၂. သစ္စာဒိ

၄၆၀. ဒုက္ခသစ္စေန ယေ ဓမ္မာ ဝိပ္ပယုတ္တာ။ တေ ဓမ္မာ စတူဟိ ခန္ဓေဟိ ဒွီဟာယတနေဟိ ဒွီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ သောဠသဟိ ဓာတူဟိ အသင်္ဂဟိတာ.

၄၆၁. သမုဒယသစ္စေန ယေ ဓမ္မာ။ မဂ္ဂသစ္စေန ယေ ဓမ္မာ ဝိပ္ပယုတ္တာ။ တေ ဓမ္မာ အသင်္ခတံ ခန္ဓတော ဌပေတွာ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

၄၆၂. နိရောဓသစ္စေန ယေ ဓမ္မာ။ စက္ခုန္ဒြိယေန ယေ ဓမ္မာ ။ ကာယိန္ဒြိယေန ယေ ဓမ္မာ။ ဣတ္ထိန္ဒြိယေန ယေ ဓမ္မာ။ ပုရိသိန္ဒြိယေန ယေ ဓမ္မာ ဝိပ္ပယုတ္တာ။ တေ ဓမ္မာ စတူဟိ ခန္ဓေဟိ ဒွီဟာယတနေဟိ အဋ္ဌဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ ဒသဟိ ဓာတူဟိ အသင်္ဂဟိတာ.

၄၆၃. သုခိန္ဒြိယေန ယေ ဓမ္မာ။ ဒုက္ခိန္ဒြိယေန ယေ ဓမ္မာ။ သောမနဿိန္ဒြိယေန ယေ ဓမ္မာ။ ဒေါမနဿိန္ဒြိယေန ယေ ဓမ္မာ ဝိပ္ပယုတ္တာ။ တေ ဓမ္မာ အသင်္ခတံ ခန္ဓတော ဌပေတွာ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

၄၆၄. ဥပေက္ခိန္ဒြိယေန ယေ ဓမ္မာ ဝိပ္ပယုတ္တာ။ တေ ဓမ္မာ အသင်္ခတံ ခန္ဓတော ဌပေတွာ ပဉ္စဟိ ခန္ဓေဟိ ဒွါဒသဟာယတနေဟိ တေရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ ပဉ္စဟိ ဓာတူဟိ အသင်္ဂဟိတာ.

၄၆၅. သဒ္ဓိန္ဒြိယေန ယေ ဓမ္မာ။ ဝီရိယိန္ဒြိယေန ယေ ဓမ္မာ။ သတိန္ဒြိယေန ယေ ဓမ္မာ။ သမာဓိန္ဒြိယေန ယေ ဓမ္မာ။ ပညိန္ဒြိယေန ယေ ဓမ္မာ။ အနညာတညဿာမီတိန္ဒြိယေန ယေ ဓမ္မာ။ အညိန္ဒြိယေန ယေ ဓမ္မာ။ အညာတာဝိန္ဒြိယေန ယေ ဓမ္မာ။ အဝိဇ္ဇာယ ယေ ဓမ္မာ။ အဝိဇ္ဇာပစ္စယာ သင်္ခါရေဟိ ယေ ဓမ္မာ ဝိပ္ပယုတ္တာ။ တေ ဓမ္မာ အသင်္ခတံ ခန္ဓတော ဌပေတွာ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

၄၆၆. သင်္ခါရပစ္စယာ ဝိညာဏေန ယေ ဓမ္မာ။ သဠာယတနပစ္စယာ ဖဿေန ယေ ဓမ္မာ။ ဖဿပစ္စယာ ဝေဒနာယ ယေ ဓမ္မာ ဝိပ္ပယုတ္တာ။ တေ ဓမ္မာ အသင်္ခတံ ခန္ဓတော ဌပေတွာ ဧကေန ခန္ဓေန ဧကာဒသဟာယတနေဟိ ဧကာဒသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? စတူဟိ ခန္ဓေဟိ ဧကေနာယတနေန သတ္တဟိ ဓာတူဟိ အသင်္ဂဟိတာ.

