကာယဝိညေယျာ န တေ ဓမ္မာ သောတဝိညေယျာ. ယေ တေ ဓမ္မာ သောတဝိညေယျာ၊ န တေ ဓမ္မာ စက္ခုဝိညေယျာ၊ ယေ ဝါ ပန တေ ဓမ္မာ စက္ခုဝိညေယျာ၊ န တေ ဓမ္မာ သောတဝိညေယျာ. ယေ တေ ဓမ္မာ ဃာနဝိညေယျာ၊ န တေ ဓမ္မာ ဇိဝှါဝိညေယျာ၊ ယေ ဝါ ပန တေ ဓမ္မာ ဇိဝှါဝိညေယျာ၊ န တေ ဓမ္မာ ဃာနဝိညေယျာ. ယေ တေ ဓမ္မာ ဃာနဝိညေယျာ၊ န တေ ဓမ္မာ ကာယဝိညေယျာ၊ ယေ ဝါ ပန တေ ဓမ္မာ ကာယဝိညေယျာ၊ န တေ ဓမ္မာ ဃာနဝိညေယျာ. ယေ တေ ဓမ္မာ ဃာနဝိညေယျာ၊ န တေ ဓမ္မာ စက္ခုဝိညေယျာ၊ ယေ ဝါ ပန တေ ဓမ္မာ စက္ခုဝိညေယျာ၊ န တေ ဓမ္မာ ဃာနဝိညေယျာ. ယေ တေ ဓမ္မာ ဃာနဝိညေယျာ၊ န တေ ဓမ္မာ သောတဝိညေယျာ၊ ယေ ဝါ ပန တေ ဓမ္မာ သောတဝိညေယျာ၊ န တေ ဓမ္မာ ဃာနဝိညေယျာ. ယေ တေ ဓမ္မာ ဇိဝှါဝိညေယျာ၊ န တေ ဓမ္မာ ကာယဝိညေယျာ၊ ယေ ဝါ ပန တေ ဓမ္မာ ကာယဝိညေယျာ၊ န တေ ဓမ္မာ ဇိဝှါဝိညေယျာ. ယေ တေ ဓမ္မာ ဇိဝှါဝိညေယျာ၊ န တေ ဓမ္မာ စက္ခုဝိညေယျာ၊ ယေ ဝါ ပန တေ ဓမ္မာ စက္ခုဝိညေယျာ၊ န တေ ဓမ္မာ ဇိဝှါဝိညေယျာ. ယေ တေ ဓမ္မာ ဇိဝှါဝိညေယျာ၊ န တေ ဓမ္မာ သောတဝိညေယျာ၊ ယေ ဝါ ပန တေ ဓမ္မာ သောတဝိညေယျာ၊ န တေ ဓမ္မာ ဇိဝှါဝိညေယျာ. ယေ တေ ဓမ္မာ ဇိဝှါဝိညေယျာ၊ န တေ ဓမ္မာ ဃာနဝိညေယျာ၊ ယေ ဝါ ပန တေ ဓမ္မာ ဃာနဝိညေယျာ၊ န တေ ဓမ္မာ ဇိဝှါဝိညေယျာ. ယေ တေ ဓမ္မာ ကာယဝိညေယျာ၊ န တေ ဓမ္မာ စက္ခုဝိညေယျာ၊ ယေ ဝါ ပန တေ ဓမ္မာ စက္ခုဝိညေယျာ၊ န တေ ဓမ္မာ ကာယဝိညေယျာ. ယေ တေ ဓမ္မာ ကာယဝိညေယျာ၊ န တေ ဓမ္မာ သောတဝိညေယျာ၊ ယေ ဝါ ပန တေ ဓမ္မာ သောတဝိညေယျာ၊ န တေ ဓမ္မာ ကာယဝိညေယျာ. ယေ တေ ဓမ္မာ ကာယဝိညေယျာ၊ န တေ ဓမ္မာ ဃာနဝိညေယျာ၊ ယေ ဝါ ပန တေ ဓမ္မာ ဃာနဝိညေယျာ၊ န တေ ဓမ္မာ ကာယဝိညေယျာ. ယေ တေ ဓမ္မာ ကာယဝိညေယျာ၊ န တေ ဓမ္မာ ဇိဝှါဝိညေယျာ၊ ယေ ဝါ ပန တေ ဓမ္မာ ဇိဝှါဝိညေယျာ၊ န တေ ဓမ္မာ ကာယဝိညေယျာ. ဣမေ ဓမ္မာ ကေနစိ ဝိညေယျာ ကေနစိ န ဝိညေယျာ.

အာသဝဂေါစ္ဆကံ

၁၁၀၂. ကတမေ ဓမ္မာ အာသဝါ? စတ္တာရော အာသဝါ – ကာမာသဝေါ၊ ဘဝါသဝေါ၊ ဒိဋ္ဌာသဝေါ၊ အဝိဇ္ဇာသဝေါ.

၁၁၀၃. တတ္ထ ကတမော ကာမာသဝေါ? ယော ကာမေသု ကာမစ္ဆန္ဒော ကာမရာဂေါ ကာမနန္ဒီ ကာမတဏှာ ကာမသိနေဟော ကာမပရိဠာဟော ကာမမုစ္ဆာ ကာမဇ္ဈောသာနံ – အယံ ဝုစ္စတိ ကာမာသဝေါ.

၁၁၀၄. တတ္ထ ကတမော ဘဝါသဝေါ? ယော ဘဝေသု ဘဝဆန္ဒော [ဘဝစ္ဆန္ဒော (သီ. သျာ.)] ဘဝရာဂေါ ဘဝနန္ဒီ ဘဝတဏှာ ဘဝသိနေဟော ဘဝပရိဠာဟော ဘဝမုစ္ဆာ ဘဝဇ္ဈောသာနံ – အယံ ဝုစ္စတိ ဘဝါသဝေါ.

၁၁၀၅. တတ္ထ ကတမော ဒိဋ္ဌာသဝေါ? သဿတော လောကောတိ ဝါ၊ အသဿတော လောကောတိ ဝါ၊ အန္တဝါ လောကောတိ ဝါ၊ အနန္တဝါ လောကောတိ ဝါ၊ တံ ဇီဝံ တံ သရီရန္တိ ဝါ၊ အညံ ဇီဝံ အညံ သရီရန္တိ ဝါ၊ ဟောတိ တထာဂတော ပရံ မရဏာတိ ဝါ၊ န ဟောတိ တထာဂတော ပရံ မရဏာတိ ဝါ၊ ဟောတိ စ န စ ဟောတိ တထာဂတော ပရံ မရဏာတိ ဝါ၊ နေဝ ဟောတိ န န ဟောတိ တထာဂတော ပရံ မရဏာတိ ဝါ၊ ယာ ဧဝရူပါ ဒိဋ္ဌိ ဒိဋ္ဌိဂတံ ဒိဋ္ဌိဂဟနံ ဒိဋ္ဌိကန္တာရော ဒိဋ္ဌိဝိသူကာယိကံ ဒိဋ္ဌိဝိပ္ဖန္ဒိတံ ဒိဋ္ဌိသံယောဇနံ ဂါဟော ပဋိဂ္ဂါဟော အဘိနိဝေသော ပရာမာသော ကုမ္မဂ္ဂေါ မိစ္ဆာပထော မိစ္ဆတ္တံ တိတ္ထာယတနံ ဝိပရိယာသဂ္ဂါဟော – အယံ ဝုစ္စတိ ဒိဋ္ဌာသဝေါ. သဗ္ဗာပိ မိစ္ဆာဒိဋ္ဌိ ဒိဋ္ဌာသဝေါ.

၁၁၀၆. တတ္ထ ကတမော အဝိဇ္ဇာသဝေါ? ဒုက္ခေ အညာဏံ၊ ဒုက္ခသမုဒယေ အညာဏံ၊ ဒုက္ခနိရောဓေ အညာဏံ၊ ဒုက္ခနိရောဓဂါမိနိယာ ပဋိပဒါယ အညာဏံ၊ ပုဗ္ဗန္တေ အညာဏံ၊ အပရန္တေ အညာဏံ၊ ပုဗ္ဗန္တာပရန္တေ အညာဏံ၊ ဣဒပ္ပစ္စယတာ ပဋိစ္စသမုပ္ပန္နေသု ဓမ္မေသု အညာဏံः ယံ ဧဝရူပံ အညာဏံ အဒဿနံ အနဘိသမယော အနနုဗောဓော အသမ္ဗောဓော အပ္ပဋိဝေဓော အသံဂါဟနာ အပရိယောဂါဟနာ အသမပေက္ခနာ အပစ္စဝေက္ခဏာ အပစ္စက္ခကမ္မံ ဒုမ္မေဇ္ဈံ ဗာလျံ အသမ္ပဇညံ မောဟော ပမောဟော သမ္မောဟော အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာနုသယော အဝိဇ္ဇာပရိယုဋ္ဌာနံ အဝိဇ္ဇာလင်္ဂီ မောဟော အကုသလမူလံ – အယံ ဝုစ္စတိ အဝိဇ္ဇာသဝေါ.

