သုတ္တန္တိကဒုကနိက္ခေပံ

၁၃၀၃. ကတမေ ဓမ္မာ ဝိဇ္ဇာဘာဂိနော? ဝိဇ္ဇာယ သမ္ပယုတ္တကာ ဓမ္မာ – ဣမေ ဓမ္မာ ဝိဇ္ဇာဘာဂိနော.

၁၃၀၄. ကတမေ ဓမ္မာ အဝိဇ္ဇာဘာဂိနော? အဝိဇ္ဇာယ သမ္ပယုတ္တကာ ဓမ္မာ – ဣမေ ဓမ္မာ အဝိဇ္ဇာဘာဂိနော.

၁၃၀၅. ကတမေ ဓမ္မာ ဝိဇ္ဇူပမာ? ဟေဋ္ဌိမေသု တီသု အရိယမဂ္ဂေသု ပညာ – ဣမေ ဓမ္မာ ဝိဇ္ဇူပမာ.

၁၃၀၆. ကတမေ ဓမ္မာ ဝဇိရူပမာ? ဥပရိဋ္ဌိမေ အရဟတ္တမဂ္ဂေ ပညာ – ဣမေ ဓမ္မာ ဝဇိရူပမာ.

၁၃၀၇. ကတမေ ဓမ္မာ ဗာလာ? အဟိရီကဉ္စ အနောတ္တပ္ပဉ္စ – ဣမေ ဓမ္မာ ဗာလာ. သဗ္ဗေပိ အကုသလာ ဓမ္မာ ဗာလာ.

၁၃၀၈. ကတမေ ဓမ္မာ ပဏ္ဍိတာ? ဟိရီ စ ဩတ္တပ္ပဉ္စ – ဣမေ ဓမ္မာ ပဏ္ဍိတာ. သဗ္ဗေပိ ကုသလာ ဓမ္မာ ပဏ္ဍိတာ.

၁၃၀၉. ကတမေ ဓမ္မာ ကဏှာ? အဟိရီကဉ္စ အနောတ္တပ္ပဉ္စ – ဣမေ ဓမ္မာ ကဏှာ. သဗ္ဗေပိ အကုသလာ ဓမ္မာ ကဏှာ.

၁၃၁၀. ကတမေ ဓမ္မာ သုက္ကာ? ဟိရီ စ ဩတ္တပ္ပဉ္စ – ဣမေ ဓမ္မာ သုက္ကာ? သဗ္ဗေပိ ကုသလာ ဓမ္မာ သုက္ကာ.

၁၃၁၁. ကတမေ ဓမ္မာ တပနီယာ? ကာယဒုစ္စရိတံ၊ ဝစီဒုစ္စရိတံ၊ မနောဒုစ္စရိတံ – ဣမေ ဓမ္မာ တပနီယာ. သဗ္ဗေပိ အကုသလာ ဓမ္မာ တပနီယာ.

၁၃၁၂. ကတမေ ဓမ္မာ အတပနီယာ? ကာယသုစရိတံ၊ ဝစီသုစရိတံ၊ မနောသုစရိတံ – ဣမေ ဓမ္မာ အတပနီယာ. သဗ္ဗေပိ ကုသလာ ဓမ္မာ အတပနီယာ.

၁၃၁၃. ကတမေ ဓမ္မာ အဓိဝစနာ? ယာ တေသံ တေသံ ဓမ္မာနံ သင်္ခါ သမညာ ပညတ္တိ ဝေါဟာရော နာမံ နာမကမ္မံ နာမဓေယျံ နိရုတ္တိ ဗျဉ္ဇနံ အဘိလာပေါ – ဣမေ ဓမ္မာ အဓိဝစနာ. သဗ္ဗေဝ ဓမ္မာ အဓိဝစနပထာ.

၁၃၁၄. ကတမေ ဓမ္မာ နိရုတ္တိ? ယာ တေသံ တေသံ ဓမ္မာနံ သင်္ခါ သမညာ ပညတ္တိ ဝေါဟာရော နာမံ နာမကမ္မံ နာမဓေယျံ နိရုတ္တိ ဗျဉ္ဇနံ အဘိလာပေါ – ဣမေ ဓမ္မာ နိရုတ္တိ. သဗ္ဗေဝ ဓမ္မာ နိရုတ္တိပထာ.

၁၃၁၅. ကတမေ ဓမ္မာ ပညတ္တိ? ယာ တေသံ တေသံ ဓမ္မာနံ သင်္ခါ သမညာ ပညတ္တိ ဝေါဟာရော နာမံ နာမကမ္မံ နာမဓေယျံ နိရုတ္တိ ဗျဉ္ဇနံ အဘိလာပေါ – ဣမေ ဓမ္မာ ပညတ္တိ. သဗ္ဗေဝ ဓမ္မာ ပညတ္တိပထာ.

၁၃၁၆. တတ္ထ ကတမံ နာမံ? ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော၊ ဝိညာဏက္ခန္ဓော၊ အသင်္ခတာ စ ဓာတု – ဣဒံ ဝုစ္စတိ နာမံ.