၄၆၇. ဝေဒနာပစ္စယာ တဏှာယ ယေ ဓမ္မာ။ တဏှာပစ္စယာ ဥပါဒါနေန ယေ ဓမ္မာ။ ကမ္မဘဝေန ယေ ဓမ္မာ ဝိပ္ပယုတ္တာ။ တေ ဓမ္မာ အသင်္ခတံ ခန္ဓတော ဌပေတွာ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.

၄၆၈. ဥပပတ္တိဘဝေန ယေ ဓမ္မာ။ သညာဘဝေန ယေ ဓမ္မာ။ ပဉ္စဝေါကာရဘဝေန ယေ ဓမ္မာ ဝိပ္ပယုတ္တာ။ တေ ဓမ္မာ စတူဟိ ခန္ဓေဟိ ဒွီဟာယတနေဟိ တီဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ ပန္နရသဟိ ဓာတူဟိ အသင်္ဂဟိတာ.

၄၆၉. ကာမဘဝေန ယေ ဓမ္မာ ဝိပ္ပယုတ္တာ။ တေ ဓမ္မာ စတူဟိ ခန္ဓေဟိ ဒွီဟာယတနေဟိ ပဉ္စဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ တေရသဟိ ဓာတူဟိ အသင်္ဂဟိတာ.

၄၇၀. ရူပဘဝေန ယေ ဓမ္မာ။ အသညာဘဝေန ယေ ဓမ္မာ။ ဧကဝေါကာရဘဝေန ယေ ဓမ္မာ။ ပရိဒေဝေန ယေ ဓမ္မာ ဝိပ္ပယုတ္တာ။ တေ ဓမ္မာ စတူဟိ ခန္ဓေဟိ ဒွီဟာယတနေဟိ အဋ္ဌဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? ဧကေန ခန္ဓေန ဒသဟာယတနေဟိ ဒသဟိ ဓာတူဟိ အသင်္ဂဟိတာ.

၄၇၁. အရူပဘဝေန ယေ ဓမ္မာ။ နေဝသညာနာသညာဘဝေန ယေ ဓမ္မာ။ စတုဝေါကာရဘဝေန ယေ ဓမ္မာ။ သောကေန ယေ ဓမ္မာ။ ဒုက္ခေန ယေ ဓမ္မာ။ ဒေါမနဿေန ယေ ဓမ္မာ။ ဥပါယာသေန ယေ ဓမ္မာ။ သတိပဋ္ဌာနေန ယေ ဓမ္မာ။ သမ္မပ္ပဓာနေန ယေ ဓမ္မာ။ ဣဒ္ဓိပါဒေန ယေ ဓမ္မာ။ ဈာနေန ယေ ဓမ္မာ။ အပ္ပမညာယ ယေ ဓမ္မာ။ ပဉ္စဟိ ဣန္ဒြိယေဟိ ယေ ဓမ္မာ။ ပဉ္စဟိ ဗလေဟိ ယေ ဓမ္မာ ။ သတ္တဟိ ဗောဇ္ဈင်္ဂေဟိ ယေ ဓမ္မာ။ အရိယေန အဋ္ဌင်္ဂိကေန မဂ္ဂေန ယေ ဓမ္မာ ဝိပ္ပယုတ္တာ။ တေ ဓမ္မာ အသင်္ခတံ ခန္ဓတော ဌပေတွာ ပဉ္စဟိ ခန္ဓေဟိ ဒွါဒသဟာယတနေဟိ အဋ္ဌာရသဟိ ဓာတူဟိ သင်္ဂဟိတာ. ကတိဟိ အသင်္ဂဟိတာ? န ကေဟိစိ ခန္ဓေဟိ န ကေဟိစိ အာယတနေဟိ န ကာဟိစိ ဓာတူဟိ အသင်္ဂဟိတာ.