ဣမေ ဓမ္မာ အာသဝါ.

၁၁၀၇. ကတမေ ဓမ္မာ နော အာသဝါ? တေ ဓမ္မေ ဌပေတွာ အဝသေသာ ကုသလာကုသလာဗျာကတာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ အပရိယာပန္နာ ဝေဒနာက္ခန္ဓော။ပေ။ ဝိညာဏက္ခန္ဓော၊ သဗ္ဗဉ္စ ရူပံ အသင်္ခတာ စ ဓာတု – ဣမေ ဓမ္မာ နော အာသဝါ.

၁၁၀၈. ကတမေ ဓမ္မာ သာသဝါ? ကုသလာကုသလာဗျာကတာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ ရူပက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ သာသဝါ.

၁၁၀၉. ကတမေ ဓမ္မာ အနာသဝါ? အပရိယာပန္နာ မဂ္ဂါ စ မဂ္ဂဖလာနိ စ၊ အသင်္ခတာ စ ဓာတု – ဣမေ ဓမ္မာ အနာသဝါ.

၁၁၁၀. ကတမေ ဓမ္မာ အာသဝသမ္ပယုတ္တာ? တေဟိ ဓမ္မေဟိ ယေ ဓမ္မာ သမ္ပယုတ္တာ ဝေဒနာက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ အာသဝသမ္ပယုတ္တာ.

၁၁၁၁. ကတမေ ဓမ္မာ အာသဝဝိပ္ပယုတ္တာ? တေဟိ ဓမ္မေဟိ ယေ ဓမ္မာ ဝိပ္ပယုတ္တာ ဝေဒနာက္ခန္ဓော။ပေ။ ဝိညာဏက္ခန္ဓော၊ သဗ္ဗဉ္စ ရူပံ၊ အသင်္ခတာ စ ဓာတု – ဣမေ ဓမ္မာ အာသဝဝိပ္ပယုတ္တာ.

၁၁၁၂. ကတမေ ဓမ္မာ အာသဝါ စေဝ သာသဝါ စ? တေယေဝ အာသဝါ အာသဝါ စေဝ သာသဝါ စ.

၁၁၁၃. ကတမေ ဓမ္မာ သာသဝါ စေဝ နော စ အာသဝါ? တေဟိ ဓမ္မေဟိ ယေ ဓမ္မာ သာသဝါ၊ တေ ဓမ္မေ ဌပေတွာ အဝသေသာ သာသဝါ ကုသလာကုသလာဗျာကတာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ ရူပက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ သာသဝါ စေဝ နော စ အာသဝါ.

၁၁၁၄. ကတမေ ဓမ္မာ အာသဝါ စေဝ အာသဝသမ္ပယုတ္တာ စ? ကာမာသဝေါ အဝိဇ္ဇာသဝေန အာသဝေါ စေဝ အာသဝသမ္ပယုတ္တော စ၊ အဝိဇ္ဇာသဝေါ ကာမာသဝေန အာသဝေါ စေဝ အာသဝသမ္ပယုတ္တော စ၊ ဘဝါသဝေါ အဝိဇ္ဇာသဝေန အာသဝေါ စေဝ အာသဝသမ္ပယုတ္တော စ၊ အဝိဇ္ဇာသဝေါ ဘဝါသဝေန အာသဝေါ စေဝ အာသဝသမ္ပယုတ္တော စ၊ ဒိဋ္ဌာသဝေါ အဝိဇ္ဇာသဝေန အာသဝေါ စေဝ အာသဝသမ္ပယုတ္တော စ၊ အဝိဇ္ဇာသဝေါ ဒိဋ္ဌာသဝေန အာသဝေါ စေဝ အာသဝသမ္ပယုတ္တော စ – ဣမေ ဓမ္မာ အာသဝါ စေဝ အာသဝသမ္ပယုတ္တာ စ.

၁၁၁၅. ကတမေ ဓမ္မာ အာသဝသမ္ပယုတ္တာ စေဝ နော စ အာသဝါ? တေဟိ ဓမ္မေဟိ ယေ ဓမ္မာ သမ္ပယုတ္တာ၊ တေ ဓမ္မေ ဌပေတွာ ဝေဒနာက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ အာသဝသမ္ပယုတ္တာ စေဝ နော စ အာသဝါ.

၁၁၁၆. ကတမေ ဓမ္မာ အာသဝဝိပ္ပယုတ္တာ သာသဝါ? တေဟိ ဓမ္မေဟိ ယေ ဓမ္မာ ဝိပ္ပယုတ္တာ သာသဝါ ကုသလာကုသလာဗျာကတာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ ရူပက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ အာသဝဝိပ္ပယုတ္တာ သာသဝါ.

၁၁၁၇. ကတမေ ဓမ္မာ အာသဝဝိပ္ပယုတ္တာ အနာသဝါ? အပရိယာပန္နာ မဂ္ဂါ စ၊ မဂ္ဂဖလာနိ စ၊ အသင်္ခတာ စ ဓာတု – ဣမေ ဓမ္မာ အာသဝဝိပ္ပယုတ္တာ အနာသဝါ.

နိက္ခေပကဏ္ဍေ ပဌမဘာဏဝါရော.

သံယောဇနဂေါစ္ဆကံ

၁၁၁၈. ကတမေ ဓမ္မာ သံယောဇနာ? ဒသ သံယောဇနာနိ – ကာမရာဂသံယောဇနံ၊ ပဋိဃသံယောဇနံ၊ မာနသံယောဇနံ၊ ဒိဋ္ဌိသံယောဇနံ၊ ဝိစိကိစ္ဆာသံယောဇနံ၊ သီလဗ္ဗတပရာမာသသံယောဇနံ၊ ဘဝရာဂသံယောဇနံ၊ ဣဿာသံယောဇနံ၊ မစ္ဆရိယသံယောဇနံ၊ အဝိဇ္ဇာသံယောဇနံ.

၁၁၁၉. တတ္ထ ကတမံ ကာမရာဂသံယောဇနံ? ယော ကာမေသု ကာမစ္ဆန္ဒော ကာမရာဂေါ ကာမနန္ဒီ ကာမတဏှာ ကာမသိနေဟော ကာမပရိဠာဟော ကာမမုစ္ဆာ ကာမဇ္ဈောသာနံ – ဣဒံ ဝုစ္စတိ ကာမရာဂသံယောဇနံ.

၁၁၂၀. တတ္ထ ကတမံ ပဋိဃသံယောဇနံ? အနတ္ထံ မေ အစရီတိ အာဃာတော ဇာယတိ၊ အနတ္ထံ မေ စရတီတိ အာဃာတော ဇာယတိ၊ အနတ္ထံ မေ စရိဿတီတိ အာဃာတော ဇာယတိ၊ ပိယဿ မေ မနာပဿ အနတ္ထံ အစရိ။ပေ။ အနတ္ထံ စရတိ။ပေ။ အနတ္ထံ စရိဿတီတိ အာဃာတော ဇာယတိ၊ အပ္ပိယဿ မေ အမနာပဿ အတ္ထံ အစရိ။ပေ။ အတ္ထံ စရတိ။ပေ။ အတ္ထံ စရိဿတီတိ အာဃာတော ဇာယတိ၊ အဋ္ဌာနေ ဝါ ပန အာဃာတော ဇာယတိ. ယော ဧဝရူပေါ စိတ္တဿ အာဃာတော ပဋိဃာတော ပဋိဃံ ပဋိဝိရောဓော ကောပေါ ပကောပေါ သမ္ပကောပေါ ဒေါသော ပဒေါသော သမ္ပဒေါသော စိတ္တဿ ဗျာပတ္တိ မနောပဒေါသော ကောဓော ကုဇ္ဈနာ ကုဇ္ဈိတတ္တံ ဒေါသော ဒုဿနာ ဒုဿိတတ္တံ ဗျာပတ္တိ ဗျာပဇ္ဇနာ ဗျာပဇ္ဇိတတ္တံ ဝိရောဓော ပဋိဝိရောဓော စဏ္ဍိက္ကံ အသုရောပေါ အနတ္တမနတာ စိတ္တဿ – ဣဒံ ဝုစ္စတိ ပဋိဃသံယောဇနံ.

