တိကနိက္ခေပံ

၉၈၅. ကတမေ ဓမ္မာ ကုသလာ? တီဏိ ကုသလမူလာနိ – အလောဘော၊ အဒေါသော၊ အမောဟော၊ တံသမ္ပယုတ္တော ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော၊ ဝိညာဏက္ခန္ဓော၊ တံသမုဋ္ဌာနံ ကာယကမ္မံ၊ ဝစီကမ္မံ၊ မနောကမ္မံ – ဣမေ ဓမ္မာ ကုသလာ.

၉၈၆. ကတမေ ဓမ္မာ အကုသလာ? တီဏိ အကုသလမူလာနိ – လောဘော၊ ဒေါသော၊ မောဟော၊ တဒေကဋ္ဌာ စ ကိလေသာ၊ တံသမ္ပယုတ္တော ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော၊ ဝိညာဏက္ခန္ဓော၊ တံသမုဋ္ဌာနံ ကာယကမ္မံ၊ ဝစီကမ္မံ၊ မနောကမ္မံ – ဣမေ ဓမ္မာ အကုသလာ.

၉၈၇. ကတမေ ဓမ္မာ အဗျာကတာ? ကုသလာကုသလာနံ ဓမ္မာနံ ဝိပါကာ ကာမာဝစရာ၊ ရူပါဝစရာ၊ အရူပါဝစရာ၊ အပရိယာပန္နာ၊ ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော၊ ဝိညာဏက္ခန္ဓော၊ ယေ စ ဓမ္မာ ကိရိယာ နေဝ ကုသလာ နာကုသလာ န စ ကမ္မဝိပါကာ၊ သဗ္ဗဉ္စ ရူပံ၊ အသင်္ခတာ စ ဓာတု – ဣမေ ဓမ္မာ အဗျာကတာ.

၉၈၈. ကတမေ ဓမ္မာ သုခါယ ဝေဒနာယ သမ္ပယုတ္တာ? သုခဘူမိယံ ကာမာဝစရေ၊ ရူပါဝစရေ၊ အပရိယာပန္နေ၊ သုခံ ဝေဒနံ ဌပေတွာ၊ တံသမ္ပယုတ္တော သညာက္ခန္ဓော၊ သင်္ခါရက္ခန္ဓော၊ ဝိညာဏက္ခန္ဓော – ဣမေ ဓမ္မာ သုခါယ ဝေဒနာယ သမ္ပယုတ္တာ.

၉၈၉. ကတမေ ဓမ္မာ ဒုက္ခာယ ဝေဒနာယ သမ္ပယုတ္တာ? ဒုက္ခဘူမိယံ ကာမာဝစရေ၊ ဒုက္ခံ ဝေဒနံ ဌပေတွာ၊ တံသမ္ပယုတ္တော သညာက္ခန္ဓော၊ သင်္ခါရက္ခန္ဓော၊ ဝိညာဏက္ခန္ဓော – ဣမေ ဓမ္မာ ဒုက္ခာယ ဝေဒနာယ သမ္ပယုတ္တာ.

၉၉၀. ကတမေ ဓမ္မာ အဒုက္ခမသုခါယ ဝေဒနာယ သမ္ပယုတ္တာ? အဒုက္ခမသုခဘူမိယံ ကာမာဝစရေ၊ ရူပါဝစရေ၊ အရူပါဝစရေ၊ အပရိယာပန္နေ၊ အဒုက္ခမသုခံ ဝေဒနံ ဌပေတွာ၊ တံသမ္ပယုတ္တော သညာက္ခန္ဓော၊ သင်္ခါရက္ခန္ဓော၊ ဝိညာဏက္ခန္ဓော – ဣမေ ဓမ္မာ အဒုက္ခမသုခါယ ဝေဒနာယ သမ္ပယုတ္တာ.

၉၉၁. ကတမေ ဓမ္မာ ဝိပါကာ? ကုသလာကုသလာနံ ဓမ္မာနံ ဝိပါကာ ကာမာဝစရာ၊ ရူပါဝစရာ၊ အရူပါဝစရာ၊ အပရိယာပန္နာ၊ ဝေဒနာက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ ဝိပါကာ.

၉၉၂. ကတမေ ဓမ္မာ ဝိပါကဓမ္မဓမ္မာ? ကုသလာကုသလာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ အပရိယာပန္နာ၊ ဝေဒနာက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ ဝိပါကဓမ္မဓမ္မာ.

၉၉၃. ကတမေ ဓမ္မာ နေဝဝိပါကနဝိပါကဓမ္မဓမ္မာ? ယေ စ ဓမ္မာ ကိရိယာ နေဝ ကုသလာ နာကုသလာ န စ ကမ္မဝိပါကာ၊ သဗ္ဗဉ္စ ရူပံ၊ အသင်္ခတာ စ ဓာတု – ဣမေ ဓမ္မာ နေဝဝိပါကနဝိပါကဓမ္မဓမ္မာ.