၁၃၁၇. တတ္ထ ကတမံ ရူပံ? စတ္တာရော စ မဟာဘူတာ၊ စတုန္နဉ္စ မဟာဘူတာနံ ဥပါဒါယ ရူပံ – ဣဒံ ဝုစ္စတိ ရူပံ.

၁၃၁၈. တတ္ထ ကတမာ အဝိဇ္ဇာ? ယံ အညာဏံ အဒဿနံ။ပေ။ အဝိဇ္ဇာလင်္ဂီ မောဟော အကုသလမူလံ – အယံ ဝုစ္စတိ အဝိဇ္ဇာ.

၁၃၁၉. တတ္ထ ကတမာ ဘဝတဏှာ? ယော ဘဝေသု ဘဝဆန္ဒော။ပေ။ ဘဝဇ္ဈောသာနံ – အယံ ဝုစ္စတိ ဘဝတဏှာ.

၁၃၂၀. တတ္ထ ကတမာ ဘဝဒိဋ္ဌိ? ဘဝိဿတိ အတ္တာ စ လောကော စာတိ၊ ယာ ဧဝရူပါ ဒိဋ္ဌိ ဒိဋ္ဌိဂတံ။ပေ။ ဝိပရိယာသဂ္ဂါဟော – အယံ ဝုစ္စတိ ဘဝဒိဋ္ဌိ.

၁၃၂၁. တတ္ထ ကတမာ ဝိဘဝဒိဋ္ဌိ? န ဘဝိဿတိ အတ္တာ စ လောကော စာတိ၊ ယာ ဧဝရူပါ ဒိဋ္ဌိ ဒိဋ္ဌိဂတံ။ပေ။ ဝိပရိယာသဂ္ဂါဟော – အယံ ဝုစ္စတိ ဝိဘဝဒိဋ္ဌိ.

၁၃၂၂. တတ္ထ ကတမာ သဿတဒိဋ္ဌိ? သဿတော အတ္တာ စ လောကော စာတိ၊ ယာ ဧဝရူပါ ဒိဋ္ဌိ ဒိဋ္ဌိဂတံ။ပေ။ ဝိပရိယာသဂ္ဂါဟော – အယံ ဝုစ္စတိ သဿတဒိဋ္ဌိ.

၁၃၂၃. တတ္ထ ကတမာ ဥစ္ဆေဒဒိဋ္ဌိ? ဥစ္ဆိဇ္ဇိဿတိ အတ္တာ စ လောကော စာတိ၊ ယာ ဧဝရူပါ ဒိဋ္ဌိ ဒိဋ္ဌိဂတံ။ပေ။ ဝိပရိယာသဂ္ဂါဟော – အယံ ဝုစ္စတိ ဥစ္ဆေဒဒိဋ္ဌိ.

၁၃၂၄. တတ္ထ ကတမာ အန္တဝါ ဒိဋ္ဌိ? အန္တဝါ အတ္တာ စ လောကော စာတိ၊ ယာ ဧဝရူပါ ဒိဋ္ဌိ ဒိဋ္ဌိဂတံ။ပေ။ ဝိပရိယာသဂ္ဂါဟော – အယံ ဝုစ္စတိ အန္တဝါ ဒိဋ္ဌိ.

၁၃၂၅. တတ္ထ ကတမာ အနန္တဝါ ဒိဋ္ဌိ? အနန္တဝါ အတ္တာ စ လောကော စာတိ၊ ယာ ဧဝရူပါ ဒိဋ္ဌိ ဒိဋ္ဌိဂတံ။ပေ။ ဝိပရိယာသဂ္ဂါဟော – အယံ ဝုစ္စတိ အနန္တဝါ ဒိဋ္ဌိ.

၁၃၂၆. တတ္ထ ကတမာ ပုဗ္ဗန္တာနုဒိဋ္ဌိ? ပုဗ္ဗန္တံ အာရဗ္ဘ ယာ ဥပ္ပဇ္ဇတိ ဒိဋ္ဌိ ဒိဋ္ဌိဂတံ။ပေ။ ဝိပရိယာသဂ္ဂါဟော – အယံ ဝုစ္စတိ ပုဗ္ဗန္တာနုဒိဋ္ဌိ.

၁၃၂၇. တတ္ထ ကတမာ အပရန္တာနုဒိဋ္ဌိ? အပရန္တံ အာရဗ္ဘ ယာ ဥပ္ပဇ္ဇတိ ဒိဋ္ဌိ ဒိဋ္ဌိဂတံ။ပေ။ ဝိပရိယာသဂ္ဂါဟော – အယံ ဝုစ္စတိ အပရန္တာနုဒိဋ္ဌိ.

၁၃၂၈. တတ္ထ ကတမံ အဟိရိကံ? ယံ န ဟိရီယတိ ဟိရိယိတဗ္ဗေန၊ န ဟိရီယတိ ပါပကာနံ အကုသလာနံ ဓမ္မာနံ သမာပတ္တိယာ – ဣဒံ ဝုစ္စတိ အဟိရိကံ.