၁၁၂၁. တတ္ထ ကတမံ မာနသံယောဇနံ? သေယျောဟမသ္မီတိ မာနော၊ သဒိသောဟမသ္မီတိ မာနော၊ ဟီနောဟမသ္မီတိ မာနော. ယော ဧဝရူပေါ မာနော မညနာ မညိတတ္တံ ဥန္နတိ ဥန္နမော [ဥဏ္ဏတိ ဥဏ္ဏာမော (သျာ.)] ဓဇော သမ္ပဂ္ဂါဟော ကေတုကမျတာ စိတ္တဿ – ဣဒံ ဝုစ္စတိ မာနသံယောဇနံ.

၁၁၂၂. တတ္ထ ကတမံ ဒိဋ္ဌိသံယောဇနံ? သဿတော လောကောတိ ဝါ၊ အသဿတော လောကောတိ ဝါ၊ အန္တဝါ လောကောတိ ဝါ၊ အနန္တဝါ လောကောတိ ဝါ၊ တံ ဇီဝံ တံ သရီရန္တိ ဝါ၊ အညံ ဇီဝံ အညံ သရီရန္တိ ဝါ၊ ဟောတိ တထာဂတော ပရံ မရဏာတိ ဝါ၊ န ဟောတိ တထာဂတော ပရံ မရဏာတိ ဝါ၊ ဟောတိ စ န စ ဟောတိ တထာဂတော ပရံ မရဏာတိ ဝါ၊ နေဝ ဟောတိ န န ဟောတိ တထာဂတော ပရံ မရဏာတိ ဝါ၊ ယာ ဧဝရူပါ ဒိဋ္ဌိ ဒိဋ္ဌိဂတံ ဒိဋ္ဌိဂဟနံ ဒိဋ္ဌိကန္တာရော ဒိဋ္ဌိဝိသူကာယိကံ ဒိဋ္ဌိဝိပ္ဖန္ဒိတံ ဒိဋ္ဌိသံယောဇနံ ဂါဟော ပဋိဂ္ဂါဟော အဘိနိဝေသော ပရာမာသော ကုမ္မဂ္ဂေါ မိစ္ဆာပထော မိစ္ဆတ္တံ တိတ္ထာယတနံ ဝိပရိယာသဂ္ဂါဟော – ဣဒံ ဝုစ္စတိ ဒိဋ္ဌိသံယောဇနံ. ဌပေတွာ သီလဗ္ဗတပရာမာသသံယောဇနံ သဗ္ဗာပိ မိစ္ဆာဒိဋ္ဌိ ဒိဋ္ဌိသံယောဇနံ.

၁၁၂၃. တတ္ထ ကတမံ ဝိစိကိစ္ဆာသံယောဇနံ? သတ္ထရိ ကင်္ခတိ ဝိစိကိစ္ဆတိ၊ ဓမ္မေ ကင်္ခတိ ဝိစိကိစ္ဆတိ၊ သံဃေ ကင်္ခတိ ဝိစိကိစ္ဆတိ၊ သိက္ခာယ ကင်္ခတိ ဝိစိကိစ္ဆတိ၊ ပုဗ္ဗန္တေ ကင်္ခတိ ဝိစိကိစ္ဆတိ၊ အပရန္တေ ကင်္ခတိ ဝိစိကိစ္ဆတိ၊ ပုဗ္ဗန္တာပရန္တေ ကင်္ခတိ ဝိစိကိစ္ဆတိ၊ ဣဒပ္ပစ္စယတာ ပဋိစ္စသမုပ္ပန္နေသု ဓမ္မေသု ကင်္ခတိ ဝိစိကိစ္ဆတိः ယာ ဧဝရူပါ ကင်္ခါ ကင်္ခါယနာ ကင်္ခါယိတတ္တံ ဝိမတိ ဝိစိကိစ္ဆာ ဒွေဠှကံ ဒွေဓာပထော သံသယော အနေကံသဂ္ဂါဟော အာသပ္ပနာ ပရိသပ္ပနာ အပရိယောဂါဟနာ ထမ္ဘိတတ္တံ စိတ္တဿ မနောဝိလေခေါ – ဣဒံ ဝုစ္စတိ ဝိစိကိစ္ဆာသံယောဇနံ.

၁၁၂၄. တတ္ထ ကတမံ သီလဗ္ဗတပရာမာသသံယောဇနံ? ဣတော ဗဟိဒ္ဓါ သမဏဗြာဟ္မဏာနံ သီလေန သုဒ္ဓိ ဝတေန သုဒ္ဓိ သီလဗ္ဗတေန သုဒ္ဓီတိ၊ ယာ ဧဝရူပါ ဒိဋ္ဌိ ဒိဋ္ဌိဂတံ ဒိဋ္ဌိဂဟနံ ဒိဋ္ဌိကန္တာရော ဒိဋ္ဌိဝိသူကာယိကံ ဒိဋ္ဌိဝိပ္ဖန္ဒိတံ ဒိဋ္ဌိသံယောဇနံ ဂါဟော ပတိဋ္ဌာဟော အဘိနိဝေသော ပရာမာသော ကုမ္မဂ္ဂေါ မိစ္ဆာပထော မိစ္ဆတ္တံ တိတ္ထာယတနံ ဝိပရိယာသဂ္ဂါဟော – ဣဒံ ဝုစ္စတိ သီလဗ္ဗတပရာမာသသံယောဇနံ.

၁၁၂၅. တတ္ထ ကတမံ ဘဝရာဂသံယောဇနံ? ယော ဘဝေသု ဘဝဆန္ဒော ဘဝရာဂေါ ဘဝနန္ဒီ ဘဝတဏှာ ဘဝသိနေဟော ဘဝပရိဠာဟော ဘဝမုစ္ဆာ ဘဝဇ္ဈောသာနံ – ဣဒံ ဝုစ္စတိ ဘဝရာဂသံယောဇနံ.

၁၁၂၆. တတ္ထ ကတမံ ဣဿာသံယောဇနံ? ယာ ပရလာဘသက္ကာရဂရုကာရမာနနဝန္ဒနပူဇနာသု ဣဿာ ဣဿာယနာ ဣဿာယိတတ္တံ ဥသူယာ ဥသူယနာ ဥသူယိတတ္တံ [ဥဿုယာ ဥဿုယနာ ဥဿုယိတတ္တံ (က.)] – ဣဒံ ဝုစ္စတိ ဣဿာသံယောဇနံ.

၁၁၂၇. တတ္ထ ကတမံ မစ္ဆရိယသံယောဇနံ? ပဉ္စ မစ္ဆရိယာနိ – အာဝါသမစ္ဆရိယံ၊ ကုလမစ္ဆရိယံ၊ လာဘမစ္ဆရိယံ၊ ဝဏ္ဏမစ္ဆရိယံ၊ ဓမ္မမစ္ဆရိယံ. ယံ ဧဝရူပံ မစ္ဆေရံ မစ္ဆရာယနာ မစ္ဆရာယိတတ္တံ ဝေဝိစ္ဆံ ကဒရိယံ ကဋုကဉ္စုကတာ အဂ္ဂဟိတတ္တံ စိတ္တဿ – ဣဒံ ဝုစ္စတိ မစ္ဆရိယသံယောဇနံ.

၁၁၂၈. တတ္ထ ကတမံ အဝိဇ္ဇာသံယောဇနံ? ဒုက္ခေ အညာဏံ၊ ဒုက္ခသမုဒယေ အညာဏံ၊ ဒုက္ခနိရောဓေ အညာဏံ၊ ဒုက္ခနိရောဓဂါမိနိယာ ပဋိပဒါယ အညာဏံ၊ ပုဗ္ဗန္တေ အညာဏံ၊ အပရန္တေ အညာဏံ၊ ပုဗ္ဗန္တာပရန္တေ အညာဏံ၊ ဣဒပ္ပစ္စယတာ ပဋိစ္စသမုပ္ပန္နေသု ဓမ္မေသု အညာဏံः ယံ ဧဝရူပံ အညာဏံ အဒဿနံ အနဘိသမယော အနနုဗောဓော အသမ္ဗောဓော အပ္ပဋိဝေဓော အသံဂါဟနာ အပရိယောဂါဟနာ အသမပေက္ခနာ အပစ္စဝေက္ခဏာ အပစ္စက္ခကမ္မံ ဒုမ္မေဇ္ဈံ ဗာလျံ အသမ္ပဇညံ မောဟော ပမောဟော သမ္မောဟော အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာနုသယော အဝိဇ္ဇာပရိယုဋ္ဌာနံ အဝိဇ္ဇာလင်္ဂီ မောဟော အကုသလမူလံ – ဣဒံ ဝုစ္စတိ အဝိဇ္ဇာသံယောဇနံ.

