အဟေတုကကိရိယာအဗျာကတံ

ကိရိယာမနောဓာတု

၅၆၆. ကတမေ ဓမ္မာ အဗျာကတာ? ယသ္မိံ သမယေ မနောဓာတု ဥပ္ပန္နာ ဟောတိ ကိရိယာ နေဝ ကုသလာ နာကုသလာ န စ ကမ္မဝိပါကာ ဥပေက္ခာသဟဂတာ ရူပါရမ္မဏာ ဝါ။ပေ။ ဖောဋ္ဌဗ္ဗာရမ္မဏာ ဝါ ယံ ယံ ဝါ ပနာရဗ္ဘ၊ တသ္မိံ သမယေ ဖဿော ဟောတိ၊ ဝေဒနာ ဟောတိ၊ သညာ ဟောတိ၊ စေတနာ ဟောတိ၊ စိတ္တံ ဟောတိ၊ ဝိတက္ကော ဟောတိ၊ ဝိစာရော ဟောတိ၊ ဥပေက္ခာ ဟောတိ၊ စိတ္တဿေကဂ္ဂတာ ဟောတိ၊ မနိန္ဒြိယံ ဟောတိ၊ ဥပေက္ခိန္ဒြိယံ ဟောတိ၊ ဇီဝိတိန္ဒြိယံ ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အဗျာကတာ။ပေ။.

တသ္မိံ ခေါ ပန သမယေ စတ္တာရော ခန္ဓာ ဟောန္တိ၊ ဒွါယတနာနိ ဟောန္တိ၊ ဒွေ ဓာတုယော ဟောန္တိ၊ တယော အာဟာရာ ဟောန္တိ၊ တီဏိန္ဒြိယာနိ ဟောန္တိ၊ ဧကော ဖဿော ဟောတိ။ပေ။ ဧကာ မနောဓာတု ဟောတိ၊ ဧကံ ဓမ္မာယတနံ ဟောတိ၊ ဧကာ ဓမ္မဓာတု ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အဗျာကတာ။ပေ။.

၅၆၇. ကတမော တသ္မိံ သမယေ သင်္ခါရက္ခန္ဓော ဟောတိ? ဖဿော စေတနာ ဝိတက္ကော ဝိစာရော စိတ္တဿေကဂ္ဂတာ ဇီဝိတိန္ဒြိယံ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ ဌပေတွာ ဝေဒနာက္ခန္ဓံ ဌပေတွာ သညာက္ခန္ဓံ ဌပေတွာ ဝိညာဏက္ခန္ဓံ – အယံ တသ္မိံ သမယေ သင်္ခါရက္ခန္ဓော ဟောတိ။ပေ။ ဣမေ ဓမ္မာ အဗျာကတာ.

ကိရိယာ မနောဓာတု.

ကိရိယာမနောဝိညာဏဓာတုသောမနဿသဟဂတာ

၅၆၈. ကတမေ ဓမ္မာ အဗျာကတာ? ယသ္မိံ သမယေ မနောဝိညာဏဓာတု ဥပ္ပန္နာ ဟောတိ ကိရိယာ နေဝ ကုသလာ နာကုသလာ န စ ကမ္မဝိပါကာ သောမနဿသဟဂတာ ရူပါရမ္မဏာ ဝါ။ပေ။ ဓမ္မာရမ္မဏာ ဝါ ယံ ယံ ဝါ ပနာရဗ္ဘ၊ တသ္မိံ သမယေ ဖဿော ဟောတိ၊ ဝေဒနာ ဟောတိ၊ သညာ ဟောတိ၊ စေတနာ ဟောတိ၊ စိတ္တံ ဟောတိ၊ ဝိတက္ကော ဟောတိ၊ ဝိစာရော ဟောတိ၊ ပီတိ ဟောတိ၊ သုခံ ဟောတိ၊ စိတ္တဿေကဂ္ဂတာ ဟောတိ၊ ဝီရိယိန္ဒြိယံ ဟောတိ၊ သမာဓိန္ဒြိယံ ဟောတိ၊ မနိန္ဒြိယံ ဟောတိ၊ သောမနဿိန္ဒြိယံ ဟောတိ၊ ဇီဝိတိန္ဒြိယံ ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အဗျာကတာ.