၁၃၂၉. တတ္ထ ကတမံ အနောတ္တပ္ပံ? ယံ န ဩတ္တပ္ပတိ ဩတ္တပ္ပိတဗ္ဗေန၊ န ဩတ္တပ္ပတိ ပါပကာနံ အကုသလာနံ ဓမ္မာနံ သမာပတ္တိယာ – ဣဒံ ဝုစ္စတိ အနောတ္တပ္ပံ.

၁၃၃၀. တတ္ထ ကတမာ ဟိရီ? ယံ ဟိရီယတိ ဟိရိယိတဗ္ဗေန၊ ဟိရီယတိ ပါပကာနံ အကုသလာနံ ဓမ္မာနံ သမာပတ္တိယာ – အယံ ဝုစ္စတိ ဟိရီ.

၁၃၃၁. တတ္ထ ကတမံ ဩတ္တပ္ပံ? ယံ ဩတ္တပ္ပတိ ဩတ္တပ္ပိတဗ္ဗေန၊ ဩတ္တပ္ပတိ ပါပကာနံ အကုသလာနံ ဓမ္မာနံ သမာပတ္တိယာ – ဣဒံ ဝုစ္စတိ ဩတ္တပ္ပံ.

၁၃၃၂. တတ္ထ ကတမာ ဒေါဝစဿတာ? သဟဓမ္မိကေ ဝုစ္စမာနေ ဒေါဝစဿာယံ ဒေါဝစဿိယံ ဒေါဝစဿတာ ဝိပ္ပဋိကူလဂ္ဂါဟိတာ ဝိပစ္စနီကသာတတာ အနာဒရိယံ အနာဒရတာ အဂါရဝတာ အပ္ပဋိဿဝတာ – အယံ ဝုစ္စတိ ဒေါဝစဿတာ.

၁၃၃၃. တတ္ထ ကတမာ ပါပမိတ္တတာ? ယေ တေ ပုဂ္ဂလာ အဿဒ္ဓါ ဒုဿီလာ အပ္ပဿုတာ မစ္ဆရိနော ဒုပ္ပညာ၊ ယာ တေသံ သေဝနာ နိသေဝနာ သံသေဝနာ ဘဇနာ သမ္ဘဇနာ ဘတ္တိ သမ္ဘတ္တိ တံသမ္ပဝင်္ကတာ – အယံ ဝုစ္စတိ ပါပမိတ္တတာ.

၁၃၃၄. တတ္ထ ကတမာ သောဝစဿတာ? သဟဓမ္မိကေ ဝုစ္စမာနေ သောဝစဿာယံ သောဝစဿိယံ သောဝစဿတာ အပ္ပဋိကူလဂ္ဂါဟိတာ အဝိပစ္စနီကသာတတာ သဂါရဝတာ သာဒရိယံ သာဒရတာ သပ္ပဋိဿဝတာ – အယံ ဝုစ္စတိ သောဝစဿတာ.

၁၃၃၅. တတ္ထ ကတမာ ကလျာဏမိတ္တတာ? ယေ တေ ပုဂ္ဂလာ သဒ္ဓါ သီလဝန္တော ဗဟုဿုတာ စာဂဝန္တော ပညဝန္တော၊ ယာ တေသံ သေဝနာ နိသေဝနာ သံသေဝနာ ဘဇနာ သမ္ဘဇနာ ဘတ္တိ သမ္ဘတ္တိ တံသမ္ပဝင်္ကတာ – အယံ ဝုစ္စတိ ကလျာဏမိတ္တတာ.

၁၃၃၆. တတ္ထ ကတမာ အာပတ္တိကုသလတာ? ပဉ္စပိ အာပတ္တိက္ခန္ဓာ အာပတ္တိယော၊ သတ္တပိ အာပတ္တိက္ခန္ဓာ အာပတ္တိယော. ယာ တာသံ အာပတ္တီနံ အာပတ္တိကုသလတာ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ အာပတ္တိကုသလတာ.

၁၃၃၇. တတ္ထ ကတမာ အာပတ္တိဝုဋ္ဌာနကုသလတာ? ယာ တာဟိ အာပတ္တီဟိ ဝုဋ္ဌာနကုသလတာ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ အာပတ္တိဝုဋ္ဌာနကုသလတာ.

၁၃၃၈. တတ္ထ ကတမာ သမာပတ္တိကုသလတာ? အတ္ထိ သဝိတက္ကသဝိစာရာ သမာပတ္တိ၊ အတ္ထိ အဝိတက္ကဝိစာရမတ္တာ သမာပတ္တိ၊ အတ္ထိ အဝိတက္ကအဝိစာရာ သမာပတ္တိ. ယာ တာသံ သမာပတ္တီနံ သမာပတ္တိကုသလတာ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ သမာပတ္တိကုသလတာ.