ဣမေ ဓမ္မာ သံယောဇနာ.

၁၁၂၉. ကတမေ ဓမ္မာ နော သံယောဇနာ? တေ ဓမ္မေ ဌပေတွာ အဝသေသာ ကုသလာကုသလာဗျာကတာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ အပရိယာပန္နာ၊ ဝေဒနာက္ခန္ဓော။ပေ။ ဝိညာဏက္ခန္ဓော၊ သဗ္ဗဉ္စ ရူပံ၊ အသင်္ခတာ စ ဓာတု – ဣမေ ဓမ္မာ နော သံယောဇနာ.

၁၁၃၀. ကတမေ ဓမ္မာ သံယောဇနိယာ? သာသဝါ ကုသလာကုသလာဗျာကတာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ ရူပက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ သံယောဇနိယာ.

၁၁၃၁. ကတမေ ဓမ္မာ အသံယောဇနိယာ? အပရိယာပန္နာ မဂ္ဂါ စ၊ မဂ္ဂဖလာနိ စ၊ အသင်္ခတာ စ ဓာတု – ဣမေ ဓမ္မာ အသံယောဇနိယာ.

၁၁၃၂. ကတမေ ဓမ္မာ သံယောဇနသမ္ပယုတ္တာ? တေဟိ ဓမ္မေဟိ ယေ ဓမ္မာ သမ္ပယုတ္တာ ဝေဒနာက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ သံယောဇနသမ္ပယုတ္တာ.

၁၁၃၃. ကတမေ ဓမ္မာ သံယောဇနဝိပ္ပယုတ္တာ? တေဟိ ဓမ္မေဟိ ယေ ဓမ္မာ ဝိပ္ပယုတ္တာ ဝေဒနာက္ခန္ဓော။ပေ။ ဝိညာဏက္ခန္ဓော၊ သဗ္ဗဉ္စ ရူပံ၊ အသင်္ခတာ စ ဓာတု – ဣမေ ဓမ္မာ သံယောဇနဝိပ္ပယုတ္တာ.

၁၁၃၄. ကတမေ ဓမ္မာ သံယောဇနာ စေဝ သံယောဇနိယာ စ? တာနေဝ သံယောဇနာနိ သံယောဇနာ စေဝ သံယောဇနိယာ စ.

၁၁၃၅. ကတမေ ဓမ္မာ သံယောဇနိယာ စေဝ နော စ သံယောဇနာ? တေဟိ ဓမ္မေဟိ ယေ ဓမ္မာ သံယောဇနိယာ၊ တေ ဓမ္မေ ဌပေတွာ အဝသေသာ သာသဝါ ကုသလာကုသလာဗျာကတာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ ရူပက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ သံယောဇနိယာ စေဝ နော စ သံယောဇနာ.

၁၁၃၆. ကတမေ ဓမ္မာ သံယောဇနာ စေဝ သံယောဇနသမ္ပယုတ္တာ စ? ကာမရာဂသံယောဇနံ အဝိဇ္ဇာသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ၊ အဝိဇ္ဇာသံယောဇနံ ကာမရာဂသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ၊ ပဋိဃသံယောဇနံ အဝိဇ္ဇာသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ၊ အဝိဇ္ဇာသံယောဇနံ ပဋိဃသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ၊ မာနသံယောဇနံ အဝိဇ္ဇာသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ၊ အဝိဇ္ဇာသံယောဇနံ မာနသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ၊ ဒိဋ္ဌိသံယောဇနံ အဝိဇ္ဇာသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ၊ အဝိဇ္ဇာသံယောဇနံ ဒိဋ္ဌိသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ၊ ဝိစိကိစ္ဆာသံယောဇနံ အဝိဇ္ဇာသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ၊ အဝိဇ္ဇာသံယောဇနံ ဝိစိကိစ္ဆာသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ၊ သီလဗ္ဗတပရာမာသသံယောဇနံ အဝိဇ္ဇာသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ၊ အဝိဇ္ဇာသံယောဇနံ သီလဗ္ဗတပရာမာသသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ၊ ဘဝရာဂသံယောဇနံ အဝိဇ္ဇာသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ၊ အဝိဇ္ဇာသံယောဇနံ ဘဝရာဂသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ၊ ဣဿာသံယောဇနံ အဝိဇ္ဇာသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ၊ အဝိဇ္ဇာသံယောဇနံ ဣဿာသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ၊ မစ္ဆရိယသံယောဇနံ အဝိဇ္ဇာသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ၊ အဝိဇ္ဇာသံယောဇနံ မစ္ဆရိယသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ – ဣမေ ဓမ္မာ သံယောဇနာ စေဝ သံယောဇနသမ္ပယုတ္တာ စ.

၁၁၃၇. ကတမေ ဓမ္မာ သံယောဇနသမ္ပယုတ္တာ စေဝ နော စ သံယောဇနာ? တေဟိ ဓမ္မေဟိ ယေ ဓမ္မာ သမ္ပယုတ္တာ၊ တေ ဓမ္မေ ဌပေတွာ ဝေဒနာက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ သံယောဇနသမ္ပယုတ္တာ စေဝ နော စ သံယောဇနာ.

၁၁၃၈. ကတမေ ဓမ္မာ သံယောဇနဝိပ္ပယုတ္တာ သံယောဇနိယာ? တေဟိ ဓမ္မေဟိ ယေ ဓမ္မာ ဝိပ္ပယုတ္တာ သာသဝါ ကုသလာကုသလာဗျာကတာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ ရူပက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ သံယောဇနဝိပ္ပယုတ္တာ သံယောဇနိယာ.

၁၁၃၉. ကတမေ ဓမ္မာ သံယောဇနဝိပ္ပယုတ္တာ အသံယောဇနိယာ? အပရိယာပန္နာ မဂ္ဂါ စ၊ မဂ္ဂဖလာနိ စ၊ အသင်္ခတာ စ ဓာတု – ဣမေ ဓမ္မာ သံယောဇနဝိပ္ပယုတ္တာ အသံယောဇနိယာ.

ဂန္ထဂေါစ္ဆကံ

၁၁၄၀. ကတမေ ဓမ္မာ ဂန္ထာ? စတ္တာရော ဂန္ထာ – အဘိဇ္ဈာ ကာယဂန္ထော၊ ဗျာပါဒေါ ကာယဂန္ထော၊ သီလဗ္ဗတပရာမာသော ကာယဂန္ထော၊ ဣဒံ သစ္စာဘိနိဝေသော ကာယဂန္ထော.

၁၁၄၁. တတ္ထ ကတမော အဘိဇ္ဈာ ကာယဂန္ထော? ယော ရာဂေါ သာရာဂေါ အနုနယော အနုရောဓော နန္ဒီ နန္ဒီရာဂေါ စိတ္တဿ သာရာဂေါ ဣစ္ဆာ မုစ္ဆာ အဇ္ဈောသာနံ ဂေဓော ပလိဂေဓော သင်္ဂေါ ပင်္ကော ဧဇာ မာယာ ဇနိကာ သဉ္ဇနနီ သိဗ္ဗိနီ ဇာလိနီ သရိတာ ဝိသတ္တိကာ သုတ္တံ ဝိသဋာ အာယူဟိနီ ဒုတိယာ ပဏိဓိ ဘဝနေတ္တိ ဝနံ ဝနထော သန္ထဝေါ သိနေဟော အပေက္ခာ ပဋိဗန္ဓု အာသာ အာသိသနာ အာသိသိတတ္တံ ရူပါသာ သဒ္ဒါသာ ဂန္ဓာသာ ရသာသာ ဖောဋ္ဌဗ္ဗာသာ လာဘာသာ ဓနာသာ ပုတ္တာသာ ဇီဝိတာသာ ဇပ္ပါ ပဇပ္ပါ အဘိဇပ္ပါ ဇပ္ပါ ဇပ္ပနာ ဇပ္ပိတတ္တံ လောလုပ္ပံ လောလုပ္ပါယနာ လောလုပ္ပါယိတတ္တံ ပုစ္ဆဉ္ဇိကတာ သာဓုကမျတာ အဓမ္မရာဂေါ ဝိသမလောဘော နိကန္တိ နိကာမနာ ပတ္ထနာ ပိဟနာ သမ္ပတ္ထနာ ကာမတဏှာ ဘဝတဏှာ ဝိဘဝတဏှာ ရူပတဏှာ အရူပတဏှာ နိရောဓတဏှာ ရူပတဏှာ သဒ္ဒတဏှာ ဂန္ဓတဏှာ ရသတဏှာ ဖောဋ္ဌဗ္ဗတဏှာ ဓမ္မတဏှာ ဩဃော ယောဂေါ ဂန္ထော ဥပါဒါနံ အာဝရဏံ နီဝရဏံ ဆာဒနံ ဗန္ဓနံ ဥပက္ကိလေသော အနုသယော ပရိယုဋ္ဌာနံ လတာ ဝေဝိစ္ဆံ ဒုက္ခမူလံ ဒုက္ခနိဒါနံ ဒုက္ခပ္ပဘဝေါ မာရပါသော မာရဗဠိသံ မာရဝိသယော တဏှာနဒီ တဏှာဇာလံ တဏှာဂဒ္ဒုလံ တဏှာသမုဒ္ဒေါ အဘိဇ္ဈာ လောဘော အကုသလမူလံ – အယံ ဝုစ္စတိ အဘိဇ္ဈာ ကာယဂန္ထော.

