၆. ဒုကံ

၂၇၇. ဟေတူ ဓမ္မာ။ ဟေတူ စေဝ သဟေတုကာ စ ဓမ္မာ။ ဟေတူ စေဝ ဟေတုသမ္ပယုတ္တာ စ ဓမ္မာ တီဟိ ခန္ဓေဟိ ဧကေနာယတနေန ဧကာယ ဓာတုယာ သမ္ပယုတ္တာ၊ ဧကေန ခန္ဓေန ဧကေနာယတနေန ဧကာယ ဓာတုယာ ကေဟိစိ သမ္ပယုတ္တာ. ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ.

၂၇၈. သဟေတုကာ ဓမ္မာ။ ဟေတုသမ္ပယုတ္တာ ဓမ္မာ။ပေ။ သမ္ပယုတ္တာတိ? နတ္ထိ. ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ.

၂၇၉. သဟေတုကာ စေဝ န စ ဟေတူ ဓမ္မာ။ ဟေတုသမ္ပယုတ္တာ စေဝ န စ ဟေတူ ဓမ္မာ။ န ဟေတုသဟေတုကာ ဓမ္မာ ဧကေန ခန္ဓေန ဧကေနာယတနေန ဧကာယ ဓာတုယာ ကေဟိစိ သမ္ပယုတ္တာ. ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ.

၂၈၀. အပ္ပစ္စယာ ဓမ္မာ။ အသင်္ခတာ ဓမ္မာ။ သနိဒဿနာ ဓမ္မာ။ သပ္ပဋိဃာ ဓမ္မာ။ ရူပိနော ဓမ္မာ။ပေ။ သမ္ပယုတ္တာတိ? နတ္ထိ. ကတိဟိ ဝိပ္ပယုတ္တာ? စတူဟိ ခန္ဓေဟိ ဧကေနာယတနေန သတ္တဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ.

၂၈၁. လောကုတ္တရာ ဓမ္မာ။ပေ။ သမ္ပယုတ္တာတိ? နတ္ထိ. ကတိဟိ ဝိပ္ပယုတ္တာ? န ကေဟိစိ ခန္ဓေဟိ န ကေဟိစိ အာယတနေဟိ ဆဟိ ဓာတူဟိ ဝိပ္ပယုတ္တာ.

၂၈၂. အာသဝါ ဓမ္မာ။ အာသဝါ စေဝ သာသဝါ စ ဓမ္မာ။ အာသဝါ စေဝ အာသဝသမ္ပယုတ္တာ စ ဓမ္မာ တီဟိ ခန္ဓေဟိ ဧကေနာယတနေန ဧကာယ ဓာတုယာ သမ္ပယုတ္တာ၊ ဧကေန ခန္ဓေန ဧကေနာယတနေန ဧကာယ ဓာတုယာ ကေဟိစိ သမ္ပယုတ္တာ. ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ.

၂၈၃. အနာသဝါ ဓမ္မာ။ အာသဝဝိပ္ပယုတ္တာ အနာသဝါ ဓမ္မာ။ပေ။ သမ္ပယုတ္တာတိ? နတ္ထိ. ကတိဟိ ဝိပ္ပယုတ္တာ? န ကေဟိစိ ခန္ဓေဟိ န ကေဟိစိ အာယတနေဟိ ဆဟိ ဓာတူဟိ ဝိပ္ပယုတ္တာ.

၂၈၄. အာသဝသမ္ပယုတ္တာ ဓမ္မာ။ပေ။ သမ္ပယုတ္တာတိ? နတ္ထိ. ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ.

၂၈၅. အာသဝသမ္ပယုတ္တာ စေဝ နော စ အာသဝါ ဓမ္မာ ဧကေန ခန္ဓေန ဧကေနာယတနေန ဧကာယ ဓာတုယာ ကေဟိစိ သမ္ပယုတ္တာ. ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ.

၂၈၆. သံယောဇနာ ဓမ္မာ။ ဂန္ထာ ဓမ္မာ။ ဩဃာ ဓမ္မာ။ ယောဂါ ဓမ္မာ။ နီဝရဏာ ဓမ္မာ။ ပရာမာသာ ဓမ္မာ။ ပရာမာသာ စေဝ ပရာမဋ္ဌာ စ ဓမ္မာ တီဟိ ခန္ဓေဟိ ဧကေနာယတနေန ဧကာယ ဓာတုယာ သမ္ပယုတ္တာ၊ ဧကေန ခန္ဓေန ဧကေနာယတနေန ဧကာယ ဓာတုယာ ကေဟိစိ သမ္ပယုတ္တာ. ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ.