၉၉၄. ကတမေ ဓမ္မာ ဥပါဒိဏ္ဏုပါဒါနိယာ? သာသဝါ ကုသလာကုသလာနံ ဓမ္မာနံ ဝိပါကာ ကာမာဝစရာ၊ ရူပါဝစရာ၊ အရူပါဝစရာ၊ ဝေဒနာက္ခန္ဓော။ပေ။ ဝိညာဏက္ခန္ဓော၊ ယဉ္စ ရူပံ ကမ္မဿ ကတတ္တာ – ဣမေ ဓမ္မာ ဥပါဒိဏ္ဏုပါဒါနိယာ.

၉၉၅. ကတမေ ဓမ္မာ အနုပါဒိဏ္ဏုပါဒါနိယာ? သာသဝါ ကုသလာကုသလာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ ဝေဒနာက္ခန္ဓော။ပေ။ ဝိညာဏက္ခန္ဓော၊ ယေ စ ဓမ္မာ ကိရိယာ နေဝ ကုသလာ နာကုသလာ န စ ကမ္မဝိပါကာ၊ ယဉ္စ ရူပံ န ကမ္မဿ ကတတ္တာ – ဣမေ ဓမ္မာ အနုပါဒိဏ္ဏုပါဒါနိယာ.

၉၉၆. ကတမေ ဓမ္မာ အနုပါဒိဏ္ဏအနုပါဒါနိယာ? အပရိယာပန္နာ မဂ္ဂါ စ၊ မဂ္ဂဖလာနိ စ၊ အသင်္ခတာ စ ဓာတု – ဣမေ ဓမ္မာ အနုပါဒိဏ္ဏအနုပါဒါနိယာ.

၉၉၇. ကတမေ ဓမ္မာ သံကိလိဋ္ဌသံကိလေသိကာ? တီဏိ အကုသလမူလာနိ – လောဘော၊ ဒေါသော၊ မောဟော၊ တဒေကဋ္ဌာ စ ကိလေသာ၊ တံသမ္ပယုတ္တော ဝေဒနာက္ခန္ဓော။ပေ။ ဝိညာဏက္ခန္ဓော၊ တံသမုဋ္ဌာနံ ကာယကမ္မံ၊ ဝစီကမ္မံ၊ မနောကမ္မံ – ဣမေ ဓမ္မာ သံကိလိဋ္ဌသံကိလေသိကာ.

၉၉၈. ကတမေ ဓမ္မာ အသံကိလိဋ္ဌသံကိလေသိကာ? သာသဝါ ကုသလာဗျာကတာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ ရူပက္ခန္ဓော၊ ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော၊ ဝိညာဏက္ခန္ဓော – ဣမေ ဓမ္မာ အသံကိလိဋ္ဌသံကိလေသိကာ.

၉၉၉. ကတမေ ဓမ္မာ အသံကိလိဋ္ဌအသံကိလေသိကာ? အပရိယာပန္နာ မဂ္ဂါ စ၊ မဂ္ဂဖလာနိ စ၊ အသင်္ခတာ စ ဓာတု – ဣမေ ဓမ္မာ အသံကိလိဋ္ဌအသံကိလေသိကာ.

၁၀၀၀. ကတမေ ဓမ္မာ သဝိတက္ကသဝိစာရာ? သဝိတက္ကသဝိစာရဘူမိယံ ကာမာဝစရေ၊ ရူပါဝစရေ၊ အပရိယာပန္နေ၊ ဝိတက္ကဝိစာရေ ဌပေတွာ၊ တံသမ္ပယုတ္တော ဝေဒနာက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ သဝိတက္ကသဝိစာရာ.

၁၀၀၁. ကတမေ ဓမ္မာ အဝိတက္ကဝိစာရမတ္တာ? အဝိတက္ကဝိစာရမတ္တဘူမိယံ ရူပါဝစရေ၊ အပရိယာပန္နေ၊ ဝိစာရံ ဌပေတွာ၊ တံသမ္ပယုတ္တော ဝေဒနာက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ အဝိတက္ကဝိစာရမတ္တာ.

၁၀၀၂. ကတမေ ဓမ္မာ အဝိတက္ကအဝိစာရာ? အဝိတက္ကအဝိစာရဘူမိယံ ကာမာဝစရေ၊ ရူပါဝစရေ၊ အရူပါဝစရေ၊ အပရိယာပန္နေ၊ ဝေဒနာက္ခန္ဓော။ပေ။ ဝိညာဏက္ခန္ဓော၊ သဗ္ဗဉ္စ ရူပံ၊ အသင်္ခတာ စ ဓာတု – ဣမေ ဓမ္မာ အဝိတက္ကအဝိစာရာ.

၁၀၀၃. ကတမေ ဓမ္မာ ပီတိသဟဂတာ? ပီတိဘူမိယံ ကာမာဝစရေ၊ ရူပါဝစရေ၊ အပရိယာပန္နေ၊ ပီတိံ ဌပေတွာ၊ တံသမ္ပယုတ္တော ဝေဒနာက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ ပီတိသဟဂတာ.