၅၆၉. ကတမော တသ္မိံ သမယေ ဖဿော ဟောတိ? ယော တသ္မိံ သမယေ ဖဿော ဖုသနာ သံဖုသနာ သံဖုသိတတ္တံ – အယံ တသ္မိံ သမယေ ဖဿော ဟောတိ။ပေ။.

၅၇၀. ကတမာ တသ္မိံ သမယေ စိတ္တဿေကဂ္ဂတာ ဟောတိ? ယာ တသ္မိံ သမယေ စိတ္တဿ ဌိတိ သဏ္ဌိတိ အဝဋ္ဌိတိ အဝိသာဟာရော အဝိက္ခေပေါ အဝိသာဟဋမာနသတာ သမထော သမာဓိန္ဒြိယံ သမာဓိဗလံ – အယံ တသ္မိံ သမယေ စိတ္တဿေကဂ္ဂတာ ဟောတိ.

၅၇၁. ကတမံ တသ္မိံ သမယေ ဝီရိယိန္ဒြိယံ ဟောတိ? ယော တသ္မိံ သမယေ စေတသိကော ဝီရိယာရမ္ဘော နိက္ကမော ပရက္ကမော ဥယျာမော ဝါယာမော ဥဿာဟော ဥဿောဠှီ ထာမော ဓိတိ အသိထိလပရက္ကမတာ အနိက္ခိတ္တဆန္ဒတာ အနိက္ခိတ္တဓုရတာ ဓုရသမ္ပဂ္ဂါဟော ဝီရိယံ ဝီရိယိန္ဒြိယံ ဝီရိယဗလံ – ဣဒံ တသ္မိံ သမယေ ဝီရိယိန္ဒြိယံ ဟောတိ.

၅၇၂. ကတမံ တသ္မိံ သမယေ သမာဓိန္ဒြိယံ ဟောတိ? ယာ တသ္မိံ သမယေ စိတ္တဿ ဌိတိ သဏ္ဌိတိ အဝဋ္ဌိတိ အဝိသာဟာရော အဝိက္ခေပေါ အဝိသာဟဋမာနသတာ သမထော သမာဓိန္ဒြိယံ သမာဓိဗလံ – ဣဒံ တသ္မိံ သမယေ သမာဓိန္ဒြိယံ ဟောတိ။ပေ။ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အဗျာကတာ.

တသ္မိံ ခေါ ပန သမယေ စတ္တာရော ခန္ဓာ ဟောန္တိ၊ ဒွါယတနာနိ ဟောန္တိ၊ ဒွေ ဓာတုယော ဟောန္တိ၊ တယော အာဟာရာ ဟောန္တိ၊ ပဉ္စိန္ဒြိယာနိ ဟောန္တိ၊ ဧကော ဖဿော ဟောတိ။ပေ။ ဧကာ မနောဝိညာဏဓာတု ဟောတိ၊ ဧကံ ဓမ္မာယတနံ ဟောတိ၊ ဧကာ ဓမ္မဓာတု ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အဗျာကတာ။ပေ။.

၅၇၃. ကတမော တသ္မိံ သမယေ သင်္ခါရက္ခန္ဓော ဟောတိ? ဖဿော စေတနာ ဝိတက္ကော ဝိစာရော ပီတိ စိတ္တဿေကဂ္ဂတာ ဝီရိယိန္ဒြိယံ သမာဓိန္ဒြိယံ ဇီဝိတိန္ဒြိယံ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ ဌပေတွာ ဝေဒနာက္ခန္ဓံ ဌပေတွာ သညာက္ခန္ဓံ ဌပေတွာ ဝိညာဏက္ခန္ဓံ – အယံ တသ္မိံ သမယေ သင်္ခါရက္ခန္ဓော ဟောတိ။ပေ။ ဣမေ ဓမ္မာ အဗျာကတာ.