၂၈၇. အပရာမဋ္ဌာ ဓမ္မာ။ ပရာမာသဝိပ္ပယုတ္တာ အပရာမဋ္ဌာ ဓမ္မာ သမ္ပယုတ္တာတိ? နတ္ထိ. ကတိဟိ ဝိပ္ပယုတ္တာ? န ကေဟိစိ ခန္ဓေဟိ န ကေဟိစိ အာယတနေဟိ ဆဟိ ဓာတူဟိ ဝိပ္ပယုတ္တာ.

၂၈၈. ပရာမာသသမ္ပယုတ္တာ ဓမ္မာ ဧကေန ခန္ဓေန ဧကေနာယတနေန ဧကာယ ဓာတုယာ ကေဟိစိ သမ္ပယုတ္တာ. ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ.

၂၈၉. သာရမ္မဏာ ဓမ္မာ။ပေ။ သမ္ပယုတ္တာတိ? နတ္ထိ. ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ ဒသဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ.

၂၉၀. အနာရမ္မဏာ ဓမ္မာ။ စိတ္တဝိပ္ပယုတ္တာ ဓမ္မာ။ စိတ္တဝိသံသဋ္ဌာ ဓမ္မာ။ ဥပါဒါ ဓမ္မာ။ပေ။ သမ္ပယုတ္တာတိ? နတ္ထိ. ကတိဟိ ဝိပ္ပယုတ္တာ? စတူဟိ ခန္ဓေဟိ ဧကေနာယတနေန သတ္တဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ.

၂၉၁. စိတ္တာ ဓမ္မာ တီဟိ ခန္ဓေဟိ သမ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ သမ္ပယုတ္တာ. ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ ဒသဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ.

၂၉၂. စေတသိကာ ဓမ္မာ။ စိတ္တသမ္ပယုတ္တာ ဓမ္မာ။ စိတ္တသံသဋ္ဌာ ဓမ္မာ။ စိတ္တသံသဋ္ဌသမုဋ္ဌာနာ ဓမ္မာ။ စိတ္တသံသဋ္ဌသမုဋ္ဌာနသဟဘုနော ဓမ္မာ။ စိတ္တသံသဋ္ဌသမုဋ္ဌာနာနုပရိဝတ္တိနော ဓမ္မာ ဧကေန ခန္ဓေန ဧကေနာယတနေန သတ္တဟိ ဓာတူဟိ သမ္ပယုတ္တာ. ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ ဒသဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ.

၂၉၃. အနုပါဒိန္နာ ဓမ္မာ။ပေ။ သမ္ပယုတ္တာတိ? နတ္ထိ. ကတိဟိ ဝိပ္ပယုတ္တာ? န ကေဟိစိ ခန္ဓေဟိ န ကေဟိစိ အာယတနေဟိ ပဉ္စဟိ ဓာတူဟိ ဝိပ္ပယုတ္တာ.

၂၉၄. ဥပါဒါနာ ဓမ္မာ။ ကိလေသာ ဓမ္မာ။ ကိလေသာ စေဝ သံကိလေသိကာ စ ဓမ္မာ။ ကိလေသာ စေဝ သံကိလိဋ္ဌာ စ ဓမ္မာ။ ကိလေသာ စေဝ ကိလေသသမ္ပယုတ္တာ စ ဓမ္မာ တီဟိ ခန္ဓေဟိ ဧကေနာယတနေန ဧကာယ ဓာတုယာ သမ္ပယုတ္တာ၊ ဧကေန ခန္ဓေန ဧကေနာယတနေန ဧကာယ ဓာတုယာ ကေဟိစိ သမ္ပယုတ္တာ. ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ.

၂၉၅. အသံကိလေသိကာ ဓမ္မာ။ ကိလေသဝိပ္ပယုတ္တာ အသံကိလေသိကာ ဓမ္မာ။ပေ။ သမ္ပယုတ္တာတိ? နတ္ထိ. ကတိဟိ ဝိပ္ပယုတ္တာ? န ကေဟိစိ ခန္ဓေဟိ န ကေဟိစိ အာယတနေဟိ ဆဟိ ဓာတူဟိ ဝိပ္ပယုတ္တာ.