၁၀၀၄. ကတမေ ဓမ္မာ သုခသဟဂတာ? သုခဘူမိယံ ကာမာဝစရေ၊ ရူပါဝစရေ၊ အပရိယာပန္နေ၊ သုခံ ဌပေတွာ၊ တံသမ္ပယုတ္တော သညာက္ခန္ဓော၊ သင်္ခါရက္ခန္ဓော၊ ဝိညာဏက္ခန္ဓော – ဣမေ ဓမ္မာ သုခသဟဂတာ.

၁၀၀၅. ကတမေ ဓမ္မာ ဥပေက္ခာသဟဂတာ? ဥပေက္ခာဘူမိယံ ကာမာဝစရေ၊ ရူပါဝစရေ၊ အရူပါဝစရေ၊ အပရိယာပန္နေ၊ ဥပေက္ခံ ဌပေတွာ၊ တံသမ္ပယုတ္တော သညာက္ခန္ဓော၊ သင်္ခါရက္ခန္ဓော၊ ဝိညာဏက္ခန္ဓော – ဣမေ ဓမ္မာ ဥပေက္ခာသဟဂတာ.

၁၀၀၆. ကတမေ ဓမ္မာ ဒဿနေန ပဟာတဗ္ဗာ? တီဏိ သံယောဇနာနိ – သက္ကာယဒိဋ္ဌိ၊ ဝိစိကိစ္ဆာ၊ သီလဗ္ဗတပရာမာသော.

၁၀၀၇. တတ္ထ ကတမာ သက္ကာယဒိဋ္ဌိ? ဣဓ အဿုတဝါ ပုထုဇ္ဇနော အရိယာနံ အဒဿာဝီ အရိယဓမ္မဿ အကောဝိဒေါ အရိယဓမ္မေ အဝိနီတော သပ္ပုရိသာနံ အဒဿာဝီ သပ္ပုရိသဓမ္မဿ အကောဝိဒေါ သပ္ပုရိသဓမ္မေ အဝိနီတော ရူပံ အတ္တတော သမနုပဿတိ၊ ရူပဝန္တံ ဝါ အတ္တာနံ၊ အတ္တနိ ဝါ ရူပံ၊ ရူပသ္မိံ ဝါ အတ္တာနံ. ဝေဒနံ အတ္တတော သမနုပဿတိ၊ ဝေဒနာဝန္တံ ဝါ အတ္တာနံ၊ အတ္တနိ ဝါ ဝေဒနံ၊ ဝေဒနာယ ဝါ အတ္တာနံ. သညံ အတ္တတော သမနုပဿတိ၊ သညာဝန္တံ ဝါ အတ္တာနံ၊ အတ္တနိ ဝါ သညံ၊ သညာယ ဝါ အတ္တာနံ. သင်္ခါရေ အတ္တတော သမနုပဿတိ၊ သင်္ခါရဝန္တံ ဝါ အတ္တာနံ၊ အတ္တနိ ဝါ သင်္ခါရေ၊ သင်္ခါရေသု ဝါ အတ္တာနံ. ဝိညာဏံ အတ္တတော သမနုပဿတိ၊ ဝိညာဏဝန္တံ ဝါ အတ္တာနံ၊ အတ္တနိ ဝါ ဝိညာဏံ၊ ဝိညာဏသ္မိံ ဝါ အတ္တာနံ. ယာ ဧဝရူပါ ဒိဋ္ဌိ ဒိဋ္ဌိဂတံ ဒိဋ္ဌိဂဟနံ ဒိဋ္ဌိကန္တာရော ဒိဋ္ဌိဝိသူကာယိကံ [ဒိဋ္ဌိဝိသူကာယိတံ (သီ.)] ဒိဋ္ဌိဝိပ္ဖန္ဒိတံ ဒိဋ္ဌိသံယောဇနံ ဂါဟော ပဋိဂ္ဂါဟော အဘိနိဝေသော ပရာမာသော ကုမ္မဂ္ဂေါ မိစ္ဆာပထော မိစ္ဆတ္တံ တိတ္ထာယတနံ ဝိပရိယာသဂ္ဂါဟော – အယံ ဝုစ္စတိ သက္ကာယဒိဋ္ဌိ.