၁၁၄၂. တတ္ထ ကတမော ဗျာပါဒေါ ကာယဂန္ထော? အနတ္ထံ မေ အစရီ တိ အာဃာတော ဇာယတိ၊ အနတ္ထံ မေ စရတီတိ အာဃာတော ဇာယတိ၊ အနတ္ထံ မေ စရိဿတီတိ အာဃာတော ဇာယတိ၊ ပိယဿ မေ မနာပဿ အနတ္ထံ အစရိ။ပေ။ အနတ္ထံ စရတိ။ပေ။ အနတ္ထံ စရိဿတီတိ အာဃာတော ဇာယတိ၊ အပ္ပိယဿ မေ အမနာပဿ အတ္ထံ အစရိ။ပေ။ အတ္ထံ စရတိ။ပေ။ အတ္ထံ စရိဿတီတိ အာဃာတော ဇာယတိ၊ အဋ္ဌာနေ ဝါ ပန အာဃာတော ဇာယတိ. ယော ဧဝရူပေါ စိတ္တဿ အာဃာတော ပဋိဃာတော ပဋိဃံ ပဋိဝိရောဓော ကောပေါ ပကောပေါ သမ္ပကောပေါ ဒေါသော ပဒေါသော သမ္ပဒေါသော စိတ္တဿ ဗျာပတ္တိ မနောပဒေါသော ကောဓော ကုဇ္ဈနာ ကုဇ္ဈိတတ္တံ ဒေါသော ဒုဿနာ ဒုဿိတတ္တံ ဗျာပတ္တိ ဗျာပဇ္ဇနာ ဗျာပဇ္ဇိတတ္တံ ဝိရောဓော ပဋိဝိရောဓော စဏ္ဍိက္ကံ အသုရောပေါ အနတ္တမနတာ စိတ္တဿ – အယံ ဝုစ္စတိ ဗျာပါဒေါ ကာယဂန္ထော.

၁၁၄၃. တတ္ထ ကတမော သီလဗ္ဗတပရာမာသော ကာယဂန္ထော? ဣတော ဗဟိဒ္ဓါ သမဏဗြာဟ္မဏာနံ သီလေန သုဒ္ဓိ၊ ဝတေန သုဒ္ဓိ၊ သီလဗ္ဗတေန သုဒ္ဓီတိः ယာ ဧဝရူပါ ဒိဋ္ဌိ ဒိဋ္ဌိဂတံ ဒိဋ္ဌိဂဟနံ ဒိဋ္ဌိကန္တာရော ဒိဋ္ဌိဝိသူကာယိကံ ဒိဋ္ဌိဝိပ္ဖန္ဒိတံ ဒိဋ္ဌိသံယောဇနံ ဂါဟော ပတိဋ္ဌာဟော အဘိနိဝေသော ပရာမာသော ကုမ္မဂ္ဂေါ မိစ္ဆာပထော မိစ္ဆတ္တံ တိတ္ထာယတနံ ဝိပရိယာသဂ္ဂါဟော – အယံ ဝုစ္စတိ သီလဗ္ဗတပရာမာသော ကာယဂန္ထော.

၁၁၄၄. တတ္ထ ကတမော ဣဒံသစ္စာဘိနိဝေသော ကာယဂန္ထော? သဿတော လောကော၊ ဣဒမေဝ သစ္စံ မောဃမညန္တိ ဝါ၊ အသဿတော လောကော၊ ဣဒမေဝ သစ္စံ မောဃမညန္တိ ဝါ၊ အန္တဝါ လောကော၊ ဣဒမေဝ သစ္စံ မောဃမညန္တိ ဝါ၊ အနန္တဝါ လောကော၊ ဣဒမေဝ သစ္စံ မောဃမညန္တိ ဝါ၊ တံ ဇီဝံ တံ သရီရံ၊ ဣဒမေဝ သစ္စံ မောဃမညန္တိ ဝါ၊ အညံ ဇီဝံ အညံ သရီရံ၊ ဣဒမေဝ သစ္စံ မောဃမညန္တိ ဝါ၊ ဟောတိ တထာဂတော ပရံ မရဏာ၊ ဣဒမေဝ သစ္စံ မောဃမညန္တိ ဝါ၊ န ဟောတိ တထာဂတော ပရံ မရဏာ၊ ဣဒမေဝ သစ္စံ မောဃမညန္တိ ဝါ၊ ဟောတိ စ န စ ဟောတိ တထာဂတော ပရံ မရဏာ၊ ဣဒမေဝ သစ္စံ မောဃမညန္တိ ဝါ၊ နေဝ ဟောတိ န န ဟောတိ တထာဂတော ပရံ မရဏာ၊ ဣဒမေဝ သစ္စံ မောဃမညန္တိ ဝါः ယာ ဧဝရူပါ ဒိဋ္ဌိ ဒိဋ္ဌိဂတံ ဒိဋ္ဌိဂဟနံ ဒိဋ္ဌိကန္တာရော ဒိဋ္ဌိဝိသူကာယိကံ ဒိဋ္ဌိဝိပ္ဖန္ဒိတံ ဒိဋ္ဌိသံယောဇနံ ဂါဟော ပတိဋ္ဌာဟော အဘိနိဝေသော ပရာမာသော ကုမ္မဂ္ဂေါ မိစ္ဆာပထော မိစ္ဆတ္တံ တိတ္ထာယတနံ ဝိပရိယာသဂ္ဂါဟော – အယံ ဝုစ္စတိ ဣဒံသစ္စာဘိနိဝေသော ကာယဂန္ထော. ဌပေတွာ သီလဗ္ဗတပရာမာသံ ကာယဂန္ထံ သဗ္ဗာပိ မိစ္ဆာဒိဋ္ဌိ ဣဒံသစ္စာဘိနိဝေသော ကာယဂန္ထော.

ဣမေ ဓမ္မာ ဂန္ထာ.

၁၁၄၅. ကတမေ ဓမ္မာ နော ဂန္ထာ? တေ ဓမ္မေ ဌပေတွာ အဝသေသာ ကုသလာကုသလာဗျာကတာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ အပရိယာပန္နာ၊ ဝေဒနာက္ခန္ဓော။ပေ။ ဝိညာဏက္ခန္ဓော၊ သဗ္ဗဉ္စ ရူပံ၊ အသင်္ခတာ စ ဓာတု – ဣမေ ဓမ္မာ နော ဂန္ထာ.

၁၁၄၆. ကတမေ ဓမ္မာ ဂန္ထနိယာ? သာသဝါ ကုသလာကုသလာဗျာကတာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ ရူပက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ ဂန္ထနိယာ.

၁၁၄၇. ကတမေ ဓမ္မာ အဂန္ထနိယာ? အပရိယာပန္နာ မဂ္ဂါ စ၊ မဂ္ဂဖလာနိ စ၊ အသင်္ခတာ စ ဓာတု – ဣမေ ဓမ္မာ အဂန္ထနိယာ.

၁၁၄၈. ကတမေ ဓမ္မာ ဂန္ထသမ္ပယုတ္တာ? တေဟိ ဓမ္မေဟိ ယေ ဓမ္မာ သမ္ပယုတ္တာ ဝေဒနာက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ ဂန္ထသမ္ပယုတ္တာ.