ကိရိယာ မနောဝိညာဏဓာတု သောမနဿသဟဂတာ.

ကိရိယာမနောဝိညာဏဓာတုဥပေက္ခာသဟဂတာ

၅၇၄. ကတမေ ဓမ္မာ အဗျာကတာ? ယသ္မိံ သမယေ မနောဝိညာဏဓာတု ဥပ္ပန္နာ ဟောတိ ကိရိယာ နေဝ ကုသလာ နာကုသလာ န စ ကမ္မဝိပါကာ ဥပေက္ခာသဟဂတာ ရူပါရမ္မဏာ ဝါ။ပေ။ ဓမ္မာရမ္မဏာ ဝါ ယံ ယံ ဝါ ပနာရဗ္ဘ၊ တသ္မိံ သမယေ ဖဿော ဟောတိ၊ ဝေဒနာ ဟောတိ၊ သညာ ဟောတိ၊ စေတနာ ဟောတိ၊ စိတ္တံ ဟောတိ၊ ဝိတက္ကော ဟောတိ၊ ဝိစာရော ဟောတိ၊ ဥပေက္ခာ ဟောတိ၊ စိတ္တဿေကဂ္ဂတာ ဟောတိ၊ ဝီရိယိန္ဒြိယံ ဟောတိ၊ သမာဓိန္ဒြိယံ ဟောတိ မနိန္ဒြိယံ ဟောတိ၊ ဥပေက္ခိန္ဒြိယံ ဟောတိ၊ ဇီဝိတိန္ဒြိယံ ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အဗျာကတာ။ပေ။.

တသ္မိံ ခေါ ပန သမယေ စတ္တာရော ခန္ဓာ ဟောန္တိ၊ ဒွါယတနာနိ ဟောန္တိ၊ ဒွေ ဓာတုယော ဟောန္တိ၊ တယော အာဟာရာ ဟောန္တိ၊ ပဉ္စိန္ဒြိယာနိ ဟောန္တိ၊ ဧကော ဖဿော ဟောတိ။ပေ။ ဧကာ မနောဝိညာဏဓာတု ဟောတိ၊ ဧကံ ဓမ္မာယတနံ ဟောတိ၊ ဧကာ ဓမ္မဓာတု ဟောတိ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ – ဣမေ ဓမ္မာ အဗျာကတာ။ပေ။.

၅၇၅. ကတမော တသ္မိံ သမယေ သင်္ခါရက္ခန္ဓော ဟောတိ? ဖဿော စေတနာ ဝိတက္ကော ဝိစာရော စိတ္တဿေကဂ္ဂတာ ဝီရိယိန္ဒြိယံ သမာဓိန္ဒြိယံ ဇီဝိတိန္ဒြိယံ၊ ယေ ဝါ ပန တသ္မိံ သမယေ အညေပိ အတ္ထိ ပဋိစ္စသမုပ္ပန္နာ အရူပိနော ဓမ္မာ ဌပေတွာ ဝေဒနာက္ခန္ဓံ ဌပေတွာ သညာက္ခန္ဓံ ဌပေတွာ ဝိညာဏက္ခန္ဓံ – အယံ တသ္မိံ သမယေ သင်္ခါရက္ခန္ဓော ဟောတိ။ပေ။ ဣမေ ဓမ္မာ အဗျာကတာ.

ကိရိယာ မနောဝိညာဏဓာတု ဥပေက္ခာသဟဂတာ.

အဟေတုကာ ကိရိယာ အဗျာကတာ.