၁၃၃၉. တတ္ထ ကတမာ သမာပတ္တိဝုဋ္ဌာနကုသလတာ? ယာ တာဟိ သမာပတ္တီဟိ ဝုဋ္ဌာနကုသလတာ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ သမာပတ္တိဝုဋ္ဌာနကုသလတာ.

၁၃၄၀. တတ္ထ ကတမာ ဓာတုကုသလတာ? အဋ္ဌာရသ ဓာတုယော စက္ခုဓာတု ရူပဓာတု စက္ခုဝိညာဏဓာတု၊ သောတဓာတု သဒ္ဒဓာတု သောတဝိညာဏဓာတု၊ ဃာနဓာတု ဂန္ဓဓာတု ဃာနဝိညာဏဓာတု၊ ဇိဝှါဓာတု ရသဓာတု ဇိဝှါဝိညာဏဓာတု၊ ကာယဓာတု ဖောဋ္ဌဗ္ဗဓာတု ကာယဝိညာဏဓာတု၊ မနောဓာတု ဓမ္မဓာတု မနောဝိညာဏဓာတု. ယာ တာသံ ဓာတူနံ ဓာတုကုသလတာ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ ဓာတုကုသလတာ.

၁၃၄၁. တတ္ထ ကတမာ မနသိကာရကုသလတာ? ယာ တာသံ ဓာတူနံ မနသိကာရကုသလတာ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ မနသိကာရကုသလတာ.

၁၃၄၂. တတ္ထ ကတမာ အာယတနကုသလတာ? ဒွါဒသာယတနာနိ – စက္ခာယတနံ၊ ရူပါယတနံ၊ သောတာယတနံ၊ သဒ္ဒါယတနံ၊ ဃာနာယတနံ၊ ဂန္ဓာယတနံ၊ ဇိဝှါယတနံ၊ ရသာယတနံ၊ ကာယာယတနံ၊ ဖောဋ္ဌဗ္ဗာယတနံ၊ မနာယတနံ၊ ဓမ္မာယတနံ. ယာ တေသံ အာယတနာနံ အာယတနကုသလတာ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ အာယတနကုသလတာ.

၁၃၄၃. တတ္ထ ကတမာ ပဋိစ္စသမုပ္ပါဒကုသလတာ? အဝိဇ္ဇာပစ္စယာ သင်္ခါရာ၊ သင်္ခါရပစ္စယာ ဝိညာဏံ၊ ဝိညာဏပစ္စယာ နာမရူပံ၊ နာမရူပပစ္စယာ သဠာယတနံ၊ သဠာယတနပစ္စယာ ဖဿော၊ ဖဿပစ္စယာ ဝေဒနာ၊ ဝေဒနာပစ္စယာ တဏှာ၊ တဏှာပစ္စယာ ဥပါဒါနံ၊ ဥပါဒါနပစ္စယာ ဘဝေါ၊ ဘဝပစ္စယာ ဇာတိ၊ ဇာတိပစ္စယာ ဇရာမရဏံ သောကပရိဒေဝဒုက္ခဒေါမနဿုပါယာသာ သမ္ဘဝန္တိ၊ ဧဝမေတဿ ကေဝလဿ ဒုက္ခက္ခန္ဓဿ သမုဒယော ဟောတီတိ. ယာ တတ္ထ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ ပဋိစ္စသမုပ္ပါဒကုသလတာ.

၁၃၄၄. တတ္ထ ကတမာ ဌာနကုသလတာ? ယေ ယေ ဓမ္မာ ယေသံ ယေသံ ဓမ္မာနံ ဟေတူ ပစ္စယာ ဥပ္ပါဒါယ [ဥပါဒါယ (သီ. က.)] တံ တံ ဌာနန္တိ၊ ယာ တတ္ထ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ ဌာနကုသလတာ.

၁၃၄၅. တတ္ထ ကတမာ အဋ္ဌာနကုသလတာ? ယေ ယေ ဓမ္မာ ယေသံ ယေသံ ဓမ္မာနံ န ဟေတူ န ပစ္စယာ ဥပ္ပါဒါယ တံ တံ အဋ္ဌာနန္တိ၊ ယာ တတ္ထ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ အဋ္ဌာနကုသလတာ.

၁၃၄၆. တတ္ထ ကတမော အဇ္ဇဝေါ? ယာ အဇ္ဇဝတာ အဇိမှတာ အဝင်္ကတာ အကုဋိလတာ – အယံ ဝုစ္စတိ အဇ္ဇဝေါ.

၁၃၄၇. တတ္ထ ကတမော မဒ္ဒဝေါ? ယာ မုဒုတာ မဒ္ဒဝတာ အကက္ခဠတာ အကထိနတာ နီစစိတ္တတာ – အယံ ဝုစ္စတိ မဒ္ဒဝေါ.

၁၃၄၈. တတ္ထ ကတမာ ခန္တိ? ယာ ခန္တိ ခမနတာ အဓိဝါသနတာ အစဏ္ဍိက္ကံ အနသုရောပေါ အတ္တမနတာ စိတ္တဿ – အယံ ဝုစ္စတိ ခန္တိ.