၂၉၆. သံကိလိဋ္ဌာ ဓမ္မာ။ ကိလေသသမ္ပယုတ္တာ ဓမ္မာ။ပေ။ သမ္ပယုတ္တာတိ? နတ္ထိ. ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ.

၂၉၇. သံကိလိဋ္ဌာ စေဝ နော စ ကိလေသာ ဓမ္မာ။ ကိလေသသမ္ပယုတ္တာ စေဝ နော စ ကိလေသာ ဓမ္မာ ဧကေန ခန္ဓေန ဧကေနာယတနေန ဧကာယ ဓာတုယာ ကေဟိစိ သမ္ပယုတ္တာ. ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ.

၂၉၈. ဒဿနေန ပဟာတဗ္ဗာ ဓမ္မာ။ ဘာဝနာယ ပဟာတဗ္ဗာ ဓမ္မာ။ ဒဿနေန ပဟာတဗ္ဗဟေတုကာ ဓမ္မာ။ ဘာဝနာယ ပဟာတဗ္ဗဟေတုကာ ဓမ္မာ။ သမ္ပယုတ္တာတိ? နတ္ထိ. ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ.

၂၉၉. သဝိတက္ကာ ဓမ္မာ။ သဝိစာရာ ဓမ္မာ ဧကေန ခန္ဓေန ဧကေနာယတနေန ဧကာယ ဓာတုယာ ကေဟိစိ သမ္ပယုတ္တာ. ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ ပန္နရသဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ.

၃၀၀. အဝိတက္ကာ ဓမ္မာ။ အဝိစာရာ ဓမ္မာ။ပေ။ သမ္ပယုတ္တာတိ? နတ္ထိ. ကတိဟိ ဝိပ္ပယုတ္တာ? န ကေဟိစိ ခန္ဓေဟိ န ကေဟိစိ အာယတနေဟိ ဧကာယ ဓာတုယာ ဝိပ္ပယုတ္တာ.

၃၀၁. သပ္ပီတိကာ ဓမ္မာ။ ပီတိသဟဂတာ ဓမ္မာ ဧကေန ခန္ဓေန ဧကေနာယတနေန ဧကာယ ဓာတုယာ ကေဟိစိ သမ္ပယုတ္တာ. ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ.

၃၀၂. သုခသဟဂတာ ဓမ္မာ ဧကေန ခန္ဓေန သမ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ သမ္ပယုတ္တာ. ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ ပန္နရသဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ.

၃၀၃. ဥပေက္ခာသဟဂတာ ဓမ္မာ ဧကေန ခန္ဓေန သမ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ သမ္ပယုတ္တာ. ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ ဧကာဒသဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ.

၃၀၄. န ကာမာဝစရာ ဓမ္မာ။ အပရိယာပန္နာ ဓမ္မာ။ အနုတ္တရာ ဓမ္မာ။ပေ။ သမ္ပယုတ္တာတိ? နတ္ထိ. ကတိဟိ ဝိပ္ပယုတ္တာ? န ကေဟိစိ ခန္ဓေဟိ န ကေဟိစိ အာယတနေဟိ ဆဟိ ဓာတူဟိ ဝိပ္ပယုတ္တာ.

၃၀၅. ရူပါဝစရာ ဓမ္မာ။ အရူပါဝစရာ ဓမ္မာ။ နိယျာနိကာ ဓမ္မာ။ နိယတာ ဓမ္မာ။ သရဏာ ဓမ္မာ ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ သမ္ပယုတ္တာတိ? နတ္ထိ. ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ.

ဓမ္မာယတနံ ဓမ္မဓာတု၊ ဒုက္ခသစ္စဉ္စ ဇီဝိတံ၊

သဠာယတနံ နာမရူပံ၊ စတ္တာရော စ မဟာဘဝါ.

ဇာတိ ဇရာ စ မရဏံ၊ တိကေသွေကူနဝီသတိ၊

ဂေါစ္ဆကေသု စ ပညာသ၊ အဋ္ဌ စူဠန္တရေ ပဒါ.

မဟန္တရေ ပန္နရသ၊ အဋ္ဌာရသ တတော ပရေ၊

တေဝီသ ပဒသတံ ဧတံ၊ သမ္ပယောဂေ န လဗ္ဘတီတိ.

သမ္ပယောဂဝိပ္ပယောဂပဒနိဒ္ဒေသော ဆဋ္ဌော.