သဟေတုကကာမာဝစရကိရိယာ

၅၇၆. ကတမေ ဓမ္မာ အဗျာကတာ? ယသ္မိံ သမယေ မနောဝိညာဏဓာတု ဥပ္ပန္နာ ဟောတိ ကိရိယာ နေဝ ကုသလာ နာကုသလာ န စ ကမ္မဝိပါကာ သောမနဿသဟဂတာ ဉာဏသမ္ပယုတ္တာ။ပေ။ သောမနဿသဟဂတာ ဉာဏသမ္ပယုတ္တာ သသင်္ခါရေန။ပေ။ သောမနဿသဟဂတာ ဉာဏဝိပ္ပယုတ္တာ။ပေ။ သောမနဿသဟဂတာ ဉာဏဝိပ္ပယုတ္တာ သသင်္ခါရေန။ပေ။ ဥပေက္ခာသဟဂတာ ဉာဏသမ္ပယုတ္တာ။ပေ။ ဥပေက္ခာသဟဂတာ ဉာဏသမ္ပယုတ္တာ သသင်္ခါရေန။ပေ။ ဥပေက္ခာသဟဂတာ ဉာဏဝိပ္ပယုတ္တာ။ပေ။ ဥပေက္ခာသဟဂတာ ဉာဏဝိပ္ပယုတ္တာ သသင်္ခါရေန ရူပါရမ္မဏာ ဝါ။ပေ။ ဓမ္မာရမ္မဏာ ဝါ ယံ ယံ ဝါ ပနာရဗ္ဘ၊ တသ္မိံ သမယေ ဖဿော ဟောတိ။ပေ။ အဝိက္ခေပေါ ဟောတိ ။ပေ။ ဣမေ ဓမ္မာ အဗျာကတာ။ပေ။ အလောဘော အဗျာကတမူလံ။ပေ။ အဒေါသော အဗျာကတမူလံ။ပေ။ ဣမေ ဓမ္မာ အဗျာကတာ.

သဟေတုကာ ကာမာဝစရကိရိယာ.

ရူပါဝစရကိရိယာ

၅၇၇. ကတမေ ဓမ္မာ အဗျာကတာ? ယသ္မိံ သမယေ ရူပါဝစရံ ဈာနံ ဘာဝေတိ ကိရိယံ နေဝ ကုသလံ နာကုသလံ န စ ကမ္မဝိပါကံ ဒိဋ္ဌဓမ္မသုခဝိဟာရံ ဝိဝိစ္စေဝ ကာမေဟိ။ပေ။ ပဌမံ ဈာနံ ဥပသမ္ပဇ္ဇ ဝိဟရတိ ပထဝီကသိဏံ၊ တသ္မိံ သမယေ ဖဿော ဟောတိ။ပေ။ အဝိက္ခေပေါ ဟောတိ။ပေ။ ဣမေ ဓမ္မာ အဗျာကတာ.

၅၇၈. ကတမေ ဓမ္မာ အဗျာကတာ? ယသ္မိံ သမယေ ရူပါဝစရံ ဈာနံ ဘာဝေတိ ကိရိယံ နေဝ ကုသလံ နာကုသလံ န စ ကမ္မဝိပါကံ ဒိဋ္ဌဓမ္မသုခဝိဟာရံ ဝိတက္ကဝိစာရာနံ ဝူပသမာ။ပေ။ ဒုတိယံ ဈာနံ။ပေ။ တတိယံ ဈာနံ။ပေ။ စတုတ္ထံ ဈာနံ။ပေ။ ပဌမံ ဈာနံ။ပေ။ ပဉ္စမံ ဈာနံ ဥပသမ္ပဇ္ဇ ဝိဟရတိ ပထဝီကသိဏံ၊ တသ္မိံ သမယေ ဖဿော ဟောတိ။ပေ။ အဝိက္ခေပေါ ဟောတိ။ပေ။ ဣမေ ဓမ္မာ အဗျာကတာ.

ရူပါဝစရကိရိယာ.