၁၃၄၉. တတ္ထ ကတမံ သောရစ္စံ? ယော ကာယိကော အဝီတိက္ကမော၊ ဝါစသိကော အဝီတိက္ကမော၊ ကာယိကဝါစသိကော အဝီတိက္ကမော – ဣဒံ ဝုစ္စတိ သောရစ္စံ. သဗ္ဗောပိ သီလသံဝရော သောရစ္စံ.

၁၃၅၀. တတ္ထ ကတမံ သာခလျံ? ယာ သာ ဝါစာ အဏ္ဍကာ ကက္ကသာ ပရကဋုကာ ပရာဘိသဇ္ဇနီ ကောဓသာမန္တာ အသမာဓိသံဝတ္တနိကာ၊ တထာရူပိံ ဝါစံ ပဟာယ ယာ သာ ဝါစာ နေဠာ ကဏ္ဏသုခါ ပေမနီယာ ဟဒယင်္ဂမာ ပေါရီ ဗဟုဇနကန္တာ ဗဟုဇနမနာပါ တထာရူပိံ ဝါစံ ဘာသိတာ ဟောတိ၊ ယာ တတ္ထ သဏှဝါစတာ သခိလဝါစတာ အဖရုသဝါစတာ – ဣဒံ ဝုစ္စတိ သာခလျံ.

၁၃၅၁. တတ္ထ ကတမော ပဋိသန္ထာရော? ဒွေ ပဋိသန္ထာရာ – အာမိသပဋိသန္ထာရော စ ဓမ္မပဋိသန္ထာရော စ. ဣဓေကစ္စော ပဋိသန္ထာရကော ဟောတိ အာမိသပဋိသန္ထာရေန ဝါ ဓမ္မပဋိသန္ထာရေန ဝါ – အယံ ဝုစ္စတိ ပဋိသန္ထာရော.

၁၃၅၂. တတ္ထ ကတမာ ဣန္ဒြိယေသု အဂုတ္တဒွါရတာ? ဣဓေကစ္စော စက္ခုနာ ရူပံ ဒိသွာ နိမိတ္တဂ္ဂါဟီ ဟောတိ အနုဗျဉ္ဇနဂ္ဂါဟီ. ယတွာဓိကရဏမေနံ စက္ခုန္ဒြိယံ အသံဝုတံ ဝိဟရန္တံ အဘိဇ္ဈာဒေါမနဿာ ပါပကာ အကုသလာ ဓမ္မာ အနွာဿဝေယျုံ၊ တဿ သံဝရာယ န ပဋိပဇ္ဇတိ၊ န ရက္ခတိ စက္ခုန္ဒြိယံ၊ စက္ခုန္ဒြိယေ န သံဝရံ အာပဇ္ဇတိ. သောတေန သဒ္ဒံ သုတွာ။ပေ။ ဃာနေန ဂန္ဓံ ဃာယိတွာ။ပေ။ ဇိဝှါယ ရသံ သာယိတွာ။ပေ။ ကာယေန ဖောဋ္ဌဗ္ဗံ ဖုသိတွာ။ပေ။ မနသာ ဓမ္မံ ဝိညာယ နိမိတ္တဂ္ဂါဟီ ဟောတိ အနုဗျဉ္ဇနဂ္ဂါဟီ. ယတွာဓိကရဏမေနံ မနိန္ဒြိယံ အသံဝုတံ ဝိဟရန္တံ အဘိဇ္ဈာဒေါမနဿာ ပါပကာ အကုသလာ ဓမ္မာ အနွာဿဝေယျုံ၊ တဿ သံဝရာယ န ပဋိပဇ္ဇတိ၊ န ရက္ခတိ မနိန္ဒြိယံ၊ မနိန္ဒြိယေ န သံဝရံ အာပဇ္ဇတိ. ယာ ဣမေသံ ဆန္နံ ဣန္ဒြိယာနံ အဂုတ္တိ အဂေါပနာ အနာရက္ခော အသံဝရော – အယံ ဝုစ္စတိ ဣန္ဒြိယေသု အဂုတ္တဒွါရတာ.

၁၃၅၃. တတ္ထ ကတမာ ဘောဇနေ အမတ္တညုတာ? ဣဓေကစ္စော အပ္ပဋိသင်္ခါ အယောနိသော အာဟာရံ အာဟာရေတိ ဒဝါယ မဒါယ မဏ္ဍနာယ ဝိဘူသနာယ. ယာ တတ္ထ အသန္တုဋ္ဌိတာ အမတ္တညုတာ အပ္ပဋိသင်္ခါ ဘောဇနေ – အယံ ဝုစ္စတိ ဘောဇနေ အမတ္တညုတာ.