၁၀၀၈. တတ္ထ ကတမာ ဝိစိကိစ္ဆာ? သတ္ထရိ ကင်္ခတိ ဝိစိကိစ္ဆတိ၊ ဓမ္မေ ကင်္ခတိ ဝိစိကိစ္ဆတိ၊ သံဃေ ကင်္ခတိ ဝိစိကိစ္ဆတိ၊ သိက္ခာယ ကင်္ခတိ ဝိစိကိစ္ဆတိ၊ ပုဗ္ဗန္တေ ကင်္ခတိ ဝိစိကိစ္ဆတိ၊ အပရန္တေ ကင်္ခတိ ဝိစိကိစ္ဆတိ၊ ပုဗ္ဗန္တာပရန္တေ ကင်္ခတိ ဝိစိကိစ္ဆတိ၊ ဣဒပ္ပစ္စယတာ ပဋိစ္စသမုပ္ပန္နေသု ဓမ္မေသု ကင်္ခတိ ဝိစိကိစ္ဆတိ. ယာ ဧဝရူပါ ကင်္ခါ ကင်္ခါယနာ ကင်္ခါယိတတ္တံ ဝိမတိ ဝိစိကိစ္ဆာ ဒွေဠှကံ ဒွေဓာပထော သံသယော အနေကံသဂ္ဂါဟော အာသပ္ပနာ ပရိသပ္ပနာ အပရိယောဂါဟနာ ထမ္ဘိတတ္တံ စိတ္တဿ မနောဝိလေခေါ – အယံ ဝုစ္စတိ ဝိစိကိစ္ဆာ.

၁၀၀၉. တတ္ထ ကတမော သီလဗ္ဗတပရာမာသော? ဣတော ဗဟိဒ္ဓါ သမဏဗြာဟ္မဏာနံ ‘သီလေန သုဒ္ဓိ၊ ဝတေန သုဒ္ဓိ၊ သီလဗ္ဗတေန သုဒ္ဓီ’တိ ယာ ဧဝရူပါ ဒိဋ္ဌိ ဒိဋ္ဌိဂတံ ဒိဋ္ဌိဂဟနံ ဒိဋ္ဌိကန္တာရော ဒိဋ္ဌိဝိသူကာယိကံ ဒိဋ္ဌိဝိပ္ဖန္ဒိတံ ဒိဋ္ဌိသံယောဇနံ ဂါဟော ပဋိဂ္ဂါဟော အဘိနိဝေသော ပရာမာသော ကုမ္မဂ္ဂေါ မိစ္ဆာပထော မိစ္ဆတ္တံ တိတ္ထာယတနံ ဝိပရိယာသဂ္ဂါဟော – အယံ ဝုစ္စတိ သီလဗ္ဗတပရာမာသော.

၁၀၁၀. ဣမာနိ တီဏိ သံယောဇနာနိ၊ တဒေကဋ္ဌာ စ ကိလေသာ၊ တံသမ္ပယုတ္တော ဝေဒနာက္ခန္ဓော။ပေ။ ဝိညာဏက္ခန္ဓော၊ တံသမုဋ္ဌာနံ ကာယကမ္မံ ဝစီကမ္မံ မနောကမ္မံ – ဣမေ ဓမ္မာ ဒဿနေန ပဟာတဗ္ဗာ.

၁၀၁၁. ကတမေ ဓမ္မာ ဘာဝနာယ ပဟာတဗ္ဗာ? အဝသေသော လောဘော၊ ဒေါသော၊ မောဟော၊ တဒေကဋ္ဌာ စ ကိလေသာ၊ တံသမ္ပယုတ္တော ဝေဒနာက္ခန္ဓော။ပေ။ ဝိညာဏက္ခန္ဓော၊ တံသမုဋ္ဌာနံ ကာယကမ္မံ၊ ဝစီကမ္မံ၊ မနောကမ္မံ – ဣမေ ဓမ္မာ ဘာဝနာယ ပဟာတဗ္ဗာ.

၁၀၁၂. ကတမေ ဓမ္မာ နေဝ ဒဿနေန န ဘာဝနာယ ပဟာတဗ္ဗာ? ကုသလာဗျာကတာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ အပရိယာပန္နာ၊ ဝေဒနာက္ခန္ဓော။ပေ။ ဝိညာဏက္ခန္ဓော၊ သဗ္ဗဉ္စ ရူပံ၊ အသင်္ခတာ စ ဓာတု – ဣမေ ဓမ္မာ နေဝ ဒဿနေန န ဘာဝနာယ ပဟာတဗ္ဗာ.

၁၀၁၃. ကတမေ ဓမ္မာ ဒဿနေန ပဟာတဗ္ဗဟေတုကာ? တီဏိ သံယောဇနာနိ – သက္ကာယဒိဋ္ဌိ၊ ဝိစိကိစ္ဆာ၊ သီလဗ္ဗတပရာမာသော.

၁၀၁၄. တတ္ထ ကတမာ သက္ကာယဒိဋ္ဌိ။ပေ။ အယံ ဝုစ္စတိ သက္ကာယဒိဋ္ဌိ.

၁၀၁၅. တတ္ထ ကတမာ ဝိစိကိစ္ဆာ။ပေ။ အယံ ဝုစ္စတိ ဝိစိကိစ္ဆာ.

၁၀၁၆. တတ္ထ ကတမော သီလဗ္ဗတပရာမာသော။ပေ။ အယံ ဝုစ္စတိ သီလဗ္ဗတပရာမာသော.

