၇. သတ္တမနယော

၇. သမ္ပယုတ္တေနဝိပ္ပယုတ္တပဒနိဒ္ဒေသော

၃၀၆. ဝေဒနာက္ခန္ဓေန ယေ ဓမ္မာ။ သညာက္ခန္ဓေန ယေ ဓမ္မာ။ သင်္ခါရက္ခန္ဓေန ယေ ဓမ္မာ။ ဝိညာဏက္ခန္ဓေန ယေ ဓမ္မာ။ မနာယတနေန ယေ ဓမ္မာ သမ္ပယုတ္တာ၊ တေဟိ ဓမ္မေဟိ ယေ ဓမ္မာ ဝိပ္ပယုတ္တာ၊ တေ ဓမ္မာ ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ ဝိပ္ပယုတ္တာ? တေ ဓမ္မာ စတူဟိ ခန္ဓေဟိ ဧကေနာယတနေန သတ္တဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ.

၃၀၇. စက္ခုဝိညာဏဓာတုယာ ယေ ဓမ္မာ။ပေ။ မနောဓာတုယာ ယေ ဓမ္မာ။ မနောဝိညာဏဓာတုယာ ယေ ဓမ္မာ သမ္ပယုတ္တာ၊ တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ န ကေဟိစိ ခန္ဓေဟိ န ကေဟိစိ အာယတနေဟိ ဧကာယ ဓာတုယာ ဝိပ္ပယုတ္တာ.

၃၀၈. မနိန္ဒြိယေန ယေ ဓမ္မာ သမ္ပယုတ္တာ၊ တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ စတူဟိ ခန္ဓေဟိ ဧကေနာယတနေန သတ္တဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ.

၃၀၉. ဥပေက္ခိန္ဒြိယေန ယေ ဓမ္မာ သမ္ပယုတ္တာ၊ တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ န ကေဟိစိ ခန္ဓေဟိ န ကေဟိစိ အာယတနေဟိ ပဉ္စဟိ ဓာတူဟိ ဝိပ္ပယုတ္တာ.

၃၁၀. သင်္ခါရပစ္စယာ ဝိညာဏေန ယေ ဓမ္မာ။ သဠာယတနပစ္စယာ ဖဿေန ယေ ဓမ္မာ။ ဖဿပစ္စယာ ဝေဒနာယ ယေ ဓမ္မာ။ ဖဿေန ယေ ဓမ္မာ။ ဝေဒနာယ ယေ ဓမ္မာ။ သညာယ ယေ ဓမ္မာ။ စေတနာယ ယေ ဓမ္မာ။ စိတ္တေန ယေ ဓမ္မာ။ မနသိကာရေန ယေ ဓမ္မာ သမ္ပယုတ္တာ၊ တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ စတူဟိ ခန္ဓေဟိ ဧကေနာယတနေန သတ္တဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ.

၃၁၁. အဓိမောက္ခေန ယေ ဓမ္မာ သမ္ပယုတ္တာ၊ တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ န ကေဟိစိ ခန္ဓေဟိ န ကေဟိစိ အာယတနေဟိ ဧကာယ ဓာတုယာ ဝိပ္ပယုတ္တာ.

၃၁၂. အဒုက္ခမသုခါယ ဝေဒနာယ သမ္ပယုတ္တေဟိ ဓမ္မေဟိ ယေ ဓမ္မာ။ ဥပေက္ခာသဟဂတေဟိ ဓမ္မေဟိ ယေ ဓမ္မာ သမ္ပယုတ္တာ၊ တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ န ကေဟိစိ ခန္ဓေဟိ န ကေဟိစိ အာယတနေဟိ ပဉ္စဟိ ဓာတူဟိ ဝိပ္ပယုတ္တာ.

၃၁၃. သဝိတက္ကသဝိစာရေဟိ ဓမ္မေဟိ ယေ ဓမ္မာ သမ္ပယုတ္တာ၊ တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ န ကေဟိစိ ခန္ဓေဟိ န ကေဟိစိ အာယတနေဟိ ဧကာယ ဓာတုယာ ဝိပ္ပယုတ္တာ.

၃၁၄. စိတ္တေဟိ ဓမ္မေဟိ ယေ ဓမ္မာ။ စေတသိကေဟိ ဓမ္မေဟိ ယေ ဓမ္မာ။ စိတ္တသမ္ပယုတ္တေဟိ ဓမ္မေဟိ ယေ ဓမ္မာ ။ စိတ္တသံသဋ္ဌေဟိ ဓမ္မေဟိ ယေ ဓမ္မာ။ စိတ္တသံသဋ္ဌသမုဋ္ဌာနေဟိ ဓမ္မေဟိ ယေ ဓမ္မာ။ စိတ္တသံသဋ္ဌသမုဋ္ဌာနသဟဘူဟိ ဓမ္မေဟိ ယေ ဓမ္မာ။ စိတ္တသံသဋ္ဌသမုဋ္ဌာနာနုပရိဝတ္တီဟိ ဓမ္မေဟိ ယေ ဓမ္မာ သမ္ပယုတ္တာ၊ တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ စတူဟိ ခန္ဓေဟိ ဧကေနာယတနေန သတ္တဟိ ဓာတူဟိ ဝိပ္ပယုတ္တာ၊ ဧကေနာယတနေန ဧကာယ ဓာတုယာ ကေဟိစိ ဝိပ္ပယုတ္တာ.

၃၁၅. သဝိတက္ကေဟိ ဓမ္မေဟိ ယေ ဓမ္မာ။ သဝိစာရေဟိ ဓမ္မေဟိ ယေ ဓမ္မာ သမ္ပယုတ္တာ၊ တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ န ကေဟိစိ ခန္ဓေဟိ န ကေဟိစိ အာယတနေဟိ ဧကာယ ဓာတုယာ ဝိပ္ပယုတ္တာ.

၃၁၆. ဥပေက္ခာသဟဂတေဟိ ဓမ္မေဟိ ယေ ဓမ္မာ သမ္ပယုတ္တာ၊ တေဟိ ဓမ္မေဟိ ယေ ဓမ္မာ ဝိပ္ပယုတ္တာ၊ တေ ဓမ္မာ ကတိဟိ ခန္ဓေဟိ ကတိဟာယတနေဟိ ကတိဟိ ဓာတူဟိ ဝိပ္ပယုတ္တာ? တေ ဓမ္မာ န ကေဟိစိ ခန္ဓေဟိ န ကေဟိစိ အာယတနေဟိ ပဉ္စဟိ ဓာတူဟိ ဝိပ္ပယုတ္တာ.

ခန္ဓာ စတုရော အာယတနဉ္စ မေကံ၊

ဓာတူသု သတ္တ ဒွေပိ စ ဣန္ဒြိယတော.

တယော ပဋိစ္စ တထရိဝ ဖဿပဉ္စမာ၊

အဓိမုစ္စနာ မနသိ တိကေသု တီဏိ.

သတ္တန္တရာ ဒွေ စ မနေန ယုတ္တာ၊

ဝိတက္ကဝိစာရဏာ ဥပေက္ခကာယ စာတိ.

သမ္ပယုတ္တေနဝိပ္ပယုတ္တပဒနိဒ္ဒေသော သတ္တမော.