၁၃၅၄. တတ္ထ ကတမာ ဣန္ဒြိယေသု ဂုတ္တဒွါရတာ? ဣဓေကစ္စော စက္ခုနာ ရူပံ ဒိသွာ န နိမိတ္တဂ္ဂါဟီ ဟောတိ န အနုဗျဉ္ဇနဂ္ဂါဟီ. ယတွာဓိကရဏမေနံ စက္ခုန္ဒြိယံ အသံဝုတံ ဝိဟရန္တံ အဘိဇ္ဈာဒေါမနဿာ ပါပကာ အကုသလာ ဓမ္မာ အနွာဿဝေယျုံ၊ တဿ သံဝရာယ ပဋိပဇ္ဇတိ၊ ရက္ခတိ စက္ခုန္ဒြိယံ၊ စက္ခုန္ဒြိယေ သံဝရံ အာပဇ္ဇတိ. သောတေန သဒ္ဒံ သုတွာ။ပေ။ ဃာနေန ဂန္ဓံ ဃာယိတွာ။ပေ။ ဇိဝှါယ ရသံ သာယိတွာ။ပေ။ ကာယေန ဖောဋ္ဌဗ္ဗံ ဖုသိတွာ။ပေ။ မနသာ ဓမ္မံ ဝိညာယ န နိမိတ္တဂ္ဂါဟီ ဟောတိ နာနုဗျဉ္ဇနဂ္ဂါဟီ. ယတွာဓိကရဏမေနံ မနိန္ဒြိယံ အသံဝုတံ ဝိဟရန္တံ အဘိဇ္ဈာဒေါမနဿာ ပါပကာ အကုသလာ ဓမ္မာ အနွာဿဝေယျုံ၊ တဿ သံဝရာယ ပဋိပဇ္ဇတိ၊ ရက္ခတိ မနိန္ဒြိယံ၊ မနိန္ဒြိယေ သံဝရံ အာပဇ္ဇတိ. ယာ ဣမေသံ ဆန္နံ ဣန္ဒြိယာနံ ဂုတ္တိ ဂေါပနာ အာရက္ခော သံဝရော – အယံ ဝုစ္စတိ ဣန္ဒြိယေသု ဂုတ္တဒွါရတာ.

၁၃၅၅. တတ္ထ ကတမာ ဘောဇနေ မတ္တညုတာ? ဣဓေကစ္စော ပဋိသင်္ခါ ယောနိသော အာဟာရံ အာဟာရေတိ – နေဝ ဒဝါယ န မဒါယ န မဏ္ဍနာယ န ဝိဘူသနာယ ယာဝဒေဝ ဣမဿ ကာယဿ ဌိတိယာ ယာပနာယ ဝိဟိံသူပရတိယာ ဗြဟ္မစရိယာနုဂ္ဂဟာယ၊ ဣတိ ပုရာဏဉ္စ ဝေဒနံ ပဋိဟင်္ခါမိ၊ နဝဉ္စ ဝေဒနံ န ဥပ္ပါဒေဿာမိ၊ ယာတြာ စ မေ ဘဝိဿတိ အနဝဇ္ဇတာ စ ဖာသုဝိဟာရော စာတိ. ယာ တတ္ထ သန္တုဋ္ဌိတာ မတ္တညုတာ ပဋိသင်္ခါ ဘောဇနေ – အယံ ဝုစ္စတိ ဘောဇနေ မတ္တညုတာ.

၁၃၅၆. တတ္ထ ကတမံ မုဋ္ဌသစ္စံ? ယာ အသတိ အနနုဿတိ အပ္ပဋိဿတိ အသတိ အသရဏတာ အဓာရဏတာ ပိလာပနတာ သမ္မုသနတာ – ဣဒံ ဝုစ္စတိ မုဋ္ဌသစ္စံ.

၁၃၅၇. တတ္ထ ကတမံ အသမ္ပဇညံ? ယံ အညာဏံ အဒဿနံ။ပေ။ အဝိဇ္ဇာလင်္ဂီ မောဟော အကုသလမူလံ – ဣဒံ ဝုစ္စတိ အသမ္ပဇညံ.

၁၃၅၈. တတ္ထ ကတမာ သတိ? ယာ သတိ အနုဿတိ ပဋိဿတိ သတိ သရဏတာ ဓာရဏတာ အပိလာပနတာ အသမ္မုသနတာ သတိ သတိန္ဒြိယံ သတိဗလံ သမ္မာသတိ – အယံ ဝုစ္စတိ သတိ.

၁၃၅၉. တတ္ထ ကတမံ သမ္ပဇညံ? ယာ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – ဣဒံ ဝုစ္စတိ သမ္ပဇညံ.

၁၃၆၀. တတ္ထ ကတမံ ပဋိသင်္ခါနဗလံ? ယာ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – ဣဒံ ဝုစ္စတိ ပဋိသင်္ခါနဗလံ.

၁၃၆၁. တတ္ထ ကတမံ ဘာဝနာဗလံ? ယာ ကုသလာနံ ဓမ္မာနံ အာသေဝနာ ဘာဝနာ ဗဟုလီကမ္မံ – ဣဒံ ဝုစ္စတိ ဘာဝနာဗလံ. သတ္တပိ ဗောဇ္ဈင်္ဂါ ဘာဝနာဗလံ.