၁၀၁၇. ဣမာနိ တီဏိ သံယောဇနာနိ၊ တဒေကဋ္ဌာ စ ကိလေသာ၊ တံသမ္ပယုတ္တော ဝေဒနာက္ခန္ဓော။ပေ။ ဝိညာဏက္ခန္ဓော၊ တံသမုဋ္ဌာနံ ကာယကမ္မံ၊ ဝစီကမ္မံ၊ မနောကမ္မံ – ဣမေ ဓမ္မာ ဒဿနေန ပဟာတဗ္ဗဟေတုကာ. တီဏိ သံယောဇနာနိ – သက္ကာယဒိဋ္ဌိ၊ ဝိစိကိစ္ဆာ၊ သီလဗ္ဗတပရာမာသော – ဣမေ ဓမ္မာ ဒဿနေန ပဟာတဗ္ဗာ. တဒေကဋ္ဌော လောဘော၊ ဒေါသော၊ မောဟော – ဣမေ ဓမ္မာ ဒဿနေန ပဟာတဗ္ဗဟေတူ. တဒေကဋ္ဌာ စ ကိလေသာ၊ တံသမ္ပယုတ္တော ဝေဒနာက္ခန္ဓော။ပေ။ ဝိညာဏက္ခန္ဓော၊ တံသမုဋ္ဌာနံ ကာယကမ္မံ၊ ဝစီကမ္မံ၊ မနောကမ္မံ – ဣမေ ဓမ္မာ ဒဿနေန ပဟာတဗ္ဗဟေတုကာ.

၁၀၁၈. ကတမေ ဓမ္မာ ဘာဝနာယ ပဟာတဗ္ဗဟေတုကာ? အဝသေသော လောဘော၊ ဒေါသော၊ မောဟော – ဣမေ ဓမ္မာ ဘာဝနာယ ပဟာတဗ္ဗဟေတူ. တဒေကဋ္ဌာ စ ကိလေသာ၊ တံသမ္ပယုတ္တော ဝေဒနာက္ခန္ဓော။ပေ။ ဝိညာဏက္ခန္ဓော၊ တံသမုဋ္ဌာနံ ကာယကမ္မံ၊ ဝစီကမ္မံ၊ မနောကမ္မံ – ဣမေ ဓမ္မာ ဘာဝနာယ ပဟာတဗ္ဗဟေတုကာ.

၁၀၁၉. ကတမေ ဓမ္မာ နေဝ ဒဿနေန န ဘာဝနာယ ပဟာတဗ္ဗဟေတုကာ? တေ ဓမ္မေ ဌပေတွာ အဝသေသာ ကုသလာကုသလာဗျာကတာ ဓမ္မာ ကာမာဝစရာ ရူပါဝစရာ၊ အရူပါဝစရာ၊ အပရိယာပန္နာ၊ ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော၊ ဝိညာဏက္ခန္ဓော၊ သဗ္ဗဉ္စ ရူပံ၊ အသင်္ခတာ စ ဓာတု – ဣမေ ဓမ္မာ နေဝ ဒဿနေန န ဘာဝနာယ ပဟာတဗ္ဗဟေတုကာ.

၁၀၂၀. ကတမေ ဓမ္မာ အာစယဂါမိနော? သာသဝါ ကုသလာကုသလာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ ဝေဒနာက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ အာစယဂါမိနော.

၁၀၂၁. ကတမေ ဓမ္မာ အပစယဂါမိနော? စတ္တာရော မဂ္ဂါ အပရိယာပန္နာ – ဣမေ ဓမ္မာ အပစယဂါမိနော.

၁၀၂၂. ကတမေ ဓမ္မာ နေဝ အာစယဂါမိ န အပစယဂါမိနော? ကုသလာကုသလာနံ ဓမ္မာနံ ဝိပါကာ ကာမာဝစရာ၊ ရူပါဝစရာ၊ အရူပါဝစရာ၊ အပရိယာပန္နာ၊ ဝေဒနာက္ခန္ဓော။ပေ။ ဝိညာဏက္ခန္ဓော၊ ယေ စ ဓမ္မာ ကိရိယာ နေဝ ကုသလာ နာကုသလာ န စ ကမ္မဝိပါကာ၊ သဗ္ဗဉ္စ ရူပံ၊ အသင်္ခတာ စ ဓာတု – ဣမေ ဓမ္မာ နေဝ အာစယဂါမိ န အပစယဂါမိနော.

၁၀၂၃. ကတမေ ဓမ္မာ သေက္ခာ? စတ္တာရော မဂ္ဂါ အပရိယာပန္နာ၊ ဟေဋ္ဌိမာနိ စ တီဏိ သာမညဖလာနိ – ဣမေ ဓမ္မာ သေက္ခာ.

၁၀၂၄. ကတမေ ဓမ္မာ အသေက္ခာ? ဥပရိဋ္ဌိမံ [ဥပရိမံ (သျာ.)] အရဟတ္တဖလံ – ဣမေ ဓမ္မာ အသေက္ခာ.