၁၁၄၉. ကတမေ ဓမ္မာ ဂန္ထဝိပ္ပယုတ္တာ? တေဟိ ဓမ္မေဟိ ယေ ဓမ္မာ ဝိပ္ပယုတ္တာ ဝေဒနာက္ခန္ဓော။ပေ။ ဝိညာဏက္ခန္ဓော၊ သဗ္ဗဉ္စ ရူပံ အသင်္ခတာ စ ဓာတု – ဣမေ ဓမ္မာ ဂန္ထဝိပ္ပယုတ္တာ.

၁၁၅၀. ကတမေ ဓမ္မာ ဂန္ထာ စေဝ ဂန္ထနိယာ စ? တေဝ ဂန္ထာ ဂန္ထာ စေဝ ဂန္ထနိယာ စ.

၁၁၅၁. ကတမေ ဓမ္မာ ဂန္ထနိယာ စေဝ နော စ ဂန္ထာ? တေဟိ ဓမ္မေဟိ ယေ ဓမ္မာ ဂန္ထနိယာ၊ တေ ဓမ္မေ ဌပေတွာ အဝသေသာ သာသဝါ ကုသလာကုသလာဗျာကတာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ ရူပက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ ဂန္ထနိယာ စေဝ နော စ ဂန္ထာ.

၁၁၅၂. ကတမေ ဓမ္မာ ဂန္ထာ စေဝ ဂန္ထသမ္ပယုတ္တာ စ? သီလဗ္ဗတပရာမာသော ကာယဂန္ထော အဘိဇ္ဈာကာယဂန္ထေန ဂန္ထော စေဝ ဂန္ထသမ္ပယုတ္တော စ၊ အဘိဇ္ဈာကာယဂန္ထော သီလဗ္ဗတပရာမာသေန ကာယဂန္ထေန ဂန္ထော စေဝ ဂန္ထသမ္ပယုတ္တော စ၊ ဣဒံသစ္စာဘိနိဝေသော ကာယဂန္ထော အဘိဇ္ဈာကာယဂန္ထေန ဂန္ထော စေဝ ဂန္ထသမ္ပယုတ္တော စ၊ အဘိဇ္ဈာကာယဂန္ထော ဣဒံသစ္စာဘိနိဝေသေန ကာယဂန္ထေန ဂန္ထော စေဝ ဂန္ထသမ္ပယုတ္တော စ – ဣမေ ဓမ္မာ ဂန္ထာ စေဝ ဂန္ထသမ္ပယုတ္တာ စ.

၁၁၅၃. ကတမေ ဓမ္မာ ဂန္ထသမ္ပယုတ္တာ စေဝ နော စ ဂန္ထာ? တေဟိ ဓမ္မေဟိ ယေ ဓမ္မာ သမ္ပယုတ္တာ၊ တေ ဓမ္မေ ဌပေတွာ ဝေဒနာက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ ဂန္ထသမ္ပယုတ္တာ စေဝ နော စ ဂန္ထာ.

၁၁၅၄. ကတမေ ဓမ္မာ ဂန္ထဝိပ္ပယုတ္တာ ဂန္ထနိယာ? တေဟိ ဓမ္မေဟိ ယေ ဓမ္မာ ဝိပ္ပယုတ္တာ သာသဝါ ကုသလာကုသလာဗျာကတာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ ရူပက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ ဂန္ထဝိပ္ပယုတ္တာ ဂန္ထနိယာ.

၁၁၅၅. ကတမေ ဓမ္မာ ဂန္ထဝိပ္ပယုတ္တာ အဂန္ထနိယာ? အပရိယာပန္နာ မဂ္ဂါ စ၊ မဂ္ဂဖလာနိ စ၊ အသင်္ခတာ စ ဓာတု – ဣမေ ဓမ္မာ ဂန္ထဝိပ္ပယုတ္တာ အဂန္ထနိယာ.

ဩဃဂေါစ္ဆကံ

၁၁၅၆. ကတမေ ဓမ္မာ ဩဃာ? စတ္တာရော ဩဃာ။ပေ။ ဣမေ ဓမ္မာ ဩဃဝိပ္ပယုတ္တာ ဩဃနိယာ.

ယောဂဂေါစ္ဆကံ

၁၁၅၇. ကတမေ ဓမ္မာ ယောဂါ? စတ္တာရော ယောဂါ။ပေ။ ဣမေ ဓမ္မာ ယောဂဝိပ္ပယုတ္တာ ယောဂနိယာ.

နီဝရဏဂေါစ္ဆကံ

၁၁၅၈. ကတမေ ဓမ္မာ နီဝရဏာ? ဆ နီဝရဏာ [နီဝရဏာနိ (သျာ.)] – ကာမစ္ဆန္ဒနီဝရဏံ၊ ဗျာပါဒနီဝရဏံ၊ ထိနမိဒ္ဓနီဝရဏံ၊ ဥဒ္ဓစ္စကုက္ကုစ္စနီဝရဏံ၊ ဝိစိကိစ္ဆာနီဝရဏံ၊ အဝိဇ္ဇာနီဝရဏံ.

၁၁၅၉. တတ္ထ ကတမံ ကာမစ္ဆန္ဒနီဝရဏံ? ယော ကာမေသု ကာမစ္ဆန္ဒော ကာမရာဂေါ ကာမနန္ဒီ ကာမတဏှာ ကာမသိနေဟော ကာမပရိဠာဟော ကာမမုစ္ဆာ ကာမဇ္ဈောသာနံ – ဣဒံ ဝုစ္စတိ ကာမစ္ဆန္ဒနီဝရဏံ.

၁၁၆၀. တတ္ထ ကတမံ ဗျာပါဒနီဝရဏံ? အနတ္ထံ မေ အစရီတိ အာဃာတော ဇာယတိ၊ အနတ္ထံ မေ စရတီတိ အာဃာတော ဇာယတိ၊ အနတ္ထံ မေ စရိဿတီတိ အာဃာတော ဇာယတိ၊ ပိယဿ မေ မနာပဿ အနတ္ထံ အစရိ။ပေ။ အနတ္ထံ စရတိ။ပေ။ အနတ္ထံ စရိဿတီတိ အာဃာတော ဇာယတိ၊ အပ္ပိယဿ မေ အမနာပဿ အတ္ထံ အစရိ။ပေ။ အတ္ထံ စရတိ။ပေ။ အတ္ထံ စရိဿတီတိ အာဃာတော ဇာယတိ၊ အဋ္ဌာနေ ဝါ ပန အာဃာတော ဇာယတိ. ယော ဧဝရူပေါ စိတ္တဿ အာဃာတော ပဋိဃာတော ပဋိဃံ ပဋိဝိရောဓော ကောပေါ ပကောပေါ သမ္ပကောပေါ ဒေါသော ပဒေါသော သမ္ပဒေါသော စိတ္တဿ ဗျာပတ္တိ မနောပဒေါသော ကောဓော ကုဇ္ဈနာ ကုဇ္ဈိတတ္တံ ဒေါသော ဒုဿနာ ဒုဿိတတ္တံ ဗျာပတ္တိ ဗျာပဇ္ဇနာ ဗျာပဇ္ဇိတတ္တံ ဝိရောဓော ပဋိဝိရောဓော စဏ္ဍိက္ကံ အသုရောပေါ အနတ္တမနတာ စိတ္တဿ – ဣဒံ ဝုစ္စတိ ဗျာပါဒနီဝရဏံ.

၁၁၆၁. တတ္ထ ကတမံ ထိနမိဒ္ဓနီဝရဏံ? အတ္ထိ ထိနံ၊ အတ္ထိ မိဒ္ဓံ.

၁၁၆၂. တတ္ထ ကတမံ ထိနံ? ယာ စိတ္တဿ အကလ္လတာ အကမ္မညတာ ဩလီယနာ သလ္လီယနာ လီနံ လီယနာ လီယိတတ္တံ ထိနံ ထိယနာ ထိယိတတ္တံ စိတ္တဿ – ဣဒံ ဝုစ္စတိ ထိနံ.

၁၁၆၃. တတ္ထ ကတမံ မိဒ္ဓံ? ယာ ကာယဿ အကလ္လတာ အကမ္မညတာ ဩနာဟော ပရိယောနာဟော အန္တောသမောရောဓော မိဒ္ဓံ သောပ္ပံ ပစလာယိကာ သောပ္ပံ သုပနာ သုပိတတ္တံ – ဣဒံ ဝုစ္စတိ မိဒ္ဓံ. ဣတိ ဣဒဉ္စ ထိနံ၊ ဣဒဉ္စ မိဒ္ဓံ – ဣဒံ ဝုစ္စတိ ထိနမိဒ္ဓနီဝရဏံ.