၁၃၆၂. တတ္ထ ကတမော သမထော? ယာ စိတ္တဿ ဌိတိ။ပေ။ သမ္မာသမာဓိ – အယံ ဝုစ္စတိ သမထော.

၁၃၆၃. တတ္ထ ကတမာ ဝိပဿနာ? ယာ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ ဝိပဿနာ.

၁၃၆၄. တတ္ထ ကတမံ သမထနိမိတ္တံ? ယာ စိတ္တဿ ဌိတိ။ပေ။ သမ္မာသမာဓိ – ဣဒံ ဝုစ္စတိ သမထနိမိတ္တံ.

၁၃၆၅. တတ္ထ ကတမံ ပဂ္ဂါဟနိမိတ္တံ? ယော စေတသိကော ဝီရိယာရမ္ဘော။ပေ။ သမ္မာဝါယာမော – ဣဒံ ဝုစ္စတိ ပဂ္ဂါဟနိမိတ္တံ.

၁၃၆၆. တတ္ထ ကတမော ပဂ္ဂါဟော? ယော စေတသိကော ဝီရိယာရမ္ဘော။ပေ။ သမ္မာဝါယာမော – အယံ ဝုစ္စတိ ပဂ္ဂါဟော.

၁၃၆၇. တတ္ထ ကတမော အဝိက္ခေပေါ? ယာ စိတ္တဿ ဌိတိ။ပေ။ သမ္မာသမာဓိ – အယံ ဝုစ္စတိ အဝိက္ခေပေါ.

၁၃၆၈. တတ္ထ ကတမာ သီလဝိပတ္တိ? ယော ကာယိကော ဝီတိက္ကမော၊ ဝါစသိကော ဝီတိက္ကမော၊ ကာယိကဝါစသိကော ဝီတိက္ကမော – အယံ ဝုစ္စတိ သီလဝိပတ္တိ. သဗ္ဗမ္ပိ ဒုဿိလျံ သီလဝိပတ္တိ.

၁၃၆၉. တတ္ထ ကတမာ ဒိဋ္ဌိဝိပတ္တိ? နတ္ထိ ဒိန္နံ၊ နတ္ထိ ယိဋ္ဌံ၊ နတ္ထိ ဟုတံ၊ နတ္ထိ သုကတဒုက္ကဋာနံ ကမ္မာနံ ဖလံ ဝိပါကော၊ နတ္ထိ အယံ လောကော၊ နတ္ထိ ပရော လောကော၊ နတ္ထိ မာတာ၊ နတ္ထိ ပိတာ၊ နတ္ထိ သတ္တာ ဩပပါတိကာ၊ နတ္ထိ လောကေ သမဏဗြာဟ္မဏာ သမ္မဂ္ဂတာ သမ္မာပဋိပန္နာ ယေ ဣမဉ္စ လောကံ ပရဉ္စ လောကံ သယံ အဘိညာ သစ္ဆိကတွာ ပဝေဒေန္တီတိः ယာ ဧဝရူပါ ဒိဋ္ဌိ ဒိဋ္ဌိဂတံ။ပေ။ ဝိပရိယာသဂ္ဂါဟော – အယံ ဝုစ္စတိ ဒိဋ္ဌိဝိပတ္တိ. သဗ္ဗာပိ မိစ္ဆာဒိဋ္ဌိ ဒိဋ္ဌိဝိပတ္တိ.

၁၃၇၀. တတ္ထ ကတမာ သီလသမ္ပဒါ? ယော ကာယိကော အဝီတိက္ကမော၊ ဝါစသိကော အဝီတိက္ကမော၊ ကာယိကဝါစသိကော အဝီတိက္ကမော – အယံ ဝုစ္စတိ သီလသမ္ပဒါ. သဗ္ဗောပိ သီလသံဝရော သီလသမ္ပဒါ.

၁၃၇၁. တတ္ထ ကတမာ ဒိဋ္ဌိသမ္ပဒါ? အတ္ထိ ဒိန္နံ၊ အတ္ထိ ယိဋ္ဌံ၊ အတ္ထိ ဟုတံ၊ အတ္ထိ သုကတဒုက္ကဋာနံ ကမ္မာနံ ဖလံ ဝိပါကော၊ အတ္ထိ အယံ လောကော၊ အတ္ထိ ပရော လောကော၊ အတ္ထိ မာတာ၊ အတ္ထိ ပိတာ၊ အတ္ထိ သတ္တာ ဩပပါတိကာ၊ အတ္ထိ လောကေ သမဏဗြာဟ္မဏာ သမ္မဂ္ဂတာ သမ္မာပဋိပန္နာ ယေ ဣမဉ္စ လောကံ ပရဉ္စ လောကံ သယံ အဘိညာ သစ္ဆိကတွာ ပဝေဒေန္တီတိः ယာ ဧဝရူပါ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ ဒိဋ္ဌိသမ္ပဒါ. သဗ္ဗာပိ သမ္မာဒိဋ္ဌိ ဒိဋ္ဌိသမ္ပဒါ.