၁၀၂၅. ကတမေ ဓမ္မာ နေဝသေက္ခနာသေက္ခာ? တေ ဓမ္မေ ဌပေတွာ၊ အဝသေသာ ကုသလာကုသလာဗျာကတာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ ဝေဒနာက္ခန္ဓော။ပေ။ ဝိညာဏက္ခန္ဓော၊ သဗ္ဗဉ္စ ရူပံ၊ အသင်္ခတာ စ ဓာတု – ဣမေ ဓမ္မာ နေဝသေက္ခနာသေက္ခာ.

၁၀၂၆. ကတမေ ဓမ္မာ ပရိတ္တာ? သဗ္ဗေဝ ကာမာဝစရာ ကုသလာကုသလာဗျာကတာ ဓမ္မာ၊ ရူပက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ ပရိတ္တာ.

၁၀၂၇. ကတမေ ဓမ္မာ မဟဂ္ဂတာ? ရူပါဝစရာ၊ အရူပါဝစရာ၊ ကုသလာဗျာကတာ ဓမ္မာ၊ ဝေဒနာက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ မဟဂ္ဂတာ.

၁၀၂၈. ကတမေ ဓမ္မာ အပ္ပမာဏာ? အပရိယာပန္နာ မဂ္ဂါ စ၊ မဂ္ဂဖလာနိ စ၊ အသင်္ခတာ စ ဓာတု – ဣမေ ဓမ္မာ အပ္ပမာဏာ.

၁၀၂၉. ကတမေ ဓမ္မာ ပရိတ္တာရမ္မဏာ? ပရိတ္တေ ဓမ္မေ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ ပရိတ္တာရမ္မဏာ.

၁၀၃၀. ကတမေ ဓမ္မာ မဟဂ္ဂတာရမ္မဏာ? မဟဂ္ဂတေ ဓမ္မေ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ မဟဂ္ဂတာရမ္မဏာ.

၁၀၃၁. ကတမေ ဓမ္မာ အပ္ပမာဏာရမ္မဏာ? အပ္ပမာဏေ ဓမ္မေ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ အပ္ပမာဏာရမ္မဏာ.

၁၀၃၂. ကတမေ ဓမ္မာ ဟီနာ? တီဏိ အကုသလမူလာနိ – လောဘော၊ ဒေါသော၊ မောဟော၊ တဒေကဋ္ဌာ စ ကိလေသာ၊ တံသမ္ပယုတ္တော ဝေဒနာက္ခန္ဓော။ပေ။ ဝိညာဏက္ခန္ဓော၊ တံသမုဋ္ဌာနံ ကာယကမ္မံ၊ ဝစီကမ္မံ၊ မနောကမ္မံ – ဣမေ ဓမ္မာ ဟီနာ.

၁၀၃၃. ကတမေ ဓမ္မာ မဇ္ဈိမာ? သာသဝါ ကုသလာဗျာကတာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ ရူပက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ မဇ္ဈိမာ.

၁၀၃၄. ကတမေ ဓမ္မာ ပဏီတာ? အပရိယာပန္နာ မဂ္ဂါ စ၊ မဂ္ဂဖလာနိ စ၊ အသင်္ခတာ စ ဓာတု – ဣမေ ဓမ္မာ ပဏီတာ.

၁၀၃၅. ကတမေ ဓမ္မာ မိစ္ဆတ္တနိယတာ? ပဉ္စ ကမ္မာနိ အာနန္တရိကာနိ၊ ယာ စ မိစ္ဆာဒိဋ္ဌိနိယတာ – ဣမေ ဓမ္မာ မိစ္ဆတ္တနိယတာ.

၁၀၃၆. ကတမေ ဓမ္မာ သမ္မတ္တနိယတာ? စတ္တာရော မဂ္ဂါ အပရိယာပန္နာ – ဣမေ ဓမ္မာ သမ္မတ္တနိယတာ.

၁၀၃၇. ကတမေ ဓမ္မာ အနိယတာ? တေ ဓမ္မေ ဌပေတွာ၊ အဝသေသာ ကုသလာကုသလာဗျာကတာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ အပရိယာပန္နာ၊ ဝေဒနာက္ခန္ဓော။ပေ။ ဝိညာဏက္ခန္ဓော၊ သဗ္ဗဉ္စ ရူပံ၊ အသင်္ခတာ စ ဓာတု – ဣမေ ဓမ္မာ အနိယတာ.

၁၀၃၈. ကတမေ ဓမ္မာ မဂ္ဂါရမ္မဏာ? အရိယမဂ္ဂံ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ မဂ္ဂါရမ္မဏာ.