၁၁၆၄. တတ္ထ ကတမံ ဥဒ္ဓစ္စကုက္ကုစ္စနီဝရဏံ? အတ္ထိ ဥဒ္ဓစ္စံ၊ အတ္ထိ ကုက္ကုစ္စံ.

၁၁၆၅. တတ္ထ ကတမံ ဥဒ္ဓစ္စံ? ယံ စိတ္တဿ ဥဒ္ဓစ္စံ အဝူပသမော စေတသော ဝိက္ခေပေါ ဘန္တတ္တံ စိတ္တဿ – ဣဒံ ဝုစ္စတိ ဥဒ္ဓစ္စံ.

၁၁၆၆. တတ္ထ ကတမံ ကုက္ကုစ္စံ? အကပ္ပိယေ ကပ္ပိယသညိတာ၊ ကပ္ပိယေ အကပ္ပိယသညိတာ၊ အဝဇ္ဇေ ဝဇ္ဇသညိတာ၊ ဝဇ္ဇေ အဝဇ္ဇသညိတာ. ယံ ဧဝရူပံ ကုက္ကုစ္စံ ကုက္ကုစ္စာယနာ ကုက္ကုစ္စာယိတတ္တံ စေတသော ဝိပ္ပဋိသာရော မနောဝိလေခေါ – ဣဒံ ဝုစ္စတိ ကုက္ကုစ္စံ. ဣတိ ဣဒဉ္စ ဥဒ္ဓစ္စံ၊ ဣဒဉ္စ ကုက္ကုစ္စံ – ဣဒံ ဝုစ္စတိ ဥဒ္ဓစ္စကုက္ကုစ္စနီဝရဏံ.

၁၁၆၇. တတ္ထ ကတမံ ဝိစိကိစ္ဆာနီဝရဏံ? သတ္ထရိ ကင်္ခတိ ဝိစိကိစ္ဆတိ၊ ဓမ္မေ ကင်္ခတိ ဝိစိကိစ္ဆတိ၊ သံဃေ ကင်္ခတိ ဝိစိကိစ္ဆတိ၊ သိက္ခာယ ကင်္ခတိ ဝိစိကိစ္ဆတိ၊ ပုဗ္ဗန္တေ ကင်္ခတိ ဝိစိကိစ္ဆတိ၊ အပရန္တေ ကင်္ခတိ ဝိစိကိစ္ဆတိ၊ ပုဗ္ဗန္တာပရန္တေ ကင်္ခတိ ဝိစိကိစ္ဆတိ၊ ဣဒပ္ပစ္စယတာ ပဋိစ္စသမုပ္ပန္နေသု ဓမ္မေသု ကင်္ခတိ ဝိစိကိစ္ဆတိ. ယာ ဧဝရူပါ ကင်္ခါ ကင်္ခါယနာ ကင်္ခါယိတတ္တံ ဝိမတိ ဝိစိကိစ္ဆာ ဒွေဠှကံ ဒွေဓာပထော သံသယော အနေကံသဂ္ဂါဟော အာသပ္ပနာ ပရိသပ္ပနာ အပရိယောဂါဟနာ ထမ္ဘိတတ္တံ စိတ္တဿ မနောဝိလေခေါ – ဣဒံ ဝုစ္စတိ ဝိစိကိစ္ဆာနီဝရဏံ.

၁၁၆၈. တတ္ထ ကတမံ အဝိဇ္ဇာနီဝရဏံ? ဒုက္ခေ အညာဏံ၊ ဒုက္ခသမုဒယေ အညာဏံ၊ ဒုက္ခနိရောဓေ အညာဏံ၊ ဒုက္ခနိရောဓဂါမိနိယာ ပဋိပဒါယ အညာဏံ၊ ပုဗ္ဗန္တေ အညာဏံ၊ အပရန္တေ အညာဏံ၊ ပုဗ္ဗန္တာပရန္တေ အညာဏံ၊ ဣဒပ္ပစ္စယတာ ပဋိစ္စသမုပ္ပန္နေသု ဓမ္မေသု အညာဏံः ယံ ဧဝရူပံ အညာဏံ အဒဿနံ အနဘိသမယော အနနုဗောဓော အသမ္ဗောဓော အပ္ပဋိဝေဓော အသံဂါဟနာ အပရိယောဂါဟနာ အသမပေက္ခနာ အပစ္စဝေက္ခဏာ အပစ္စက္ခကမ္မံ ဒုမ္မေဇ္ဈံ ဗာလျံ အသမ္ပဇညံ မောဟော ပမောဟော သမ္မောဟော အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာနုသယော အဝိဇ္ဇာပရိယုဋ္ဌာနံ အဝိဇ္ဇာလင်္ဂီ မောဟော အကုသလမူလံ – ဣဒံ ဝုစ္စတိ အဝိဇ္ဇာနီဝရဏံ.

ဣမေ ဓမ္မာ နီဝရဏာ.

၁၁၆၉. ကတမေ ဓမ္မာ နော နီဝရဏာ? တေ ဓမ္မေ ဌပေတွာ အဝသေသာ ကုသလာကုသလာဗျာကတာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ အပရိယာပန္နာ၊ ဝေဒနာက္ခန္ဓော။ပေ။ ဝိညာဏက္ခန္ဓော၊ သဗ္ဗဉ္စ ရူပံ၊ အသင်္ခတာ စ ဓာတု – ဣမေ ဓမ္မာ နော နီဝရဏာ.

၁၁၇၀. ကတမေ ဓမ္မာ နီဝရဏိယာ? သာသဝါ ကုသလာကုသလာဗျာကတာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ ရူပက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ နီဝရဏိယာ.

၁၁၇၁. ကတမေ ဓမ္မာ အနီဝရဏိယာ? အပရိယာပန္နာ မဂ္ဂါ စ၊ မဂ္ဂဖလာနိ စ၊ အသင်္ခတာ စ ဓာတု – ဣမေ ဓမ္မာ အနီဝရဏိယာ.

၁၁၇၂. ကတမေ ဓမ္မာ နီဝရဏသမ္ပယုတ္တာ? တေဟိ ဓမ္မေဟိ ယေ ဓမ္မာ သမ္ပယုတ္တာ ဝေဒနာက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ နီဝရဏသမ္ပယုတ္တာ.

၁၁၇၃. ကတမေ ဓမ္မာ နီဝရဏဝိပ္ပယုတ္တာ? တေဟိ ဓမ္မေဟိ ယေ ဓမ္မာ ဝိပ္ပယုတ္တာ ဝေဒနာက္ခန္ဓော။ပေ။ ဝိညာဏက္ခန္ဓော၊ သဗ္ဗဉ္စ ရူပံ၊ အသင်္ခတာ စ ဓာတု – ဣမေ ဓမ္မာ နီဝရဏဝိပ္ပယုတ္တာ.

၁၁၇၄. ကတမေ ဓမ္မာ နီဝရဏာ စေဝ နီဝရဏိယာ စ? တာနေဝ နီဝရဏာနိ နီဝရဏာ စေဝ နီဝရဏိယာ စ.

၁၁၇၅. ကတမေ ဓမ္မာ နီဝရဏိယာ စေဝ နော စ နီဝရဏာ? တေဟိ ဓမ္မေဟိ ယေ ဓမ္မာ နီဝရဏိယာ၊ တေ ဓမ္မေ ဌပေတွာ အဝသေသာ သာသဝါ ကုသလာကုသလာဗျာကတာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ ရူပက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ နီဝရဏိယာ စေဝ နော စ နီဝရဏာ.