အရူပါဝစရကိရိယာ

၅၇၉. ကတမေ ဓမ္မာ အဗျာကတာ? ယသ္မိံ သမယေ အရူပါဝစရံ ဈာနံ ဘာဝေတိ ကိရိယံ နေဝ ကုသလံ နာကုသလံ န စ ကမ္မဝိပါကံ ဒိဋ္ဌဓမ္မသုခဝိဟာရံ သဗ္ဗသော ရူပသညာနံ သမတိက္ကမာ ပဋိဃသညာနံ အတ္ထင်္ဂမာ နာနတ္တသညာနံ အမနသိကာရာ အာကာသာနဉ္စာယတနသညာသဟဂတံ သုခဿ စ ပဟာနာ။ပေ။ စတုတ္ထံ ဈာနံ ဥပသမ္ပဇ္ဇ ဝိဟရတိ တသ္မိံ သမယေ ဖဿော ဟောတိ။ပေ။ အဝိက္ခေပေါ ဟောတိ။ပေ။ ဣမေ ဓမ္မာ အဗျာကတာ.

၅၈၀. ကတမေ ဓမ္မာ အဗျာကတာ? ယသ္မိံ သမယေ အရူပါဝစရံ ဈာနံ ဘာဝေတိ ကိရိယံ နေဝ ကုသလံ နာကုသလံ န စ ကမ္မဝိပါကံ ဒိဋ္ဌဓမ္မသုခဝိဟာရံ သဗ္ဗသော အာကာသာနဉ္စာယတနံ သမတိက္ကမ္မ ဝိညာဏဉ္စာယတနသညာသဟဂတံ သုခဿ စ ပဟာနာ။ပေ။ စတုတ္ထံ ဈာနံ ဥပသမ္ပဇ္ဇ ဝိဟရတိ၊ တသ္မိံ သမယေ ဖဿော ဟောတိ။ပေ။ အဝိက္ခေပေါ ဟောတိ။ပေ။ ဣမေ ဓမ္မာ အဗျာကတာ.

၅၈၁. ကတမေ ဓမ္မာ အဗျာကတာ? ယသ္မိံ သမယေ အရူပါဝစရံ ဈာနံ ဘာဝေတိ ကိရိယံ နေဝ ကုသလံ နာကုသလံ န စ ကမ္မဝိပါကံ ဒိဋ္ဌဓမ္မသုခဝိဟာရံ သဗ္ဗသော ဝိညာဏဉ္စာယတနံ သမတိက္ကမ္မ အာကိဉ္စညာယတနသညာသဟဂတံ သုခဿ စ ပဟာနာ။ပေ။ စတုတ္ထံ ဈာနံ ဥပသမ္ပဇ္ဇ ဝိဟရတိ၊ တသ္မိံ သမယေ ဖဿော ဟောတိ။ပေ။ အဝိက္ခေပေါ ဟောတိ။ပေ။ ဣမေ ဓမ္မာ အဗျာကတာ.

၅၈၂. ကတမေ ဓမ္မာ အဗျာကတာ? ယသ္မိံ သမယေ အရူပါဝစရံ ဈာနံ ဘာဝေတိ ကိရိယံ နေဝ ကုသလံ နာကုသလံ န စ ကမ္မဝိပါကံ ဒိဋ္ဌဓမ္မသုခဝိဟာရံ သဗ္ဗသော အာကိဉ္စညာယတနံ သမတိက္ကမ္မ နေဝသညာနာသညာယတနသညာသဟဂတံ သုခဿ စ ပဟာနာ။ပေ။ စတုတ္ထံ ဈာနံ ဥပသမ္ပဇ္ဇ ဝိဟရတိ၊ တသ္မိံ သမယေ ဖဿော ဟောတိ။ပေ။ အဝိက္ခေပေါ ဟောတိ။ပေ။ ဣမေ ဓမ္မာ အဗျာကတာ။ပေ။ အလောဘော အဗျာကတမူလံ။ပေ။ အဒေါသော အဗျာကတမူလံ။ပေ။ အမောဟော အဗျာကတမူလံ။ပေ။ ဣမေ ဓမ္မာ အဗျာကတာ.

အရူပါဝစရကိရိယာ.

ကိရိယာ အဗျာကတာ.

စိတ္တုပ္ပါဒကဏ္ဍံ နိဋ္ဌိတံ.