၁၀၃၉. ကတမေ ဓမ္မာ မဂ္ဂဟေတုကာ? အရိယမဂ္ဂသမင်္ဂိဿ မဂ္ဂင်္ဂါနိ ဌပေတွာ၊ တံသမ္ပယုတ္တော ဝေဒနာက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ မဂ္ဂဟေတုကာ. အရိယမဂ္ဂသမင်္ဂိဿ သမ္မာဒိဋ္ဌိ မဂ္ဂေါ စေဝ ဟေတု စ၊ သမ္မာဒိဋ္ဌိံ ဌပေတွာ၊ တံသမ္ပယုတ္တော ဝေဒနာက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ မဂ္ဂဟေတုကာ. အရိယမဂ္ဂသမင်္ဂိဿ အလောဘော၊ အဒေါသော၊ အမောဟော – ဣမေ ဓမ္မာ မဂ္ဂဟေတူ. တံသမ္ပယုတ္တော ဝေဒနာက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ မဂ္ဂဟေတုကာ.

၁၀၄၀. ကတမေ ဓမ္မာ မဂ္ဂါဓိပတိနော? အရိယမဂ္ဂံ အဓိပတိံ ကရိတွာ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ မဂ္ဂါဓိပတိနော. အရိယမဂ္ဂသမင်္ဂိဿ ဝီမံသာဓိပတေယျံ မဂ္ဂံ ဘာဝယန္တဿ ဝီမံသံ ဌပေတွာ၊ တံသမ္ပယုတ္တော ဝေဒနာက္ခန္ဓော။ပေ။ ဝိညာဏက္ခန္ဓော – ဣမေ ဓမ္မာ မဂ္ဂါဓိပတိနော.

၁၀၄၁. ကတမေ ဓမ္မာ ဥပ္ပန္နာ? ယေ ဓမ္မာ ဇာတာ ဘူတာ သဉ္ဇာတာ နိဗ္ဗတ္တာ အဘိနိဗ္ဗတ္တာ ပါတုဘူတာ ဥပ္ပန္နာ သမုပ္ပန္နာ ဥဋ္ဌိတာ သမုဋ္ဌိတာ ဥပ္ပန္နာ ဥပ္ပန္နံသေန သင်္ဂဟိတာ၊ ရူပံ [ရူပါ (ဗဟူသု)]၊ ဝေဒနာ၊ သညာ၊ သင်္ခါရာ၊ ဝိညာဏံ – ဣမေ ဓမ္မာ ဥပ္ပန္နာ.

၁၀၄၂. ကတမေ ဓမ္မာ အနုပ္ပန္နာ? ယေ ဓမ္မာ အဇာတာ အဘူတာ အသဉ္ဇာတာ အနိဗ္ဗတ္တာ အနဘိနိဗ္ဗတ္တာ အပါတုဘူတာ အနုပ္ပန္နာ အသမုပ္ပန္နာ အနုဋ္ဌိတာ အသမုဋ္ဌိတာ အနုပ္ပန္နာ အနုပ္ပန္နံသေန သင်္ဂဟိတာ၊ ရူပံ၊ ဝေဒနာ၊ သညာ၊ သင်္ခါရာ၊ ဝိညာဏံ – ဣမေ ဓမ္မာ အနုပ္ပန္နာ.

၁၀၄၃. ကတမေ ဓမ္မာ ဥပ္ပါဒိနော? ကုသလာကုသလာနံ ဓမ္မာနံ အဝိပက္ကဝိပါကာနံ ဝိပါကာ ကာမာဝစရာ၊ ရူပါဝစရာ၊ အရူပါဝစရာ၊ အပရိယာပန္နာ၊ ဝေဒနာက္ခန္ဓော။ပေ။ ဝိညာဏက္ခန္ဓော၊ ယဉ္စ ရူပံ ကမ္မဿ ကတတ္တာ ဥပ္ပဇ္ဇိဿတိ – ဣမေ ဓမ္မာ ဥပ္ပါဒိနော.

၁၀၄၄. ကတမေ ဓမ္မာ အတီတာ? ယေ ဓမ္မာ အတီတာ နိရုဒ္ဓါ ဝိဂတာ ဝိပရိဏတာ အတ္ထင်္ဂတာ အဗ္ဘတ္ထင်္ဂတာ ဥပ္ပဇ္ဇိတွာ ဝိဂတာ အတီတာ အတီတံသေန သင်္ဂဟိတာ၊ ရူပံ၊ ဝေဒနာ၊ သညာ၊ သင်္ခါရာ၊ ဝိညာဏံ – ဣမေ ဓမ္မာ အတီတာ.

၁၀၄၅. ကတမေ ဓမ္မာ အနာဂတာ? ယေ ဓမ္မာ အဇာတာ အဘူတာ အသဉ္ဇာတာ အနိဗ္ဗတ္တာ အနဘိနိဗ္ဗတ္တာ အပါတုဘူတာ အနုပ္ပန္နာ အသမုပ္ပန္နာ အနုဋ္ဌိတာ အသမုဋ္ဌိတာ အနာဂတာ အနာဂတံသေန သင်္ဂဟိတာ၊ ရူပံ၊ ဝေဒနာ၊ သညာ၊ သင်္ခါရာ၊ ဝိညာဏံ – ဣမေ ဓမ္မာ အနာဂတာ.