၁၃၇၂. တတ္ထ ကတမာ သီလဝိသုဒ္ဓိ? ယော ကာယိကော အဝီတိက္ကမော၊ ဝါစသိကော အဝီတိက္ကမော၊ ကာယိကဝါစသိကော အဝီတိက္ကမော – အယံ ဝုစ္စတိ သီလဝိသုဒ္ဓိ. သဗ္ဗောပိ သီလသံဝရော သီလဝိသုဒ္ဓိ.

၁၃၇၃. တတ္ထ ကတမာ ဒိဋ္ဌိဝိသုဒ္ဓိ? ကမ္မဿကတဉာဏံ သစ္စာနုလောမိကဉာဏံ မဂ္ဂသမင်္ဂိဿ ဉာဏံ ဖလသမင်္ဂိဿ ဉာဏံ.

၁၃၇၄. ဒိဋ္ဌိဝိသုဒ္ဓိ ခေါ ပနာတိ – ယာ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ.

၁၃၇၅. ယထာဒိဋ္ဌိဿ စ ပဓာနန္တိ – ယော စေတသိကော ဝီရိယာရမ္ဘော။ပေ။ သမ္မာဝါယာမော.

၁၃၇၆. သံဝေဂေါတိ – ဇာတိဘယံ ဇရာဘယံ ဗျာဓိဘယံ မရဏဘယံ. သံဝေဇနိယံ [သံဝေဇနီယံ (သီ.)] ဌာနန္တိ – ဇာတိ ဇရာ ဗျာဓိ မရဏံ.

၁၃၇၇. သံဝိဂ္ဂဿ စ ယောနိသော ပဓာနန္တိ – ဣဓ ဘိက္ခု အနုပ္ပန္နာနံ ပါပကာနံ အကုသလာနံ ဓမ္မာနံ အနုပ္ပါဒါယ ဆန္ဒံ ဇနေတိ ဝါယမတိ ဝီရိယံ အာရဘတိ စိတ္တံ ပဂ္ဂဏှာတိ ပဒဟတိ၊ ဥပ္ပန္နာနံ ပါပကာနံ အကုသလာနံ ဓမ္မာနံ ပဟာနာယ ဆန္ဒံ ဇနေတိ ဝါယမတိ ဝီရိယံ အာရဘတိ စိတ္တံ ပဂ္ဂဏှာတိ ပဒဟတိ၊ အနုပ္ပန္နာနံ ကုသလာနံ ဓမ္မာနံ ဥပ္ပါဒါယ ဆန္ဒံ ဇနေတိ ဝါယမတိ ဝီရိယံ အာရဘတိ စိတ္တံ ပဂ္ဂဏှာတိ ပဒဟတိ၊ ဥပ္ပန္နာနံ ကုသလာနံ ဓမ္မာနံ ဌိတိယာ အသမ္မောသာယ ဘိယျောဘာဝါယ ဝေပုလ္လာယ ဘာဝနာယ ပါရိပူရိယာ ဆန္ဒံ ဇနေတိ ဝါယမတိ ဝီရိယံ အာရဘတိ စိတ္တံ ပဂ္ဂဏှာတိ ပဒဟတိ.

၁၃၇၈. အသန္တုဋ္ဌိတာ စ ကုသလေသု ဓမ္မေသူတိ – ယာ ကုသလာနံ ဓမ္မာနံ ဘာဝနာယ အသန္တုဋ္ဌဿ ဘိယျောကမျတာ.

၁၃၇၉. အပ္ပဋိဝါနိတာ စ ပဓာနသ္မိန္တိ – ယာ ကုသလာနံ ဓမ္မာနံ ဘာဝနာယ သက္ကစ္စကိရိယတာ သာတစ္စကိရိယတာ အဋ္ဌိတကိရိယတာ အနောလီနဝုတ္တိတာ အနိက္ခိတ္တဆန္ဒတာ အနိက္ခိတ္တဓုရတာ အာသေဝနာ ဘာဝနာ ဗဟုလီကမ္မံ.

၁၃၈၀. ဝိဇ္ဇာတိ – တိဿော ဝိဇ္ဇာ – ပုဗ္ဗေနိဝါသာနုဿတိ ဉာဏံ ဝိဇ္ဇာ၊ သတ္တာနံ စုတူပပါတေ ဉာဏံ ဝိဇ္ဇာ၊ အာသဝါနံ ခယေ ဉာဏံ ဝိဇ္ဇာ.

၁၃၈၁. ဝိမုတ္တီတိ – ဒွေ ဝိမုတ္တိယော – စိတ္တဿ [စိတ္တဿ စ (သီ. သျာ.)] အဓိမုတ္တိ၊ နိဗ္ဗာနဉ္စ.

၁၃၈၂. ခယေ ဉာဏန္တိ – မဂ္ဂသမင်္ဂိဿ ဉာဏံ.

၁၃၈၃. အနုပ္ပါဒေ ဉာဏန္တိ – ဖလသမင်္ဂိဿ ဉာဏံ.

နိက္ခေပကဏ္ဍံ နိဋ္ဌိတံ.