၁၁၇၆. ကတမေ ဓမ္မာ နီဝရဏာ စေဝ နီဝရဏသမ္ပယုတ္တာ စ? ကာမစ္ဆန္ဒနီဝရဏံ အဝိဇ္ဇာနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ၊ အဝိဇ္ဇာနီဝရဏံ ကာမစ္ဆန္ဒနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ၊ ဗျာပါဒနီဝရဏံ အဝိဇ္ဇာနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ၊ အဝိဇ္ဇာနီဝရဏံ ဗျာပါဒနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ၊ ထိနမိဒ္ဓနီဝရဏံ အဝိဇ္ဇာနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ၊ အဝိဇ္ဇာနီဝရဏံ ထိနမိဒ္ဓနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ၊ ဥဒ္ဓစ္စနီဝရဏံ အဝိဇ္ဇာနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ၊ အဝိဇ္ဇာနီဝရဏံ ဥဒ္ဓစ္စနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ၊ ကုက္ကုစ္စနီဝရဏံ အဝိဇ္ဇာနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ၊ အဝိဇ္ဇာနီဝရဏံ ကုက္ကုစ္စနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ၊ ဝိစိကိစ္ဆာနီဝရဏံ အဝိဇ္ဇာနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ၊ အဝိဇ္ဇာနီဝရဏံ ဝိစိကိစ္ဆာနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ၊ ကာမစ္ဆန္ဒနီဝရဏံ ဥဒ္ဓစ္စနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ၊ ဥဒ္ဓစ္စနီဝရဏံ ကာမစ္ဆန္ဒနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ၊ ဗျာပါဒနီဝရဏံ ဥဒ္ဓစ္စနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ၊ ဥဒ္ဓစ္စနီဝရဏံ ဗျာပါဒနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ၊ ထိနမိဒ္ဓနီဝရဏံ ဥဒ္ဓစ္စနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ၊ ဥဒ္ဓစ္စနီဝရဏံ ထိနမိဒ္ဓနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ၊ ကုက္ကုစ္စနီဝရဏံ ဥဒ္ဓစ္စနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ၊ ဥဒ္ဓစ္စနီဝရဏံ ကုက္ကုစ္စနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ၊ ဝိစိကိစ္ဆာနီဝရဏံ ဥဒ္ဓစ္စနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ၊ ဥဒ္ဓစ္စနီဝရဏံ ဝိစိကိစ္ဆာနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ၊ အဝိဇ္ဇာနီဝရဏံ ဥဒ္ဓစ္စနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ၊ ဥဒ္ဓစ္စနီဝရဏံ အဝိဇ္ဇာနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ – ဣမေ ဓမ္မာ နီဝရဏာ စေဝ နီဝရဏသမ္ပယုတ္တာ စ.

၁၁၇၇. ကတမေ ဓမ္မာ နီဝရဏသမ္ပယုတ္တာ စေဝ နော စ နီဝရဏာ? တေဟိ ဓမ္မေဟိ ယေ ဓမ္မာ သမ္ပယုတ္တာ၊ တေ ဓမ္မေ ဌပေတွာ ဝေဒနာက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ နီဝရဏသမ္ပယုတ္တာ စေဝ နော စ နီဝရဏာ.

၁၁၇၈. ကတမေ ဓမ္မာ နီဝရဏဝိပ္ပယုတ္တာ နီဝရဏိယာ? တေဟိ ဓမ္မေဟိ ယေ ဓမ္မာ ဝိပ္ပယုတ္တာ သာသဝါ ကုသလာဗျာကတာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ ရူပက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ နီဝရဏဝိပ္ပယုတ္တာ နီဝရဏိယာ.

၁၁၇၉. ကတမေ ဓမ္မာ နီဝရဏဝိပ္ပယုတ္တာ အနီဝရဏိယာ? အပရိယာပန္နာ မဂ္ဂါ စ၊ မဂ္ဂဖလာနိ စ၊ အသင်္ခတာ စ ဓာတု – ဣမေ ဓမ္မာ နီဝရဏဝိပ္ပယုတ္တာ အနီဝရဏိယာ.

ပရာမာသဂေါစ္ဆကံ

၁၁၈၀. ကတမေ ဓမ္မာ ပရာမာသာ? ဒိဋ္ဌိပရာမာသော.

၁၁၈၁. တတ္ထ ကတမော ဒိဋ္ဌိပရာမာသော? သဿတော လောကောတိ ဝါ၊ အသဿတော လောကောတိ ဝါ၊ အန္တဝါ လောကောတိ ဝါ၊ အနန္တဝါ လောကောတိ ဝါ၊ တံ ဇီဝံ တံ သရီရန္တိ ဝါ၊ အညံ ဇီဝံ အညံ သရီရန္တိ ဝါ၊ ဟောတိ တထာဂတော ပရံ မရဏာတိ ဝါ၊ န ဟောတိ တထာဂတော ပရံ မရဏာတိ ဝါ၊ ဟောတိ စ န စ ဟောတိ တထာဂတော ပရံ မရဏာတိ ဝါ၊ နေဝ ဟောတိ န န ဟောတိ တထာဂတော ပရံ မရဏာတိ ဝါः ယာ ဧဝရူပါ ဒိဋ္ဌိ ဒိဋ္ဌိဂတံ ဒိဋ္ဌိဂဟနံ ဒိဋ္ဌိကန္တာရော ဒိဋ္ဌိဝိသူကာယိကံ ဒိဋ္ဌိဝိပ္ဖန္ဒိတံ ဒိဋ္ဌိသံယောဇနံ ဂါဟော ပတိဋ္ဌာဟော အဘိနိဝေသော ပရာမာသော ကုမ္မဂ္ဂေါ မိစ္ဆာပထော မိစ္ဆတ္တံ တိတ္ထာယတနံ ဝိပရိယာသဂ္ဂါဟော – အယံ ဝုစ္စတိ ဒိဋ္ဌိပရာမာသော. သဗ္ဗာပိ မိစ္ဆာဒိဋ္ဌိ ဒိဋ္ဌိပရာမာသော.

ဣမေ ဓမ္မာ ပရာမာသာ.

၁၁၈၂. ကတမေ ဓမ္မာ နော ပရာမာသာ? တေ ဓမ္မေ ဌပေတွာ အဝသေသာ ကုသလာကုသလာဗျာကတာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ အပရိယာပန္နာ၊ ဝေဒနာက္ခန္ဓော။ပေ။ ဝိညာဏက္ခန္ဓော၊ သဗ္ဗဉ္စ ရူပံ၊ အသင်္ခတာ စ ဓာတု – ဣမေ ဓမ္မာ နော ပရာမာသာ.

၁၁၈၃. ကတမေ ဓမ္မာ ပရာမဋ္ဌာ? သာသဝါ ကုသလာကုသလာဗျာကတာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ ရူပက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ ပရာမဋ္ဌာ.

၁၁၈၄. ကတမေ ဓမ္မာ အပရာမဋ္ဌာ? အပရိယာပန္နာ မဂ္ဂါ စ၊ မဂ္ဂဖလာနိ စ၊ အသင်္ခတာ စ ဓာတု – ဣမေ ဓမ္မာ အပရာမဋ္ဌာ.

၁၁၈၅. ကတမေ ဓမ္မာ ပရာမာသသမ္ပယုတ္တာ? တေဟိ ဓမ္မေဟိ ယေ ဓမ္မာ သမ္ပယုတ္တာ ဝေဒနာက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ ပရာမာသသမ္ပယုတ္တာ.

၁၁၈၆. ကတမေ ဓမ္မာ ပရာမာသဝိပ္ပယုတ္တာ? တေဟိ ဓမ္မေဟိ ယေ ဓမ္မာ ဝိပ္ပယုတ္တာ ဝေဒနာက္ခန္ဓော။ပေ။ ဝိညာဏက္ခန္ဓော၊ သဗ္ဗဉ္စ ရူပံ၊ အသင်္ခတာ စ ဓာတု – ဣမေ ဓမ္မာ ပရာမာသဝိပ္ပယုတ္တာ.

၁၁၈၇. ကတမေ ဓမ္မာ ပရာမာသာ စေဝ ပရာမဋ္ဌာ စ? သွေဝ ပရာမာသော ပရာမာသော စေဝ ပရာမဋ္ဌော စ.

၁၁၈၈. ကတမေ ဓမ္မာ ပရာမဋ္ဌာ စေဝ နော စ ပရာမာသာ? တေဟိ ဓမ္မေဟိ ယေ ဓမ္မာ ပရာမဋ္ဌာ၊ တေ ဓမ္မေ ဌပေတွာ အဝသေသာ သာသဝါ ကုသလာကုသလာဗျာကတာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ ရူပက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ ပရာမဋ္ဌာ စေဝ နော စ ပရာမာသာ.

၁၁၈၉. ကတမေ ဓမ္မာ ပရာမာသဝိပ္ပယုတ္တာ ပရာမဋ္ဌာ? တေဟိ ဓမ္မေဟိ ယေ ဓမ္မာ ဝိပ္ပယုတ္တာ သာသဝါ ကုသလာကုသလာဗျာကတာ ဓမ္မာ ကာမာဝစရာ၊ ရူပါဝစရာ အရူပါဝစရာ၊ ရူပက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ ပရာမာသဝိပ္ပယုတ္တာ ပရာမဋ္ဌာ.