၁၀၄၆. ကတမေ ဓမ္မာ ပစ္စုပ္ပန္နာ? ယေ ဓမ္မာ ဇာတာ ဘူတာ သဉ္ဇာတာ နိဗ္ဗတ္တာ အဘိနိဗ္ဗတ္တာ ပါတုဘူတာ ဥပ္ပန္နာ သမုပ္ပန္နာ ဥဋ္ဌိတာ သမုဋ္ဌိတာ ပစ္စုပ္ပန္နာ ပစ္စုပ္ပန္နံသေန သင်္ဂဟိတာ၊ ရူပံ၊ ဝေဒနာ၊ သညာ၊ သင်္ခါရာ၊ ဝိညာဏံ – ဣမေ ဓမ္မာ ပစ္စုပ္ပန္နာ.

၁၀၄၇. ကတမေ ဓမ္မာ အတီတာရမ္မဏာ? အတီတေ ဓမ္မေ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ အတီတာရမ္မဏာ.

၁၀၄၈. ကတမေ ဓမ္မာ အနာဂတာရမ္မဏာ? အနာဂတေ ဓမ္မေ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ အနာဂတာရမ္မဏာ.

၁၀၄၉. ကတမေ ဓမ္မာ ပစ္စုပ္ပန္နာရမ္မဏာ? ပစ္စုပ္ပန္နေ ဓမ္မေ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ ပစ္စုပ္ပန္နာရမ္မဏာ.

၁၀၅၀. ကတမေ ဓမ္မာ အဇ္ဈတ္တာ? ယေ ဓမ္မာ တေသံ တေသံ သတ္တာနံ အဇ္ဈတ္တံ ပစ္စတ္တံ နိယတာ ပါဋိပုဂ္ဂလိကာ ဥပါဒိဏ္ဏာ၊ ရူပံ၊ ဝေဒနာ၊ သညာ၊ သင်္ခါရာ၊ ဝိညာဏံ – ဣမေ ဓမ္မာ အဇ္ဈတ္တာ.

၁၀၅၁. ကတမေ ဓမ္မာ ဗဟိဒ္ဓါ? ယေ ဓမ္မာ တေသံ တေသံ ပရသတ္တာနံ ပရပုဂ္ဂလာနံ အဇ္ဈတ္တံ ပစ္စတ္တံ နိယတာ ပါဋိပုဂ္ဂလိကာ ဥပါဒိဏ္ဏာ၊ ရူပံ၊ ဝေဒနာ၊ သညာ၊ သင်္ခါရာ၊ ဝိညာဏံ – ဣမေ ဓမ္မာ ဗဟိဒ္ဓါ.

၁၀၅၂. ကတမေ ဓမ္မာ အဇ္ဈတ္တဗဟိဒ္ဓါ? တဒုဘယံ – ဣမေ ဓမ္မာ အဇ္ဈတ္တဗဟိဒ္ဓါ.

၁၀၅၃. ကတမေ ဓမ္မာ အဇ္ဈတ္တာရမ္မဏာ? အဇ္ဈတ္တေ ဓမ္မေ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ အဇ္ဈတ္တာရမ္မဏာ.

၁၀၅၄. ကတမေ ဓမ္မာ ဗဟိဒ္ဓါရမ္မဏာ? ဗဟိဒ္ဓါ ဓမ္မေ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ ဗဟိဒ္ဓါရမ္မဏာ.

၁၀၅၅. ကတမေ ဓမ္မာ အဇ္ဈတ္တဗဟိဒ္ဓါရမ္မဏာ? အဇ္ဈတ္တဗဟိဒ္ဓါ ဓမ္မေ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ အဇ္ဈတ္တဗဟိဒ္ဓါရမ္မဏာ.

၁၀၅၆. ကတမေ ဓမ္မာ သနိဒဿနသပ္ပဋိဃာ? ရူပါယတနံ – ဣမေ ဓမ္မာ သနိဒဿနသပ္ပဋိဃာ.

၁၀၅၇. ကတမေ ဓမ္မာ အနိဒဿနသပ္ပဋိဃာ? စက္ခာယတနံ၊ သောတာယတနံ၊ ဃာနာယတနံ၊ ဇိဝှါယတနံ၊ ကာယာယတနံ၊ သဒ္ဒါယတနံ၊ ဂန္ဓာယတနံ၊ ရသာယတနံ၊ ဖောဋ္ဌဗ္ဗာယတနံ – ဣမေ ဓမ္မာ အနိဒဿနသပ္ပဋိဃာ.

၁၀၅၈. ကတမေ ဓမ္မာ အနိဒဿနအပ္ပဋိဃာ? ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော၊ ဝိညာဏက္ခန္ဓော၊ ယဉ္စ ရူပံ အနိဒဿနံ အပ္ပဋိဃံ ဓမ္မာယတနပရိယာပန္နံ၊ အသင်္ခတာ စ ဓာတု – ဣမေ ဓမ္မာ အနိဒဿနအပ္ပဋိဃာ.

တိကံ.